MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Mhux minnu li ma nistgħux noħorġu mill-Unjoni Ewropea.

Araw dan il-video tal-Parlament Ewropew kif nistgħu noħorġu

Il-Kanċellier Ġermaniż, Angela Merkel, il-ġimgħa l-oħra fil-Parlament Ġermaniż iġġustifikat is-self ta’ biljuni ta’ ewro li l-Ġermanja se tagħti lill-Greċja u lill-Fond tal-Istabbiltà tal-Ekonomija taż-Żona Ewro, billi qalet li jekk l-ewro tfalli, tfalli magħha l-Unjoni Ewropea.

Merkel għamlet din l-istqarrija meta taf li waqt li hemm 16-il pajjiż membru tal-Unjoni Ewropea li huma fiż-Żona Ewro, hemm 11-il pajjiż ieħor membri tal-Unjoni Ewropea li m’humiex fiż-Żona Ewro.

Fost dawn hemm l-Ingilterra, l-Iżvezja u d-Danimarka.

Din l-istqarrija tal-Merkel tixhed kemm il-kriżi tal-ewro hija gravi biex il-Kanċellier tqis li tista’ tfalli jekk il-pajjiżi taż-Żona Ewro, flimkien mal-Bank Ċentrali tal-Unjoni Ewropea, il-Fond Monetarju Internazzjonali (IMF) u l-Unjoni Ewropea stess ma joħorġux €110 biljun u €750 biljun għall-istabbilità finanzjarja tal-Greċja u tal-pajjiżi tal-Unjoni Ewropea li jsibu ruħhom f’qagħda finanzjarja ħażina u jistgħu jfallu.

Skont il-Ministru tal-Finanzi Tonio Fenech, sehem Malta se jkun ta’ €74 miljun u bejn €350 u €400 miljun.

Malta se toħroġ €74 miljun u bejn €350 u €400 miljun biex tgħin lill-munita ewro milli tfalli.

Dan il-fatt juri kemm kien falż id-diskors ta’ m’alla li daħħalna l-ewro biex insalvaw fiż-żmien ir-riċessjoni internazzjonali li hawn.

 Minflok l-ewro salvatna, l-ewro saret mażżra u piż għalina, tridna ngħinuha ħalli ssalva hija u l-Unjoni Ewropea.

Ħafna huma l-pajjiżi tal-Unjoni Ewropea li jinsabu f’qagħda finanzjarja kerha b’dejn kbir akkumulat fuq medda ta’ snin, aktar minn 60% tal-Prodott Gross Domestiku (PGD) u/jew żbilanċ kull sena (defiċit) ogħla aktar minn 3% tal-istess PGD, bi ksur tar-regoli tal-Patt ta’ Tkabbir u Stabbilità tal-Unjoni Ewropea skont il-ftehim ta’ Maastricht.

Il-lista ta’ dawn il-pajjiżi li mhumiex skont ir-regoli tal-Unjoni Ewropea hija twila

* u tinkludi barra lil Malta,

* lill-Ġermanja,

* Franza,

* l-Ingilterra,

* l-Italja,

* Spanja,

* l-Irlanda,

* il-Greċja,

* Portugall,

* l-Ungerija,

* ir-Rumanija,

* Latvja

* u oħrajn.

X’uħud minn dawn il-pajjiżi tal-Unjoni Ewropea

* kellhom jagħqu għall-għajnuna mill-Fond Monetarju Internazzjonali

* u joqgħodu għall-kundizzjonijiet ħorox tiegħu,

* inklużi tnaqqis fil-pagi,

* fil-pensjonijiet u

* fil-benefiċċji soċjali,

* u privatizzazzjoni

* u telfien ta’ impjiegi.

Il-qgħad tela’ għal aktar minn 23 miljun ħaddiema u l-miljuni ta’ familji li jgħixu fil-perilu ta’ faqar huma ħafna aktar.

