MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Araw kif tassew nistgħu nitilqu mill-Unjoni Ewropea

Dan huwa video tal-Parlament Ewropew

Id-dħul spiss fil-Port il-Kbir ta’ għadd kbir ta’ bċejjeċ tal-gwerra huwa xempju ta’ l-ipokresija tal-Gvern Malti u tal-pajjiżi ta’ l-Unjoni Ewropea li qalu li sejrin iħarsu n-newtralità skond il-Kostituzzjoni ta’ Malta. 

Skond il-Kostituzzjoni tagħna, il-preżenza ta’ forzi militari barranin f’għadd kbir u fl-istess waqt jammonta għall-ksur tan-newtralità ta’ pajjiżna. 

Meta fi żmien ta’ gwerra jidħlu bċejjeċ tal-gwerra ta’ pajjiż imdaħħal fil-ġlied, inkunu qegħdin niksru n-newtralità. 

Minkejja dan, bċejjeċ Ingliżi u Amerikani tal-gwerra daħlu fil-port tagħna aktar minn darba waqt il-gwerra li l-Amerika u l-Ingilterra għamlu lill-Iraq.

Sa tliet snin ilu l-Unjoni Ewropea kienet tistqarr li dak li l-Kostituzzjoni tagħna tgħid dwar in-newtralità kien ta’ ostaklu għall-ftehim tas-sħubija ta’ Malta fl-Unjoni Ewropea.

Sa sentejn ilu l-Prim Ministru Fenech Adami kien jgħid li n-newtralità hija llum irrilevanti, jigifieri, ma kinetx tiswa għaż-żminijiet tal-lum.

Meta l-Kummissjoni Ewropea sabet ma’ wiċċha l-oppożizzjoni mis-CNI u mill-FMI għall-ksur tan-newtralità skond il-Kostituzzjoni ta’ Malta, hija fetħet għajnejn il-Gvern Malti għall-inkwiet li kien se jidħol fih jekk kien jibqa’ jgħid li n-newtralità kienet irrilevanti.

Fenech Adami għalhekk biddel id-diska.

Mhux talli l-Gvern Malti ma baqax jgħid li n-newtralità kienet irrilevanti, iżda saħansitra talab lill-Unjoni Ewropea ħalli hija tagħrafha fil-ftehim li Malta kienet se tagħmel magħha. 

Iżda għadd ta’ pajjiżi membri ta’ l-Unjoni Ewropea, fosthom il-Ġermanja u Franza, ma accettawx li jiddikjaraw li jagħrfu n-newtralità ta’ pajjiżna fil-ftehim tas-sħubija.

Għalhekk meta l-Gvern sab li l-Unjoni Ewropea ma kinitx lesta tagħraf fit-trattat ta’ sħubija n-newtralità ta’ pajjiżna, il-Gvern kellu jikkuntenta b’dikjarazzjoni li jagħmel huwa biss u li tiġi mehmuza mat-Trattat li ġie ffirmat f’Ateni fis-16 ta’ April.

Mhux biss id-dikjarazzjoni tan-newtralità ta’ Malta hija biss tal-Gvern Malti, iżda minnufih qabel id-dikjarazzjoni fit-Trattat hemm dikjarazzjoni oħra tal-15-il membri preżenti kollha ta’ l-Unjoni li tgħid li kull dikjarazzjoni magħmula mill-pajjiżi ġodda li kienu se jissieħbu fl-Unjoni ma kinetx tiswa aktar mir-regoli u l-kundizzjonijiet li bihom il-pajjiżi ġodda kienu qegħdin jintrabtu.

Din id-dikjarazzjoni tal-15-il pajjiż li llum huma membri ta’ l-Unjoni Ewropea li ntehmżet mat-Trattat tas-16 ta’ April iġġib fix-xejn il-kliem tal-Prim Ministru Malti u tal-Gvern meta jgħidu li l-Unjoni Ewropea ntrabtet li tħares in-newtralità ta’ Malta.

