MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
minn Kampanja Ħelsien Nazzjonali CNI
GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!
Fis-seba’ snin 2007 – 2013 il-Maltin u l-Għawdxin se jkunu ħallsu lill-Unjoni Ewropea €360,000,000
L-Unjoni Ewropea ċċaqċqilna l-frosta
Fl-aħħar sebat ijiem assistejna għal purċissjoni ta' personalitajiet barranin li ġew Malta b'mod jew ieħor minħabba s-sħubija ta' Malta fl-Unjoni Ewropea.
Ġew
* il-President tal-Latvja, Vike-Freiberga,
* il-Viċi President tal-Kummissjoni Ewropea, Kinnock,
* il-Prim Ministru Taljan, Berlusconi,
* il-Kummissarju tas-Suq Intern ta' l-Unjoni Ewropea, Bolkenstein,
* il-Kanċillier Ġermaniż, Schroeder,
* is-Senatur Taljan, Dini, u
*
l-Viċi President tal-Parlament Taljan, Biondi.
Dawn kollha kemm huma faħħru l-pass li Malta għamlet li ssieħbet
fl-Unjoni Ewropea.
Donnhom ġew ifarrġuna min-niket li għandna hekk kif qegħdin inġarrbu l-effetti ħżiena tal-ftehim tas-sħubija fl-Unjoni.
Ħadd minnhom ma qalilna li se igħinna negħlbu l-kriżi finanzjarja u ekonomika li għandna.
Bil-kliem ta' ftaħir ma nagħmlu xejn.
Anzi,
jagħmlilna ħsara għax jaljenana u inessina mill-ħtieġa
kbira li għandna li niflu sewwa l-kawżi tal-kriżi u x'għandna
nagħmlu biex noħorġu minnha.
Waħda mill-kawżi tal-kriżi finanzjarja u ekonomika li qiegħda tifnina hija s-sħubija ta' Malta fl-Unjoni Ewropea u l-ftehim diżastruż ta' sħubija li l-Gvern Malti u l-Unjoni Ewropea għamlulna.
Biex noħorġu mill-kriżi, irridu naqtgħu l-ktajjen li l-ftehim tas-sħubija rabatna bihom.
Jekk
ma nagħmlux dan malajr, se nintagħfsu aktar hekk kif ir-regoli ta' l-Unjoni
Ewropea jissikkawna aktar milli għamlu s'issa.
Diġà rajna kif l-Unjoni Ewropea ġagħlet lill-Gvern Malti inaqqas
in-numru tal-ħaddiema fit-tarzni tagħna għal 1,600 biss.
Rajna fabbriki jissensjaw mijiet ta' ħaddiema minħabba ż-żieda ordnata mill-Unjoni Ewropea fid-dazji fuq il-materja prima miġjuba minn barra l-Unjoni Ewropea.
Rajna fabbriki jitilqu minn Malta għax l-Unjoni Ewropea ma tħalliniex nagħtuhom l-għajnuniet u l-inċentivi li konna nagħtuhom.
Rajna imprendituri Maltin iżarmaw l-azjendi tagħhom wara li l-Unjoni Ewropea ċaħditilna d-dritt li nkomplu nagħtuhom il-protezzjoni li konna nagħtuhom.
Issa
rajna l-‘cruise liners’ iħassru ż-żjarat bit-turisti li kienu
regolarment jagħmlu fil-Port tagħna, għax l-Unjoni Ewropea tridna
neqirdu d-‘duty free’.
Dawn huma xi wħud mill-fatti li diġà rajna jseħħu minħabba l-ftehim magħmul mill-Gvern Malti u l-Unjoni Ewropea dwar is-sħubija ta' Malta fl-Unjoni li l-Prim Ministru Malti ffirma b'tant daqq ta' trombi fis-16 ta' April tas-sena l-oħra ġewwa Atene.
Ġraw aktar fatti barra dawk li semmejna li għamlu ħsara l-ekonomija u l-qasam tax-xogħol f'pajjiżna.
Iżda
l-agħar għadu ġej hekk kif l-Unjoni Ewrpea tissikka aktar
lill-Gvern Malti ħalli jobdi r-regoli kollha ta' l-Unjoni fl-oqsma
tal-kummerċ, tal-provvista tas-servizzi, tat-tassazzjoni u ta' l-għoti
tal-kuntratti.
