MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Il-Gvern Daniż ilu jipprepara biex f’Settembru jew f’Ottubru jorganizza referendum dwar jekk id-Danimarka ddaħħalx il-munita Ewro flok il-Kroner Daniż.

F’daqqa waħda l-Gvern Daniż abbanduna l-pjani għar-referendum, wara li l-istħarriġ tal-opinjoni pubblika beda juri li jekk isir referendum, il-maġġoranza tal-poplu Daniż kieneet se tivvota LE.

Din hija prova oħra kemm l-appostli tal-UE jibżgħu jilagħbu jekk jaħsbu li se jitilfu. 

Għalihom rebħa biss lesti jaċċettaw. 

Allura biex il-Gvern Daniż ma jiġrilux bħal ma ġralu l-Gvern Irlandiż, ipprefera li l-logħba ma jilgħabhiex ħalli taparsi jidher li ma tilifx.

Araw x’qalu politiċi ewlenin tal-UE dwar il-LE tal-Irlandiżi.

•Nicolas Sarkozy, President Franċiż, fl-20 ta’ Ġunju: 

“Dawn iċ-ĊWIEĊ Irlandiżi ilhom jiffangaw bi flus l-Ewropa għal ħafna snin u issa ramewna fil-ħmieġ”.
 

•Valery Giscard d’Estaing, l-awtur tal-Kostituzzjoni tal-UE, fid-19 ta’ Ġunju: 

“It-Trattat ta’ Lisbona ma mietx.

Hemm bżonn kbir li jerġgħu jivvotaw”.

•Wolfgang Schaeuble, Ministru tal-Intern Ġermaniż, fil-15 ta’ Ġunju: 

“Veru li rridu nieħdu r-referendum ta’ l-Irlanda bis-serjetà.

Iżda ftit miljuni ta’ Irlandiżi m’għandhomx jiddeċiedu għal 495 miljuni Ewropej”.
 

•Josè Barroso, il-President tal-Kummissjoni Ewropea, fl-14 ta’ Ġunju: 

“It-Trattat mux mejjet.

It-Trattat għadu ħaj u rridu naraw kif se nsibu soluzzjoni”.

 

•Lopez Garrido, Ministru tal-Ewropa, Spanjol, fil-15 ta’ Ġunju: 

“It-Trattat se jidħol fis-seħħ, għalkemm xi ftit xhur tard”.

 

Vera wiċċhom imċappas bil-ħamrija (la ma tistax tintuża l-kelma l-oħra li tixraqilhom)!

Tajjeb li ninnutaw...

Malta ssieħbet fl-Unjoni Ewropea skond ftehim li ġie ffirmat f’Ateni f’April tal-2003. 

Malta ma tistax tbiddel xejn qatt mill-kundizzjonijiet ta’ dak il-ftehim.

Iżda l-Unjoni Ewropea tista’ meta trid tbiddel ir-regoli tagħha u Malta jkollha toqgħod għar-regoli ġodda ta’ l-Unjoni.

L-Unjoni biddlet ir-regoli tagħha fit-Trattat dwar il-Kostituzzjoni, li spiċċa ma daħalx fis-seħħ għax il-Franċiżi u l-Olandiżi ma aċċettawhx. 

L-Unjoni reġgħet biddlet ir-regoli tagħha fit-Trattat ta’ Lisbona, li l-Irlandiżi vvotaw kontrih.

Iżda li kien għall-Unjoni, Malta kien ikollha toqgħod għar-regoli mibdula kemm tal-Kostituzzjoni, kif ukoll tat-Trattat ta’ Lisbona.

L-Unjoni għandha dritt tbiddel ir-regoli, iżda Malta m’għandhiex dritt tbiddel xejn mill-kundizzjonijiet tas-sħubija.

Kapaċi jmexxi lill-pajjiż?

Il-Gvern stqarr li mhux kapaċi jmexxi azjendi kummerċjali tajjeb daqskemm imexxuhom il-privat.

It-tmexxija tal-pajjiż hija wisq akbar mit-tmexxija ta’ azjenda kummerċjali. 

It-tmexxija ta’ azjenda kummerċjali hija anqas diffiċli mit-tmexxija tal-pajjiż.

Jekk il-Gvern mhux kapaċi jmexxi tajjeb azjenda kummerċjali, kif huwa kapaċi jmexxi l-pajjiż?

