GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Fis-seba’ snin 2007 – 2013 il-Maltin u l-Għawdxin se jkunu ħallsu lill-Unjoni Ewropea €420,000,000

X’konna ngħidulkom, li rajna ma jibqax f’idejna?

Tiftakruhom il-qaddejja ta‘ l-Unjoni Ewropea f’pajjiżna jgħidulna li jekk nidhħlu fl-Unjoni Ewropea “is-sovranità ta’ Malta se tissaħħah?”

Kienu jkomplu jgħidu li s-sovranità tagħna tissaħħah “għax inkunu qegħdin naqsmuha ma’ dik ta’ pajjiżi ferm akbar minna“!

Aħna konna għednielkom kemm-il darba, kemm bil-fomm kif ukoll bil-kitba, li mhux talli s-sovranità ta’ Malta ma tissaħħahx bis-sħubija, anzi kważi tispiċċa għal kollox.

Dan mhux aħna biss konna ngħiduh, iżda bħalna kien jgħid il-Partit Laburista.

Nhar it-Tnejn, 12 ta’ Ġunju kellna żewġ eżempji klassiċi ta’ kemm verament illum mhux Gvern Malti qiegħed jiggverna l-pajjiżna iżda l-Unjoni Ewropea.

F’dan l-istess ġurnal ta’ nhar it-Tnejn, 12 ta’ Ġunju, (L-Orizzont) fl-ewwel paġna kien hemm rapport bit-titlu: “Il-fondi mwegħdin mill-Unjoni Ewropea għall-immigrazzjoni illegali mhux Malta tagħżel kif tonfoqhom”.

Dan ir-rapport ma vvintaħx il-ġurnalista Owen Galea, li kiteb ir-rapport, għax hu kkwota dak li ntqal mill-Aġenzija Ewropea tal-Fruntieri (Frontex).

Fi ftit kliem, kif il-flus li ġew ivvotati mill-Unjoni Ewropea biex din l-aġenzija tonfoq (Lm900,000) fil-glieda kontra l-immigrazzjoni illegali li għandhom Spanja u Malta, l-aħħar kelma se tkun ta’ din l-aġenzija.

Veru “wara konsultazzjonijiet mill-qrib mal-pajjiżi membri…”. Izda “konsultazzjonijiet”, kif nafu xi jfissru fir-realtà, tfisser biss li din l-aġenzija tisma’ x’għandhom xi jgħidu Malta u Spanja, iżda mbagħad tiddeċiedi hi kif għandhom jintefqu l-flus f’pajjiżna.

Issa tinsewx, dawn il-flus ġejjin mill-istess flus li aħna nħallsu kull xahar lill-Unjoni Ewropea.

U lill-Unjoni Ewropea ma noqogħdux ngħidula kif tonfoq il-flus li nibgħatulha!

Dan ifisser li l-prijoritajiet li għandu l-Gvern Malti jistgħu ma jkunux bħal dawk ta’ din l-aġenzija, iżda xorta waħda jkollna nagħmlu li trid hi inkella nibqgħu b’xejn!

Dik sovranità msaħħa, Onorevoli Simon Busuttil u David Casa!!!

It-tieni storja, li forsi iktar importanti, hi dik li dehret fl-ewwel paġna ta’ The Times nhar it-Tnejn ukoll, 12 ta’ Ġunju. It-titlu kien: “New EU rules force radical change in public transport” (“Regoli ġodda ta’ l-Unjoni Ewropea se jimponu bidla radikali fit-trasport pubbliku”).

F’dan ir-rapport ta’ Ivan Camilleri minn Brussels, intqal li minkejja l-oppożizzjoni tal-Ministru Jesmond Mugliett għal din il-bidla li trid issir, “Malta ġiet megħluba bil-vot fil-Kunsill tal-Ministri tat-Trasport”.

Dan se jfisser li s-sistema tat-trasport pubbliku li kellna sal-lum trid tispiċċa.

It-trasport pubbliku jrid jiġi liberalizzat.

