MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Kien ħanin wisq ma’ l-Unjoni Ewropea

Kien ta’ ċertu sodisfazzjoni dak li qal dan l-aħħar Membru tal-Parlament Malti, meta semma li l-Gvern spiss jitkellem dwar il-Miljuni ta’ Ewros jew liri li ġejjin mill-Unjoni Ewropea, iżda qatt ma jsemmi l-miljuni li qegħdin nibagħtu aħna lill-Unjoni Ewropea.

Dan id-Deputat semma Lm22 miljun li l-Gvern Malti qiegħed iħallas lill-Unjoni Ewropea għall-baġit tagħha din is-sena.

Ma’ dawn semma’ wkoll Lm7 miljun fis-sena, li l-Gvern qiegħed ikollu joħroġ bħala sussidju lill-bdiewa u li qabel dħalna fl-Unjoni Ewropea ma kienx joħroġ, għax il-bdiewa tagħna ma kellhomx il-kompetizzjoni qalila ta’ prodotti tal-biedja li jiġu mill-Unjoni Ewropea.

Issemmew ukoll il-Lm11-il miljun li qegħdin nitilfu mill-Protokol Taljan, preċiżament għax issa dħalna fl-Unjoni Ewropea.

Kompla jgħid li seba’ snin oħra, aktarx nitilfu l-istatus ta’ “objective 1”, li llum qiegħed jagħmilha possibbli li Malta tirċievi l-għola ammont ta’ fondi strutturali.

Meta jispiċċalna l-’Objective One Status’, dawn il-fondi strutturali jonqsu ħafna.

Skond id-Deputat Parlamentari Malti Malta jibqalha bilanċ favur tagħha ta’ madwar Lm11-il miljun, meta tnaqqas Lm40 miljun (Lm22+Lm11+Lm7 miljuni) mill-Lm51 miljun li ġejjin mill-Unjoni Ewropea.

Iżda aħna nafu li dan id-Deputat Parlamentari kien ħanin ma’ l-Unjoni Ewropea.

Per eżempju, it-telf ta’ miljuni ta’ liri li se jkollu l-Bank Ċentrali ta’ Malta u li sal-lum qegħdin indaħħlu fuq ir-riżervi barranin tal-Bank Ċentrali ta’ Malta, għax meta ndaħħlu l-Ewro, ir-riżervi ta’ Malta se jsiru riżervi barranin tal-Bank Ċentrali Ewropew.

Hemm l-ispiża enormi – bosta miljuni oħrajn – li qiegħda tiswielna s-sħubija fl-Unjoni Ewropea minħabba ’l ħafna strutturi li kellna bilfors inwaqqfu, bħalma huma l-Awtoritajiet kollha li waqqafna.

Min jaf kemm hemm “civil servants” li xogħolhom, tista’ tgħid, sar kollu konness mas-sħubija fl-Unjoni Ewropea u li qegħdin jitħallsu minn butna u mhux mill-Unjoni Ewropea?

U li kieku kellna ngħoddu x’qed tiswielna s-sovranità li tlifna, kieku ara kemm irridu nżidu miljun ta’ liri oħrajn!

Aħna niftakru dak li l-mexxejja Laburisti kienu jgħidu qabel ir-referendum.

Kienu jgħidu li kieku nikkalkolaw x’tiswa s-sovranità, “kemm nitilfu, Lm50 miljun? Lm100 miljun? Lm200 miljun fis-sena? Ma tistax tgħid għax is-sovranità hija imprezzabbli”.

Kieku kellu jsir awditjar serju u indipendenti ta’ x’qegħdin nirċievu mill-Unjoni Ewropea u x’qiegħda tiswielna s-sħubija, il-poplu Malti żgur jibqa’ mbellah u jifhem aktar x’daħka daħku bih dawk li ma stħawx jerġgħu jagħmlu lil pajjiżna kolonja tal-barrani, wara li tant kienu ftaħru li għamlu lil Malta indipendenti.

L-Unjoni Ewropea tiddottrina lit-tfal ta’ l-iskola

Għalkemm il-Kostituzzjoni ġdida ta’ l-Unjoni Ewropea ma tistax tidħol fis-seħħ għax il-Franċiżi u l-Olandiżi vvotaw kontriha, il-Kummissjoni Ewropea trid li t-tfal ta’ l-iskola tal-pajjiżi membri ta’ l-Unjoni jingħataw x’jifhmu li l-Kostituzzjoni daħlet fis-seħħ.

