MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
Mill-Kampanja Ħelsien Nazzjonali CNI
Morna hazin bil-bagit ta’ l-UE
Bl-uċuħ imbissmin u d-daqq tat-trombi, il-Gvern u
l-propagandisti tiegħu riedu jġiegħlu lill-poplu jemmen li Malta għamlet xi
gwadann kbir bil-ftehim li l-mexxejja tal-pajjiżi ta’ l-Unjoni Ewropea għamlu
l-ġimgħa l-oħra dwar il-baġit ta’ l-Unjoni għas-seba’ snin bejn l-2007 u l-2013.
Iżda kollox kien eżerċizzju ta’ diżinformazzjoni u ta’
miżinformazzjoni biex iqarraq bil-poplu.
Għax il-Gvern ma rnexxielu
jikseb għal Malta xejn iktar minn dak li pajjiżna kellu jingħata mill-Unjoni
fit-tliet snin bejn l-2004 u l-2006.
Infatti, kif wieħed jista’ jara minn dak li ċ-Ċentru
ta’ l-Informazzjoni Malta-UE (il-MIC) xandar fil-bulletin uffiċjali tiegħu
L-Aġġornat, ta’ Frar 2003, il-bilanċ nett li l-Unjoni kellha tagħti lil Malta
fit-tliet snin bejn l-2004 u l-2006, kien ta’ 194.3 miljun Ewro.
Dan iġib medja ta’ 64.76 miljun Ewro
fis-sena.
Issa skond il-Prim Ministru, għas-seba’ snin bejn il-2007 u
l-2013 il-bilanċ nett li l-Unjoni għandha tagħti lil Malta huwa ta’ 450 miljun
Ewro.
Dan iġib medja ta’ 64.28 miljun Ewro
fis-sena.
Dawn l-ammonti huma mogħtijin mill-Gvern stess, u jikxfu kemm
hija falza l-impressjoni li qiegħda tingħata li l-Gvern irnexxielu jagħmel xi
gwadann kbir.
Il-verità hija li ma jirnexxielu jikseb xejn iktar
milli diġà kien ingħata fil-ftehim li sar ma’ l-Unjoni fis-sena 2002 (li deher
f’L-Aġġornat ta’ Frar 2003).
Id-disa’ pajjiżi l-oħrajn li ssieħbu
fl-Unjoni Ewropea fl-1 ta’ Mejju 2004 bħal Malta, kollha kisbu għas-seba’ snin
bejn l-2007 u l-2013 iktar milli kienu ħadu għat-tliet snin ta’
qabel.
Malta biss ma kisbet xejn iktar minkejja l-ħafna ftaħir vojt ta’
kemm il-Gvern Malti kellu ħila jipperswadi l-ewwel lill-Prim Ministru
tal-Lussemburgu, Juncker, li kellu l-presidenza ta’ l-Unjoni sa Ġunju ta’ din
is-sena, u wara lill-Prim Ministru Ingliż Blair, li kellu l-presidenza ta’
l-Unjoni għas-sitt xhur li jintemmu llum.
L-ammont li l-Unjoni kellha
tagħti lil Malta għas-snin 2007-2013 kien gie ffissat f’Ġunju ta’ din is-sena
meta ma ntlaħaqx qbil dwar il-bagit ta’ l-Unjoni.
Dak baqa’ l-ammont li
se jingħata lil Malta wara li ntlaħaq qbil il-ġimgħa l-oħra dwar il-baġit ta’
l-Unjoni.
Qatt ma kien hemm xi theddida li seta’ jitnaqqas.
Għax huwa l-inqas ammont li jista’ jingħata lil
pajjiżna skond il-formola li biha l-Unjoni tiffissa x’jingħata lil pajjiż
membru.
Il-Gvern u l-propagandisti tiegħu pprovaw jidħku bil-poplu billi
jgħidulu li bis-saħħa ta’ l-argumenti tal-Gvern, pajjiżna baqa’ ntitolat li
jingħata għajnuna skond dak li huwa magħruf bħala ”Objective One”, jew l-ogħla
għajnuna.
Din ukoll hija ħrafa.
Għax pajjiżna jingħata l-ogħla rata ta’ għajnuna għax
il-Prodott Gross Domestiku għal kull persuna ma jilħaqx il-75 fil-mija tal-medja
tal-prodott gross Domestiku ta’ l-Unjoni Ewropea kollha.
Biex wieħed
jifhem kemm pajjiżna ma marx tajjeb fil-ftehim li sar dwar il-baġit ta’ l-Unjoni
Ewropea għas-snin 2007-2013, tajjeb li wieħed iħares lejn dak li se jingħata
l-pajjiż kważi ċkejken daqs Malta, il-Lussemburgu.
Dan se jingħata ħafna
iżjed minn Malta, għalkemm huwa għani ħafna aktar minn Malta, għax il-medja tal-
Prodott Gross Domestiku ta’ persuna fil-Lussemburgu hija tliet darbiet daqs
il-medja tal-prodott Gross Domestiku ta’ persuna f’Malta.
