MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA

L-INDIPENDENZA U L-ĦELSIEN!

L-Unjoni Ewropea ordnat li fis-sena 2011 il-Maltin u l-Għawdxin iħallsuha €68,000,000

€186,000 kuljum misruqa minn ħalq uliedek

minn Karmenu Mifsud Bonnici KAMPANJA ĦELSIEN NAZZJONALI CNI

L-akbar kontribut li Malta tista’ tagħti lil-Libja

Il-gwerra fil-Libja daħlet fir-raba’ xahar u Malta għadha m’għamlet xejn biex tipprova twaqqaf il-ġlied.

Anzi l-Gvern Malti qiegħed jappoġġja l-attakki li xi wħud mill-pajjiżi tal-Unjoni Ewropea, bħal Franza, l-Ingilterra u l-Italja qegħdin jagħmlu fuq l-ibliet Libjani b’dannu kbir għall-popolazzjoni ċivili.

L-Unjoni Ewropea ma tridx li fil-Libja l-ġlied jieqaf sakemm il-Gvern Libjan jibqa’ ma jwarrabx, u l-Gvern Malti qiegħed isostni din il-politika ta’ aggressjoni sfaċċata, bl-iskuża li l-poplu Libjan irid bidla fil-Gvern, meta hu fatt ċar li hemm qasma kbira fil-Libja bejn dawk li jappoġġjaw lill-Gvern u dawk li huma kontrih.

L-Unjoni Ewropea trid li fil-Libja jkun hemm soluzzjoni politika biex il-ġlied jieqaf, fil-waqt li r-raġuni tgħid li għandu l-ewwel ikun hemm waqfien mill-ġied, biex imbagħad il-partijiet ikunu jistgħu jiddiskutu x’għandha tkun is-soluzzjoni politika tal-kriżi fil-pajjiż, skont ir-rieda ħielsa tal-poplu Libjan kollu.

Il-Gvern Malti qiegħed jaqbel mal-linja politka tal-Unjoni Ewropea minkejja li jaf li aktar ma jdum ma jieqaf il-ġlied, aktar jikber l-għadd ta’ Libjani li qed jinqatlu u li qed jiġu feruti, mhux biss fost is-suldati, iżda anke fost il-popolazzjoni ċivili.

L-Unjoni Ewropea qiegħda tappoġġja lir-ribelli Libjani li waqqfu Gvern proviżorju f’Benghazi u għalkemm l-Unjoni għadha ma tathomx l-għarfien uffiċjali ta’ Gvern tal-Libja kollha, bħalma għamlu Franza u l-Italja, qiegħda tatihom ħafna għajnuna, u f’dawn il-ġranet, Lady Ashton, ir-rappreżentanta tal-politika barranija tal-UE marret Benghazi tiftaħ l-uffiċċju tal-UE f’dik il-belt.

Hi pubblikament qalet li s-27 pajjiż membru tal-UE (inkluża Malta) u l-istituzzjonijiet kollha tal-UE kienu qegħdin jappoġġjaw il-ġlieda tagħhom kontra l-Gvern Libjan.

Lady Ashton m’għamlet l-ebda sforz biex tħeġġeġ lir-ribelli jaċċettaw waqfien mill-ġlied u meta bi kliemha hi inkoraġġithom biex jissoktaw fil-ġlieda tagħhom, hi tkellmet ukoll għan-nom tal-Gvern Malti li hu msieħeb fl-UE.

Iżda Malta, li għandha d-dmir li taħdem għall-paċi fost il-ġnus, ma jmissha qatt tappoġġja politika ta’ tkomplija tal-gwerra inkoraġġita mill-UE, aktar u aktar meta l-gwerra tkun f’pajjiż qrib tagħna u meta hemm ħbiberija bejn iż-żewġ popli.

Hu mhux biss fl-interess tal-poplu Libjan li fil-pajjiż ma jkunx hemm il-ġlied, iżda hu wkoll fl-interess tagħna l-Maltin jekk ma rridux nitilfu l-postijiet tax-xogħol ta’ mijiet ta’ ħaddiema Maltin fil-Libja, kif ukoll in-negozji u l-investimenti ta’ ħafna Maltin f’dak il-pajjiż, u madwar €80 miljun ta’ esportazzjoni minn Malta lejn il-Libja kull sena.

