MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Il-Baġit u l-UE

L-Unjoni Ewropea bierket il-Baġit għas-sena 2007 li l-Gvern Malti ressaq fil-Parlament il-ġimgħa l-oħra.

Il-Prim Ministru Gonzi u s-Segretarju Parlamentari Fenech kemm-il darba f’dawn l-aħħar tliet xhur marru jiddiskutuh biex jaqblu dwaru ma’ l-UE.

Għalhekk m’hemm xejn fil-baġit li l-Unjoni ma approvatx, kemm it-tnaqqis, kif ukoll iż-żidiet li fih.

L-Unjoni qablet li għall-għoli tal-ħajja tingħata s-sena d-dieħla zieda ta’ Lm1.25c fil-ġimgħa, li tfisser Lm91 fis-sena, wara li aktar kmieni din is-sena ngħatat żieda ta’ 50ċ fil-ġimgħa.

Fl-istess ħin l-Unjoni approvat li fil-2007 is-Segretarji Parlamentari jingħataw żieda fis-salarju ta’ Lm426, is-salarji tal-Ministri jiżdiedu bi Lm446 u l-Prim Ministru jkollu żieda ta’ Lm506 fis-salarju.

Il-pensjonanti, iżda għandhom jingħataw żieda għall-għoli tal-ħajja ta’ Lm1.17ċ biss fil-ġimgħa, li tfisser Lm60.84ċ fis-sena.  

Aktar dħul mit-taxxi

Skond il-baġit maqbul ma’ l-Unjoni Ewropea, il-Gvern is-sena d-dieħla se jdaħħal mill-Income Tax (wara it-tibdil fil-faxex tad-dħul taxxabbli u fir-rati tat-taxxa) u mill-VAT, Lm48, 835,000 aktar milli jkun daħħal din is-sena.

Waqt li se jżid in-nefqa totali bi Lm23, 625,000 se jispiċċa jagħmel dejn li l-Unjoni hija kuntenta bih ta’ Lm54, 464,000.

Ftit tal-ġimgħat ilu l-Unjoni Ewropea saħqet mall-pajjiżi membri biex ma jnaqqsux it-taxxi jew il-‘levies’ fuq il-prodotti taż-żejt.

Bi qbil ma’ din id-deċiżjoni fil-baġit hemm li l-Gvern se jdaħħal is-sena d-dieħla, f’dażji u sisa, is-somma ta’ Lm38,300,000 li tfisser żieda ta’ Lm8,600,000 fuq l-ammont li jkun daħħal din is-sena mid-dażji u s-sisa fuq il-prodotti taż-żejt u b’hekk it-tama ta’ roħs fir-rati għolja ta’ l-elettriku u ta‘ l-ilma taret.

L-estimi mhux bħad-diskors

Mad-diskors tal-baġit mill-Prim Ministru tħabbru l-estimi tad-dħul u l-ħruġ għas-sena 2007.

Meta tiflihom it-tnejn issib li jekk iċ-ċifri ta’ l-estimi huma korretti, il-ftaħir tad-diskors hu falz.

Jekk il-ftaħir mhux falz, iċ-ċifri ta’ l-estimi m’humiex korretti.

Fid-diskors tal-baġit intqal li fis-snin 2007-2013 se jkollna medja ta’ Lm50,400,000 fis-sena mill-Fondi Strutturali u mill-Fond ta’ Koeżjoni ta’ l-Unjoni.

Iżda l-estimi ppubblikati juru li miż-żewġ fondi fis-sena 2007 se nirċievu biss Lm42, 730,000.

Imkien fid-diskors ma jissemma kemm se nħallsu lill-Unjoni fil-2007, fil-waqt li l-estimi juru li l-Unjoni se tirċievi mingħandna Lm22,030,000 fil-2007.

Lanqas fid-diskors tal-baġit ma jissemmew ċerti spejjeż li se jsiru fil-2007 minħabba s-sħubija fl-Unjoni Ewropea, fosthom l-ispiża minħabba d-dħul ta’ l-Ewro li skond l-estimi se tkun ta’ Lm700,000 u l-ispiża ta’ Lm420,000 għaċ-ċentru tal-propoganda favur l-Unjoni Ewropea, il-Forum Malta fl-Ewropa li ħa post il-MIC.

Proġetti mhux maqbula

Kemm fid-diskors tal-baġit, kif ukoll fl-estimi jissemmew il-proġetti li għalihom se jintużaw l-għotijiet mill-fondi ta’ l-Unjoni Ewropea.

