MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

JEKK TIRRISPETTA L-KOSTITUZZJONI TA' PAJJIŻEK GĦID

LID-DEPUTAT PARLAMENTARI TIEGĦEK JIRRISPETTA L-FEHMIET

TIEGĦEK U MA JIVVOTAX FAVUR IL-KOSTITUZZJONI TA' L-UNJONI EWROPEA

LI TKASBAR IL-KOSTITUZZJONI TA' MALTA.

Il-President ta’ Malta jgħaxxaqha fi Praga

Il-PRESIDENT ta’ Malta, fiż-żjara uffiċjali li għadu kif għamel fir-Repubblika Ċeka, mar jagħmilha tal-bravu u rrepeta l-propaganda qarrieqa dwar l-Unjoni Ewropea li kien jagħmel f’Malta meta kien Prim Ministru.

Il-President tar-Repubblika Ceka Vaclav Klaus huwa kritiku ħafna ta’ l-Unjoni Ewropea u tal-kostituzzjoni ġdida tagħha.

Huwa ma jemminx fil-politika ekonomika li l-Unjoni mxiet biha, u jixli lill-Unjoni li qiegħda tiċċentralizza f’idejha t-tmexxija tal-popli tal-pajjiżi membri tagħha, u b’hekk qiegħda tnaqqsilhom il-libertà tagħhom.

Il-maġġoranza tal-membri Ċeki tal-Parlament Ewropew, l-istess bħal ma għamlu d-Deputati Maltin, ma vvutawx favur il-kostituzzjoni ġdida ta’ l-UE meta tressqet għall-approvazzjoni tal-Parlament Ewropew fit-12 ta’ Jannar fi Strasbourg.

Mhux ċar x’se jiġri dwar ir-ratifika tal-kostituzzjoni ġdida ta’ l-UE fir-Repubblika Ċeka.

Huwa magħruf li hemm oppożizzjoni qawwija kontriha, u fost dawk kontriha, hemm il-President stess tar-Repubblika.

Il-kliem tal-President Malti fi Praga favur l-Unjoni u l-kostituzzjoni ġdida tagħha kien meqjus barrra minn loku u żball diplomatiku.

Huwa veru li għadu mibrum mill-propaganda qarrieqa li huwa temgħa lill-poplu Malti favur l-Unjoni.

Il-President Ċek ma qagħdx jogħmodha meta qal li wħud min-nies qegħdin joħolmu dwar is-saħħa ekonomika ta’ l-Unjoni Ewropea.

Il-President ta’ Malta kien imprudenti u irresponsabbli li fir-Repubblika Ċeka tkellem pubblikament kif tkellem dwar l-UE u l-kostituzzjoni ġdida tagħha, meta huwa jaf li kemm il-President tal-pajjiż li kien qiegħed jospitah, kif ukoll il-maġġoranza tad-Deputati Ċeki fil-Parlament Ewropew huma tal-fehma kontra l-Unjoni u l-kostituzzjoni ġdida tagħha.

Il-fehma li l-President Vaclav Klaus u l-maġġoranza tad-Deputati Ċeki, fil-Parlament Ewropew għandhom kontra l-kostituzzjoni ġdida ta’ l-Unjoni Ewropea għandha ssaħħaħ il-fehma tal-maġġoranza tal-Maltin kontriha wkoll.

Ir-Repubblika Ċeka hija fil-qalba ta’ l-Ewropa, u l-poplu Ċek huwa Ewropew mija fil-mija.

Il-kritika tiegħu għall-Unjoni Ewropea u l-oppożizzjoni tiegħu għall-kostituzzjoni ġdida tagħha m’humiex ġejjin minn xi fanatiżmu jew xi sentiment anti-Ewropew.

Huma msejsa fuq raġunijiet sodi, l-istess raġunijiet li għandna aħna li jġagħluna nikkritikaw l-Unjoni Ewropea u nopponu l-kostituzzzjoni ġdida tagħha.

