MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha €182,192 kuljum misruqa minn ħalq uliedek

Il-jum tal-31 ta’ Marzu ta’ din is-sena mhux se jkun jum ta’ ferħ bħal ma kien għall-poplu Malti ma’ tul l-aħħar 25 sena mill-1979 ’l hawn.

Għax il-Ħelsien sħiħ li ksibna fil-31 ta’ Marzu 1979 il-Gvern Malti ċedieh fis-16 ta’ April tas-sena l-oħra f’Ateni, il-Greċja, meta l-Prim Ministru Malti u l-Ministru għall-Affarijiet Barranin iffirmaw it-Trattat tas-Sħubija ta’ Malta fl-Unjoni Ewropea u issa se nitilfuh formalment fl-1 ta’ Mejju ta’ din is-sena, hekk kif Malta tissieħeb formalment bħala membru fl-Unjoni.

B’hekk, is-16 ta’ April se jibqa’ mfakkar bħala Jum it-Tradiment, u l-1 ta’ Mejju, Jum il-Ħaddiem, se jkun imtappan bil-mistħija tas-sħubija fl-Unjoni Ewropea.

M’għadniex ħielsa

Bl-irbit tal-kundizzjonijiet tal-politika u tar-regoli ta’ l-Unjoni Ewropea, pajjiżna ma baqax ħieles li jitmexxa skond ir-rieda tal-poplu tagħna.

F’ħafna oqsma importanti ta’ ħajjitna, l-Unjoni Ewropea tikkmandana x’nagħmlu u ma nagħmlux, naqblu jew ma jaqblux magħha.

Konna ħielsa biex niddeċiedu li ma nibqgħux ħielsa, iżda issa li ddeċidejna li tmexxina l-Unjoni Ewropea, inkunu qegħdin nidħku bina nfusna jekk nibqgħu niċelebraw kemm aħna ħielsa meta m’aħniex, għax ninsabu mmexxija minn ħaddiehor, mill-Unjoni Ewropea.

Skandlu lill-poplu

Meta nhar it-Tlieta rajna u smajna l-Prim Ministru, il-Ministri u s-Segretarji Parlamentari jaħilfu li jkunu fidili u leali lejn il-poplu Malti u lejn il-Kostituzzjoni u l-liġijiet ta’ pajjiżna, skandalizzajna ruħna.

Għax il-Prim Ministru, il-Ministri u s-Segretarji Parlamentari jafu li bis-sħubija ta’ Malta fl-Unjoni Ewropea, huma, fl-ewwel lok, se jkollhom ikunu fidili u leali lejn dak li tgħid u tiddeċiedi l-Unjoni Ewropea u mhux dak li jaqbel u jgħodd għall-poplu Malti.

Il-Prim Ministru, il-Ministri u s-Segretarji Parlamentari jafu li huma fl-ewwel lok iridu jobdu dak li tgħid il-Kostituzzjoni ta’ l-Unjoni Ewropea u mhux dak li tgħid il-Kostituzzjoni Maltija, għax il-Kostituzzjoni ta’ l-Unjoni hija aqwa u fuq il-Kostituzzjoni ta’ pajjiżna.

Il-Prim Ministru, il-Ministri u s-Segretarji Parlamentari jafu li huma se jkollhom iwettqu l-liġijiet li tagħmel l-Unjoni Ewropea u mhux il-liġijiet tal-Parlament Malti li jistgħu ma jkunux jaqblu ma’ dawk ta’ l-Unjoni.

Għalhekk il-poplu Malti ngħata skandlu nhar it-Tlieta biċ-ċerimonja tal-ħatra u tal-ġurament tal-Prim Ministru, tal-Ministri, u tas-Segretarji Parlamentari, li ntweriet u nstemgħet fuq il-mezzi tax-xandir.

La darba bis-sħubija fl-Unjoni Ewropea l-poplu Malti m’għadux ħieles li jiggverna lilu nnifsu, fil-31 ta’ Marzu nagħmlu żball jekk nifirħu u niċċelebraw il-Ħelsien.

La l-Ħelsien tlifnieh, fil-31 ta’ Marzu għandna nfakkru meta il-Ħelsien ksibnieh, kemm huwa ħaġa għażiża u x’għajb għamilna li ma ddefendejnieħx.

Iżda m’għandniex nikkommemoraw biss il-Ħelsien li tlifna u nqimu dawk li kisbuhulna.