Tista’ tgħid li l-Unjoni Ewropea hija unjoni ta’ pajjiżi midjunin,

* ta’ qgħad kbir

* u ta’ faqar mifrux,

* u minflok sejrin ’il quddiem,

* sejrin lura bħal ġranċ.

Diżgrazzjatament magħha sseħiba u magħha sejrin ħażin waqt li b’irresponsabbiltà kbira niftaħru bħal Ġaħan li sejrin tajjeb.

Bl-iskuża li jirdu jsalvaw l-ewro,

* il-mexxejja tal-Unjoni Ewropea

* u tal-akbar żewġ pajjiżi membri tal-Unjoni Ewropea,

* il-Ġermanja u Franza,

* qegħdin isostnu li l-Unjoni Ewropea

* jeħtieġilha tikseb aktar kontroll fuq il-Gvernijiet tal-pajjiżi membri

* billi dawn ikomplu jċedu aktar mill-ftit sovranità li baqa’.

Huma qegħdin jisħqu li l-Unjoni Ewropea għandha jkollha t-tmexxija ekonomika (‘economic goverment’) jew li l-Franċiżi jsejjħu (‘gouvernement economique’) tas-27 pajjiżi membri.

Bħala l-ewwel pass qegħdin jipproponu li kull gvern irid l-ewwel iressaq il-baġit quddiem il-Kummissjoni Ewropea u mbagħad quddiem il-Kunsill tal-Ministri tal-Finanzi tal-Unjoni Ewropea, u biss wara li tkun approvata, ikun jista’ jressaqha fil-Parlament Nazzjonali.

Din il-proposta li l-Unjoni Ewropea trid l-ewwel tapprova l-baġit tal-Gvern Malti qabel ma dan ikun jista’ jressaqha fil-Parlament Malta hija umiljazzjoni nazzjonali, u toħodna lura għaż-żmien ta’ qabel ma ksibna l-awtonomija fit-tmexxija ta’ ħwejjiġna mingħand il-Gvern Ingliż.

B’sogħba kbira, u fl-istess ħin b’rabja kbira, jkollna nistqarru li tkexkixna meta smajna lill-Prim Ministru u lill-Ministru tal-Finanzi tagħna jappoġġjaw u jfaħħru din il-proposta.

Nittamaw li l-Maltin u l-Għawdxin kollha li baqagħlhom sens ta’ xi tfisser nazzjoni indipendenti u ħieles, jirribellaw kontra din iċ-ċaħda tas-sovranità nazzjonali u tas-supremażija tar-rieda tal-maġġoranza tal-poplu kif rappreżentat fil-Parlament Malti.

Mintoff u Borg Olivier ma stinkawx biex aħna l-Maltin u l-Għawdxin inkunu indipendenti u ħielsa b’rajna f’idejna, biex jiġi Fenech Adami u Gonzi jerġgħu jġibuna maħkumin mill-barranin.

Se joqgħodu anki għal dan it-tradiment tas-sovranità popolari l-membri tal-Parlament tagħna?

Qiegħda sewwa l-Unjoni Ewropea, kif Alla jridha!

Lill-Gvern Grieg qaltlu

* biex inaqqas kemm irid u kemm jiflaħ il-pagi

* u l-kundizzjonijiet tax-xogħol tal-ħaddiema,

* biex inaqqas il-pensjonijiet

* u jtella’ l-età tal-pensjoni għal 65 sena,

* biex inaqqas il-ħlasijiet tas-servizzi soċjali,

* biex jiffriża l-pagi

* u biex inaqqas kemm jiflaħ in-numru tal-impjegati mal-Gvern.

Fi ftit kliem l-Unjoni Ewropea ma jimportahiex jekk il-klassi tal-ħaddiema Griega ssir klassi ta’ tallaba jew le.

Ma jimportahiex jekk il-klassi tal-ħaddiema Griega tmutx bil-ġuħ jew bil-għaks.

L-aqwa li ma tmissx in-nefqa militari tagħha.

Biex tkun tista’ tixtri l-armamenti mingħand il-produtturi ta’ armamenti Ewropej, l-aktar il-Ġermaniżi u l-Franċiżi u s-sidien tagħhom ikomplu jistagħnaw u jissaħħu finanzjarjament.

