MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Id-deċiżjonijiet tal-Gvern dwar it-Tarzna: Għaliex aħna kontra – is-CNI

Id-decizjoni li l-Gvern ħa dwar it-Tarzna bi ftehim ma’ l-Unjoni Ewropea, ma għandhom ikollhom il-kunsens ta’ ħadd u għandhom ikollhom il-kundanna ta’ kulħadd, issostni s-CNI. 

Mhux kunsens nazzjonali għandu jkun hemm dwarhom, iżda protesta nazzjonali kontrihom.

Is-CNI fliet id-deċiżjonijiet waħda, waħda u sabet li huma ta’ ħsara għal pajjiżna. 

Ibda mid-deċiżjoni li n-numru ta’ ħaddiema fit-Tarzna jonqos drastikament.

Is-CNI tfakkar li n-numru ta’ ħaddiema fit-Tarzna iffissawh l-eperti tal-Gvern u ta’ l-Unjoni Ewropea meta seba’ snin ilu fasslu l-Pjan ta’ Ristrutturar tat-Tarzna. 

Dak iż-żmien kienu diġà għalqu wieħed mill-baċiri u kkalkolaw kemm kellu jkun in-numru ta’ ħaddiema fuq in-numru ta’ baċiri tal-lum.

Seba’ snin ilu s-suq tax-xogħol ta’ tiswija tal-vapuri ma kienx kbir daqs dak tal-lum. 

Skond il-Gvern, illum hawn “boom”. 

Fi żmien ta’ “boom” ma jagħmilx sens li tnaqqas il-ħaddiema, iżda jagħmel sens li żżid in-numru tagħhom.

Għalhekk is-CNI tgħid li d-deċiżjoni tal-Gvern u ta’ l-Unjoni Ewropea li jonqos drastikament in-numru ta’ ħaddiema fit-Tarzna hija ħażina u ta’ ħsara għall-qasam tax-xogħol ta’ pajjiżna.

L-irtirar volontarju mix-xogħol

Id-deċiżjoni l-oħra marbuta mat-tnaqqis tal-ħaddiema hija li l-ħaddiema jirtiraw volontarjament mix-xogħol. 

Din tfisser li snin qabel il-ħaddiema jilħqu l-età ta’ l-irtirar. 

Jieqfu jaħdmu u jieħdu l-pensjoni. 

Għas-CNI din id-deċiżjoni hija ta’ ħsara għall-pajjiżna li għandu bżonn ikabbar in-numru ta’ nies li jaħdmu u mhux jiżdied in-numru ta’ nies li jieħdu l-pensjoni. 

F’din id-deċiżjoni l-problema tal-pensjonijiet se tikber. 

Il-pajjiż għandu jħeġġeġ aktar nies ikomplu jaħdmu, mhux jinkoraġġixxi bi skemi attraenti li aktar nies jieqfu kmieni mix-xogħol.

Hemm bżonn li nifhmu li x-xogħol li jsir fit-Tarzna huwa bejgħ tas-servizzi tagħna lill-barranin, u jitqies bħal esportazzjoni li tikseb flus għall-pajjiżna minn barra. 

Meta nnaqqsu l-ħaddiema fit-Tarzna, inkunu qegħdin innaqqsu l-bejgħ tas-servizzi tagħna lill-barranin.

L-ekonomija ta’ pajjiżna titlef meta jonqos id-dħul mix-xogħol li t-Tarzna tagħmel lill-barranin.

Għalhekk anke minn dan l-aspett ekonomiku, it-tnaqqis tan-numru tal-ħaddiema fit-Tarzna u l-inkoraġġiment li jirtiraw kmieni mix-xogħol, huma miżuri ta’ dannu għall-ekonomija tagħna u għall-qagħda finanzjarja tal-pensjonijiet f’pajjiżna.

Is-CNI temmen li t-tielet deċiżjoni tal-Gvern, 

* li jieħu l-‘Boiler Wharf’ minn għand it-Tarzna u 

* li jneħħilha t-‘Tank Cleaning Farm’ tar-Ricasoli, 

tfisser li t-Tarzna se tnaqqsilha bil-kbir il-faċilitajiet li għandha li tkabbar id-dħul tagħha. 