M’hemmx dubju li l-politika tal-Unjoni Ewropea dwar il-Libja hi ddettata minn Franza u l-Ingilterra, għalkemm l-akbar pajjiż tal-Unjoni, il-Ġermanja, ma jaqbilx mal-intervent militari ta’ Franza, l-Ingilterra u l-Italja fil-Libja.

Il-Gvern Malti lanqas kellu d-dehen li jagħmel bħall-Gvern Ġermaniż u ma japprovax l-intervent militari fil-Libja minkejja li l-Kunsill tas-Siġurtà tal-Ġnus Magħquda awtorizzah.

Il-Ġermanja li qiegħda fin-NATO, mhix tapprova l-attakki tan-NATO fuq il-Libja, fil-waqt li Malta, li mhux fin-NATO, qiegħda tappoġġja l-attakki tan-NATO.

Il-Ġermanja, għalkemm hi membru fil-Kunsill tas-Sigurtà tal-Ġnus Magħquda ma qablitx mad-deċiżjoni tal-Kunsill li awtorizzat l-attakki militari fuq il-Libja, u mhix qiegħda taqbel magħhom.

Waqt li Malta, li jmissha għandha politika kontra l-gwerra għax għandha dmir taħdem attivament għall-paċi fost il-ġnus, qablet u qiegħda tappoġġja l-attakki militari li n-NATO qiegħda kull lejl tagħmel fuq l-ibliet u l-popolazzjoni ċivili Libjana.

Fil-ħuġġieġa tal-gwerra ċivili li hemm fil-Libja, l-Unjoni Ewropea qiegħda aktar tkebbes in-nar milli tipprova titfih, u l-Gvern Malti hu kompliċi bis-sehem li Malta qiegħda tieħu fil-‘Contact Group’ tal-pajjiżi li jifformaw koalizzjoni, li ħafna tawha l-isem ta’ ‘Coalition of Evil’.

Għaliex hu dijaboliku li tgħid li qiegħed tipproteġi l-popolazzjoni ċivili meta bl-azzjonijiet tiegħek, u bis-sanzjonijiet li tapplika, tkun qiegħed tagħmel ħsara kbira lill-poplu tal-pajjiż.

Il-bumbardamenti fil-belt ta’ Tripli mhumiex għajr atti maħsubin biex jitterrorizzaw lill-popolazzjoni ċivili, barra l-imwiet u l-ferimenti li jikkaġunaw.

L-attakki fuq il-portijiet Libjani mhumiex isiru biex jipproteġu l-popolazzjoni ċivili.

L-imblokk tat-trasport tal-merkanzija lejn il-Libja u tal-passiġġieri minn dak il-pajjiż huma ta’ ħsara għall-popolazzjoni ċivili.

L-għoti tal-armi u l-armamenti lir-ribelli jgħinu biex jikber il-ġlied u mhux jonqos.

Ir-rifjut li jsir waqfien mill-ġlied jekk qabel ma jitwarrabx il-Gvern Libjan hu atteġġjament assurd li hu maħsub biex ma jwassalx għal soluzzjoni paċifika tal-kriżi.

Għalhekk il-politika tal-koalizzjoni hi politika ta’ qerq (evil) għax hi ipokrita u taħbi l-għanijiet veri tal-pajjiżi li qegħdin jattakkaw lil-Libja għall-interessi strateġiċi tagħhom.

Il-fatt li l-Kunsill tas-Sigurtà tal-Ġnus Magħquda awtorizza s-sanzjonijiet u l-attakki kontra l-Libja ma jagħmilhomx ġusti u lanqas huma legalment korretti.

Mhux ġusti għax qegħdin jagħmlu ħsara lill-poplu, u mhux legalment korretti għax mhux skont il-provvedimenti tal-Ġnus Magħquda li ma jiġġustifikawx indħil militari fi gwerra ċivili f’pajjiż membri.

