MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Parti minn artikolu tas-Sur Tony Zarb, Segretarju Ġenerali tal-General Workers Union

Appoġġ mill-EMF

Il-European Metalworkers Federation (EMF) f’ittra li bagħtet lill-Prim Ministru ħeġġitu biex il-Gvern ma jiddeċiedix waħdu dwar il-privatizzazzjoni tat-Tarzna u biex iżomm konsultazzjoni kontinwa mal-GWU dwar il-proċess tal-pjan kollu tar-ristrutturar tat-Tarzna.

Dan biex jiġi assigurat li ma jkunx hemm impatt soċjalment negattiv fuq il-ħaddiema ta’ din l-ażjenda.

L-EMF, li tiġbor fiha madwar 5.5 miljun ħaddiema fis-settur tal-metall qiegħda ssegwi b’interess l-iżvilupp fil-kwistjoni dwar il-privatizzazzjoni tat-Tarzna u stqarret l-appoġġ tagħha lill-GWU fil-ħidma li qed tagħmel biex tassigura l-vijabilità tat-Tarzna.

Fl-ittra tiegħu lill-Prim Ministru, is-Segretarju Ġenerali tal-EMF, Peter Scherrer, filwaqt li stqarr li l-EMF hija solidali mal-GWU f’din il-kwistjoni fakkar fil-wegħda li għamel il-Gvern qabel l-elezzjoni li għaddiet li mhux se jkun hemm tnaqqis ta’ ħaddiema mit-Tarzna u għaldaqstant ħeġġeġ lill-Gvern biex jassigura li ma jkunx hemm tnaqqis ta’ ħaddiema mit-Tarzna mingħajr ma jinstabu alternattivi aċċettabbli.

Filwaqt li rriaffermat it-tħassib tal-GWU għat-tnaqqis drastiku ta’ ħaddiema li l-Gvern ħabbar li se jkun hemm mit-Tarzna, l-EMF appellat biex il-Gvern jirrispetta l-liġijiet tal-Unjoni Ewropea dwar il-privatizzazzjoni ta’ ażjendi pubbliċi. 

L-EMF appellat ukoll lill-Gvern sabiex il-Gvern jimxi mad-Direttiva tal-Unjoni Ewropea dwar id-dritt tal-konsultazzjoni u għaldaqstant sostniet il-ħtieġa li l-Gvern jinnegozja mal-GWU sabiex tinstab soluzzjoni soċjalment responsabbli fl-aħjar interess tal-ħaddiema tat-Tarzna.

Il-kumpanija Malta Shipyards li topera t-Tarzna, mit-twaqqif tagħha fil-2003, qatt ma bagħtet l-Accounts tagħha skond il-liġi lill-uffiċjali tal-Financial Services. 

Għalhekk m’hemmx mezz kif tista’ tifli r-riżultati finanzjarji tat-Tarzna. 

Bl-iskuża li l-Accounts jikxfu tagħrif kummerċjali kunfidenzjali, il-Gvern qatt ma ssottomettihom għall-iskrutinju tal-pubbliku u tal-ħaddiema tat-Tarzna qalet il-Kampanja għall-Ħelsien Nazzjonali (CNI).

Is-CNI tilmenta li f’ħafna drabi ngħataw ammonti li ma jaqblux ta’ kemm tilfet it-Tarzna u ta’ kemm ingħatat għajnuna mill-Gvern matul is-seba’ snin tal-Pjan ta’ Ristrutturar miftiehem ma’ l-Unjoni Ewropea u li kellu l-bidu fil-2002. 

Lanqas intqal x’ma ngħatawx lit-Tarzna mill-ammonti ta’ flus li skond il-Pjan kellhom jingħataw.

Dan in-nuqqas ta’ tagħrif serva biex il-pubbliku ma jkunx jista’ jifforma stampa ċara tal-qagħda finanzjarja vera tat-Tarzna u l-pubbliku jkollu joqgħd fuq id-diskors ta’ propaganda li minn żmien għal żmien jingħad mill-Gvern, jew mit-tmexxija eżekuttiva tat-Tarzna.

Is-CNI nnutat li l-Prim Ministru, waqt li ma jridx li l-verità kollha tkun magħrufa permezz ta’ inkjesta indipendenti pubblika dwar it-Tarzna, poġġa fuq il-mejda tal-Parlament, xi dokumenti li jikxfu ħwejjeġ importanti dwar it-Tarzna.