U s-sussidju li jagħti l-Gvern biex kemm jista’ jkun il-prezz tal-biljett ma jogħliex aktar milli hu, irid jispiċċa wkoll!

Il-ħelwa hi li dawn l-allat ta’ l-UE jgħidulek li jrid isir dan “fl-interess ta’ min juża t-trasport pubbliku”.

Aħna nistaqsu: Jekk l-UE ma temminx u ma tridx kontrolli fuq prezzijiet, għax hi tgħid li biżżejjed ikollok kompetizzjoni ħielsa, kif se jkun jista’ l-Gvern jikkontrolla jekk jogħlewx jew le l-prezz tal-biljetti?

Kif se jkun jista’ jiggarantixxi, per eżempju, li l-anzjani ma jgħollilhomx il-prezz tal-biljett minn kif inhu llum?

L-istess Ministru Mugliett ammetta li l-pjani li kellu l-Gvern għar-riformi fis-sistema tat-trasport pubbliku sfaxxaw.

U issa se jkollu jsib toroq ġodda kif joranizza t-trasport pubbliku kif trid l-UE u mhux kif irid il-Gvern Malti!

Nisperaw ukoll li dawn “it-toroq il-ġodda” ma jiġrilhomx bhal dawk li saru mill-Protokoll Taljan!

Tgħid se nisimgħu xi politiku jiftaħ ħalqu u juri lill-poplu kif anke f’dan is-settur li jolqot eluf kbar ta’ nies kuljum, rajna m’għadux f’idejna?

Malta super-ħabs tal-klandestini?

Għamel tajjeb il-ħabib tagħna J. Cachia minn Raħal Ġdid (l-orizzont, 12 ta’ Gunju), li fakkarna dwar x’ippropona l-Ministru ta’ l-Intern Taljan Giuseppe Pisanu f’Awissu, 2004, jiġifieri li Malta ssir “super-ħabs” fejn jinżammu l-immigranti illegali kollha li jkunu se jidħlu fl-Unjoni Ewropea.”

L-istess ħsieb jidher li għandu l-Kummissarju għall-Ġustizzja, Ħelsien u Sigurtà, Franco Frattini, jiġifieri li Malta għandha ssir ċentru ta’ l-immigrazzjoni illegali.

Mhux ta’ b’xejn li aħna tas-CNI, kif ukoll moviment bħall-ANR u l-maġġoranza assoluta tal-poplu Malti, għandna għaliex nitħassbu u ninkwetaw meta sirna nafu li l-Unjoni Ewropea se tibgħat vapuri jippatroljaw il-Mediterran għall-immigranti illegali.

Nerġgħu nistaqsu:

X’se jagħmlu dawn il-vapuri meta jaraw dgħajjes mimlijin immigranti illegali?

Jaqaw fi ħsiebhom jabbuhom fuq il-vapuri ta’ l-UE u jġibhuhomna f’pajjiżna?

Dwar dan konna nistennew li kellu jitkellem deputat parlamentari fil-programm Xarabank.

U mhux jgħid li l-problema finanzjarja għal pajjiżna lanqas missha tissemma!

Mela l-interess tal-poplu Malti u ta’ pajjiżna m’għadux jiġi l-ewwel u qabel kollox għal xi wħud?

F’liema pajjiż serju...?

F’liema pajjiż serju, immigranti illegali jitfgħu tazza bil-kafè jagħli f’wiċċ kuntistabbli fejn jikkaġunawlu ġrieħi gravi f’wiċċu u qisu ma ġara xejn?

F’liema pajjiż serju, klandestini jissuttaw lill-pulizija bil-fliexken ta’ l-ilma mimlijin bl-awrina u anke jitfgħulhom ħmieg uman, u qisu ma ġara xejn?

Jekk ittieħdu passi – għax ma qrajna mkien li ttieħdu xi passi – tistgħu tgħidulna x’kienu dawn il-passi?

Is-Sibt, 29 ta’ Lulju, 2006.

e-mail: cnimalta at yahoo.co.uk 

IRRIDU L'INDIPENDENZA MILL-UNJONI EWROPEA

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien?

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