Biex imbagħad dawn l-armamenti jintużaw mill-armata Griega fi ħdan in-NATO fl-Iraq u fl-Afghanistan – żewġ pajjiżi li lill-Greċja fl-istorja riċenti tagħha m’għamlulha xejn.

L-istess bħalma qatt m’għamlu xejn kontra l-pajjiżi kollha tal-Unjoni Ewropea u dawk taż-Żona Ewro.

Dan li għidt dwar kif tittratta l-Unjoni Ewropea mal-Greċja, jgħodd ukoll għall-pajjiżi ż-żgħar kollha tal-Unjoni Ewropea u taż-Żona Ewro.

L-ewwel u qabel kollox għall-Unjoni Ewropea jiġi l-militariżmu.

In-nefqa militari ma jnaqqsuhiex.

Inaqqsu biss in-nefqa tas-servizzi soċjali u dak kollu li jmur kontra l-interessi tal-ħaddiema.

Din mhijiex Unjoni Ewropea soċjali.

Din hija Unjoni Kapitalista sfrenata li l-anqas biss tħalli lill-gvernijiet joħolqu x-xogħol huma, jekk il-privat ifalli milli jagħmel dan.

Jippreferu jarawhom fil-kju tan-nies bla xogħol quddiem l-uffiċji tar-reġistrazzjoni milli jaraw lill-ħaddiema jaħdmu.

Għax iż-żaqq il-mimlija qatt ma tat każ iż-żaqq vojta.

Ara xi ġralu l-Partit Laburista Ingliż, tilef l-elezzjoni għax ma baqax partit soċjalista tal-Welfare State, tal-ħaddiema.

Il-ħaddiema Ingliżi riedu partit verament Laburista iżda l-Partit Laburista Ingliż sar partit kapitalista u partit favur il-gwerer, għax il-gwerer jagħmlu sinjuri s-sidien tal-fabbriki tal-armamenti u tal-uniformijiet tas-suldati u l-baħrin.

Allura l-Ingliżi rraġunaw li b’partit kapitalista jtellgħu fil-gvern lill-Konservattivi.

B’hekk taw tagħlima lill-Partit Laburista Ingliż li ma baqgħax partit tal-ħaddiema.

Sar partit tas-sinjuri, għax Blair u Brown kienu Laburisti fl-isem biss.

Għalhekk il-ħaddiema Ingliżi tellquhom u pattuhielhom għax neħħewhom mill-gvern.

L-Unjoni Ewropea ma jistax ikun tibqa’ unjoni militarista – kapitalista fejn flus għal gwerra jsibu u flus għall-klassi tal-ħaddiema ma jsibux.

Fl-Unjoni Ewropea hemm 23 miljun bla xogħol.

Hemm korruzzjoni kbira u evażjoni tat-taxxi mill-klassi tas-sinjuri.

Mal-Unjoni Ewropea, il-klassi tal-ħaddiema teħel dejjem għall-kriżijiet.

Hija trid li kull fejn hemm Welfare State, titkisser u tiżżarma, bl-iskuża li pajjiżi ma jifilħux għall-ispiża.

Għalhekk lill-Gvern Grieg, l-Unjoni Ewropea qaltu jnaqqas in-nefqa militari.

Dik le.

Dik tmisshiex.

Ixtri armamenti għal kontra l-irvellijiet kontra l-gvernijiet u għall-gwerer tan-NATO kemm trid u kemm jogħġbok.

Dawn ir-rġaunijiet li wassluni għall-fehma qawwija li Malta tagħmel tajjeb jekk tfittex toħroġ mill-Unjoni Ewropea u miż-Żona Ewro.

L-Unjoni Ewropea ilha s-snin tipprova toħloq “ċittadini Ewropej” flok ċittadini Taljani, Franċiżi, Ġermaniżi u oħrajn, iżda baqgħet ma rnexxilhiex.