Fil-fatt il-pajjiżi membri ta’ l-Unjoni Ewropea m’humiex qegħdin jirrispettaw in-newtralità tagħna meta huma jibagħtu bċejjeċ tal-gwerra tagħhom fil-Port il-Kbir tagħna, bħal ma għamlu meta ġimgħatejn ilu daħlet skwadra tan-NATO u damet hawn għal xi erbat ijiem.

Il-ħsara tal-ftehim li l-Gvern Nazzjonalista għamel ma’ l-Unjoni Ewropea bdiet tinħass anki qabel ma Malta tissieħeb fl-Unjoni fl-1 ta’ Mejju tas-sena d-dieħla. 

L-aħbar xokkanti li l-kumpanija ta’ l-elettronika ST Microelectronics ta’ Ħal Kirkop se tieħu parti mix-xogħol li kien qiegħed jinħadem fil-fabbrika tagħha f’Malta għall-fabbrika tagħha fil-Marokk kixfet il-verità dwar l-effetti ħżiena tal-ftehim ma’ l-Unjoni Ewropea.

L-effetti tal-ftehim fuq l-industrija tal-manifattura u fuq l-industrija tas-servizzi se jkunu diżastrużi għal Malta.

L-ispejjeż jogħlew minħabba l-ftehim u b’hekk il-manifattura u s-servizzi f’Malta jsiru anqas kompetittivi milli huma llum. 

It-tnaqqis fil-kompetittività iġiegħel l-industriji u l-kumpaniji li llum għandna f’Malta biex ifittxu li jmorru f’pajjiżi oħra barra l-Unjoni Ewropea fejn l-ispejjeż huma inqas u għalhekk l-industriji u l-kumpaniji jistgħu jkunu aktar kompetittivi.

Il-propagandisti tas-sħubija fl-Unjoni Ewropea kienu jħambqu li meta Malta tidħol fis-suq kbir ta’ l-Unjoni Ewropea l-industriji jikbru u l-kumpaniji jiżdiedu. 

Issa li Malta ntrabtet li tidħol fl-Unjoni Ewropea fl-ewwel ta’ Mejju tas-sena d-dieħla, mhux talli l-industriji mhux qegħdin jikbru u l-kumpaniji mhux qegħdin jiżdiedu, iżda saħansitra qegħdin naraw dawk li għandna llum jonqsu għax jew jagħlqu għax ma jifilħux ikomplu, jew jagħlqu ġalli jmorru jiftħu f’pajjiżi oħra barra l-Unjoni Ewropea.

Iż-żieda fl-ispejjeż minħabba l-ftehim li l-Gvern għamel ma’ l-Unjoni Ewropea ma jolqotx biss lill-industriji u l-kumpaniji li llum hawn f’pajjiżna. 

Jolqot ħażin ukoll lill-investiment barrani ġdid li minħabba fih ma jiġix lejn pajjiżna iżda li kieku ma kellniex il-ftehim ma’ l-Unjoni Ewropea, kien jinġibed lejn pajjiżna bl-inċentivi u l-għajnuniet li konna nagħtu. 

Għax issa minħabba l-ftehim li l-Gvern Nazzjonalista għamel ma’ l-Unjoni Ewropea, lanqas nistgħu nkomplu nagħtu l-inċentivi u l-għajnuniet lill-industriji u lill-kumpaniji biex joperaw minn Malta.

It-telf ta’ industriji u ta’ kumpaniji milli jiġu f’pajjiżna jew billi jitilqgħu minn pajjiżna huwa kbir għall-ekonomija tagħha. 

Iżda huwa l-agħar mill-ħaddiema li jitilfu l-impjieg u għaż-żgħażagħ li jitilfu l-opportunitajiet ta’ mpjiegi ġodda għalihom.

Jekk il-Gvern Nazzjonalista ma jimpurtaħx mill-ħaddiema li jiġu ssensjati u miż-żgħażagħ li ma jsibux fejn jaħdmu, il-General Workers’ Union u l-Partit Laburista żgur li jinteressahom ħafna. 