Minflok li l-Gvern jisfrutta aktar il-faċilitajiet tat-Tarzna ħalli jimmassimizza d-dħul tagħha, il-Gvern se inaqqsilha l-faċilitajiet u b’hekk se jċekknilha x-xogħol li t-Tarzna tagħmel u d-dħul li ddaħħal tiegħu.

Iż-żewġ faċilitajiet, 

* il-‘Boiler Wharf’ u 

* t-‘Tank Cleaning Farm’, 

* huma essenzjali u ta’ siwi għat-Tarzna u 

t-telfien tagħhom mhux se jgħin fl-iżvilupp tat-Tarzna. 

Minflok li l-Gvern jinvesti fit-tkabbir tal-faċilitajiet u l-modernizzar tat-Tarzna, il-Gvern iddeċieda li jnaqqsilha mill-faċilitajiet li llum għandha.

Diġà kien sar żball kbir meta snin ilu ingħalaq wieħed mill-baċiri tat-Tarzna, il-baċir numru wieħed. 

Kien żball ukoll li fil-ftehim li l-Gvern għamel ma’ l-Unjoni Ewropea seba’ snin ilu l-Unjoni Ewropea rabtet lill-Gvern li għal żmien ta’ għaxar snin it-Tarzna ma tagħmel ebda użu mill-baċir numru wieħed. 

Kull baċir iħaddem numru ta’ ħaddiema u meta tagħlaq baċir, tkun qiegħed tnaqqas ix-xogħol lill-ħaddiema.

Il-Gvern minflok iddeċieda li t-Tarzna terġa’ tħaddem il-baċir numru wieħed, li bi dnub kbir baqa’ wieqaf għal dawn is-snin kollha b’telf ta’ xogħol u dħul għat-Tarzna, issa l-Gvern se jkompli jiżżoppja lit-Tarzna billi jwaqqfilha wkoll il-‘Boiler Wharf’ u t-‘Tank Cleaning Farm’. 

Għas-CNI din hija deċiżjoni oħra żbaljata tal-Gvern u ta’ l-Unjoni Ewropea.

Il-Gvern iddeċieda wkoll li ma jfittix x’sar ħażin fit-Tarzna fl-aħħar snin, li tellifha l-progress li kienet qiegħda tagħmel ta’ sentejn, tlieta ilu.

Is-CNI issostni li huwa fl-interess tal-poplu li jkun jaf għaliex il-qagħda tat-Tarzna ħżienet ħafna fl-aħħar sentejn, tlieta. 

Għax huwa l-poplu li se jkollu jagħmel tajjeb bit-taxxi li jħallas għat-telf diżastruż li sar fl-aħħar sentejn, tlieta.

Nifhmu li mhux fl-interess tal-Gvern li tkun magħrufa l-verità dwar it-tarzna, għaliex parti kbira mill-ħtija tat-tmexxija diżastruża hija tal-Gvern stess. 

Għalhekk il-Gvern, biex ma jinstabx ħati, iddeċieda li mhux il-mument li jsir magħruf x’ġara sewwa fit-Tarzna fl-aħħar sentejn, tlieta.

Is-CNI tfakkar li mis-sena 1998 ’l hawn il-Gvern kien responsabbli mija fil-mija għat-tmexxija tat-Tarzna.

Jekk it-Tarzna ma marretx tajjeb, il-Gvern huwa responsabbli ta’ dan għax it-tmexxija tagħha kienet f’idejh,

Huwa fl-interess tal-poplu li jsir magħruf jekk il-Gvern mexxiex tajjeb jew mexxiex ħażin lit-Tarzna. 

Il-Gvern qed iġib ruħu ta’ ġifa li jibża’ li l-poplu jsir jaf kif il-Gvern mexxa lit-Tarzna fl-aħħar għaxar snin li fihom kellu t-tmexxija sħiħa tagħha.

Tajjeb li nfakkru li l-Gvern ilu 20 sena responsabbli mit-Tarzna u jekk it-Tarzna marret lura, il-Gvern ma jistax jeħles mill-ħtija, jew parti mill-ħtija tat-telf li għamlet. 

Minflok li jilmenta li l-poplu ġarrab il-piż ta’ l-għajnuniet mogħtija lit-Tarzna f’dawn l-aħħar 20 sena, il-Gvern għandu jistqarr li huwa għandu l-parti l-kbira mit-tort ta’ dan, għax huwa kien responsabbli tat-Tarzna.