Aħna nemmnu li l-politika ta’ l-Unjoni hija ħażina u li l-kostituzzjoni ġdida ta’ l-Unjoni tkompli tnaqqsilna l-ħelsien tagħna.

Ma vvotawx favur il-Kostituzzjoni ta' l-UE

IL-PROPAGANDISTI f'Malta ta' l-Unjoni Ewropea jgħajjru lil dawk fostna li jikkritikaw il-Kostituzzjoni ġdida ta' l-UE.

Iżda huma jaħbu mill-poplu Malti l-fatt li 32 membru parlamentari mal-Partit Popolari Ewropew, li fih huwa msieħeb il-Partit Nazzjonalista Malti, ivvotaw kontra l-Kostituzzjoni ġdida ta' l-UE fis-seduta tat-12 ta' Jannar tal-Parlament Ewropew ġewwa Strasbourg.

20 membru Parlamentari oħrajn ta' l-istess Partit Popolari Ewropew astjenew milli jivvotaw.

Simon Busuttil u David Casa kkritikaw lit-tliet membri parlamentari Laburisti li astjenew jew ma ħadux sehem fil-votazzjoni tat-12 ta' Jannar.

Iżda Busuttil u Casa ma ħaduhiex kontra t-32 membru sħabhom li vvotaw kontra l-Kostituzzjoni ġdida u ma kkritikawx l-20 l-oħra sħabhom li astjenew milli jivvotaw.

Bil-vot tagħhom favur il-Kostituzzjoni ġdida ta' l-UE, Busuttil u Casa qablu li l-liġijiet li l-Unjoni tagħmel li jkunu ma jaqblux mal-Kostituzzjoni Maltija, jegħlbu l-Kostituzzjoni tagħna.

M'għandhomx biex jiftaħru ħlief bis-serviliżmu tagħhom lejn l-Unjoni Ewropea.

Fost il-membri parlamentari Soċjalisti tal-Parlament Ewropew, kien hemm 13 li astjenew milli jivvotaw (fosthom żewġ Maltin) u deputata oħra vvotat kontra l-Kostituzzjoni ġdida.

Dan juri li d-deputati Maltin ma kinux waħedhom fost is-Soċjalisti li ma vvotawx favur il-Kostituzzjoni ġdida ta' l-UE.

Il-Membri Parlamentari Laburisti fil-Parlament Malti m'għandhomx jinsew li hemm Soċjalisti oħra Ewropej li ma vvotawx favur il-Kostituzzjoni ġdida ta' l-UE u meta il-Kostituzzjoni tersaq fil-Parlament Malti għar-ratifika, m'għandhomx isibuha bi tqila li jagħmlu bħalhom.

Kien hemm ukoll seba' membri parlamentari tal-Ħodor (Greens) li vvotaw kontra l-Kostituzzjoni ġdida ta' l-UE fit-12 ta' Jannar fi Strasbourg u ieħor astjena li jivvota.

Is-Segretarju tal-Ħodor, Dr Cassola, ma xandarx dawn il-fatti lill-poplu Malti, ħalli ż-żgħażagħ Maltin li jissimpatizzaw mal-Ħodor ma jintebħux li hemm ħwejjeġ fil-Kostituzzjoni ġdida ta' l-UE li huma oġġezzjonabbli ħafna għal ħafna votanti favur il-Ħodor Ewropej.

Fost il-membri Parlamentari Ħodor li vvotaw kontra l-Kostituzzjoni ġdida ta' l-UE, kien hemm Caroline Lucas, deputata Ingliża.

Hija tikkritika bl-aħrax lill-Unjoni Ewropea dwar il-politika ta' militarizzazzjoni li adottat, dwar il-politika ambjentali li hija defiċjenti u dwar il-politika tagħha favur il-globalizzazzjoni tal-kummerċ, li Lucas issostni qiegħda tnaqqas ix-xogħol u l-impjiegi fil-pajjiżi membri ta' l-Unjoni.