Għalhekk huwa mistenni li kemm l-Union kif ukoll il-Partit jibqgħu jħabbirku biex ma nħallux iseħħu l-effetti ħżiena tal-ftehim.

Rapporti minn ħafna pajjiżi membri ta’ l-Unjoni Ewropea jgħidu li l-qagħda ta’ l-ekonomija hija mwegħra.

Skond l-ekonomisti, il-qagħda ekonomika se teħżien għal li ġej. Uffiċjali ta’ 'trade unions' tal-pajjiżi membri ta’ l-Unjoni Ewropea jbassru żminijiet koroħ kemm fil-qasam ta’ l-industrija tal-manifattura kif ukoll fil-qasam tas-servizzi.

Uffiċjal ta’ 'trade union' Daniża stqarr li għal li ġej, l-Ewropa se tkun ċimiterju ta’ l-industriji għax il-fabbriki tal-manifattura qegħdin jitilqgħu mill-pajjiżi membri ta’ l-Unjoni Ewropea u jiftħu f’pajjiżi barra l-Unjoni Ewropea. 

L-istess qiegħed jiġri fil-każ ta’ kumpaniji ta’ l-informatika u tal-kompjuters.

Fil-każ tal-fabbriki tal-manifattura, dawn l-aktar li qegħdin ifittxu hu li jmorru fiċ-Ċina. 

Fil-każ tal-kumpaniji ta’ l-informatika u tal-kompjuters, l-aktar li qegħdin imorru hu lejn l-Indja.

Din il-mewġa ta’ emigrazzjoni mill-pajjiżi membri ta’ l-Unjoni Ewropea ta’ kumpaniji u ta’ fabbriki qiegħda tkun kaġun ta’ qgħad akbar milli kien hemm sal-lum fl-Unjoni Ewropea. 

Għalhekk il-qagħda tal-qasam ta’ l-impjiegi u tax-xogħol fl-Unjoni Ewropea hija mwegħra u t-tbassir huwa li mhux se titjieb aktar ma kumpaniji u fabbriki jitilqgħu mill-Ewropa.

It-telf tal-kumpaniji ta’ l-informatika u l-fabbriki tal-manifattura mill-pajjiżi membri ta’ l-Unjoni għall-pajjiżi tal-kontinent ta’ l-Asja għandu tagħlima kbira għalina l-Maltin. 

Għalkemm is-suq ta’ l-Unjoni Ewropea huwa suq kbir ta’ mijiet ta’ miljuni u qiegħed jikber bid-dħul fl-Unjoni ta’ aktar pajjiżi, xorta waħda qiegħed jitlef l-industrija tal-manifattura u l-kumpaniji ta’ l-informatika. Il-kobor tas-suq mhux garanzija ta’ aktar xogħol u ta’ aktar impjiegi.

Il-fabbriki ta’ l-Ewropa tal-manifattura u l-kumpaniji ta’ l-informatika telqin mill-Unjoni Ewropea għax l-ispejjeż tal-produzzjoni u l-ispejjeż tal-kumpaniji fl-Ewropa huma ħafna akbar mill-ispejjeż fil-pajjiż ta’ l-Asja.

Bil-faċilitajiet li hawn tat-trasport tal-merċa u bis-servizzi li llum hawn ta’ l-elettronika, il-prodotti maħduma fl-Asja u l-informazzjoni li tinżamm fl-Asja jinġiebu għall-pajjiżi ta’ l-Ewropa fejn jistgħu jinbiegħu jew jintużaw, mingħajr diffikultà u minkejja l-ispejjeż biex isir dan, xorta waħda aktar ifendi milli kieku l-merċa tinħadem fil-fabbriki fl-Ewropa u l-informatika tinżamm f’ċentri fl-Ewropa.

Is-sħubija ta’ Malta fl-Unjoni Ewropa u fis-suq tagħha ma jiswiex biex iġib lejn Malta industriji tal-manifattura u kumpaniji ta’ l-informatika. 

