MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
JEKK TIRRISPETTA L-KOSTITUZZJONI TA' PAJJIŻEK GĦID LID-DEPUTAT PARLAMENTARI TIEGĦEK JIRRISPETTA L-FEHMIET TIEGĦEK U MA JIVVOTAX FAVUR IL-KOSTITUZZJONI TA' L-UNJONI EWROPEA LI TKASBAR IL-KOSTITUZZJONI TA' MALTA.
Nipprotestaw fl-Ewwel ta’ Mejju
Mill-Kampanja Ħelsien Nazzjonali CNI
JUM il-Ħaddiem din is-sena se jkun imtebba’ bil-ġrajja ta’ niket għal kull Malti li jgħożż il-Ħelsien.
Is-sħubija fl-Unjoni Ewropea tibda sseħħ fl-1 ta’ Mejju u pajjiżna jerġa’ jsir kolonja tal-barranin, minflok ta’ Londra, ta’ Brussell.
Mhux biss niket, iżda għajb kbir, għax eluf minn ħutna se jieħdu sehem f’ċelebrazzjonijiet li se jħammrulna wiċċna mad-dinja.
Għax se jikxfu kemm aħna boloħ li nifirħu bil-kbir meta se nitilfu l-għeżeż kisba li qatt għamilna.
Fdejna ruħna mill-barrani u sirna ġens ħieles.
Mill-1 ta’ Mejju ma nibqgħux immexxu lilna nfusna.
Se nitmexxew mill-Unjoni Ewropea.
GŻIRITNA midjuna iktar minn biljun lira.
Il-Gvern qed jitlef aktar minn mitt miljun lira fis-sena.
Xorta waħda, b’irresponsabbilta` kriminali, se naħarqu maż-żewġ miljuni biex niċċelebraw it-telfien ta’ l-Indipendenza u l-Ħelsien tal-poplu tagħna.
L-ogħla personalitajiet ta’ pajjiżna qegħdin jieħdu sehem f’din l-orġja skandaluża ta’ tradiment tal-valuri li sawwruna bħala ġens u ta’ ħela kapriċċjuża ta’ flus midjuna.
Il-poplu tagħna se jispiċċa ifqar fil-valuri morali u ifqar materjalment.
Min hu fid-dmir li jikkundanna dan, se jkun kompliċi f’dan is-sagrileġġ.
Iż-żgħir u l-ħaddiem m’għandhomx biex jifirħu bis-sħubija fl-Unjoni Ewropea.
Huma se jbatu l-aktar.
Diġa’ daqu l-morr tal-politika ta’ l-Unjoni.
* Sensji,
* kundizzjonijiet imnaqqsa tax-xogħol,
* għoli tal-ħajja,
* telfien ta’ servizzi soċjali,
* tnaqqis fil-pensjonijiet,
* taxxi fuq l-oġġetti ta’ l-ikel u mediċini –
* dan huwa l-frott qares tal-politika ta’ l-Unjoni Ewropea.
F’dan kollu li qed iġarrab bis-sħubija li tibda sseħħ fl-1 ta’ Mejju, il-ħaddiem se jiftakar fil-jum għażiż tiegħu, f’Jum il-Ħaddiem.
Fl-imgħoddi, fl-1 ta’ Mejju, il-ħaddiema fakkru l-kisbiet li għamlu.
Din is-sena, barra li jfakkru l-kisbiet, il-ħaddiema Maltin se jipprotestaw għat-telfien ta’ ħafna kisbiet.
Telf li qiegħed iseħħ minħabba s-sħubija fl-Unjoni skond il-ftehim li l-Gvern Malti ffirma fis-16 ta’ April tas-sena l-oħra.
Il-poplu Malti qed iħossu ttradut.
Ġie mwiegħed Rebbieha ġdida.
Minflok sab ruħu f’Xitwa qalila.
* Il-familji tal-ħaddiema tal-Menrad,
* dawk tal-ħaddiema tat-tarzni,
* dawk tal-ħaddiema tal-PBS,
* dawk tal-ħaddiema ta’ l-Air Malta,
* dawk tal-mijiet tal-ħaddiema l-oħra li ġew issensjati u li oħrajn ġarrbu telfien fil-pagi,
iħossuhom ittraduti.