Għandna naħilfu li nagħmlu minn kollox biex nerġgħu nirbħuh lura għall-poplu tagħna.

Hija s-sħubija fl-Unjoni Ewropea li serqitilna l-Ħelsien.

Mela biex il-poplu tagħna jerga’ jkun ħieles, ma jridx jibqa’ msieħeb fl-Unjoni Ewropea bl-irbit tal-ftehim li l-Unjoni Ewropea għamlitilna.

Jum il-Ħelsien li ġej għandu jkun il-bidu tal-ġlieda mill-ġdid għall-Ħelsien.

Il-fondi ta’ l-UE Ikunu flusna stess!

Diġa' bdejna naqraw u nisimgħu dwar "Fondi mill-UE" li jistgħu jiġu għal diversi proġetti kemm f'Malta u kemm f'Għawdex.

Tajjeb li l-Maltin u l-Għawdxin ikunu jafu li dawk il-fondi li qegħdin isemmu m'huma xejn fondi ta' l-Unjoni Ewropea!

Dawk huma flus li l-Unjoni Ewropea tkun ilha li ħaditilna xhur u snin qabel.

Bħal per eżempju, il-miljuni ta' liri li se nibdew niġbru mid-dwana u li rridu nibgħatuhom lill-Unjoni Ewropea.

Infakkrukom f'dak li qal is-Sur John Mifsud, id-Direttur Ġenerali tad-Dwana, meta kellem lill-uffiċjali tad-Dwana dan l-aħħar:

"… mill-1 ta' Mejju, il-flus kollha li niġbru mid-Dwana ma jmorrux aktar fil-kaxxa ta' Malta iżda f'dik ta' l-Unjoni Ewropea. Il-gvern iħallas biss il-pagi".

Minbarra dawn il-miljuni li niġbru mid-Dwana, irridu wkoll inħallsu lill-Unjoni parti mill-VAT li jiġbor il-Gvern u flejjes oħrajn.

Mela meta tisimgħu lill-politiċi Maltin jgħidulkom li "se nirċievu fondi mill-Unjoni Ewropea", kunu afu li dawk il-fondi li se nirċievu huma flusna stess li nkunu diġà ħallasna jew tajna lill-UE.

U stennew li tibdew taraw tabelli kbar kull fejn ikun qiegħed isir xi proġett li l-Unjoni tkun bagħtet għalih xi parti mill-ispiża tiegħu (tinsewx, minn flusna stess).

"Dan il-proġett qiegħed jitwetttaq bl-għajnuna tal-fondi ta' l-UE".

Mhux biss se jkunu serqulna l-ħelsien, l-indipendenza u s-sovranità ta' pajjiżna, iżda issa se jġagħlulna nagħmlu propaganda għall-Unjoni Ewropea bi flusna stess!

U kif il-politiċi Maltin m'huma jgħidu xejn dwar dan?

Nixtarru dawn sewwa

- David Heathcoat-Amory, ex-Paymaster General ta' l-Ingilterra, fit-12 ta' Novembru 1996, qal:

"… l-importanza ta' din id-deċiżjoni tal-Qorti (dwar il-“Working Time Directives" ta' l-UE) m'għandha x'taqsam xejn ma' kemm kienu jistgħu jaħdmu sigħat il-ħaddiema fl-Ingilterra; imma għandha x'taqsam dwar min verament jagħmel il-liġijiet f'pajjiżna – hux dan il-Parlament (Ingliż) jew setgħa oħra barranija (l-UE)."

- Dennis Healet, ex-Chancellor of the Exchequer Ingliż, fit-30 ta' Ottubru 1996, qal:

"Li toħloq munita waħda (l-Euro) – ħaġa daqstant importanti – kontra x-xewqa ta' tant nies, ikun diżastru … ikun ferm jaqbel għall-Ingilterra li tibqa' barra milli tidhol f'sistema li bilfors se tkun diżastruża fil-konsegwenzi politiċi u ekonomiċi tagħha."

- Malcolm Rifkind, ex-Segretarju ta' l-Istat għall-Affarijiet Barranin tal-Commonwealth, fis-7 ta' Ottubru 1996, stqarr hekk:

"Aħna lkoll nifhmu li l-munita waħda tkun deċiżjoni storika li virtwalment tkun irriversibbli. U għalhekk huwa kruċjalment importanti li nkunu nafu għal x'hiex deħlin."

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.