Iżda fl-istess ħin jingħad fid-diskors li għalkemm hemm qbil fil-prinċipju mal-Kummissjoni Ewropea dwarhom, “issa wieħed jistenna li nibdew in-negozjati finali. Meta l-programmi jiġu maqbula, jkunu jistgħu jibdew il-proġetti. Fl-istess ħin qegħdin jiġu mħejjijin wkoll l-istrateġiji fil-qasam ta’ l-agrikoltura u l-iżvilupp rurali u dik tas-sajd”.

Fid-diskors tal-baġit jingħad li aktar kmieni din is-sena l-Gvern nieda skemi li ġabu lejn pajjiżna linja ta’ l-ajru ‘low cost’ (Rynair) b’nefqa ta’ Lm1,000, 000, iżda mkien ma jingħad li l-Unjoni Ewropea għadha ma tatniex il-permess ħalli jibdew it-titjiriet.

L-UE tissemma wkoll fid-diskors tal-baġit dwar l-immigranti illegali li jingħad joħolqu sfida kbira għalina.

Intqal li pperswedejna lill-Unjoni tidħol magħna f’din il-kwistjoni ħalli tgħina.

Iżda fil-fatt, jidher li l-UE hija aktar ta’ xkiel għalina f’din il-kwistjoni, għax f’ħafna każijiet jkollna nagħtuhom status ta’ refuġjati u allura jkunu se jibqgħu f’Malta għal żmien twil u jkollna ngħinuhom jibnu ħajjithom mill-ġdid.

Id-dħul ta’ l-Ewro

Għalkemm id-diskors tal-baġit jammetti li fil-waqt li l-ekonomija dinjija f’din is-sena kibret bi 5.5 fil-mija, l-ekonomija tal-pajjiżi li daħħlu l-Ewro kibret biss b’2.5 il-mija, jintqal fid-diskors li d-dħul ta’ l-Ewro f’pajjiżna se jżid l-istabbiltà, jiftaħ orizzonti ġodda u opportunitajiet ġodda għal min irid jaħdem f’pajjiżna.

Iżda t-tliet pajjiżi ta’ l-Unjoni li ma daħħlux l-Ewro, marru aħjar ekonomikament minn dawk li daħħluh.

Li ma ntqalx huwa li l-Unjoni imponiet fuqna li ndaħħlu l-Ewro bħala waħda mill-kundizzjoni tas-sħubija fl-Unjoni, anki jekk dan ma jkunx ta’ ġid għalina u jiġrilna bħal ma ġara lit-Taljani li ġarrbu dannu bid-dħul ta’ l-Ewro.  

Ebda azzjoni effettiva kontra l-immigrazzjoni illegali

Fid-diskors tal-Bagit tat-18 ta’ Ottubru l-Prim Ministru qal li kien irnexxielu jipperswadi lill-UE tidħol magħna u tgħinna fl-isfida kbira ta’ l-immigranti illegali, u kompla jgħid:

“fil-fatt għada fil-għodu se mmur il-Fillandja għal ‘summit’ tal-mexxejja ta’ l-UE li fost l-oħrajn se niddiskutu l-immigrazzjoni illegali” – paġna 7).

Mid-diskussjoni fil-Filandja ma jidher li ħareġ xejn konkret u pożittiv u jidher li l-Prim Ministru mar għalxejn, ħlief għar-ritratti u l-ikliet tas-soltu.

Tant hu hekk li jumejn ilu daħlu f’pajjiżna numru ieħor ta’ immigranti illegali u jum qabel marru mijiet oħrajn f’Lampedusa.

Għalxejn qed isiru r-rondi minn pattulji Taljani, Franċiżi u Maltin u ma sar xejn effettiv mill-UE biex twaqqaf l-immigrazzjoni illegali.

F’din il-kwistjoni ta’ l-immigranti illegali qegħdin nimxu b’politika ħażina li tagħmel ħsara l-interessi nazzjonali basta ma nagħmlux xi passi li ma jogħġobx lill-UE.

Il-Gvern Malti dejjem jittama li tittieħed azzjoni komuni mill-UE li mhix se tasal qatt biex issolvilna l-problema tagħna.

Anzi qed jiġri li l-Gvern Malti qata’ jiesu dwar din il-problema, għax fid-diskors tal-Baġit (f’paġna 31) il-Prim Ministru qal:

“Il-qasam soċjali qed jiffaċċja l-isfida ta’ l-immigranti illegali li jingħataw status ta’ refuġjati u allura jkunu se jibqgħu f’Malta għal żmien twil. Minbarra l-impatt finanzjarju, hemm xogħol kbir għaddej biex jgħin lil dawn ir-refuġjati jerġgħu jibdew jibnu ħajjithom mill-ġdid, jew f’Malta jew inkella barra minn xtutna, b’attenzjoni speċjali fuq it-tfal.”