ISSA nafu xi tfisser għall-poplu Malti s-sħubija ta’ pajjiżna fl-Unjoni Ewropea.

Tfisser ħafna sensji u impriżi li jagħlqu u oħrajn li jnaqqsu n-numru tan-nies li jħaddmu.

Tfisser theddida għax-xogħol tal-ħaddiema f’ħafna setturi, bħal tax-Xatt, għall-bdiewa, raħħala u għas-sajjieda.

Tfisser anqas investiment barrani produttiv f’pajjiżna u konsegwentement, nuqqas ta’ ħolqien ta’ impjiegi ġodda.

Tfisser 98,000 turisti tal-cruise liners anqas fis-sena li għaddiet, minħabba t-telfien ta’ l-iffrankar tat-taxxa kkaġunat mis-sħubija ta’ Malta fl-Unjoni.

Tfisser żieda fit-taxxi u d-dħul ta’ ħafna taxxi ġodda u ħlas ta’ rati ogħla għas-servizzi essenzjali.

Tfisser splużjoni fil-prezzijiet ta’ l-art u tal-bini u fil-kera tad-djar.

Tfisser żieda fl-għoli tal-ħajja ħafna aktar miż-żidiet fil-pagi.

Tfisser spejjeż aktar fil-qasam tal-produzzjoni u fil-qasam tas-servizzi u tat-turiżmu u konsegwentement, pajjiżna jsir anqas kompetittiv.

Qegħdin naraw li l-Gvern irid inaqqas il-kundizzjonijiet tax-xogħol tal-ħaddiema u l-impjegati mhux biss ta’ dawk fis-settur pubbliku, iżda anki ta‘ dawk fis-settur privat.

Ftiehem li jagħmel hekk ma’ l-Unjoni Ewropea.

L-Unjoni Ewropea trid li l-Gvern inaqqas in-numru ta’ l-impjegati u ħaddiema fis-settur pubbliku, mingħajr ma l-Unjoni tgħid biex jinħolqu impjiegi ġodda fis-settur privat.

Trid ukoll li l-Gvern ma jkompliex jiggarantixxi l-impjieg sa kemm tintlaħaq l-età ta’ l-irtirar mis-servizz u tgħid li din tkun parti mir-riforma tas-servizz pubbliku.

Is-sħubija fl-Unjoni ġġiegħel lill-Gvern inaqqas il-kundizzjonijiet tal-pensjonijiet u jdaħħal il-pensjonijiet privati li jitħallsu mill-kontribuzzjonijiet ġodda li l-ħaddiema u l-impjegati jkollhom jagħmlu, barra l-kontribuzzjoni li jħallsu tas-Sigurtà Nazzjonali.

Is-sħubija fl-Unjoni ma tħallix lill-Gvern ikompli jipprovdi mingħajr ħlas il-kura tas-saħħa lill-poplu u ġġagħlu jnaqqas is-servizzi soċjali li huwa jagħti lill-komunità.

Anki l-edukazzjoni tintlaqat mis-sħubija ta’ pajjiżna fl-Unjoni.

Mhux biss il-Gvern mhux se jitħalla jħallas l-istipendji li qiegħed iħallas lill-istudenti, iżda jkollu jdaħħal ħlasijiet fl-għoti tat-tagħlim ta’ ċertu livell għoli li llum huwa bla ħlas.

Din mhix il-lista sħiħa tal-konsegwenzi ħżiena tas-sħubija ta’ pajjiżna fl-Unjoni Ewropea.

Iżda naħsbu hija biżżejjed kerha li ma tħalliniex nieqfu fil-ħidma tagħna biex neħilsu lill-poplu Malti mill-gwaj kbir li ġab b’idejh.