HIJA l-politika ta’ l-Unjoni Ewropea dwar ix-xogħol u dwar il-kummerċ li qiegħda
* toħloq il-qagħad,
* tikkaġuna s-sensji,
* tnaqqas l-investiment,
* iddgħajjef is-servizzi soċjali u l-pensjonijiet u
* tfaqqar aktar nies,
* f’ħafna pajjiżi membri, inkluża Malta.
Għax l-Unjoni Ewropea qiegħda tinkoraġġixxi li l-industriji tal-manifattura jmorru fil-pajjiżi fejn jistgħu jisfruttaw il-ħaddiema b’pagi miżeri u kundizzjonijiet tax-xoghol mill-aghar.
Hemm jistghu jaghmlu profitti aktar.
Dan seta’ jsir biss bil-liberazzjoni tal-kapital, tal-ħruġ bla xkiel tal-flejjes kapitali mill-pajjiżi ta’ l-Unjoni Ewropea għall-pajjiżi fejn il-ħaddiema jiġu sfruttati mill-investituri ġejjin mill-Unjoni Ewropea.
Minflok tħares l-impjiegi u tkattarhom, il-politika ekonomika ta’ l-Unjoni Ewropea tħares biss il-profitt u jimpurtaha biss fejn jista’ jsir l-akbar profitt.
Malta, imsieħba fl-Unjoni Ewropea, issa saret vittma tal-politika ħażina ta’ l-Unjoni Ewropea.
U l-ħaddiema l-iktar li se jintlaqtu biha.
Għalhekk il-ħaddiema għandhom jipprotestaw fl-Ewwel ta’ Mejju kontra l-ftehim tas-sħubija li ma ħasibx kif iħares lill-ħaddiema Maltin mill-effetti ħżiena tal-politika żbaljata ta’ l-Unjoni.
DAWK li bħalna sena ilu kienu jaqblu li sħubija fl-Unjoni Ewropea ġġibilna gwaj kbir, qegħdin jitmasħnu għax għadd ta’ votanti Laburisti qegħdin jgħidu li ma jridux imorru jivvutaw f’Ġunju li ġej, għax huma kontra li Malta ssir kolonja tal-barrani.
Aħna tas-CNI għamilniha ċara li mhux se nindaħlu jivvotaw jew ma jivvotawx, u lil min jivvotaw f’Ġunju għall-Parlament Ewropew.
Għandna sostenituri Nazzjonalisti u Laburisti, u x’uħud jaħsbuha li għandhom jivvutaw, u oħrajn m’għandhomx.
Għalhekk se nħallu lil kulhħadd fil-liberta` jimxi skond il-fehma tiegħu.
Ma naqblux mal-kelliema tal-partiti politiċi Maltin li jippruvaw jagħtu l-impressjoni li d-deputati Maltin fil-Parlament Ewropew se jagħmlu l-għeġubijiet, meta huma se jkunu waħdiet fil-gruppi tal-partiti Soċjalisti jew Popolari Ewropej.
Naħsbu li ħadu qatgħa kbira meta fis-16 ta’ April dehret f’ġurnal lokali intervista mogħtija mill-President tal-Parlament Ewropew, Pat Cox.
Dan qal li dawk il-membri tal-Parlament Ewropew li se jibqgħu fit-trunċieri nazzjonali (jiġifieri, li moħhom biex jiġġieldu għal pajjiżhom), se jkunu qed jiġġieldu battalji mitlufa.
Żied jgħid ukoll li jekk il-membri parlamentari maħtura minn Malta se jiġu hawn jitkellmu dwar pajjiżhom – se jsibu ruħhom iżolati u ma jkollhom ebda influwenza!
Minbarra dan, Pat Cox irredikolana mal-ġurnalisti ta’ l-Unjoni Ewropea meta ddeskriviena bħala nies b’mentalita` parrokkjali u li naraw kollox iswed jew abjad!