Il-Gvern Malti jaf b’dan, iżda l-Gvern qiegħed jissagrifika l-ġieħ tal-pajjiż biex iservi fedelment lill-mexxejja tal-Unjoni Ewropea, allavolja dan mhux fl-interess nazzjonali tagħna.

Aktar ma jgħaddi ż-żmien aktar qiegħda tiżdied l-aggressjoni kontra l-poplu Libjan.

L-aqwa għajnuna li l-poplu Malti jista’ jagħti lill-poplu Libjan hi l-għajnuna biex mill-aktar fis, mingħajr aktar dewmien, ikun hemm waqfien mill-ġlied effettiv u l-għoti ta’ kull għajnuna meħtieġa lis-sezzjonijiet kollha tal-popolazzjoni ċivili.

Meta jieqaf il-ġlied, in-naħat kollha għandhom jiġu mgħejjunin biex jiddiskutu u jisbu l-aħjar ftehim aħħari għall-pajjiż, li jkun skont ir-rieda ħielsa tal-poplu kollu, u b’rispett għad-drittijiet u l-libertajiet ta’ kulħadd.

Malta għandha tħeġġeġ biex issir rikonċiljazzjoni u paċifikazzjoni nazzjonali fil-Libja, mhux kif trid l-Unjoni Ewropea, li naħa toħroġ rebbieħa fuq in-naħa l-oħra.

Dan ikun l-akbar kontribut li Malta tista’ tagħti biex ikun hawn is-sliem fiċ-ċentru tal-Mediterran.

Abbozz ta’ dikjarazzjoni għall-waqfien mill-ġlied fil-Libja

minn Deo Cassar, KAMPANJA ĦELSIEN NAZZJONALI CNI

Bħala Maltin, aħna ma nistgħux nibqgħu passivi quddiem il-ġrajjiet koroh li qed jgħaddi minnhom bħalissa l-poplu ġar u ħabib tagħna, il-Libjan.

Għalhekk nixtieq l-ewwel u qabel xejn nuru s-solidarjetà tiegħi mal-Libjani kollha huma tal-liema xejra politika huma, kemm jekk huma favur il-Gvern Libjan kif ukoll kontra u nħeġġuhom jersqu lejn xulxin u jinsew id-differenzi ta’ bejniethom fi spirtu ta’ rikonċiljazzjoni għall-ġid komuni tal-poplu Libjan kollu.

Aħna ma naqblux u nikkundannaw bla riserva l-attakki fuq ċentri abitati mill-partijiet kollha fil-kunflitt.

Madankollu nistmerru l-fatt li ajruplani tal-koalizzjoni li suppost qegħdin hemm biex jipproteġu lill-popolazzjoni ċivili qed ikunu huma stess li jikkaġunaw vittmi ċivili billi jattakkaw ċentri urbani f’lokalitajiet oħrajn li diġà ħallew mijiet ta’ persuni innoċenti mejtin bi ksur tal-istess riżoluzzjoni 1973 tal-Ġnus Magħquda li titlob biex tali ċivili jkunu protetti.

Nikkundannaw ukoll l-użu tal-qawwiet tal-koalizzjoni ta’ missili u munizzjon bl-uranju mdgħajjef (depleted uranium) li huma illegali taħt il-liġi internazzjonali għax jikkontaminaw l-arja u l-ambjent fejn jintefgħu bir-radjazzjoni, li din tagħmel ħsara kbira għas-saħħa tal-popolazzjoni ċivili.

1) Minnufih, kemm it-truppi tal-Gvern ta’ Tripli kif ukoll it-truppi ta’ Benghazi jwaqqfu kull xorta ta’ attività ostili jew militari kemm kontra truppi opposti kif ukoll kontra ċittadni kemm jekk huma favur jew kontra l-Gvern ta’ Tripli.

2) Kontemporanjament il-qawwiet tal-ajru tal-koalizzjoni jwaqqfu minnfih kull ħbit mill-ajru fuq bliet u rħula u ċentri abitati oħrajn taħt il-kontroll tal-Gvern Libjan u fuq truppi governattivi ta’ Tripli.