Spiss kien isir stħarriġ fil-pajjiżi membri tal-Unjoni Ewropea li fihom kienu jistaqsu lin-nies, speċjalment liż-żgħażagħ, jekk iħossu li huma “Ewropej” aktar milli huma t-Taljani, il-Franċiżi, il-Ġermaniżi u mill-pajjiżi membri tal-Unjoni Ewropea.

Ir-risposti dejjem kienu li ċ-ċittadini tal-pajjiżi membri tal-Unjoni Ewropea jħossu ruħhom ċittadini Taljani, Franċiżi, Ġermaniżi u l-istess l-oħrajn, qabel li huma wkoll Ewropej.

Kien għalhekk li ttieħdet id-deċiżjoni li jibdew strateġija ġdida immirata lejn it-tfal żgħar li kienu għadhom fl-iskola, għax huwa ferm aktar faċli li timmanipula l-imħuħ tat-tfal milli ta’ dak li diġà jkunu kibru.

Kienet din l-istrateġija li wasslet għat-twaqqif tal-“European Studies” fl-iskejjel kollha, kemm fl-istati membri tal-Unjoni Ewropea u anki f’dawk il-pajjiżi li applikaw biex jissieħbu fl-Unjoni Ewropea, inkluż Malta.

Aħna tas-CNI mill-ewwel għedna x’għan kien hemm wara d-dħul tal-“European Studies” fl-iskejjel.

Bħalma kien qal il-Kelliem tal-Oppożizzjoni.

Dakinhar il-Kummissjoi Ewropea stħat tgħid li riedet lit-tfal jistudjaw dwar l-Unjoni Ewropea.

L-aħħar attentat tal-UE biex taħsel moħħ it-tfal Maltin u Għawdxin tnieda dan l-aħħar bil-proġett “L-avventuri maġiċi ta’ Tommy u Rosy” li jinkludi film ta’ 15-il minuta u ktejjeb li jakkompanja dan il-filmat.

Is-Segretarju Parlamentari Chris Said nieda dan l-attakk propagandistiku fuq moħħ it-tfal tagħna fl-Eden Century Cinemas f’San Ġiljan waqt il-wirja ta’ dan il-‘cartoon’.

L-Onorevoli Said għamel diskors politiku propogandistiku dwar l-Unjoni Ewropea li fih semma x-xinxilli tas-soltu tal-Unjoni Ewropea u l-gidba faħxija tas-soltu li “l-Unjoni Ewropea fissret 60 sena ta’ paċi fil-kontinent Ewropew”.

Meta kienet il-biża’ reċiproka li kellhom il-pajjiżi tal-Punent, immexxijin mill-Istati Uniti tal-Amerika magħqudin fl-alleanza militari tan-NATO, kif ukoll l-Unjoni Sovjetika bil-pajjiżi dipendenti tagħha, taħt l-umbrella militari tal-Patt ta’ Varsavja.

Iż-żewġ blokki kienu jafu li gwerra oħra kienet tfisser il-qerda taż-żewġ blokki.

Kienet din il-biża’ li żammet il-paċi – jekk ninsew il-gwerer limitati li ġraw fl-Ewropa – u mhux fl-UE.

Tgħid lit-tfal tal-iskejjel tagħna se jgħidulhom li l-iskop tal-ħolqien tal-munita waħda Ewropea, l-ewro, kellha aktar skop politiku milli wieħed ekonomiku, għax mil-lat ekonomiku ma jagħmilx sens li toħloq munita waħda għal ħafna pajjiżi b’ekonomiji differenti minn xulxin?

Sadanittant sirna nafu li l-MEUSAC, li qiegħda sservi biex tinfirex kemm jista’ jkun il-propoganda favur l-Unjoni Ewropea f’pajjiżna, f’dawn l-erba’ snin li ġejjin.

Dan kollu jfakkarni kif kien jaħdem il-Gvern Nażista fil-Ġermanja qabel l-aħħar gwerra dinjija.

Il-Ħamis 27 ta’ Mejju 2010

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