NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Aktar tagħrif dwar l-Unjoni Ewropea

Xi snin ilu l-Unjoni Ewropea ddeċediet li tnaqqas l-ammont ta’ qamħ li l-pajjiżi ta’ l-Unjoni jistgħu jipproduċu, għax qalet li kien hawn produzzjoni żejda tal-qamħ.

Għalhekk iddeċidiet li għaxra fil-mija tar-raba ma kellux jinħadem u jinżera.

L-Unjoni ma tatx każ tal-miljuni bil-ġuħ li hawn fid-dinja u lanqas ma mpurtaha li aktar ma jkun hawn qamħ, ikun orħos il-prezz tiegħu.

Il-Ministri tal-Biedja tal-pajjiżi ta’ l-Unjoni aktar tard dan ix-xahar se jiddiskutu jwarrbux id-deċiżjoni ta’ l-għaxra fil-mija tar-raba’ ma jinħadimx, bit-tama li s-sena d-dieħla l-produzzjoni tal-qamħ tiżdied bejn għaxar u 17-il miljun tunellata.

Skond il-Politika Komuni tas-Sajd ta’ l-Unjoni Ewropea, hemm kwota ta kemm ħut jista’ jitniżżel l-art u x’daqs ikun.

Ħut li jkun iżgħar mid-daqs deċiż mill-Unjoni u ħut li jinqabad aktar mill-kwota, irid jintrema lura fil-baħar.

Fir-reġjun ta’ l-English Channel u l-ibħra ta’ Wales u l-Irlanda, madwar 60 fil-mija tal-ħut li jinqabad, jintrema lura mejjet, skond dak li trid l-Unjoni.

Dan huwa ħela skandaluż u telf ta’ ikel bnin u wkoll inaqqas ir-riproduzzjoni tal-ħut li kieku ma jintremix mejjet.

Il-Finlandja qiegħda tipprotesta kontra l-proposta ta’ l-Unjoni Ewropea li tesiġi li fl-Unjoni kollha min jingħata permess li jkollu senter, irid ikun għalaq it-18-il sena.

Il-Finlandja, fejn l-età legali hija ta’ 15-il sena, qiegħda ssostni li din il-proposta ta’ l-Unjoni tippenalizza lill-kaċċaturi “teenagers” u se tqajjem reazzjoni qawwija kontra l-Unjoni Ewropea.

Minħabba l-politika industrijali u kummerċjali ta’ l-Unjoni Ewropea, prodotti li qabel kienu jinħadmu fil-pajjiżi ta’ l-Unjoni, issa m’għadhomx jinħadmu.

Nofs l-ammont kollu tal-ġugarelli li jinbiegħu fis-swieq ta’ l-Unjoni, huma impurtati miċ-Ċina, fejn il-kumpaniji tal-pajjiżi tal-Punent qegħdin jisfruttaw ix-xogħol irħis tal-ħaddiema, nisa u tfal Ċiniżi.

Il-Kummissjoni Ewropea ta’ l-Unjoni l-ġimgħa l-oħra, instabet mill-Qorti ta’ l-Unjoni ħatja li kkommettiet żball meta ċaħdet lill-ġurnalisti milli jkollhom aċċess għal dokumenti li l-Kummissjoni ssottomettiet lill-Qorti f’kawżi bejn għadd ta’ kumpaniji kummerċjali u l-Kummissjoni.

Iċ-ċaħda tad-dokumenti lill-ġurnalisti wriet kemm ma kienu jiswew xejn ir-regolamenti li l-Unjoni għamlet fl-2001 dwar it-trasparenza tad-dokumenti ta’ l-Unjoni.

L-Assoċjazzjoni Internazzjonali tal-Ġurnalisti, li kienet ħarrket lill-Kummissjoni Ewropea, sostniet wara s-sentenza tal-Qorti, li se tkompli tagħfas lill-Unjoni għal trasparenza f’ħidmitha, għax skond id-demokrazija, l-Unjoni m’għadhiex tkun sigrieta ħlief fejn jidħol tagħrif kunfidenzjali kummerċjali.

Issa f’Ottubru li ġej l-Kummissjoni Ewropea u l-Ukrajna se jagħmlu taħdidiet biex isaħħu l-“Partnership agreement” li kienu għamlu xi snin ilu.

Dan il-“Partnership Agreement” kien sar wara dik li kienet magħrufa bħala l-“Orange Revolution” fil-2004 li tat lil Victor Yushcenko t-tmexxija tal-pajjiż.