Il-Kummissjoni Ewropea ppubblikat ‘textbook’ dwar l-Unjoni Ewropea li tqassam lil 120,000 tifel u tifla ta’ l-iskejjel primarji tal-pajjiżi ta’ l-Unjoni.

F’dan il-ktieb, persuna twajba li ġġib l-isem ta’ Father Houpette jfisser lil żewġt itfal ta’ l-iskola, x’inhi u kif taħdem l-Unjoni.

Huwa jgħidilhom li huma sejrin jifhmu kemm hemm il-ħtieġa għall-Unjoni Ewropea.

Fil-kapitlu tal-ktieb li jitkellem dwar il-Kostituzzjoni ġdida ta’ l-Unjoni Ewropea, iż-żewġt itfal jidhru qegħdin jaqraw ir-regoli u r-regolamenti mwaħħlin mal-ħitan ta’ l-isports hall ta’ l-iskola.

Father Houpette jgħidilhom li ftit ta’ żmien ilu, l-Unjoni sarulha regolamenti ġodda bħal dawk li ż-żewġt itfal ikunu qegħdin jaraw mal-ħitan ta‘ l-isports hall.

Huwa jissokta jgħidilhom li l-Unjoni, b’din il-Kostituzzjoni ġdida, se timxi ħarir, bħal ma jimxi arloġġ, l-istess kif jiġri fil-club taż-żewġt itfal.

Fil-ktieb li ħarġet il-Kummissjoni Ewropea imkien ma jingħad li l-popli ta’ Franza u ta’ l-Olanda ċaħdu dik il-Kostituzzjoni ta’ l-Unjoni.

Ħafna kkundannaw lill-Kummissjoni Ewropea għal dan il-ktieb li huwa maħsub sabiex jiddottrina lit-tfal.

Huma xebbħuh mal-propaganda li l-Kommunisti kienu jagħmlu lit-tfal, jew bħall-ħasil ta’ l-imħuh tal- propaganda għaż-żgħażagħ li Doctor Goebbels kien jagħmel fi żmien Ħitler.

Liam Fox, ix-shadow Minister ta’ l-Affarijiet Barranin ta’ l-Ingilterra, ikkritika bl-aħrax dan il-ktieb tal-Kummissjoni Ewropea.

Huwa qal li jidher ċar li l-Kummissjoni Ewropea trid issammar fl-imħuh tat-tfal il-Kostituzzjoni ġdida ta’ l-Unjoni, minkejja li jeżistu oġġezzjonijiet demokratiċi għaliha (fosthom, l-oġġezzjonijiet tal-Franċiżi u l-Olandiżi).

U biex tagħmel dan, il-Kummissoni qiegħda tagħmel użu minn propaganda li tixraq aktar lill-pajjiżi ta’ l-Ewropa tal- Lvant dominati mill-Unjoni Sovjetika.

Fox żied jgħid li ħaġa ta’ min jistmerraha hija li din il-propaganda lit-tfal ta’ l-iskola qiegħda ssir mill-fondi li ġejjin mit-taxxi li jħallsu l-popli tal-pajjiżi ta’ l-Unjoni.

Jisgħobbina ngħidu li anki f’Malta qiegħed isir il-ħasil ta’ l-imħuh u l-indottrinar tat-tfal ta’ l-iskola.

Taxxa ġdida għas-sajjieda minħabba l-Unjoni Ewropea

Ħafna setturi tal-poplu Malti ġew imqarrqin bil-propaganda giddieba li saret qabel ir-referendum tas-sħubija fl-Unjoni Ewropea.

Fost dawn, hemm is-sajjieda li issa se jsibu li se tiġi mposta fuqhom taxxa ġdida, minħabba r-regolamenti ta‘ l-Unjoni.

Lis-sajjieda issa qegħdin jgħidulhom li jridu jibdew jgħajtu uffiċjal tas-sajd biex jispezzjona u jiżen il-ħut qabel dan jitniżżel l-art.

Dan huwa ordni ta’ l-Unjoni Ewropea ħalli tiżgura li s-sajjieda ma qabdux ħut iżgħar milli r-regolamenti ta’ l-Unjoni Ewropea jippermettu, barra li tkun taf kemm inqabad ħut sabiex is-sajjieda ma jaqbżux il-kwot allokata lill-Maltin.

