MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

  NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Il-kaċċa, l-abort u l-UE

Dan l-aħħar tgħidx kemm smajna kemm l-UE qiegħda toqmos għax il-Gvern Malti għadu ma qatax il-kaċċa fir-rebbiegħa. 

L-UE qiegħda tinsisti li l-Gvern Nazzjonalista huwa marbut li jaqta’ l-kaċċa fir-rebbiegħa (kif inhu wkoll marbut li jaqta’ l-insib is-sena kollha wara s-sena 2008) la Malta issa saret membru fl-UE, minħabba d-Direttiva ta’ l-Għasafar.

Il-Gvern qiegħed jipprova jtawwal kemm jista’ biex jobdi l-ordni ta’ l-UE biex forsi jilħqu jgħaddu l-elezzjonijiet tal-Kunsilli Lokali f’Marzu li ġej, u l-elezzjoni ġenerali, li jekk ma ssirx is-sena d-dieħla, bilfors trid issir is-sena ta’ wara. 

U b’hekk jerġgħu “jonsbu” lill-kaċċaturi u n-nassaba għal ma nafx kemm-il darba!

Forsi tgħidu, imma x’għandu x’jaqsam l-abort mal-kaċċa fir-rebbiegħa? 

Għandkom raġun li jiġikom dan il-ħsieb għax l-ipokrezija ta’ l-UE dwar l-abort hija tant grassa li ma titwemminx!

Ħalli nispjegaw.

Ir-raġuni ewlenija għaliex l-Unjoni Ewropea trid taqta’ l-kaċċa fir-rebbiegħa huwa li fir-rebbiegħa l-għasafar ikunu qegħdin ipassu, jew jitilgħu, mill-kontinent Afrikan lejn l-Ewropa biex ibejtu. 

U allura l-UE, skond id-direttiva ta’ l-Għasafar, trid tiżgura li, per eżempju, il-gamiem u s-summien (għax dawn huma l-uniċi tajr li jistgħu jikkaċċjaw il-kaċċaturi Maltin u Għawdxin) ikollhom iċ-ċans kollu li jbejtu u li l-bajd ifaqqas u “jitwieldu” biex ngħidu hekk (!) il-“frieħ” (?) tal-gamiem u s-summien u jibdew jgħixu!

L-ipokrezija grassa dwar l-abort hija din: 

L-UE ma taħsibx l-istess dwar trabi li diġà jkunu tnisslu u ħadu l-ħajja iżda li jkunu għadhom ma twieldux, għax l-UE qatt ma ħasset li kellha toħroġ xi direttiva dwar it-trabi li jkunu għadhom fil-ġuf t’ommhom, billi tipprojbixxi l-abort fil-pajjiżi mseħbin fl-Unjoni Ewropea!

Fil-fatt huwa f’Malta biss li l-abort huwa illegali u meqjus bħala att kriminali. 

F’kull pajjiż ieħor ta’ l-UE jeżisti xi forma jew oħra ta’ abort. 

Mela skond il-valuri “umani” (!) ta’ l-UE, it-trabi li jkunu għadhom fil-ġuf ta’ l-omm m’għandhomx l-istess dritt għall-ħajja u li “jitwieldu” biex huma wkoll jibdew jgħixu, daqskemm għandhom il-gamiem u s-summien, u tajr ieħor fir-rebbiegħa!

Smart City għall-Maltin jew għall-barranin?

Meta dan l-aħħar staqsew lill-Ministru Austin Gatt, minfejn se jsibu dawk l-eluf ta’ ħaddiema kkwalifikati fit-teknoloġija ta’ l-informatika biex jaħdmu fi Smart City, il-Ministru rrisponda li se jġibuhom mill-Indja!

Meta kien tħabbar dan il-proġett kmieni din is-sena, u l-Ministru kien ħabbar li se jinħolqu 3,6000 impjieg fl-IT, min jaf kemm kien hemm diġà beda jgħodd il-flieles qabel ifaqqsu.

U li dan il-proġett – li l-Prim Ministru iddiskrivieh bħala “frott” tas-sħubija fl-UE se jsolvilna l-problema tal-qgħad fost iż-żgħażagħ tagħna li għad jikkwalifikaw f’din it-teknoloġija għolja ta’ l-informatika.

