MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
Mill-Kampanja Ħelsien Nazzjonali CNI
Għal darb’oħra ma ntlaħaq ebda ftehim
fil-laqgħa li l-Ministri ta’ l-Affarijiet Barranin tal-pajjiżi membri ta’
l-Unjoni Ewropea kellhom fi Brussels kmieni din il-gimgħa, bil-għan li jaslu
għal qbil dwar il-baġit ta’ l-Unjoni għas-seba’ snin bejn il-2007 u l-2013.
Il-laqgħa tal-Ministri tal-pajjiżi ta’
l-Unjoni falliet minkejja l-appell imqanqal li għamlilha l-President
tal-Kummissjoni Ewropea Josè Manuel Barroso, li mar għal-laqgħa ħalli jheġġeġ
lill-Ministri jilħqu ftehim.
Barroso seħaq dwar il-ħtieġa urġenti li jkun
hemm qbil dwar il-baġit għax ħadd ma jista’ jemmen lill-Unjoni meta titkellem
dwar tkabbir billi jissieħbu magħha pajjiżi oħrajn ġodda, jekk l-Unjoni lanqas
tista’ tiftiehem kif se tiffinanzja lilha stess kif inhi llum.
Aptit imperjali
Kif huwa magħruf, l-aptit ta’ l-Unjoni ħalli
taħtaf fl-imperu tagħha pajjiżi oħrajn, huwa kbir hafna.
Hija trid negozjati mat-Turkija.
Qablet li tiddiskuti mal-Kroazja.
U tixtieq tegħleb l-oppożizzjoni għas-sħubija
fl-Unjoni tal-popli tan-Norveġja u ta’ l-Isvizzera.
Insomma, m’hemmx limitu għall-kilba ta’
l-Unjoni biex taħkem il-pajjiżi kollha ta’ l-Ewropa, kif għamlet lil Malta.
L-Unjoni trid tkompli tikber, minkejja li
l-Franċiżi u l-Olandiżi qatlu l-Kostituzzjoni tagħha, u minkejja li
l-oppożizzjoni għall-Unjoni qiegħda tikber f’ħafna mill-pajjiżi li huma membri
tagħha, bħalma qed jiġri f’Malta.
Differenzi dwar il-baġit
In-nuqqas ta’ qbil bejn il-pajjiżi ta’ l-Unjoni dwar il-baġit tas-snin 2007-2013 mhux żgħir.
Il-pajjiżi membri kollha, barra l-Ingilterra, iridu li l-Ingilterra ma tibqax tingħata skont (“rebate”) fuq dak li hija tħallas kull sena lill-Unjoni. Is-sena l-oħra l-iskont leħħaq mal-ħames biljun Euro.
Min-naħa tagħha l-Ingilterra ma tridx tiddiskuti li tnaqqas l-iskont jekk l-Unjoni ma tintrabatx li ‘l quddiem jonqos il-ħlas li l-Unjoni tagħmel kull sena f’sussidji fil-qasam tal-biedja.
Franza, li tgawdi l-aktar mis-sussidji tal-biedja, ma tridx li tiddiskuti tnaqqis għal dak li kien ġie miftiehem fis-sena 2002. Skond dak il-ftehim, madwar 40 fil-mija tal-baġit ta’ l-Unjoni jmur fuq is-sussidji tal-qasam tal-biedja.
Fis-Summit tal-mexxejja tal-pajjiżi ta’ l-Unjoni li kien
sar f’Ġunju ta’ din is-sena, il-Lussemburgu, li kellu l-Presidenza ta’ l-Unjoni,
fassal kompromess dwar il-baġit, iżda la l-Ingilterra u lanqas l-Olanda,
l-Isvezja, il-Finlandja u Spanja ma qablu miegħu.
Tbażwir ta’ l-Unjoni
Waqt li l-ħames pajjiżi, l-Ingilterra,
l-Olanda, l-Isvezja, il-Finlandja u Spanja ma qablux li jħallsu lill-Unjoni
skond kemm ippropona l-Lussemburgu fil-kompromess li ressaq, l-għaxar pajjiżi,
fosthom Malta, li ssieħbu l-aħħar fl-Unjoni fl-1 ta’ Mejju, 2004, aċċettaw li
jitnaqqsulhom l-għajnuniet imwiegħda lilhom mill-Kummissjoni Ewropea għas-snin
2007-2013.
Dan għamluh ħalli jħajru lil pajjiżi oħrajn
jilħqu ftehim fuq il-baġit.
Iżda kien għalxejn u l-intoppi għadhom hemm
sal-lum.
Ħafna jikkritikaw bl-aħrax il-mod imbażwar
tal-finanzjament ta’ l-Unjoni Ewropea.