Ħjiel ta' xi swat hemm lest għalina tahulna Frits Bolkenstein,
il-Kummissarju tas-Suq Intern ta' l-Unjoni Ewropea.
Dan ġie biex iċaqċqilna l-frosta.
Huwa nsista li għandna nneħħu l-benefiċċji tal-ħelsien mill-ħlas tat-taxxa li nagħtu lill-investituri barranin biex jinvestu f'pajjiżna ħalli joħolqulna l-impjiegi għall-ħaddiema tagħna.
Huwa saħaq li għandna niftħu l-bibien beraħ ħalli operaturi barranin mill-Unjoni Ewropea li jipprovdu s-servizzi jkunu jistgħu bla xkiel ta' xejn jaħdmu f'pajjiżna b'kompetizzjoni ma' l-operaturi Maltin.
Qalilna li għandna nħaffu l-proċeduri ħalli nagħtu l-liċenzji lill-barranin ta' l-Unjoni Ewropea li jridu jiftħu negozju f'pajjiżna b'kompetizzjoni man-negozjanti Maltin.
L-istess
ħaġa għandna nagħmlu biex professjonisti bil-lawrja mill-Unjoni
Ewropea jkunu jistgħu jipprattikaw il-professjoni tagħhom
b'kompetizzjoni mal-professjonisti Maltin.
Fil-waqt li l-Unjoni Ewropea qiegħda ġġagħlna nadottaw il-politika ekonomika tagħha, il-Kummissarju Ewropew Frits Bolkenstein stess jammetti li l-ekonomija ta' l-Unjoni Ewropea hija marida u teħtiġilha riforma strutturali.
Huwa
jridna nieħdu l-istess mediċina li ma fejqitx lill-ekonomija ta' l-Unjoni
u li wasslet fil-miljuni ta' ħaddiema qegħda fil-pajjiżi ta' l-Unjoni
u fl-industriji jaħarbu mill-pajjiżi ta' l-Unjoni biex jarmaw f'pajjiżi
fejn m'humiex imxekkla bir-regoli u d-direttivi ta' l-Unjoni.
Hemm bżonn li niflu sewwa x'inhu jiġri fl-Unjoni Ewropea.
Il-Kancillier
Schroeder kien ikun ta' għajnuna għalina kieku minflok li qalilna li
l-Prim Ministru Malti qabel miegħu f'kollox, fissrilna għax il-Ġermanja
ntlaqtet bi kriżi ekonomika kbira u għandha miljuni ta' ħaddiema
bla xogħol u fetħilna għajnejna biex ma jiġrilnix l-istess
f'Malta jekk inħaddmu l-istess politika ekonomika ta' l-Unjoni Ewropea.
Il-Viċi President tal-Kummissjoni Ewropea, Neil Kinnock, kien ikun ta' siwi
għalina li kieku minflok ma ftaħar kemm l-Unjoni Ewropea hija tajba,
qalilna kemm hija kbira l-korruzzjoni fl-istrutturi kollha ta' l-Unjoni Ewropea
u x'għandna nagħmlu ħalli Malta fl-Unjoni Ewropea ma tmissnix l-istess
xorti li npestat l-Unjoni.
B'hekk biss dawn iż-żjarat tal-barranin jistgħu jkunu ta' ġid
u mhux ħela taż-żmien.
Kif
l-UE tixtri lill-politiċi!
L-Unjoni Ewropea ilha li għarfet li biex tibni mperu ġdid Ewropew kien neċessarju li "tixtri" l-appoġġ tal-politiċi Ewropej.
Biex
jirnexxilha tagħmel dan fasslet numru kbir ta' "inċentivi"
li ma setgħux ma jagħmux lill-maġġoranza kbira tal-politiċi
u uffiċjali tal-partiti politiċi fl-Ewropea.
Illum se nsemmulkom "inċentiv" wieħed biss minn ħemel
ta' "inċentivi" oħra li nisperaw li ninfurmawkom bihom aktar
’il quddiem.