Il-“Partnership Agreement” ta’ l-Ukrajna huwa parti mill-politika magħrufa bħala “Neighbourhood Policy” li l-Unjoni Ewropea tapplika għall-pajjiżi li huma ġirien tagħha.

Kritika f’waqtha tat-trattat ta’ riforma

Il-ġurnalist Ingliż Christopher Booker huwa magħruf bħala wieħed mill-aqwa kritiċi ta’ l-Unjoni Ewropea.

Ma setax jonqos li jikkummenta fuq it-trattat il-ġdid (magħruf bħala Trattat ta’ Riforma) li l-mexxejja tal-pajjiżi ta’ l-Unjoni ftehmu dwaru fl-aħħar laqgħa għolja li kellhom f’Berlin, f’Ġunju li għadda.

Booker qajjem ħafna punti importanti dwar it-Trattat ġdid ta’ Riforma ta’ l-Unjoni.

Punt ewlieni huwa dwar it-tibdil li se jseħħ fil-Kunsill Ewropew ta’ l-Unjoni, li jiġbor fih il-mexxejja tal-pajjiżi kollha tagħha, li jiltaqgħu kull tant xhur f’laqgħat għolja (summits).

Sal-lum il-Kunsill Ewropew serva biex fih kull mexxej jirrappreżenta l-Gvern tal-pajjiż u jħares l-interessi nazzjonali ta’ pajjiżu fil-kwistjonijiet kollha li jiġu diskussi u deċiżi.

Għalhekk il-laqgħat jitqisu intergovernattivi, jiġifieri, bejn il-gvernijiet.

Christopher Booker ifisser kif it-Trattat il-ġdid se jbiddel l-istatus tal-Kunsill Ewropew.

It-Trattat se jagħmel lill-Kunsill uffiċjalment wieħed mill-istituzzjonijiet jew organi ta’ l-Unjoni, l-istess bħalma huma l-Kummissjoni Ewropea u l-Parlament Ewropew.

Bis-setgħat u d-doveri li se jingħata, il-Kunsill Ewropew se jiffunzjona bħall-Kabinett tal-Gvern ta’ l-Unjoni l-ġdida li se tinbet jekk it-Trattat jidħol fis-seħħ.

Booker isostni dan għax, fil-waqt li sal-lum kull mexxej ta’ pajjiż ta’ l-Unjoni, fil-laqgħat tal-Kunsill Ewropew jirrappreżenta lil pajjiżu u jħares l-interessi nazzjonali tiegħu, bit-Trattat il-ġdid il-lealtà ta’ kull mexxej tkun lejn l-Unjoni Ewropea.

L-iskop ewlieni tal-ħidma tiegħu fil-laqgħat tal-Kunsill Ewropew issa se jkun li jippromwovi l-valuri ta’ l-Unjoni, li jmexxi ’l quddiem l-għanijiet tagħha, jaqdi l-interessi tagħha u li dan l-iskop jiġi qabel kull lealtà għal pajjiżu.

Skond Booker, l-għanijiet ta’ l-Unjoni Ewropea, fit-Trattat il-ġdid huma mfisser b’mod tant wisa’ li tista’ tgħid m’hemm xejn li ma jistax jitqies li jagħmel sehem mill-għanijiet ta’ l-Unjoni.

It-Trattat jagħmilha ċara li l-Unjoni Ewropea s’issa jkollha s-setgħa li tfassal politika fuq kważi kollox, fil-laqgħat tal-Kunsill Ewropew.

It-Trattat il-ġdid jagħmilha possibbli li l-Kunsill Ewropew jagħti setgħat ġodda lill-Unjoni Ewropea li m’għandhiex illum fit-trattati tagħha.

Il-Kunsill Ewropew qiegħed bit-Trattat il-ġdid jingħata bħal “cheque” vojt (blank cheque) li fih jista’ jinkiteb l-ammont ta’ flus li l-kunsill ikun irid u meta jrid.

Bħala eżempju ta’ kif il-Kunsill Ewropew jista’ juża din is-setgħa mogħtija lilu mit-Trattat il-ġdid, Booker isemmi l-każ li l-Kunsill jiddeċiedi li l-Unjoni Ewropea tibda tikseb fondi direttament mingħand iċ-ċittadini tal-pajjiżi ta’ l-Unjoni billi timponi fuqhom taxxa.

Illum l-Unjoni dan m’għandhiex setgħa tagħmlu, iżda bit-Trattat il-ġdid jekk jidħol fis-seħħ, il-Kunsill jista’ jagħti lill-Unjoni li tagħmel taxxa bħal din.