Eżempju ta’ dan huwa l-ftehim li l-Unjoni
għandha ma’ l-Ingilterra, li bih kull pajjiż ta’ l-Unjoni jħallas kull sena
sehmu mill-ammont ta’ l-iskont (rebate) mogħti lill-Ingilterra.
B’hekk Malta tispiċċa kull sena tħallas miljun lira lill-Ingilterra bħala sehemha ta’ dan l-iskont.
Eżempju ieħor ta’ l-arranġamenti finanzjarji
assurdi ta’ l-Unjoni huma l-mod kif titmexxa l-politika komuni dwar il-biedja.
Skond din, l-Unjoni tħallas sussidju ta’ żewġ
Euro kuljum għal kull baqra li hawn fil-pajjiżi ta’ l-Unjoni.
Il-kontradizzjonijiet fl-UE huma kbar u
hafna.
Eżempju ta’ dawn huwa li waqt li fl-Unjoni
kollha ssir pubbliċità kbira biex jinqata’ t-tipjip minħabba l-ħsara li jagħmel
għas-saħħa tal-bniedem, l-Unjoni tħallas miljuni ta’ Euro kull sena biex
tissussidja lill-produtturi tat-tabakk.
Bir-raġun ħafna jsostnu li l-Unjoni Ewropea
teħtieġ taqliba sħiħa kemm kif inhi magħmula, kemm kif titmexxa, u fuq kollox,
fil-politika żbaljata tagħha f’ħafna oqsma.
Huwa sfortuna għall-poplu Malti li
l-Parlament, fis-6 ta’ Lulju li għadda, minflok seħaq ma’ l-Unjoni li titbiddel
kif meħtieġ, ivvota favur il-Kostituzzjoni tagħha li żżomm dak kollu li huwa
ħazin fl-Unjoni u l-politika tagħha.
B’saħtet l-UE
Mhux żball li qed ngħidu “bis-saħta” ta’
l-Unjoni Ewropea, minflok “bis-saħħa” ta’ l-Unjoni.
Għax waqt li ħafna jiftaħru bil-ġunġlien li
ksibna bis-sħubija fl-Unjoni, ħadd ħlifna ma jilminta biz-zkuk li weħilna bihom
minħabba s-sħubija fl-Unjoni.
Biex joqgħod għal dak li l-Unjoni trid minnu,
il-Gvern ikollu jħares ċass u impotenti jara l-ħerba ta’ l-industrija
tal-manifattura ta’ pajjiżna u l-għoti tas-sensji lil mijiet ta’ ħaddiema.
Biex iwettaq il-politika ta’ l-Unjoni,
il-Gvern qiegħed ibiegħ l-impriżi tal-poplu Malti lill-barranin:
il-Mid Med Bank lill-HSBC,
il-Freeport lil kumpanija Franċiża,
l-Air Terminal lil kumpanija Awstrijaka,
l-Air Supplies lil kumpanija Ingliża,
is-Sea Malta lil Grimaldi, barra oħrajn.
Il-Gvern ikollu jħarbat il-biedja ta’
pajjiżna ħalli jimxi fit-triq ikkundannata minn kulħadd tal-politika komuni
agrarja ta’ l-Unjoni.
Fuq l-altar tal-kompetizzjoni u tas-suq
ħieles ta’ l-Unjoni, il-Gvern ikollu jissagrifika l-impriżi lokali u l-impjiegi
tal-ħaddiema Maltin.
Għax hekk tammar l-Unjoni, il-Gvern ikollu
jilliberalizza l-importazzjoni ta’ ħwejjeġ essenzjali għall-komunità,
bħall-prodotti taż-żejt u tal-qamħ, u b’hekk jitlef is-setgħa li jikkontrolla
l-prezzijiet tagħhom għall-pubbliku.
Bl-istess mod il-Gvern ikollu jintaxxa
l-importazzjoni minn barra l-pajjiżi ta’ l-Unjoni, ta’ prodotti essenzjali,
bħal-laħam, iz-zokkor u l-butir, akkost li l-ħajja tkompli togħla mas-smewwiet
għall-konsumatur.
L-Unjoni ġġiegħel lill-Gvern jagħmel it-taxxa
tal-VAT fuq kollox, anki fuq l-ikel, il-mediċini u l-kotba.
Iġġagħlu jnaqqas is-servizzi soċjali li
jagħti bla ħlas u li jbaxxi l-kundizzjonijiet tal-pensjonijiet.
Iġġagħlu jiftaħ beraħ lill-pajjiż għall-irwiefen tal-globalizzazzjoni, minflok jagħmel l-ilqugħ ħalli ma jintmisslux kull ma bena fl-imgħoddi.
Bir-riżultat ikraħ li jingħataw aktar sensji,
li l-qgħad jikber, il-ħajja togħla, it-taxxi jiżdiedu u l-faqar jinfirex.
Dan kollu mhux saħta kbira għall-poplu
Malti?