L-“inċentiv” li se nsemmilkom illum fakkritulna ittra li dehret f'The Times (tad-19 ta' Frar 2004), miktuba minn Derek Bennett, minn Walsall, fl-Ingilterra.
F'din
l-ittra Derek Bennett kiteb hekk:-
"Mill-1 ta' Mejju, meta Malta uffiċjalment tissieħeb fl-Unjoni
Ewropea, id-duty free għall-ivvjaġġar fl-Unjoni Ewropea jsir
ħaġa tal-passat.
Aħna li ninsabu mwaħħlin fl-Unjoni Ewropea tlifna d-duty free żmien ilu, bħala parti mill-pjan ta' l-Unjoni Ewropea li ssir pajjiż wieħed.
Iżda
hemm klikka żgħira ta' nies li għadhom jistgħu jixtru oġġetti
duty free meta jivvjaġġaw ġewwa l-Unjoni Ewropea – il-membri
tal-Parlament Ewropew, il-Kummissarji Ewropej u l-uffiċjali ta' l-Unjoni
Ewropea!"
Kos, kif m'għadna nisimgħu xejn dwar din l-imbierka duty free mill-politiċi
Maltin, hux?
Iżda ġurnal ta' Londra, nhar is-Sibt li għadda, ta prominenza l-istorja dwar kemm Malta sejra titlef 'cruise liners' kull sena minħabba li l-Unjoni Ewropea ġagħlitna nneħħu d-duty free.
Il-ġurnal
Ingliż semma l-każ ta' aġenzija ta' l-ivvjaġġar f'Malta
li qalet li x-xogħol tagħha se jonqos b'95% għax il-vapuri tat-turisti
li kienu jidħlu Malta kull ġimgħa, issa sejrin imorru Tuneż,
minn fejn jistgħu jixtru li jridu mingħajr ma jħallsu t-taxxa tal-VAT
u taxxi oħra fuq l-oġġetti.
L-istess ġurnal Ingliż qal li vapur tat-turisti li kien jiġi
regolarment kull ġimgħa f'Malta, kien jixtri b'madwar £80,000 fi
fjuri minn Malta.
Dan
l-eżempju ngħata biex il-qarrejja tal-ġurnal ta' Londra jkollhom
ħjiel kemm Malta se titlef negozju bit-telf tad-dħul tal-‘cruise
liners’ minħabba t-tneħħija tad-duty free fuq l-ordnijiet ta'
l-Unjoni Ewropea.
Il-Konvenzjoni
toriġina minn konvenzjoni mhux demokratika
Il-kwistjoni
li l-popli tal-pajjiżi differenti ta' l-Ewropa għandhom hija jekk
humiex lesti li jabbandunaw id-demokrazija nazzjonali u l-indipendenza tagħhom
favur it-tmexxija minn gvern u stat li jkun fuq il-gvernijiet u l-istati
tal-pajjiżi membri (sopranazzjonali) u li jkun profondament mhux
demokratiku, bħal ma hija l-Unjoni Ewropea.
Din il-kwistjoni l-popli sabuha fuqhom bil-ħabi matul għexieren ta'
snin u bis-saħħa ta' sensiela ta' trattati li għaddew it-tmexxija
ta' ħafna oqsma f'idejn l-Unjoni Ewropea.
Il-mexxejja
politiċi tal-pajjiżi membri ma spjegawx lill-poplu tagħhom l-implikazzjonijiet
tat-trattati li saru u huwa biss issa li ċ-ċittadini tal-pajjiżi
membri bdew jifhmu x'ifissru sewwa dawk it-trattati.
Hekk kif wieħed jista' japprezza l-valur ta' ħajja b'saħħitha,
meta jimrad, hekk ukoll wieħed jibda jirrealizza kemm jiswa l-valur tad-demokrazija
meta jitlifha u jsib ruħu ggvernat minn politiċi, l-aktar barranin, li
ma jkollu ebda kontroll fuqhom.
Il-popli ta' l-Ewropa huma lesti li jpoġġu lilhom infushom, lil
uliedhom u lil ulied uliedhom taħt ir-regoli tal-Kostituzzjoni ta' l-Unjoni
Ewropea li tkun superjuri għall-Kostituzzjoni nazzjonali tagħhom?