Dan lilna jħassibna.
Kif se jilqgħu lid-deputati Maltin meta jiftħu ħalqhom biex ‘jiġġieldu għal Malta’, kif qegħdin jgħidu li se jagħmlu?
Dan qegħdin ngħiduh ħalli wara l-votazzjoni ta’ Ġunju, ma jkunx hemm min iwaħħal fina li ma kisibx appoġġ kbir tal-poplu.
Għandu jwaħħal fih innifsu u kif huwa magħmul il-Parlament Ewropew.
LI dan l-aħħar il-Mexxej Laburista reġa’ stqarr li d-deċiżjoni li ħa l-poplu Malti fl-aħħar elezzjoni (u b’hekk Malta se tkun membru ta’ l-Unjoni Ewropea) “kienet żbaljata”.
L-ewwel kumment tagħna:
jekk niftakru tajjeb, dik id-deċiżjoni ġiet sforz “l-ingann u l-qerq” li sar mill-Gvern Nazzjonalista, bl-għajnuna diretta ta’ l-Unjoni Ewropea.
Għalhekk ma kienet deċiżjoni demokratika xejn!
It-tieni kumment:
Jekk il-poplu ha deċiżjoni żbaljata, sinjal li issa se jbati minħabba d-deċiżjoni żbaljata.
Għandna dmir li nuru lill-poplu kemm kien żbaljat fid-deċiżjoni li ħa.
Eżempji diġa` għandna.
U dan għadu l-bidu.
B’hekk nikkonvinċu lill-maġġoranza tal-poplu biex darba oħra jappoġġa l-partit li kien wissa li niżbaljaw jekk nivvutaw favur sħubija fl-Unjoni.
It-tielet kumment:
la l-poplu żbalja, għaliex m’għandux ikollu l-opportunita` li jsewwi l-iżball li għamel, u jagħżel minflok “sħubija fl-Unjoni”, “sħubija ma’ l-Unjoni” (jew “partnership”)?
Kemm kien ikun aktar għaqli u koerenti kieku ttieħdet din il-linja mill-ewwel wara r-riżultat ta’ l-aħħar elezzjoni, u mhux intremiet mill-ewwel u bla ħsieb?
Aħna tas-CNI hekk narawhom l-affarijiet.
Min ikun fi żball, jagħmel li jista’ biex jirranġa u mhux jibqa’ fl-iżball.
Poplu jekk żbalja, jixraqlu min imexxih lura għat-triq it-tajba, mhux min imexxih fit-triq żbaljata.
Xtarru dawn sewwa
MAX Kohnstamm, dwar l-integrazzjoni Ewropea, qal hekk:
"L-iskop tas-servizzi ta' informazzjoni ta' l-Unjoni Ewropea hu - li żżarma dawk li jopponu l-integrazzjoni"!
Araw hux ghall-istess skop kien it-twaqqif ta' l-MIC f'Malta ffinanzjata mill-flus tal-Maltin u l-Għawdxin kollha - anki dawk li ma qablux mas-sħubija fl-UE!
John Major, ex-Prim Ministru Konservattiv Ingliz, fit-23 ta' April, 1992, qal:
"Isseħibna tard. Ir-regoli m'għamilnihomx aħna. Ħafna minnhom ma jgħoddux għalina".
Aħseb u ara kemm jgħoddu għalina li qegħdin nissieħbu 31 sena wara li l-Ingliterra ssieħbet, u se nibilgħu eluf kbar ta' regolamenti aktar milli kellhom l-Ingliżi jibilgħu 31 sena ilu.
U se nagħmlu dan f'daqqa u mill-ewwel.
X'indiġestjoni!
Il-Kostituzzjoni ta' l-Unjoni Ewropea
Analiżi kritika ta' l-Abbozz tal-Kostituzzjoni ta' l-UE
mill-Professur Anthony Coughlan ta' l-Universita` ta' Dublin
Kolp ieħor kontra l-Parlamenti Nazzjonali
It-tneħħija tal-veto f'27 oqsma oħra
Nru 13.