Għalhekk id-deċiżjoni li l-Gvern ħa li ma ssirx inkjesta pubblika indipendenti dwar it-Tarzna, kienet ukoll deċiżjoni żbaljata u l-Gvern ħadha biex jgħatti dnubitu.

Fost kollox il-Gvern iddeċieda bi ftehim ma’ l-Unjoni Ewropea li jbiegħ it-Tarzna, sħiħa jew maqsuma f’partijiet, lill-investituri barranin u jagħtihom b’kera jew ċens il-baċiri, il-mollijiet u l-ħwienet tax-xogħol.

Il-Gvern qal li ddeċieda li jbiegħ, għax mhux xogħol il-Gvern li jmexxi azjenda kummerċjali u l-privat kapaċi imexxiha aħjar minnu. 

Hawnhekk is-CNI tfakkar li kien Gven Nazzjonalista li 40 sena ilu ddeċieda bil-maqlub u ħa f’idejh it-Tarzna minn għand kumpanija privata li kellha t-Tarzna. 

Dak iż-żmien il-Gvern kien jemmen li fl-isteress nazzjonali, it-Tarzna ma kellhiex tibqa’ għand il-privat. 

Illum, Gvern Nazzjonalista iridna nemmnu li fl-interess nazzjonali, it-Tarzna għandha tkun f’idejn il-privat.

Biex jieħu f’idejh it-Tarzna, il-privat irid li n-numru ta’ ħaddiema jkun ħafna iżgħar. 

Il-Gvern warrab l-interess nazzjonali soċjali li jitlob li jaħdmu kemm jista’ jkun ħaddiema, ħalli jikkuntenta l-interessi egoisti tal-privat li ma jġorx il-piż ta’ ħafna ħaddiema, la darba l-interessi tiegħu huma biss li jagħmel kemm jiflaħ profitt.

Il-Gvern qed jinħela wara l-argument li mhux xogħlu li jħaddem azjenda kummerċjali. 

Nesa d-dmir soċjali li għandu li jipprovdi kemm jista’ opportunitajiet ta’ xogħol lill-poplu li qiegħed iservi u mhux li jnaqqas l-impiegi ħalli l-privat jinqeda u jistana.

Il-Gvern ħareġ b’dik li għas-CNI hija dagħwa, li hu m’għandux imur iġib ix-xogħol lit-Tarzna. 

Jekk hu xogħol il-Gvern li joħroġ il-miljuni ħalli jiġu t-turisti f’pajjiżna ħalli jimlew il-lukandi tal-privat, għaliex hekk teħtieġ l-ekonomija ta’ pajjiżna. 

Mhux dmir tiegħu wkoll li jġib xogħol lejn pajjiżna, li jfisser dħul għall-pajjiżna u b’hekk huwa ġid għall-pajjiżna? 

U x-xogħol ta’ natura kummerċjali li l-ambaxxati tagħna fil-pajjiżi barranin f’hiex jikkonsisti jekk mhux li jġibu xogħol u negozju lejn pajjiżna?

Għalhekk hija deċiżjoni żbaljata oħra tal-Gvern li ma jaħdimx biex jiġi xogħol ta’ tiswija ta’ vapuri u ta’ bini ta’ vapuri għat-Tarzna ta’ Malta. 

Il-privat għandu interess li jħaddem l-inqas nies biex jagħmel l-ikbar profitt, waqt li l-poplu għandu interess li jaħdmu l-akbar numru ta’ nies, anki jekk ma jibqgħalux profitt, la darba jekk l-azjenda tgħaddi għand il-privat, xorta waħda l-poplu mhux se jkollu profitt, għax il-profitt jieħdu l-privat.

Għaldaqstant, is-CNI issostni li d-deċiżjonijiet kollha li ħa l-Gvern dwar it-tarzna m’humiex fl-interess nazzjonali u jagħmlu ħsara lill-pajjiżna. 

Mhux fl-interess tal-poplu li l-poplu jaqbel magħhom.

Hu fl-interess tiegħu li jipprotesta b’kull mod kontrihom. 

Skond is-CNI, min jagħti l-kunsens tiegħu għalihom, ikun kompliċi mal-Gvern u l-Unjoni Ewropea għall-ħsara li d-deċiżjonijiet se jikkaġunaw. 

Dmirna huwa li nopponuhom.

Il-Ġimgħa, 25 ta’ Lulju, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