MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ma trid ebda miżuri ta’ kontroll tal-prezzijiet li ma jħallux is-suq jaħdem regolarment permezz tal-kompetizzjoni ħielsa li tiżgura l-orħos prezzijiet. 

Fl-istess ħin l-Unjoni tgħolli l-prezzijiet bit-taxxi li ġġiegħel lill-pajjiżi membri tagħha jagħmlu

* fuq il-prodotti u s-servizzi,

* bħat-taxxa fuq il-valur miżjud (VAT),

* il-‘levies’ fuq il-prodotti taż-żejt u

* t-taxxa għall-ħarsien ta’ l-ambjent, l-ECO Tax.

Dawn it-taxxi indiretti li l-Unjoni Ewropea tinsisti li jsiru, jgħollu l-ħajja għal kulħadd, iżda jagħfsu l-aktar lil min għandu dħul baxx u jonfoq kollox biex jista’ jgħajjex lill-familja. 

Jekk nikkunsidraw x‘jiġri fil-każ tal-VAT, insibu li min jgħix b’paga minima, xorta waħda jħallas 18 fil-mija tagħha f’taxxa tal-VAT, minkejja li kulħadd jaqbel li min għandu paga minima, m’għandux iħallas taxxa fuq id-dħul (income tax).

Għalhekk it-taxxa tal-VAT fuq prodotti u servizzi essenzjali u taxxi indiretti oħrajn bħala, li l-Unjoni Ewropea tant tiddiletta bihom, huma anti-soċjali għax jgħakksu lil min ma jistgħax fis-soċjetà, waqt li mhux lil min jista’, jiflaħ għalihom.

Min għandu dħul biss ta’ €100, jekk toħodlu 18 minnhom bil-VAT, iħossuhom ħafna aktar minn min għandu dħul ta’ €1,000 u toħodlu 180 minnhom, bil-VAT, għax dan jibqagħlu €820, filwaqt li l-ieħor jibqagħlu €82 biss biex jgħix bihom.

L-Unjoni Ewropea ma jimportahiex mill-impatt soċjali tat-taxxi indiretti li timponi fuq il-poplu, għax għaliha li jimportaha hu li huma l-aqwa mezz kif il-Gvern idaħħal il-fondi, fil-waqt li huma wkoll l-aħjar mod kif jiżguraw aktar dħul lil min ibiegħ il-prodotti u s-servizzi.

L-Unjoni, il-gvernijiet, il-bejjiegħa tal-prodotti u s-servizzi jafu u jgawdu mill-fatt li aktar ma jkun għoli il-prezz tal-prodott jew servizz, aktar se jkun l-ammont tat-taxxa miġbura, kif ukoll l-ammont tal-qligħ magħmul fuq il-prodott mibjugħ jew is-servizz mogħti.

Meta l-VAT hija 18 fil-mija u r-rata tal-profitt għal min ibiegħ l-oġġett jew jagħti s-servizz hija għaxra fil-mija, jekk il-valur ta’ l-oġġett jew tas-servizz ikun €100, il-Gvern idaħħal €18 mill-VAT u min ibiegħ l-oġġett jew jagħti s-servizz jagħmel qligħ ta’ €10. 

Iżda jekk il-valur ta’ l-istess oġġett jew servizz jogħla għal €150, il-Gvern idaħħal €27 mill-VAT u min ibiegħ l-oġġett jew is-servizz, jagħmel qligħ ta’ €15.

Dan l-eżempju juri li għall-Gvern u għal min ibiegħ il-prodotti jew jagħti servizzi, aktar ma jogħlew il-prezzijiet, aktar jaqblilhom għax idaħħlu aktar, bil-maqlub ta’ x’jaqbel lill-konsumaturi, il-poplu inġenerali.

L-Unjoni Ewropea taf dan kollu u trid li dan kollu u s-sehem tagħha mit-taxxa tal-VAT jikber aktar ma jkun kbir l-ammont miġbur.

L-Unjoni mhix qiegħda tfittex l-interessi tal-konsumaturi – tal-poplu inġenerali – meta tisħaq li m’għandu jkun hemm ebda forma ta’ kontroll tal-prezzijiet li jiffishom is-suq u l-kompetizzjoni ħielsa.