Huma
lesti li jpoġġu ruħhom taħt Kostituzzjoni li tfasslet minn
Konvenzjoni (jiġifieri, il-grupp ta' 105 rappreżentanti, fosthom
tlieta minn kull pajjiż, inkluża Malta) li ma kinux eletti, iżda
magħżula mill-partiti politiċi (fil-każ ta' Malta, per eżempju,
il-Gvern bagħat saċerdot politikant biex jirrappreżentah)?
Il-Konvenzjoni li fasslet il-Kostituzzjoni kienet fondamentalment mhux demokratika.
Il-membri tagħha – b'kollox 105 persuni – kienu magħmula minn żewġ rappreżentanti minn kull parlament nazzjonali ta' kull stat membru u ta' kull stat li kien applika biex isir membru ta' l-Unjoni.
U
magħhom kien hemm rappreżentant ta' kull gvern nazzjonali u rappreżentanti
mill-Parlament Ewropew u tal-Kummissjoni Ewropea.
L-abbozz tat-Trattat tal-Kostituzzjoni jgħid li l-Kostituzzjoni ġiet
addottata "b'kunsens" fil-Konvenzjoni.
Iżda
l-“kunsens” kien l-aktar f'moħħ il-President tal-Konvenzjoni,
l-ex-President Franċiż Giscard d'Estaing u t-12-il persuna li kienu
jiffurmaw il-Presidium (il-Kumitat tal-Presidenza) tal-Konvenzjoni.
L-ebda vot ma ttieħed fuq aktar minn 1,000 emendi li tressqu u l-opinjonijiet
tal-minoranzi u ta' dawk li ma kinux qegħdin jaqblu, ġew injorati.
Hekk per eżempju ġara dwar ir-Rapport Alternattiv:
"L-Ewropa tad-Demokraziji" (The Europe of Democracies) li ssuġġerixxa Unjoni Ewropea aktar deċentralizzata u trattat aktar fil-qosor għal "Unjoni ta' Demokraziji".
Dan
ir-rapport kien iffirmat minn tmin membri tal-Konvenzjoni.
Konvenzjoni oħra bħal dik tal-Kostituzzjoni kienet intużat biex tfassal iċ-Charter tad-Drittijiet Fundamentali tal-Bniedem ta' l-Unjoni Ewropea, li l-kontenut tiegħu qatt ma ġie diskuss f'xi parlament nazzjonali.
Il-Konvenzjoni
dwar il-Kostituzzjoni pproponiet li dak iċ-Charter għandu jkun it-tieni
parti tal-Kostituzzjoni ta' l-Unjoni Ewropea u għandu jkollu s-saħħa
ta' rabta legali għall-pajjiżi ta' l-Unjoni.
Għal dawk li jridu jibnu stat Ewropew (kif iridu li l-Unjoni ssir), dak li
huma jsejħu bħal "il-metodu tal-Konvenzjoni" għandu l-vantaġġ
li jagħmilha possibbli li jittieħdu inizjattivi maġġuri
ġodda biex isseħħ aktar l-integrazzjoni ta' l-istati membri, mingħajr
ma tkun qiegħda tiġi kkunsidrata x-xewqa tal-popli ta' l-istati membri
u tar-rappreżentanti tagħhom fil-parlamenti nazzjonali.
Il-kompozizzjoni tal-Konvenzjoni magħmula minn rappreżentanti nominati
mill-parlamenti u mill-gvernijiet kienet maħsuba biex tagħti dehra ta'
leġittimità demokratika għal proġett li riduh biss ftit għoljin
(elitisti).
Huma
ħolqu bil-forza Kostituzzjoni għaċ-ċittadini ta' l-Unjoni
Ewropea, li ċ-ċittadini iżda la qatt riedu u lanqas qatt staqsew
għaliha.
IRRIDU L'INDIPENDENZA MILL-UNJONI EWROPEA
Il-Ħamis, 26 ta’ Frar, 2004.
e-mail: cnimalta at yahoo.co.uk
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat Lm2 flimkien ma' din il-formola liċ-
Chairman
CNI,
Dr
Karmenu Mifsud Bonnici B.A. LL.D.
81,
Triq Ġuże Pace,
Ħamrun.
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