3) Infakkru li r-riżoluzzjoni 1973 tal-Ġnus Magħquda titlob u tagħti mandatt lill-forzi tal-ajru tal-koalizzjoni li jħarsu l-waqfien mill-ġlied miż-żewġ partijiet u li jipproteġu liċ-ċittadini ċivili Libjani kollha rrispettivament jekk huma favur jew kontra l-Gvern ta’ Tripli u mhux li tappoġġja lin-naħa kontra l-oħra.

4) Nitolbu għalhekk li l-qawwiet tal-ajru tal-koalizzjoni u lill-pajjiżi li jifformahom li sakemm jiġi fis-seħħ dan il-waqfien mill-ġlied iwaqqfu kull appoġġ lill-grupp armat oppost tal-Gvern Libjan li qatt ma kien sanċit mill-Ġnus Maqgħuda u li jikkostitwixxi ndħil fl-affarijiet interni ta’ pajjiż sovran bi ksur ta’ Charter 50/172 tal-istess Ġnus Magħquda u biex jimxi strettament u ma jċedux il-mandatt li tagħtihom ir-riżoluzzjoni 1972 tal-għaqda dinjija hekk kif diġà mfisser.

5) Għandha tintbagħat ‘fact finding mission’ magħmula minn delegazzjoni konġunta tal-Unjoni Afrikana u tal-Lega Għarbija taħt l-awspiċju tal-ĠM biex tistħarreġ is-sitwazzjoni fuq l-art u tara x’qiegħed jiġri tassew b’għajnejha bil-ħsieb li tistabbilixxi x’inhuma l-bżonnijiet immedjati tal-poplu Libjan u x’għajnuna hemm bżonn tingħata biex tittaffa t-tbatija tan-nies ċivili u biex tassigura li jinżamm il-waqfien mill-ġlid u jkunu mħarsin nies ċivili ta’ opinjoni opposta fil-postijiet taħt il-kontroll taż-żewġ naħat.

6) Għandhom jinfetħu kanali ta’ kuntatt bejn iż-żewġ naħat bl-iskop li jinbeda djalogu kostruttiv u negozjati bejn il-partijiet konċernati bl-arbitraġġ tal-istess Għaqda Afrikana u l-Lega Għarbija bl-iskop li tissolva l-kriżi attwali fil-Libja, mhux biss dawk iċ-ċivili li huma kontra l-Gvern ta’ Tripli, iżda wkoll dawk li huma favur u li wkoll qegħdin ikunu suġġetti għall-intimidazzjoni, qtil u vjolenza mit-truppi u l-awtoritajiet ta’ Benghazi.

7) Għandha titwitta t-triq biex sakemm jintlaħaq ftehim bejn il-partijiet konċernati u tissolva l-kriżi attwali, tintbagħat delegazzjoni mhux armata magħmluha minn bosta pajjiżi tal-fiduċja taż-żewġ partijiet biex tagħmel monitoraġġ fl-ibliet u rħula għaż-żamma tal-waqfien mill-ġlied u ħarsien ta’ nies ċivili miż-żewġ naħat.

8) Iż-żewġ partijiet għandhom bżonn li jwarrbu d-differenti ta’ bejnithom u l-interess personali tagħhom u minflok ipoġġu l-interess taċ-ċittadini Libjani kollha l-ewwel u qabel kollox.

9) Nappellaw liż-żewġ partijiet fil-konflitt biex mill-aktar fiss ifittxu jaslu għall-ftehim ġust bejniethom mingħajr indħil jew impożizzjoni u s-sovranità ta’ pajjiżhom, li ġenwinament jassigura nuqqas ta’ diskriminazzjoni kontra n-nisa u minoranzi oħrajn kemm reliġjużi kif ukoll etniċi, speċjalment ta’ Libjani Afrikani, fir-rispett tal-opinjonijiet, l-aspirazzjonijiet u x-xewqat tal-gruppi kollha li jifformaw lill-poplu Libjan kollu u mhux ftehim impost minn barra li sservi biss l-interessi ekonomiċi u ġeopolitiċi tal-qawwiet barranin għad-detriment tal-poplu Libjan.

Fittex li tiffirma l-petizzjoni popolari lill-Parlament Malti biex jgħaddi miżuri li jrażżnu l-immigrazzjoni illegali f’pajjiżna.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.