MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

L-UNJONI EWROPEA ma tridx li pajjiżna jkun newtrali għax tridu jħaddan il-politika barranija u ta’ sigurta` tal-Unjoni.

Il-politiċi servili Maltin, li jridu jikkuntentaw lill-Unjoni, qegħdin iħejju t-triq biex il-poplu jaċċetta li titħassar in-newtralita` mill-Kostituzzjoni ta’ Malta.

Dan il-pass ifisser tradiment tal-aħjar interessi tal-poplu tagħna.

Issa li daħal fis-seħħ it-Trattat ta’ Lisbona,

* l-UE għandha Kummissarju,

* Lady Ashton,

* li tieħu ħsieb ir-relazzjonijiet tal-UE mal-pajjiżi barranin

* u tirrappreżenta lill-Unjoni fil-qasam tal-affarijiet barranin.

Lady Ashton titkellem għal Malta u għall-pajjiżi l-oħrajn kollha tal-Unjoni.

Hija tmexxi l-politika barranija komuni tal-Unjoni,

* mhux il-politika barranija ta’ Malta,

* għax il-politika barranija komuni tal-Unjoni

* mhix il-politika ta’ newtralita`,

* kif imfissar fil-Kostituzzjoni ta Malta.

Dawk li jridu li pajjiżna jċedi n-newtralita` jġibu l-iskużi li ċ-ċirkosanzi politiċi tal-lum mhumiex l-istess bħal dawk tal-1987, meta daħħalna fil-Kostituzzjoni tagħna l-kunċett li Malta hija stat newtrali li jaħdem attivament għall-paċi, is-sigurta` u l-progress soċjali għall-ġnus kollha, billi jħaddan politika ta’ non-alinjament u ma jisseħibx fl-ebda allejanza militari

Il-Kostituzzjoni Maltija hi waħda ta’ non-allinjament,

* u l-UE,

* jekk mhux diġa` hi,

* qiegħda tiżviluppa f’allejanza militari

* u qiegħda twaqqaf armata Ewropea.

Għalhekk il-politika tal-Unjoni ma taqbilx mal-Kostituzzjoni ta’ Malta. 

U għalhekk il-politiċi li huma servili għall-UE jridu jemendaw il-Kostituzzjoni ta’ Malta biex ma tibqax ma taqbilx mal-politika tal-Unjoni.

Il-mexxejja tal-Unjoni Ewropea u l-politiċi Maltin servili għaliha jġibu l-iskuża li ladarba l-gwerra bierda m’għadhiex teżisti u m’hawnx il-pajjiżi tal-Punent fuq naħa u l-pajjiżi tal-Lvant fuq in-naħa l-oħra, bħalma kien hemm fl-1987, m’hemmx aktar skop li pajjiżna ma jxaqlibx lejn naħa jew oħra.

Iżda dan huwa raġunar falz għax illum għad hawn firda kbira bejn il-popli tal-pajjiżi tal-Punent u l-popli ta’ ħafna pajjiżi oħrajn tad-dinja, li jħossuhom mheddin mis-saħħa finanzjarja, ekonomika u militari tal-Punent.

Illum avolja m’hawnx theddida ta’ attakk militari minn barra fuq xi pajjiż tal-Ewropa jew fuq l-Istati Uniti, xorta waħda l-pajjiżi Ewropej u l-Istati Uniti jħossu li s-sigurta` tagħhom hija mhedda minn attakki jew attentati minn ġewwa l-pajjiż stess.

Min ma jridx iqarraq bil-poplu tagħna

* għandu jammetti li fil-pajjiżi ewlenin tal-Unjoni Ewropea –

* bħall-Ingliterra,

* il-Ġermanja,

* Franza,

* l-Italja u

* Spanja –

* teżisti tensjoni kontinwa

* u ħtieġa ta’ għassa kbira

* dwar attakki jew attentati

* organizzati minn għedewwa tas-sistema

* u tal-politika tal-gvernijiet ta’ dawn il-pajjiżi.

Nistgħu ngħidu, iżda, li sal-lum din it-tensjoni ma teżistix f’pajjiżna, u m’hawnx theddid ta’ attakki jew attentati kontra l-politika u s-sistema tal-Gvern tagħna.