Fl-ABBOZZ tal-Kostituzzjoni, il-vot b'maġġoranza fil-Kunsill tal-Ministri se jieħu post l-unanimita` f'madwar 27 oqsma ġodda.
Dawn se jiżdiedu mal-l35 qasam li kienu diġa` maqbula fit-Trattat ta' Nizza fl-2002, u d-19-il qasam tat-Trattat ta' Amsterdam fl-1998.
Dawn l-oqsma ġodda jinkludu
* l-koperazzjoni ġuridika f'materji ċivili u kriminali;
* il-kontroll tal-fruntieri;
* l-immigrazzjoni u l-eżilju;
* il-protezzjoni ċivili;
* l-Europol u l-Eurojust;
* il-fondi strutturali u ta' koeżjoni;
* il-kultura;
* politika kummerċjali;
* l-enerġija; u
* l-inizjattivi tal-Ministru ta' l-Affarijiet Barranin ta' l-UE.
Qed jiġi propost li titwessa' b'mod kbir il-politika ta' l-Unjoni dwar il-kummerċ komuni, billi jsir bħala skop ta' l-UE "it-tneħħija progressiva ta' restrizzjonijiet fuq investiment dirett barrani".
Kif ukoll li jitbaxxew "other barriers", u mhux biss ta' dwana, li dwarhom l-UE tkun tista' tikkonkludi trattati internazzjonali b'vot tal-maġġoranza.
Dan jiftaħ it-triq biex l-UE tagħfas pajjiżi inqas żviluppati biex ineħħu l-kontrolli nazzjonali fuq investiment barrani, kif ukoll fuq servizzi tas-saħħa edukazzjoni u kultura, u jinkoraġġixxi l-privatizzazzjoni f'dawn l-oqsma.
L-Artiklu 14 jagħti poter lill-UE tadotta miżuri biex tikkordina l-politika ekonomika, il-politika tax-xogħol, u dik soċjali ta' l-istati membri.
L-Artikli III-62 u III-63 jipprovdu għal votazzjoni b'maġġoranza fuq taxxi tal-kumpaniji li għandhom x'jaqsmu ma koperazzjoni amministrattiva, il-ġlieda kontra firda fiskali, u evazjoni tat-taxxa, hekk kif il-Kunsill tal-Ministri jkun iddeċieda b'mod unanimu li dawn l-għanijiet huma mixtieqa.
Dan huwa l-feles li se jintuża biex l-UE tindaħal ukoll dwar it-taxxi interni tal-pajjiżi membri.
L-Artiklu III-157 jdaħħal politika ta' l-Unjoni dwar l-enerġija u jaħseb għal-liġijiet ta' sorsi oħra ta' enerġija.
X'uħud jibżgħu li dan se jagħti lil Brussels il-poter fuq ir-riżorsi nazzjonali taż-żejt u l-gass, fuq it-tfittxija tagħhom u l-liċenzji u n-negozjati dwarhom mal-pajjiżi tat-Tielet Dinja.
B'hekk il-politika nazzjonali tkun suġġetta għad-deċiżjonijiet ta' l-UE meħuda b'maġġoranza.
Ġurament ta' lealta` li jieħdu l-Membri Parlamentari kollha
Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).
Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.
Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).
Ġurament għall-qadi xieraq tal-kariga ta’ President.
Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).
Sezzjoni 6 tal-Kostituzzjoni ta' Malta
6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.
Artiklu I-6 tal-Kostituzzjoni ta' l-Unjoni Ewropea
Dritt ta' l-Unjoni
Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.
Tista' tafda lil min jikser il-ĠURAMENT tiegħu/tagħha?
Il-Ħamis, 29 ta’ April, 2004.
IRRIDU L'INDIPENDENZA MILL-UNJONI EWROPEA
e-mail: cnimalta at yahoo.co.uk
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat €5 flimkien ma' din il-formola lis-
Segretarju
Finanzjarju
CNI,
60A, Triq id-Dejqa,
Valletta
Isem .......................................................
Indirizz ..................................................
ID Numru...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