Ir-riżultat ta’ din il-politika ta’ l-Unjoni Ewropea hu li l-prezzijiet dejjem jogħlew, il-gvernijiet idaħħlu aktar mit-taxxi, min ibiegħ jagħmel aktar qligħ u s-sehem ta’ l-Unjoni Ewropea mit-taxxa jkun akbar, waqt li l-poplu jitgħakkes aktar.

M’hemmx kelma oħra ħlief “viltà” Eddy Privitera

Nhar il-Ħamis, 20 ta’ Marzu, ħarġet l-aħbar li l-Gvern reġa’ daħħal lil Malta fil-Partnership for Peace ta’ l-Unjoni Ewropea. 

Il-Gvern Laburista fl-1996 kien irtira lill-pajjiżna minn din l-organizzazzjoni militari, fl-ewwel jiem tiegħu.

Fit-titlu ta’ din il-kitba ddiskrivejt din id-deċiżjoni tal-Gvern “viltà” minħabba dawn ir-raġunijiet.

L-ewwel – Il-Prim Ministru ilu jaf x’kien bi ħsiebu jagħmel jekk jirbaħ l-elezzjoni. 

Mhux biss, iżda żgur kien informa lill-Unjoni Ewropea żmien ilu x’kien bi ħsiebu jagħmel.

It-tieni – Il-Prim Ministru ilu erba’ snin fil-kariga sadanittant ma daħħalx lil Malta fil-Partnership for Peace, iżda ħalla sakemm tgħaddi l-elezzjoni. 

Ir-raġuni hija ċara daqs il-kristall. 

Beża’ li jekk jagħmel hekk, kien se jsib ma’ wiċċu kritika ħarxa u se jkunu eluf ta’ votanti, speċjalment ġenituri ta’ membri fil-Forzi Armati, li xejn ma kienu se jieħdu pjaċir u allura seta’ jitlef il-voti tagħhom.

It-tielet – Din id-deċiżjoni ma dehret imkien fil-programm elettorali tal-Partit Nazzjonalista. 

Minkejja dan il-fatt, kienet l-ewwel deċiżjoni li ħa l-Kabinett il-ġdid. 

Possibbli, bħalma nstab post għal 353 wegħda elettorali, ma setgħax żdiedet wegħda oħra, li jdaħħlu lil Malta fil-Partnership for Peace?

Huwa dan il-ħabi mill-poplu ta’ dak li jkun fi ħsiebu jagħmel, iżda li jaf li mhux se jkun popolari mal-votanti, waqt li juri biss dak li jemmen li se jgħammex l-għajnejn u jiġbed il-voti, bħall-wegħda tal-ħames bozoz, li ġġiegħlni nuża l-kelma “viltà”.

Niskanta wkoll kif ma jistħux isemmu l-kelma “Partnership”, meta għall-Gvern l-kelma “Partnership” ma teżistix fid-dizjunarju ta’ l-Unjoni Ewropea. 

Jekk allura teżisti “Partnership” f’dak li għandu x’jaqsam ma’ assoċjazzjonijiet militari ta’ l-Unjoni Ewropea, ma teżistix ukoll f’dak li għandu x’jaqsam mal-kummerċ, ma’ relazzjonijiet ma pajjiżi barra mill-Unjoni Ewropea, fil-qasam edukattiv u f’ħafna oqsma oħrajn?

Din l-ewwel deċiżjoni tal-Gvern qabel biss fetaħ il-Parlament u lejlet il-Ġimgħa l-Kbira (meta ma joħorġux ġurnali) u meta ma jkunx hemm ġurnali minħabba l-Ġimgħa l-Kbira, żgur li ħasdet lil ħafna nies. 

Inqis din id-deċiżjoni bħala mera ta’ x’ġej għall-poplu Malti fl-ewwel sentejn jew tlieta ta’ din il-leġistratura.

Min emmen il-billbord “Moħħok mistriħ”, se jinduna li issa moħħu aktar se jinkwieta milli jistrieħ.