Seba’ snin ilu l-esperti ta’ l-Unjoni Ewropea u tal-Gvern qalu li t-Tarzna ta’ Malta tkun vijabbli jekk ikollha mhux aktar minn 1,400 ħaddiema produttivi.

Fiż-żminijiet tal-lum hawn “boom” fit-tiswija tal-vapuri u s-superyachts. 

Illum iżda l-Gvern u l-Unjoni Ewropea qegħdin jgħidu li biex it-Tarzna tkun vijabbli, irid ikollha bejn 400 u 700 biss ħaddiema.

Kienu żgurawna li bis-sħubija fl-Unjoni Ewropea l-prezzijiet jorħsu għax jitneħħew il-“levies” minn fuqhom.

Wara li pajjiżna ssieħeb fl-Unjoni, il-prezzijiet dejjem komplew jogħlew. 

Biss biss ħafna prodotti żdiedu bi 18% taxxa VAT.

Illum, il-ħajja qatt ma kienet għolja daqshekk.

Anki l-pagi għolew, iżda mhux daqskemm għolew il-prezzijiet.

Għalhekk morna lura mhux ‘il quddiem.

Qabel ir-referendum 

* żguraw lill-ħaddiema li mhux se jitilfu l-impjieg, 

* lill-kaċċaturi li se jgawdu l-kaċċa fir-rebbiegħa, 

* lin-nassaba li se jkomplu bin-namra ta’ l-insib, u 

* lis-sidien tat-trasport li mhux se jonqsilhom id-dħul.

Fl-erba’ snin li pajjiżna ilu fl-Unjoni Ewropea, 

* eluf ta’ ħaddiema tilfu l-impjieg tagħhom, 

* il-kaċċaturi neħħewlhom il-kaċċa fir-rebbiegħa, 

* in-nassaba jafu li l-insib se jinqered u 

* s-sidien tat-trasport se jonqsilhom id-dħul għax se jiżdiedu l-liċenzji.

Dan hu l-frott qares ta’ l-UE.

Żgurawna wkoll li fl-Unjoni Ewropea jkollna serħan il-moħħ. 

L-aktar uġiegħ ta’ ras għal ħafna ġenituri hija l-invażjoni ta’ l-eluf ta’ immigranti illegali li l-Unjoni mhu qiegħda tagħmel xejn biex tilqa’ għaliha. 

Anzi l-Unjoni qiegħda tagħmel bil-maqlub.

L-Unjoni qiegħda tħeġġiġna 

* nilqgħuhom, 

* nagħtuhom ix-xogħol, u 

* nħallu lil qrabathom jingħaqdu magħhom f’pajjiżna.

B’hekk pajjiżna, li huwa l-iżgħar fl-Unjoni Ewropea, iżda li għandu l-aktar nies paragunat mad-daqs tiegħu, ikompli jaqta’ ‘l quddiem bħala l-pajjiż l-aktar iffullat fl-Unjoni Ewropea.

Dan qed jikkaġuna wġiegħ ta’ ras lil ħafna ġenituri.

Ftit tal-ġimgħat ilu l-banek għollew ir-rati ta’ l-imgħax fuq is-self li jagħmlu. 

B’hekk, kull min issellef biex jixtri daru, ikollu jħallas iktar imgħax. 

In-negozjant li ssellef għan-negozju, għandu spiża akbar fl-imgħax li jħallas, li jrid iġibha minn żieda fil-prezzijiet li jħallsu l-klijenti tiegħu. 

U dan ikompli jgħolli l-ħajja għal ħafna.

Għaliex il-banek għollew ir-rati ta’ l-imgħax fuq is-self? 

Mhux għax il-qagħda ekonomika tal-pajjiż teħtieġ dan, iżda għax kienu mġegħla jagħmlu dan mill-Bank Ċentrali ta’ l-Unjoni Ewropea li ddeċieda li jgħolli r-rata fuq is-self, mingajr ma jimpurtah x’impatt dan se jkollu ekonomiku u soċjali fuq iċ-ċittadini ta’ pajjiżna.