M’hemmx dubju li l-maġġoranza l-kbira tal-poplu Malti ma taqbilx ma’ politika li tinkoraġġixxi l-immigranti illegali jibqħu f’Malta bħala refuġjati u jibnu ħajja ġdida f’pajjiżna.

Pajjiżna m’għandux wisgħa biex barranin jiġu jaħdmu u jieħdu post il-ħaddiema Maltin li jispiċċaw qegħda.

M’għandniex xogħol biżżejjed għaż-żgħażagħ tagħna u għalhekk huwa kontra l-interess nazzjonali li nħallu barranin jieħdu post il-Maltin.

Lanqas nistgħu ninkoraġġixxu refuġjati li jibqgħu f’pajjiżna basta ma jaħdmux.

M’għandniex faċilitajiet ta’ ‘housing’ u lanqas nistgħu nipprovdu s-servizzi soċjali b’xejn, kura b’xejn tas-saħħa u edukazzjoni b’xejn.

Inkunu qegħdin niżirgħu problemi soċjali jekk lir-refuġjati nagħtuhom jagħmlu l-agħar xogħol fil-pajjiż, kif sfortunatament jidher li diġà qed jiġri, bħal każ tal-ġbir tar-‘refuse’.

L-UE tagħmel kif jaqblilha

L-Unjoni Ewropea mis-7 ta’ Ottubru bdiet timponi dazju ta’ 16.5 fil-mija fuq żraben tal-ġilda importanti miċ-Ċina, biex tipproteġi l-produzzjoni taż-żraben tal-pajjiżi ta’ l-Unjoni.

Din il-miżura ta’ l-Unjoni għandha tifsira kbira għalina.

Tiftakru li l-Unjoni Ewropea kienet ġagħlitna nneħħu l-‘import levies’ li kienu ta’ protezzjoni għall-prodotti maħdumin f’Malta u għall-impjiegi tal-ħaddiema li jipproduċuhom.

Il-propogandisti ta’ l-Unjoni faħħru t-tneħħija tal-‘levies’ biex il-konsumaturi Maltin igawdu minn prezzijiet orħos.

Issa li l-Unjoni mponiet dazju ta’ 16.5% fuq iż-żraben Ċiniżi tal-ġilda, ħadd mill-propogandisti ta’ l-Unjoni ma’ lmenta li b’din il-miżura l-konsumaturi Maltin se jbagħtu minħabba ż-żieda fil-prezzijiet taż-żraben.

Tajjeb li nfakkru li l-‘import levies’ kien daħħalhom il-Gvern Malti u kienu jintefqu għall-ġid tal-poplu Malti, waqt li issa d-dazju taż-żraben se ddaħħlu l-UE u jħallsuh il-konsumaturi Maltin u minnu se jgawdu l-produtturi taż-żraben mhux f’Malta iżda f’pajjiżi ta’ l-UE.

Il-ħlas ta’ dan id-dazju lill-UE huwa żieda ġdida mal-kontribuzzjonijiet li Malta tħallas kull sena lill-Unjoni li jammontaw għall-miljuni kbar.

Ir-rappreżentant tal-Gvern Malti ma vvotax kontra l-impożizzjoni tad-dazju fuq iż-żraben Ċiniżi u d-deċiżjoni ttieħdet minkejja li 12-il pajjiż membru vvotaw kontriha.

Apparti l-fatt li din il-miżura ta’ l-Unjoni se tgħolli l-prezz taż-żraben miċ-Ċina, id-dazji jiksru l-prinċipju tal-kummerċ ħieles li l-UE tant tgħajjat bih.

Fejn jaqblilha, l-Unjoni tinsa l-prinċipji u timxi skond l-interessi tagħha.

Lilna l-UE ma ħallitniex inħarsu l-interessi ta’ l-industrija tagħna ħalli nipproteġuha kontra l-prodotti barranin b’iskużi tal-kummerċ ħieles u tal-ġid għall-konsumaturi.

Dawn issa l-Unjoni nsithom fil-każ taż-żraben Ċiniżi.

Huwa xieraq li lill-poplu jgħidulu kemm qegħdin nikkontribwixxu lill-UE kull sena u jnaqqsuh mis-somma li l-UE tatina.

Hu wkoll xieraq li nkunu nafu l-ispiża enormi li qegħdin nagħmlu kull sena minħabba s-sħubija fl-Unjoni u anki din innaqqsuha mis-somma mogħtija mill-Unjoni.

Jekk nagħmlu dan, insibu li sejrin minn taħt.

Għalhekk dan it-tagħrif qatt ma jingħata lill-pubbliku, għax inkella l-poplu jintebah li jaqblilna ma nibqgħux imseħbin fl-UE.

Il-Ħamis, 26 ta’ Ottubru, 2006.

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