Min huwa onest u oġġettiv għandu jirrifletti u jirealizza li n-nuqqas ta’ tensjoni u s-sigurta` li hawn f’pajjiżna huma frott tal-politika tan-newtralita` u non-allinjament tagħna.

Din tagħżilna mill-popli l-oħrajn tal-Unjoni Ewropea f’għajnejn il-popli tal-pajjiżi barra l-blokk, li jħossu li l-gvernijiet tal-pajjiżi Ewropej huma għedewwa tagħhom, minkejja li huma ħbieb tal-mexxejja tal-gvernijiet tagħhom.

Għandna nifhmu li jekk ma rridux li nkunu fl-istess maltemp ta’ tensjoni u theddid ghas-sigurta` li l-popli l-oħrajn tal-UE jinsabu fih, għandna nkomplu nħaddnu politika barranija differenti minn tagħhom, jiġifieri mill-politika barranija u ta’ sigurta` komuni Ewropea.

Kontra t-theddida ta’ attakki jew attentati minn ġewwa l-pajjiż, l-ebda ammont ta’ armamenti ma jiswew daqs kemm tiswa l-politika ta’ newtralita` u non-alinjament għax din mhux tilqa’ għall-attakki jew attentati, iżda tevita li jitwettqu għax il-Maltin ma jitqisux għedewwa bħal ma jitqiesu popli oħrajn tal-Unjoni Ewropea.

Għalhekk il-politika ta’ newtralita` u non-allinjament hija l-aqwa tarka li l-poplu Malti għandu għall-ħarsien u s-sigurta` tiegħu.

Il-politika barranija u ta’ sigurta` komuni tal-Unjoni Ewropea

* mhux biss mhijiex aħjar għall-poplu tagħna

* mill-politika ta’ newtralita` u non-allinjament,

* iżda lanqas ma tagħti xi timbru modern lill-Kostituzzjoni tagħna,

* għax hija politika mibnija fuq is-sisien qodma ta’ żmien il-Gwerra l-Bierda,

* meta l-Ewropa tal-Punent ħasset li tista’ tiżgura s-sigurta` tagħha permezz tal-forzi militari.

Illum l-ebda pajjiż tal-Unjoni Ewropea ma jista’ jiżgura ħarsien għall-poplu tiegħu bil-qawwa tal-mezzi militari, għax il-periklu huwa intern, minn ġewwa, u l-ebda forza militari ma tista’ tilqa’ għalih.

Jekk l-Unjoni Ewropea trid li jkollha aktar sigurta` u paċi, trid tibdel il-politika tagħha u taddotta l-politika Maltija ta’ newtralita` u non-allinjament.

Billi f’dan is-sens tiswa lill-Unjoni anki ekonomikament, għax tkun tista’ tiddedika l-biljuni li qiegħda tonfoq ħalli ssaħħaħ il-forzi militari tagħha fi proġetti u ta’ fejda għall-miljuni ta’ Ewropej li jgħixu fil-faqar, jew li huma qegħda.

Fuq kollox, il-popli kollha li llum iqisu lill-UE bħala għadu tagħhom, ma jibqgħux antagonisti għaliha jekk hija twarrab il-politika barranija tagħha tal-lum u tħaddan il-politika Maltija ta’ newtralita` u non-allinjament, li hi politika ideali għaċ-ċirkostanzi moderni tal-lum.

IL-POPLU Malti huwa aħjar milli kien meta ma kienx għadu membru tal-Unjoni Ewropea? 

It-tweġiba għal din il-mistoqsija li l-propagandisti tal-UE huma mistennija li jagħtu, hija iva.

Iżda t-tweġiba li l-kotra l-kbira tal-Maltin u l-Għawdxin jagħtu, hi le, għax jinsabu ferm agħar.

Min huma l-ħafna Maltin u Għawdxin li jinsabu agħar wara s-sħubija?

Huma l-eluf kbar ta’ nisa tad-dar

* li ma jistgħux ilaħħqu bil-pagi ta’ żwieġhom

* mal-għoli sfrenat tal-ħajja

* li sploda wara s-sħubija fl-Unjoni.

Huma l-eluf ta’ ħaddiema

* li tilfu l-impjieg tagħhom

* meta l-fabbriki fejn kienu jaħdmu

* kellhom jagħlqu

* minħabba l-politika u r-regolamenti tal-UE.