Nafu li minn hawn u ftit ieħor, lis-sajjieda se jibdew jagħtuhom kwoti ta’ kemm jistgħu jaqbdu ħut, u se jibdew jingħataw il-post minn fejn kull sajjied ikun jista’ jmur jistad.

L-Unjoni Ewropea tordna wkoll spezzjonijiet tal-postijiet mogħtija lis-sajjieda, sabiex tara jekk humiex jistadu f’postijiet li m’humiex liċenzjati li jistadu fihom.

Mhux hekk biss.

Minn hawn u ftit ieħor, is-sajjieda Maltin u Għawdxin se jkollhom iħallsu liċenzji differenti biex ikunu jistgħu jistadu għal ħut differenti.

U jekk huma jaqbdu ħut li ma jkunux liċenzjati għalih, ikollhom jarmuh jew inkella jeħlu multi, kemm-il darba jipprovaw iniżżluh l-art.

Sabiex l-Unjoni tkun taf kull sajjied fejn ikun qiegħed jistad, hija trid li jitwaħħal apparat tas-satellita li jimmarka l-post eżatt fejn is-sajjied ikun.

Permezz ta’ l-apparat tas-satellita, l-Unjoni tara li s-sajjieda Maltin u Għawdxin ma jistadux f’postijiet li ma jkunux liċenzjati għalihom.

Tara wkoll li jekk tkun intlaħqet il-kwota, is-sajjieda ma jkunux jistgħu joħorġu jistadu aktar, għax permezz ta‘ l-apparat tas-satellita, ikun magħruf li huma ċċaqilqu u fejn marru.

Dan kollu huwa ta’ saram għas-sajjieda Maltin u Għawdxin.

Bħas-setturi l-oħrajn tal-poplu li ġew ingannati bil-propaganda favur is-sħubija fl-Unjoni, għandhom mezz wieħed biex jeħilsu minn dan is-saram.

Jingħaqdu mas-setturi l-oħrajn tal-poplu li jridu joħorġu mill-Unjoni.

Nerġgħu ntennu.

Nistaqsu lil Dr Joanne Drake li tirrappreżenta lill-Unjoni Ewropea f’Malta, jekk l-iffirmar tat-Trattat ta’ Ruma fil-25 ta’ Marzu, 1957, u li kien sar fuq “gozz paġni vojta”, kif inkixef li kien sar fil-programm fuq il-BBC World Service, Radio 4, lejlet il-50 Anniversarju, kellux allura bażi legali?

Billi Joanna Drake hija wkoll avukat, tista’ tirrispondina?

•Jekk kellu bażi legali, tista’ tgħidilna fuq liema bażi legali?

•Jekk ma kellux bażi legali, tista’ tgħidilna jekk il-mexxejja tas-sitt pajjiżi li kienu iffirmaw dokument vojt, qattx reġgħu ltaqgħu u ffirmaw id-dokument proprju bl-artikli kollha tat- trattat? Tista’ tgħidilna meta u fejn sar dan l-iffirmar?

•Dr Joanna Drake tista’ tirrispondina billi tikteb lil Eddy Privitera, CNI, 60A, Triq id-Dejqa, Valletta. Ir-risposta tagħha nippubblikawha f’din il-paġna mill-ewwel.

B'dedika lill-Unjoni Ewropea li ħbiet sigriet għal 50 sena!

1. Minn qatt kien jobsor li dak l-iffirmar tat-Trattat ta’ Ruma li kien sar, kien l-aqwa reċta tant li baqa’ ħadd ma nduna!

2. 50 sena ilu, wara ħafna xogħol iebes, iffirmaw dokument bla ma ndunaw x’kien hemm nieqes! Id-dokument li ffirmaw il-mexxejja Ewropej kien biss gozz paġni vojta li ma jiswew xejn!

3. Mur għidilhom lill-ġurnalisti u lil ħafna mistednin li l-farsa li saret se tibqa’ moħbija s-snin! U kellu jkun eżatt fil-50 Anniversarju li fuq dak l-ingann niżel is-siparju!

4. Fid-9 ta’ Mejju – Jum l-Ewropa – nixtieq nipproponi biex il-Maltin u l-Għawdxin jitgħallmu lezzjoni. Dak in-nhar fil-Belt Valletta Dr Joanna Drake aħjar taqsam qassata flok li taqsam il-kejk!

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.