Dawn jiġu mhux minħabba l-kobor tas-suq, iżda biss jekk f’Malta jkunu aktar kompetittivi.

Il-Gvern Nazzjonalista jaf li jekk iwettaq il-ftehim li huwa għamel ma’ l-UE, se joħloq inkwiet serju f’pajjiżna bl-ammont ta’ sensji li se jkun hawn. 

Il-Gvern qiegħed jieħu passi ħalli jipprova jilqa’ għall-inkwiet li jinqala’ billi ordna li l-pulizija jitħarrġu fil-kontroll tal-folol u kif jilqgħu għar-rambaġġ. 

Il-pulizija qegħdin jingħataw taħriż regolari fl-użu tat-tarka, taħriġ li kienm ilu ma jsir għal ħafna snin.

F’ħafna bliet fil-pajjiżi membri ta’ l-Unjoni Ewropea jsiru dimostrazzjonijiet ta’ protesta kontra l-politika ta’ l-Unjoni. 

L-aħħar dimostrazzjoni ta’ protesta saret f’Ruma waqt il-laqgħa tal-mexxejja tal-pajjiżi membri ta’ l-UE u ta’ dawk li se jissieħbu fiha. 

F’dik l-okkażjoni l-Prim Ministru Fenech Adami daq ftit xi jfissru l-protesti popolari li jsiru fl-Ewropa kontra l-Unjoni Ewropea. 

Biex titħares is-sigurtà tal-Prim Ministru, huwa kellu jħalli ħesrem il-palazz fejn kien se jagħmel konferenza stampa u kellu jħassarha, għax id-dimostranti rnexxielhom jersqu viċin ħafna l-palazz fejn kien qiegħed il-Prim Ministru.

Din id-dimostrazzjoni ta’ protesta li saret f’Ruma fil-bidu ta’ Ottubru kellha tifsira importanti ħafna. 

Għax uffiċjali tal-Konfederazzjoni tat-Trade Unions ta’ l-Ewropa (ETUC) organizzaw il-protesta kontra l-politika ekonomika ta’ l-Unjoni Ewropea li qiegħda tikkaġuna ħafna qgħad fil-pajjiżi membri ta’ l-Unjoni, u kontra l-politika ta’ l-Unjoni li qiegħda tħeġġeġ lill-gvernijiet tal-pajjiżi membri ta’ l-Unjoni biex inaqqsu s-servizzi soċjali u l-pensjonijiet mogħtija mill-Gvern.
 

It-‘trade unions’ Ewropej tant taw importanza lil din id-dimostrazzjoni ta’ protesta f’Ruma, li saħansitra John Monks, is-Segretarju Ġenerali tal-Konfederazzjoni tat-‘trade unions’ Ewropej, ħa sehem fiha.

Barra d-dimostrazzjoni ta’ protesta li saret f’Ruma fil-bidu ta’ Ottubru, ħafna bliet oħra tal-pajjiżi membri ta’ l-Unjoni raw dimostrazzjonijiet kbar kontra l-politika ta’ l-Unjoni Ewropea. 

Saru dimostrazzjonijiet impressjonanti ħafna f’Londra, f’Pariġi, f’Ateni, fi Brussels u f’Madrid.

Id-dimostrazzjonijiet kienu kbar ħafna u kienu xhieda ta’ kemm huwa kbir it-tgergir u kemm huma ħafna l-ilmenti kontra l-UE fil-pajjiżi membri tagħha, speċjalment fost il-ħaddiema ta’ dawn il-pajjiżi membri.

Jidher li l-Gvern Nazzjonalista jaf li minn mument għall-ieħor se jfaqqgħu l-protesti fit-toroq tagħna hekk kif il-konsegwenzi ħżiena tal-ftehim magħmul ma’ l-Unjoni Ewropea jagħfsu lill-poplu, speċjalment lill-ħaddiema u lill-familji tal-ħaddiema. 

Għalhekk reġgħu ħarġu t-tarki lill-pulizija.

Il-Ħamis, 30 ta’ Ottubru, 2003

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis- 

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