Huma l-aqwa ħaddiema tas-sengħa li pajjiżna kellu,

* li spiċċaw bla xogħol

* jew jagħmlu xogħol li ma jitlob l-ebda sengħa,

* meta t-Tarzna ta Malta tħarbtet għax l-UE hekk riedet.

Jinsabu agħar wara s-sħubija fl-UE

* l-imprendituri Maltin

* li l-impriżi tagħhom kienu jaħdmu għas-suq lokali

* u li kellhom iżarmaw

* għax l-UE ma ppermettitx

* li tkompli tingħata għajnuna

* biex jikkompetu ma prodotti konkorrenti barranin.

Marru agħar bis-sħubija fl-UE

* is-sidien tax-xarabanks li,

* minħabba l-politika Ewropea,

* se jittieħdilhom xogħolhom

* u l-vetturi tagħhom

* se jkollhom jarmuhom.

M’humiex aħjar wara s-sħubija fl-UE

* l-impjegati tal-impriżi

* li ġew ipprivatizzati,

* kif ordnat minn Brussels,

* u li l-pagi tagħhom tnaqqsu,

* filwaqt li l-kundizzjonijiet tal-impjieg ħżienu flok tjiebu.

Marru agħar l-eluf ta’ għarajjes li,

* b’effett tal-politika tal-UE

* li trażżan l-għoti mill-Istat ta’ għajnuna għal ‘housing’ soċjali,

* ma jifilħux iħallsu l-prezzijiet tal-‘plots’ biex jibnu djarhom,

* jew li jixtru dar lesta,

* u lanqas li jistgħu jaslu li jħallsu l-kirjiet għoljin tal-lum fuq il-postijiet.

Jinsabu ferm ħażin wara s-sħubija

* l-eluf ta’ kaċċaturi

* u nassaba

* li jħossuhom iddisprati

* mċaħħdin mill-kaċċa fir-rebbiegħa

* u min-namra tal-insib.

Jifhmu li huma f’qagħda agħar wara l-1 ta’ Mejju, 2004,

* il-Maltin u l-Għawdxin qegħda

* li xorta jaraw eluf ta’ barranin

* minn pajjiżi oħrajn tal-UE

* jaħdmu hawn minflokhom

* b’inqas pagi

* u huma jkollhom ikampaw

* bl-għajnuna soċjali tal-qagħad.

Marru agħar il-bdiewa

* minħabba l-importazzjoni bla rażan

* tal-prodotti ta’ barra,

* kif ukoll is-sajjieda

* minħabba x-xkiel li l-Unjoni Ewropea

* tagħmel fuq l-ammont ta’ ħut li jistgħu jaqbdu

* u l-ħafna sikkaturi oħrajn li qiegħda tagħmel fuqhom.

Appart dawn l-eluf ta’ Maltin u Għawdxin

* li jħossu li huma personalment marru ħażin bis-sħubija fl-UE,

* il-pajjiż kollu kemm hu jinsab f’qagħda agħar

* għax l-istat finanzjarju tiegħu ddgħajjef

* mhux issaħħaħ bil-kobor tad-dejn,

* l-esportazzjoni mill-pajjiż naqset mhux żdiedet,

* il-piż tat-taxxi kiber mhux tħaffef

* u l-faqar kiber ukoll.

Fil-pajjiż żdied l-għawġ soċjali wara s-sħubija fl-UE

* bil-kanċer tal-korruzzjoni jinfirex

* u l-vizzju tad-droga u tal-logħob

* iħarbtu eluf ta’ żgħażagħ u familji.

Il-valuri morali b’saħħithom tal-poplu ddgħajfu f’ġieħ il-progress mingħajr valuri li l-UE xxandar u timponi fuq il-poplu mseħbin fiha.

Quddiem din il-ħerba morali u materjali kollha

* li s-sħubija fl-UE ġabitilna,

* insibu b’għajb li għad hawn ċrieki ekklesjastiċi

* responsabbli mill-mezzi tal-komunikazzjoni,

* bħalma huma r-rivista tal-parroċċi

* Flimkien u Leħen is-Sewwa,

* li jaċċettaw li jkomplu jagħmlu regolarment

* propaganda qarrieqa favur l-Unjoni Ewropea.

Dawn qegħdin,

* bil-maqlub,

* il-lifgħa jgħożżuha f’komtna,

* flok jagħmlu bħalma għamel San Pawl,

* u jarmuha.