Minbarra l-aħbar li se jinġiebu ħaddiema mill-Indja, ftit ġimgħat ilu konna smajna bomba ferm akbar tfaqqa’, meta l-Ministru Gatt żvela li ghad m’hemmx ftehim finali dwar dan il-proġett jekk mhux se jintlħaq ftehim fuq “punti kruċjali”.

Aħna però ċerti li fl-aħħar dan il-ftehim jintlaħaq la l-Ministru laħaq paċpaċ żejjed qabel ma faqqsu l-flieles.

Dak it-tpacpiċ żejjed ġab lill-Gvern dahru mal-ħajt u dawn l-ispekulaturi ta’ Dubai huma esperti kif jaħtfu opportunità. 

Mhux biżżejjed li bil-karrotta li dendlu lill-Gvern, ta’ eluf ta’ impjiegi fir-Rikażli, se jaħtfu biċċa art enormi ħdejn il-baħar li fuqha se jibnu mijiet ta’ appartamenti u vilel lussużi, li bihom biss ikopru l-ispiża tal-blokki ta’ uffiċini u l-bqija tal-proġett. 

U allura tista’ tgħid li ma jkunu ħarġu xejn minn buthom ħlief għall-bidu tal-proġett, sakemm jibda tiela’ l-bini tal-vilel u l-appartamenti!

Tinsewx ukoll li dawn ta’ Dubai – Tecom Investments – ingħataw iċ-ċans li jieħdu f’idejhom il-maġġoranza ta’ l-isħma tal-Maltacom qabel biss kienu ffirmaw kollox dwar Smart City! 

Min taħsbu li kien l-aktar ‘smart’, il-Gvern Nazzjonalista jew l-ispekulaturi ta’ Dubai?

U dak il-ħelikopter?

Ħalli nfakkrukom ftit. 

Fid-9 ta’ Marzu 2005, konna għidna li s-servizz tal-ħelikopter ġdid li beda wara li twaqqaf is-servizz li kellna qabel bil-ħelikopter Russu bejn Malta u Għawdex, ma kienx se jkollu ħajja twila minkejja l-ftaħir tal-Gvern u tal-Ministru Giovanna Debono.

Ħalli nfakkrukom xi ħaġ’oħra. 

Qabel ir-referendum, il-Ministru Giovanna Debono kienet tkellmet u qalet li jekk nidħlu fl-UE, l-Unjoni kienet se tagħti lil Għawdex il-vapuri u l-ħelikopters. 

Aħna naħsbu li meta semmiet il-vapuri kienet qiegħda tirreferi għal vapuri tas-sajd u mhux vapuri bħal tal-Gozo Channel. 

Iżda dwar l-għoti tal-ħelikopters kienet ċara u m’hemm ebda dubju x’riedet tgħid!

Imbasta kissru s-servizz bil-ħelikopter Russu, għax qalulna li dak ma kienx ta’ “standards Ewropej”. 

Ara r-Russi kienu l-ewwel pajjiż li tella’ satellita fl-ispazju – l-isputnik – sejrin ma jafux jibnu ħelikopter li forsi jogħla mijiet jew ftit eluf ta’ metri mill-art!

Però xi ħaġa tinten hemm wara din id-deċiżjoni, li l-Gvern ħalla lill-kumpanija Spanjola titlaq u s-servizz jieqaf qisu ma ġara xejn, u proprju fi żmien meta se tibda x-xitwa u servizz vitali, kemm għall-Maltin, Għawdxin, u speċjalment għat-turisti, bħal dak tal-ħelikopter, twaqqaf.

Diġà smajna li aġenti ta’ l-ivvjaġġar ħassru btajjel f’Għawdex għax ma jissograwx jibagħtu turisti Għawdex meta dawn jistgħu jsibu li ma jistgħux jaqsmu bejn Malta u Għawdex u viċi-versa minħabba l-maltemp li jikkawża li s-servizz bil-vapuri jieqaf ukoll.

Il-Gvern seta’ rranġa biex is-servizz tal-ħelikopter ikompli kieku ddeċieda li jissussidja s-servizz. 

Iżda m‘għamilx hekk. 

Ir-raġuni tista’ tkun li iktar moħħu biex jibni ‘airstrip’ li fiha jkunu jistgħu jinżlu ajruplani zgħar.