Din hija konsegwenza tad-dħul tal-munita ewro f’pajjiżna.

minn Eddy Privitera

Il-Qorti tal-Ġustizzja ta’l-Unjoni Ewropea dan l-aħħar iddeċidiet li l-liġi tal-Lussemburgu li tipproteġi ħaddiema barraninn milli jiġu sfruttati billi jagħtuhom paga aktar baxxa minn dawk tal-ħaddiema Lussemburgiżi, qiegħda tfixkel id-dritt tal-kampaniji li jimpjegaw dawn il-barranin, milli jagħmlu l-aktr profitt possibbli. 

Il-Qorti qatgħet, għalhekk, li l-Lussemburgu għandu jneħħi din il-liġi.

Din id-deċiżjoni ngħatat f’każ imressaq ill-Kummissjoni Ewropea kontra l-Lussemburgu, li fih il-Kummissjoni ilmentat li l-Gvern ta’ dak il-pajjiż membru naqas milli jimplimenta d-Direttiva ta’ l-UE msejħa “Posting of Workers Directive”. 

Il-Qorti qieset dan in-nuqqas bħala tfixkil għall-provvista ta’ servizzi bejn il-pajjiżi ta’ l-UE.

Din id-deċiżjoni tal-Qorti tal-Ġustizzja ta’ l-UE reġgħet ikkonfermat li d-dritt tas-sidien negozjanti li jagħmlu li jridu, jiġi qabel il-ħarsien tad-drittijiet ta’l-Għaqdiet tal-Ħaddiema. 

Id-deċiżjoni wasslet lil wieħed mill-aktar appostli tal-UE, John Monks, is-Segretarju Ġenerali tal-European Trade Union Confederation (ETUC), biex qal li d-deċiżjoni tal-Qorti tal-UE 

“hija problematika ħafna, u qiegħda tistabbilixxi li l-libertajiet ekonomiċi jieħdu prijorità fuq id-drittijiet fundamentali, fuq ir-rispett lejn il-liġijiet nazzjonali dwar ix-xogħol, u fuq il-ftehim kollettiv”.

Meta tqis li dan id-diskors intqal minn bniedem li dejjem ħadem favur l-UE, anki kontra l-opinjoni ta’ ħafna minn sħabu fil-Moviment Trejdunjonistiku Ewropew, għandhom għaliex jinkwetaw bil-kbir kemm it-trejdunjins, kif ukoll il-miljuni kbar ta’ ħaddiema fl-UE (inklużi l-ħaddiema u t-trejdunjins Maltin).

Iżda, jintqal b’dispjaċir, li ĦADD mhu qed jinforma lill-poplu, u lill-ħaddiema l-aktar, dwar dawn id-deċiżjonijiet tal-Qorti tal-UE li huma theddida għad-drittijiet tal-ħaddiema u tal-unjins tagħhom.

L-impatt ta’ din id-deċiżjoni tal-Qorti tal-UE se jkun enormi u mifrux lil hinn mill-fruntieri tal-Lussemburgu, u se jżid l-ispettru ta’ pagi baxxi għall-ħaddiema kollha.

Minkejja li fil-2005 il-Parlament Ewropew suppost li wqqaf id-Direttiva li kienet tgħid li l-kundizzjonijiet tal-pajjiż li jipprovdi s-servizz, jgħoddu anki meta s-servizz jingħata f’pajjiż ieħor tal-UE, il-Qorti tal-UE xorta waħda qiegħda bil-mod il-mod bid-deċiżjonijiet tagħha ddaħħal il-prinċipju tal-“pajjiż tal-oriġini” tad-Direttiva li l-Parlament Ewropew ma approvax. 

Id-deċiżjonijiet tal-Qorti tal-UE jorbtu lill-pajjiżi kollha tal-UE, u għalhekk dak li l-Parlamentari Ewropej ma ħallewx jidħol mill-bieb, il-Qorti ta’ l-UE qiegħda tgħaddih mit-tieqa. 

Hu ttamat li l-Parlamentari Ewropej jinteressaw ruħhom mid-deċiżjonijiet perikolużi tal-Qorti tal-Ġustizzja tal-UE, jekk verament għandhom għal qalbhom il-ħarisen tal-interessi tal-ħaddiema, kif ukoll li t-trejdunjins Ewropej juru sens akbar ta’ inkwiet għat-theddid għad-drittijiet tagħhom u għall-futur tal-ftehim kollettivi li jinnegozjaw.

Il-Ħamis, 31 ta’ Lulju, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