L-AĦBAR li Għawdex ma jistax jitqies bħala “regjun” minħabba li huwa “gżira fi stat gżira” żgur li ġabet f’moħħ dawk l-Għawdxin li kienu emmnu lil Fenech Adami u l-PN qabel ir-referendum, bil-wegħda solenni li, jekk Malta tidħol fl-Unjoni Ewropea, Għawdex ikollu trattament speċjali għax jitqies bħala reġjun u b’hekk jibda jgawdi minn fondi speċjali Ewropej.

Min jaf kemm Għawdxin kienu belgħu dik il-lixka u marru jivvutaw “Iva”.

Min jaf illum dawn l-istess Għawdxin x’qed jgħaddi minn moħħhom?

F’Għawdex hemm ukoll mijiet kbar ta’ kaċċaturi u nassaba, li wkoll kienu wegħduhom li mhux talli ma kinux se jinbidlu r-regolament tal-kaċċa u l-insib, iżda jekk isir xi tibdil, dan kien se jkun għall-aħjar tagħhom.

Il-kaċċaturi u n-nassaba Għawdxin, bħal sħabhom il-Maltin, llum jafu li ġew ingannati.

Għalhekk nemmnu li anki dawk kollha li kienu vvotaw “Iva” għas-sħubija fl-UE, għax emmnu li Għawdex fl-UE se jsir “reġjun” għalih u jibda jirċievi fondi speċjali, illum indunaw li l-Gvern Nazzjonalista u l-MIC, immexxija minn Simon Busuttil, dakinhar kienu għaddewhom minn għajn il-labra.

Forsi jkun hemm min jgħid: “Issa m’hemmx x’tagħmel, li hemm hemm”.

Imma jgħidu hekk dawk li ma jridu jagħmlu xejn

F’din il-paġna stess fl-10 ta’ Diċembru li għadda tajna spjegazzjoni ta’ x’jgħid l-artiklu 49A tat-Trattat ta’ Lisbona, li issa daħal fis-seħħ.

Dan l-artiklu jagħmilha ċara li kull stat membru tal-UE għandu dritt joħroġ mill-għaqda.

Kien spjegat kif meta stat membru javża li ma jridx jibqa’ marbut bit-trattat ta’ sħubija fi ħdanha, hemm sentejn żmien biex fihom jiġi nnegozjat ftehim ġdid ta’ koperazzjoni bejn il-pajjiż li jkun se jirtira u l-UE nfisha u li jidħol fis-seħħ hekk kif jintlaħaq ftehim.

B’hekk dak il-pajjiż qisu jerġa’ jitwieled mill-ġdid bħala stat indipendenti u Sovran, bħalma kien qabel il-politiċi webbluh jarmi l-ħelsien tal-poplu tiegħu u jerġa’ jsir kolonja tal-barrani, kif ġara lil Malta fl-1 ta’ Mejju 2004.

Lil min tisimgħu jgħid li Allaħares ma konniex fl-UE għax kieku l-kriżi finanzjarja li laqtet lid-dinja fl-aħħar xhur, kieku konna nsibu ruħna ferm agħar, għidulhom:

“Mela kif ċerti pajjiżi li  m’humiex fl-UE ma ntlaqtux ħażin daqs ċerti pajjiżi oħrajn li huma membru u anki fiż-Żona Ewro? Għaliex Spanja u l-Greċja, biex insemmu tnejn biss, intlaqtu ferm agħar, tista’ tgħid, il-pajjiżi l-oħrajn kollha tal-Ewropa, kemm dawk fl-UE kif ukoll dawk barra u li m’għandhomx l-ewro bħala l-munita tagħhom?”

L-UE hija ħolma li l-politiċi famużi li fassluha rnexxilhom b’makakkerija u anke b’gideb moħbi wara ħafna propaganda ta’ kliem sabiħ, iġiegħlu lill-poplu jiġri warajha, iżda maż-żmien qiegħda tinbidel fi ħmar il-lejl.

Mhux ta’ b’xejn li issa, bit-Trattatta’ Lisbona, id-dritt li poplu jfassal id-destin tiegħu ngħata d-daqqa tal-mewt, sakemm jibqa’ jaċċetta l-ħolm tal-Imperu Ewropew.

Il-Ħamis, 24 ta’ Diċembru, 2009

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