M’hemm ebda garanzija li wara l-‘airstrip’ ma ssirx ‘runway’ li fiha jkunu jistgħu jinżlu ajruplani ferm akbar. 

U allura addio waħda mill-isbaħ attrazzjonijiet li ssaħħar kemm lit-turisti kif ukoll lill-Maltin – il-kwiet.

Taħt it-tinda taċ-“ċirklu” ta’ l-Unjoni Ewropea!

Kif żgur smajtu fl-aħbarijiet, ftit ġimgħat ilu Dr Joanne Drake, il-kap tar-rappreżentanza tal-Kummissjoni Ewropea f’Malta, organizzat dak li ssejħet il-Fiera ta’ l-UE, taħt tinda bajda fil-Belt Valletta.

Biex jimpressjonaw u jagħmlu propaganda, Dr Drake qalet dan il-kliem bombastiku “L-Ewropa tibda minn Malta mhux minn Brussels”. 

Jekk tagħtu daqqa t’għajn lejn il-mappa ta’ l-Ewropa, tindunaw malajr li Malta qiegħda fit-tarf t’isfel ta’ l-Ewropa, bħalma l-Ewropa tibda mill-Portugall u l-gżejjer Kanarji fil-Punent, u r-Russja min-naħa tal-Lvant.

Mela Joanna Drake ma kienet qiegħda tgħid xejn ġdid!

L-istess Joanna Drake qalet iżjed minn hekk biex turi lill-UE f’dawl sabiħ. 

Minbarra li l-Ewropa tibda minn Malta u mhux minn Brussels, qalet hekk: 

“Il-poplu jidher li jħossu komdu bl-UE għax issa qed jirrealizza li għandna ħafna mill-valuri tradizzjonali u soċjali”. 

Nemmnu li riedet tgħid li ħafna mill-valuri tradizzjonali tagħna l-Maltin huma l-istess bħal ta’ pajjiżi oħrajn fl-UE.

L-ewwelnett ma nafux kif u meta Joanna Drake ntebħet li l-poplu Malti “qed iħossu komdu” bl-UE. 

U aktar kif waslet għall-konklużjoni li l-valuri tradizzjonali tal-poplu Malti huma bħal dawk tal-pajjiżi – speċjalment dawk kbar – ta’ l-UE.

Żgur li l-istorja tgħallimna li f’diversi valuri u tradizzjonijiet, il-Maltin għandhom storja differenti. 

Nieħdu l-imħabba li għandu l-poplu Malti għall-paċi. 

U kemm jobgħod il-gwerer u l-armi qerrieda. 

Huwa fatt storiku li għal mijiet ta’ snin, pajjiżi kbar Ewropej kienu nvoluti fil-gwerer. 

Dawn ġieli bdewhom huma kontra pajjiżi oħrajn ta’ l-Ewropa.

U ġieli kellhom jiddefendu ruħhom mill-attakki ta’ dawk il-pajjiżi l-oħrajn Ewropej: Franza, l-Ingilterra, l-Italja, il-Ġermanja, Spanja u l-Portugall kienu protagonisti f’dawn il-gwerer.

Malta żgur li qatt ma bdiet gwerer. 

Anzi, l-unika gwerra li Malta sabet ruħha mdaħħla fiha, daħħlitha fiha l-Ingilterra. 

U jekk immorru lura mijiet ta’ snin, sibna ruħna fi “gwerra” oħra meta Malta ġiet attakkata mit-Torok fl-1565 – li huma wkoll qegħdin jitħabtu biex jidħlu fl-UE!

Rigward valuri u tradizzjonijiet Insara, hemm baħar jaqsam bejna u l-bqija ta’ dawk il-pajjiżi l-kbar li jmexxu lill-Unjoni Ewropea. 

L-aqwa eżempju hu l-fatt, kif diġà spjegajna fl-artiklu ieħor f’din l-istess pagna – huwa l-abort, li aħna nqisuh bħala delitt kontra l-aqwa dritt uman – id-dritt tal-ħajja.

Mhux bħal pajjiżi l-oħrajn fl-Ewropa, fejn l-abort huwa legali!

Il-Ħamis, 30 ta’ Novembru, 2006.

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