U tabilħaqq, jekk għall-Gvern, il-fatt li reġa’ daħħal lil Malta f’organizzazzjoni militari ta’ l-Unjoni Ewropea, ma jiksirx in-newtralità ta’ pajjiżna, meta s-suldati se jkunu jifformaw parti mill-kontinġent militari Taljan, li żgur mhux kontinġent newtrali, jista’ l-Gvern jgħidilna x’jifhem bil-kelma “newtralità”?

Il-Partnership for Peace – alleanza militari Karmenu Mifsud Bonnici

Il-Gvern se jikser il-Kostituzzjoni ta’ Malta. 

Għax il-Kostituzzjoni tgħid li Malta għandha tirrifjuta li tieħu sehem f’alleanzi militari. 

Il-Gvern se jsieħeb lil Malta fl-alleanza militari Partnership for Peace tan-NATO. 

Għalhekk il-Gvern se jikser il-Kostituzzjoni.

L-istqarrija li l-Gvern għamel dwar il-parteċipazzjoni ta’ Malta fil-Partnership for Peace taħbi t-tifsira reali ta’ dan il-pass gravi għall-ħarsien tal-poplu tagħna. 

Kienu l-istqarrijiet dwar dan il-fatt tar-rappreżentanti tar-Renju Unit u ta’ l-Istati Uniti ta’ l-Amerika li taw it-tifsira vera ta’ dan il-pass u kixfu l-ipokrezija ta’ l-istqarrija tal-Gvern.

Il-Kummissarju Għoli Ingliż Nick Archer huwa rrapportat li qal dwar il-parteċipazzjoni ta’ Malta fil-Partnership: “The key thing for us is that Malta will be able to participate more fully in European Security and Defence Policy (ESDP) activity, which means that it can in future make a bigger contribution to keeping Europe safe and to the EU’s effort to create a more peaceful world”.

Mela skond il-Kummissarju Ingliż, il-parteċipazzjoni ta’ pajjiżna fil-Partnership tfisser li Malta se tieħu sehem akbar fl-attivitajiet tal-politika ta’ l-UE dwar is-sigurtà u d-difiża u se tgħin biex jikber il-ħarsien fl-Ewropa. Naturalment dan pajjiżna se jagœmlu bil-kontribuzzjoni militari li se jagħti.

Min-naħa tiegħu, l-Acting Under Secretary of State for Political Affairs ta’ l-Istati Uniti qal: 

“The United States welcomes Malta’s decision to request reactivation fo its cooperation with NATO’s Partnership for Peace (PfP) and the Euro-Atlantic Partnership Council. These institutions make a valuable contribution to Euro-Atlantic security and dialogue. PfP has effectively strengthened relationships between states in Europe and North America, increased cooperation and underlined our common commitment to democratic principles”.

Din l-istqarrija ta’ l-Under Secretary Amerikan, Daniel Fried, turi biċ-ċar li l-Partnership for Peace hija fergħa tan-NATO u li min jieħu sehem fil-Partnership, ikun qed jikkontribwixxi militarment għas-sigurtà Ewropea u Atlantika. 

Tikxef ukoll li Malta se tipparteċipa fil-Kunsill ta’ l-Euro-Atlantic Partnership, li wkoll għandu fost l-għanijiet tiegħu, għan militari u ta’ sigurtà.

M’hemmx dubbju li l-Partnership for Peace hija alleanza militari. 

Tant hija hekk, li l-Forzi Armati ta’ Malta se jieħdu sehem fiha. 

M’hemm lanqas dubbju, li l-għanijiet tagħha huma militari u l-operazzjonijiet tagħha huma operazzjonijiet militari. 

Proprju minħabba n-natura militari tagħha, pajjiżna ma jistax jipparteċipa fiha jekk ma jridx imur kontra l-Kostituzzjoni ta’ Malta.

Il-Gvern qed jikser il-Kostituzzjoni li ħalef li jkun leali lejha.

IRRIDU L'INDIPENDENZA MILL-UNJONI EWROPEA

Il-Ħamis,27 ta’ Marzu, 2008

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