Għalhekk Christopher Booker għandu raġun jistqarr li t-Trattat il-ġdid jixhed ir-rieda ta’ l-Unjoni Ewropea li tiggverna hija aktar u aktar lill-pajjiżi membri u li jagħtiha setgħat kważi bla limiti fuqhom.

Huwa jqis li dan it-Trattat, jekk iseħħ, ikun ifisser “kolp ta’ stat” li jdgħajjef il-qagħda tal-gvernijiet tal-pajjiżi membri ta’ l-Unjoni u jġib fix-xejn id-demokrazija fihom.

Nemmnu li l-maġġoranza tal-Maltin ma japprovawx li t-Trattat il-ġdid jidħol fis-seħħ.

Se jaħslu moħħ l-istudenti dwar l-Ewro

Ilna ngħidu li jridu jaħslu moħħ it-tfal u l-istudenti fl-iskejjel tagħna dwar ħwejjeġ li għandhom x’jaqsmu mas-sħubija ta’ Malta fl-Unjoni Ewropea.

Konna għedna li jridu jdaħħlu l-istudju dwar l-Unjoni wara li kienu daħħlu l-istudju dwar l-Ewropa (European Studies) fl-iskejjel tagħna.

Għalkemm s’issa għadhom ma ddaħlux fil-kurrikulu ta’ l-iskejjel l-istudju dwar l-UE, sabu x-xoqqa f’moxta ħalli mill-bidu ta’ din is-sena skolastika t-tfal u l-istudenti jsibu suġġett ġdid li jridu jistudjaw – dak kollu li għandu x’jaqsam mal-munita Ewro.

Skond il-gazzetta li joħroġ kull tant żmien il-Kumitat responsabbli mid-dħul ta’ l-Ewro f’pajjiżna – in-NECC – it-tfal u l-istudenti Maltin u Għawdxin “mhux biss se jitgħallmu dwar il-muniti u l-karti ta’ l-Ewro, jew il-valur ta’ l-Ewro fil-ħajja ta’ kuljum, iżda se jiskopru wkoll l-istorja ta’ l-Ewro, għax inħolqot din il-munita ġdida fl-Ewropa u l-benefiċċji ta’ l-adozzjoni ta’ din il-munita internazzjonali għal pajjiżna”.

Kieku l-iskop ta’ l-introduzzjoni ta’ dan is-suġġett ġdid kien biss li t-tfal u l-istudenti jitgħallmu dwar il-valur tal-muniti u l-karti ta’ l-Ewro ħalli jkunu jistgħu jqabbluhom mal-valur tal-muniti u l-karti tal-lira Maltija li se tispiċċa, wieħed jifhimha.

Iżda li jridu jdaħħlu f’moħħ it-tfal u l-istudenti anke “l-istorja ta’ l-Ewro, għax inħolqot u l-benefiċċji ta’ l-adozzjoni ta’ din il-munita”, huwa biss eżerċizzju ta’ “brain-washing”, jew ħasil tal-moħħ, tat-tfal u l-istudenti Maltin u Għawdxin.

Lanqas għal mument wieħed biss m’aħna se nemmnu li se jgħallmu lit-tfal u l-istudenti l-verità għaliex inħolqot l-Ewro.

Jew li se jgħidulhom ukoll l-iżvantaġġi tal-munita waħdanija għall-pajjiżi kollha ta’ l-UE, barra li sejrin jgħidulhom x’inhuma l-benefiċċji.

Aktar minn tgħalim, dan se jkun eżerċizzju ta’ propaganda, li għax mhux se jkollu t-tagħrif sħiħ, se jkun misinformazzjoni misqija lit-tfal u l-istudenti tagħna.

Biex daħħlu fil-kurrikulu ta’ l-iskejjel ta’ pajjiżna dan is-suġġett ġdid, bilfors kellu jitnaqqas il-ħin fuq xi suġġett jew suġġetti oħrajn.

Tajjeb ukoll li wieħed ikun jaf jekk dan is-suġġett ġdid ta’ propaganda ta’ l-UE, hux se jibqa’ parti mill-kurrikulu anki fis-snin li ġejjin.

La d-Dipartiment u lanqas il-Ministeru ta’ l-Edukazzjoni ma taw tagħrif dwar dan is-suġġett ġdid.

Nistennew li r-rappreżentanti tal-poplu jinsistu li t-tagħrif meħtieġ jingħata bla dewmien.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Il-qamħ

Is-sajd

Kaċċa

Importazzjoni

Trasparenza

Partnership

Se jaħslu moħħ l-istudenti dwar l-Ewro