Huwa għajb li meta nifhmu dan u naraw
il-ħsara kbira li s-sħubija fl-UE qiegħda tagħmlilna, x’uħud fostna tonqsilhom
ir-rieda u jitilfu l-kuraġġ li niġġieldu ħalli l-ħerba ma tkomplix issir.
Biex inwaqqfu din is-saħta, rridu nbiddlu
l-ftehim tas-sħubija fl-Unjoni, u nfittxu nagħmlu magħha ftehim ieħor li jkun
tajjeb għall-poplu Malti, u speċjalment għall-ħaddiema.
Ftehim li qabel kollox jiżgura xogħol produttiv u mpjiegi ġodda għaż-żgħażagħ tagħna.
X’nirbħu bil-ħruġ mill-UE
Il-politika ekonomika ta’ l-Unjoni Ewropea
qiegħda tnaqqas l-impjiegi mhux iżżidhom.
F’pajjiżna jeħtieġilna nżidu l-impjiegi.
Għalhekk il-politika ekonomika ta’ l-UE ma
tgħoddx għal pajjiżna.
Il-ftehim tas-sħubija ta’ pajjiżna fl-Unjoni
Ewropea jorbotna nimxu bil-politika ekonomika ta’ l-Unjoni.
Il-politika ekonomika ta’ l-Unjoni ma tgħoddx
għalina.
Għalhekk jeħtieġilna ninħallu mill-ftehim
tas-sħubija li għamilna.
Il-ftehim tas-sħubija ta’ pajjiżna fl-UE
seta’ jsir bis-saħħa tal-maġġoranza tal-poplu.
Għalhekk bis-saħħa tal-maġġoranza tal-poplu
l-ftehim jista’ jerġa’ jitħassar.
La ma qablilniex bil-ftehim tas-sħubija li
sar, jaqblilna li nħassruh.
La huwa ta’ ħsara għalina, jaqblilna nwaqqfu
l-ħsara mill-aktar fis.
Il-ftehim tas-sħubija fl-Unjoni ma ġabilniex
investiment produttiv.
Għalhekk jekk inħassru l-ftehim, ma nitilfux
investiment produttiv li ma ġiex.
Qabel isseħibna fl-Unjoni, konna kapaċi
nattiraw investiment produttiv.
Għalhekk meta noħorġu mill-Unjoni, nistgħu
nerġgħu nattiraw investiment produttiv.
Bis-saħħa fl-Unjoni Ewropea
qegħdin igawdu ħafna l-ftit, u l-kotra qiegħda tbati.
Jekk ma nibqgħux imseħbin fl-Unjoni, il-kotra
ma tkomplix tbati u l-ftit ma jkomplux igawdu ħafna.
Bis-sħubija fl-UE tlifna l-indipendenza u
l-ħelsien.
Meta noħorġu mill-Unjoni, nerġgħu niksbu
l-indipendenza u l-ħelsien.
Imseħbin fl-UE m’għandniex is-sliem
tal-politika ta’ newtralità.
Jekk ma nibqgħux marbutin bil-politika komuni
ta’ l-Unjoni Ewropea, nerġgħu niżguraw is-sliem tal-politika ta’
newtralità.
L-Unjoni Ewropea tinsisti li l-pajjiżi membri
jnaqqsu s-servizzi soċjali u l-pensjonijiet.
Jekk pajjiżna ma jibqax membru ta’ l-Unjoni,
inkunu nistgħu naħdmu biex ma jonqsulniex is-servizzi soċjali u
l-pensjonijiet.
L-UE ma tħallix lill-Gvern joħloq ix-xogħol u
jżid l-impjiegi.
Jekk noħorġu mill-Unjoni, il-Gvern ikollu s-setgħa joħloq ix-xogħol u jżid l-impjiegi għall-ħaddiema u ż-żgħażagħ Maltin
Barra mill-Unjoni,
x’nirbħu ħafna għandna.
Ġurament ta' lealta` li jieħdu l-Membri Parlamentari kollha
Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).
Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.
Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).
Ġurament għall-qadi xieraq tal-kariga ta’ President.
Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).
Sezzjoni 6 tal-Kostituzzjoni ta' Malta
6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.
Artiklu I-6 tal-Kostituzzjoni ta' l-Unjoni Ewropea
Dritt ta' l-Unjoni
Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.
Tista' tafda lil min KISER il-ĠURAMENT tiegħu/tagħha?
Il-Sibt, 26
ta’ Novembru, 2005.
<< Lura http://www.cnimalta.org/2005
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat Lm2 flimkien ma' din il-formola liċ-
Chairman CNI,
Dr Karmenu Mifsud Bonnici LL.D.
81, Triq Ġuże Pace,
Ħamrun.
Isem .......................................................
Indirizz ..................................................
ID Numru...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