Wieħed mid-dokumenti jagħti tagħrif dwar x’għajnuniet kellhom jingħataw skond il-Pjan miftiehem ma’ l-Unjoni Ewropea, iżda li baqgħu ma ngħatawx, mingħajr ma l-Gvern ta r-raġunijiet għaliex naqas li jagħtihom. 

* Il-Pjan ta’ Ristrutturar kien ħaseb għall-għoti ta’ Lm32 miljun f’“Social Cost Subsidy”.

* Id-dokument esebit mill-Gvern juri li Lm12-il miljun minnhom mhux se jitħallsu sa l-aħħar ta’ din is-sena meta jintemm il-Pjan.

* Il-Pjan ħaseb għall-għoti ta’ Lm9.9 miljun f’“Capital Investment Subsidy”. 

* Id-dokument esebit mill-Gvern juri li sa l-aħħar ta’ din is-sena Lm1.9 miljun minnhom ma jkunux ingħataw u dak l-ammont huwa ppjanat li jintefaq fis-sentejn li ġejjin, fil-2009 u 2010 (meta t-Tarzna tkun inbiegħet mill-Gvern lill-barranin). 

* Il-Pjan approvat mill-Unjoni Ewropea kien jaħseb biex Lm4.5 miljun jingħataw fi “Training Grants”. 

* Skond id-dokument esebit mill-Gvern, Lm3.6 miljun minnhom mhux se jintefqu sa l-aħħar tal-Pjan fl-aħħar ta’ din is-sena. 

* Il-Pjan approvat mill-Unjoni Ewropea jipprovdi għall-għoti ta’ Lm21 għal “Financial Costs”. 

* Skond id-dokumenti esebit mill-Gvern, sa l-aħħar tal-Pjan, Lm20.8 miljun minnhom ma jkunux ingħataw lit-Tarzna.

* B’kollox, minn total ta’ għajnuniet approvati mill-Unjoni Ewropea fil-Pjan ta’ Ristrutturar, li jleħħaq Lm119 miljun, sa l-aħħar tal-Pjan ma jkunux ingħataw lit-Tarzna Lm41.5 miljun minnhom.

Is-CNI tinnota li l-Gvern ta’ spiss isemmi l-ammont ta’ sussidju mogħti lit-Tarzna skond il-Pjan ta’ Ristrutturar, iżda qatt ma jnaqqas l-ammont ta’ Lm41.8 miljun li mhux se jkunu ngħataw sat-tmiem tas-seba’ snin tal-Pjan. 

Il-Gvern xi drabi semma’ wkoll li se jkollu jitlob lill-Unjoni Ewropea biex tagħtih permess jagħmel tajjeb għal madwar 100 miljun Ewro (mhux Lm) telf li qal li t-Tarzna akumulat f’seba’ snin. 

Ma qalx il-Gvern li se jkun iffranka madwar €100 miljun (jew Lm41.8 miljun) mill-ammont ta’ għajnuniet li kellu jagħti lit-Tarzna skond il-Pjan miftiehem ma’ l-Unjoni Ewropea u b’dak l-ammont se jaqta’ t-telf li qed jgħid li t-Tarzna akkumulat.

Is-CNI temmen li huwa xieraq li ssir inkjesta indipendenti pubblika dwar x’seħħ sewwa mit-Tarzna fis-seba’ snin tal-Pjan ta’ Ristrutturar u għalhekk is-CNI tingħaqad fis-sejħa tal-ħaddiema tat-Tarzna u tal-General Workers’ Union għall-inkjesta ħalli tkun magħrufa l-verità kollha dwar it-Tarzna u dwar it-tmexxija tagħha.

Il-Gvern u l-Unjoni Ewropea m’għandhomx jibqgħu jaħbu mill-pubbliku l-“Accounts” tat-Tarzna mill-2003 ’l hawn, għax kull għajnuna mogħtija lit-Tarzna ġiet minn għand il-poplu u ebda Ewro ma tħallset mill-Unjoni Ewropea, għalkemm din iddettathielna x’għajnuna tingħata lit-Tarzna.

It-Tlieta, 29 ta’ Lulju, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