Aktar taxxi minhabba l-Unjoni Ewropea

WAQT li l-maġġoranza tal-poplu Malti oġġezzjonat għal ħafna mill-miżuri li l-Gvern daħħal fl-aħħar budget, l-Unjoni Ewropea faħħret lill-Gvern Malti għal dawk il-miżuri.

Din l-istorja se tirripeti ruħha kull sena.

Il-Gvern Malti jkollu bil-fors jogħġob u jissodisfa lill-Unjoni Ewropea u mhux lill-maġġoranza tal-Maltin.

Minn meta beda jseħħ il-ftehim tas-sħubija ma’ l-Unjoni Ewropea, twarrab f’pajjiżna l-prinċipju tad-demokrazija li sseħħ ir-rieda tal-maġġoranza.

Minfloku, daħal il-prinċipju f’pajjiżna li sseħħ ir-rieda ta’ l-Unjoni Ewropea, mhux ir-rieda tal-maġġoranza tal-poplu Malti.

Għax bil-ftehim ta’ sħubija li l-Gvern għamel ma’ l-Unjoni, il-Gvern Malti jkollu bil-fors jimxi skond il-politika finanzjarja tagħha.

Kellu jagħmel Pjan ta’ Konverġenza, jiġifieri, li jdaħħal il-miżuri li jaqblu mal-politika ta’ l-Unjoni.

Ikollu jwettaq il-miżuri li kellu jaċċetta fil-Pjan ta’ Konverġenza, anki jekk b’dawk il-miżuri l-poplu jintgħafas ħafna.

Issa, barra l-ftehim ta’ sħubija u l-Pjan ta’ Konverġenza, il-Gvern Malti bi ħsiebu jintrabat aktar bil-Kostituzzjoni ġdida ta’ l-Unjoni.

Meta din tidħol fis-seħħ, il-Gvern Malti jkun marbut biha li jimxi skond il-politika finanzjarja ta’ l-Unjoni li hija msammra fil-Kostituzzjoni ġdida, bħala Kmandament li jrid bil-fors jitħares minn kull pajjiż membru ta’ l-Unjoni.

Għalkemm wara disa’ xhur li daħal fis-seħħ fl-1 ta’ Mejju tas-sena l-oħra l-ftehim ta’ sħubija li l-Gvern għamel ma’ l-Unjoni, il-maġġoranza tal-poplu Malti diġà fehmet li l-politika finanzjarja ta’ l-Unjoni tagħmlilna akar deni milli ġid, il-Gvern xorta waħda se jisfida r-rieda tal-maġġoranza tal-poplu.

Se jisfidha billi jivvota fil-Parlament Malti l-approvazzjoni tal-politika finanzjarja ta’ l-Unjoni kif inhi mfissra fil-Kostituzzjoni ġdida li l-Gvern irid li tegħleb il-Kostituzzjoni ta’ Malta.

Qabel ma sar ir-referendum dwar is-sħubija ta’ Malta fl-Unjoni, kienu jiżguraw lill-poplu li l-Unjoni ma tindaħalx fit-taxxi li jsiru f’pajjiżna.

Il-Gvern jipprova jġib xi skuża jew oħra għal kull taxxa li jagħmel u qatt ma jammetti l-verità li l-Unjoni ordnatlu jagħmilha.

Iżda llum il-poplu nduna bil-qerq tal-Gvern li daħak bih.

Issa l-Gvern se jerġa’ jinganna lill-poplu Malti bl-istorja tal-Kostituzzjoni ġdida ta’ l-UE.

Il-Gvern u l-propagandisti tiegħu diġà bdew kampanja favur ir-ratifika tal-Kostituzzjoni ġdida ta’ l-UE.

Mhux qegħdin jgħidu lill-poplu li din il-Kostituzzjoni ġdida torbotna aktar li nagħmlu dak li trid l-Unjoni dwar taxxi ġodda f’pajjiżna.

Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).

Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.

Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).

Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).

6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.

Artiklu I-6 tal-Kostituzzjoni ta' l-Unjoni Ewropea

Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.