Minkejja dawn
il-fatti, il-propogandisti favur is-sħubija ta’ Malta fl-Unjoni Ewropea, ikantaw
vittoria, meta ma stajniex immorru agħar milli morna.
Il-ġlieda għall-Indipendenza u l-Ħelsien
minn
Karmenu Mifsud Bonnici Ċermen CNI
FIL-WAQT li l-mexxejja politiċi jfinġu bħallikieku
kollox miexi sewwa fl-Unjoni Ewropea, fost il-popli tal-pajjiżi membri hawn
ferment kontra l-Unjoni.
Dan il-ferment intwera biċ-ċar fi Franza u fl-Olanda
meta l-Franċiżi u l-Olandiżi vvotaw kontra l-Kostituzzjoni li l-Unjoni ħejjiet
għaliha.
F’Malta ma sarx referendum dwar il-Kostituzzjoni ta’
l-Unjoni biex ma tingħatax opportunità lill-maġġoranza tivvota
kontriha.
Fl-Ingilterra wkoll hemm ferment kontra l-Unjoni Ewropea, tant
li ftit ilu l-partit politiku li jsostni li l-Ingilterra ċediet wisq
mill-indipendenza tagħha meta ssieħbet fl-Unjoni (il-UK Independence Party),
nieda kampanja biex isir referendum dwar jekk l-Ingilterra għandhiex toħroġ
mill-Unjoni Ewropea.
Il-UK Independence Party jittama li jiġbor maż-żewg
miljun firma favur it-talba biex isir referendum.
Osservaturi politiċi jfakkru li l-kandidati tal-UK
Independence Party marru tajjeb fl-elezzjonijiet għall-membri tal-Parlament
Ewropew.
L-osservaturi jsostnu wkoll li fost il-poplu Ingliz hemm
skuntentizza mifruxa għall-politika ta’ l-Unjoni f’diversi oqsma, u għall-kilba
kbira ta‘ l-Unjoni biex tifrex il-ħakma u r-regoli tagħha fuq kull aspett
tal-ħajja tal-poplu.
L-Ingilterra hija waħda mit-tliet pajjiżi ta’
l-Unjoni li ma aċċettawx li jdaħħlu l-munita komuni ta’ l-Unjoni, l-Ewro, flok
il-munita nazzjonali, l-Isterlina.
Iż-żewġ pajjiżi l-oħrajn huma l-Isvezja u
d-Danimarka.
Minkejja li l-mexxejja ta’ l-Unjoni jsostnu li l-munita
komuni l-Ewro tgħin l-ekonomiji u l-kummerċ imorru ’l quddiem, l-ekonomiji u
l-kummerċ tat-tliet pajjiżi ta’ l-Unjoni li ma qalbux għall-Ewro, huwa itjeb u
sejrin aħjar mill-medja tal-pajjiżi ta’ l-Unjoni li daħħlu
l-Ewro.
Ewlenija fost ir-raġunijiet għall-ferment popolari kontra
l-Unjoni Ewropea hija dik li l-politika u r-regoli tagħha jgħollu l-prezzijiet u
jżidu l-għoli tal-ħajja.
Dan huwa fatt li anki l-poplu Malti qiegħed iġarrbu.
Barra li ħafna familji qegħdin isibuha diffiċli li
jlaħħqu maż-żieda fil-prezzijiet u fl-għoli tal-ħajja, il-pajjiż qiegħed isir
inqas kompetittiv.
It-tnaqqis fil-kompetittività ta’ pajjiżna kkaġunata
mill-politika u r-regoli ta’ l-Unjoni Ewropea qed jolqot ħażin ħafna
l-industriji f’pajjiżna tal-manifattura, tas-servizzi u tat-turiżmu.
Konsegwenza ta’ dan huma aktar sensji u qgħad akbar
għall-ħaddiema u ż-żgħażagħ tagħna.
Bħal ma hemm fl-Ingilterra, anki
f’Malta hawn lok għal moviment politiku li jiġġieled ħalli niksbu lura
l-Indipendenza u l-Ħelsien li s-sħubija fl-Unjoni Ewropea telfitna.
Kemm hawn eluf li lesti jsostnu din il-ġlieda?
L-iskandlu tas-Sea Malta
Jekk il-Gvern jibqa’ jagħmel kif trid l-Unjoni
Ewropea, se jkollna aktar straġi bħal tas-Sea Malta.
Għax akkost ta’ kollox l-Unjoni trid li l-Gvern jeħles mill-kumpaniji tal-poplu u mill-investimenti tal-poplu, il-Gvern Malti m’għandux sinsla biex jieqaf lill-Unjoni u jħares l-interessi nazzjonali.
Iżda
l-kundanna li l-Gvern jistħoqqlu hi mhux biss minħabba d-djufija tiegħu.
Hija wkoll minħabba l-aġir skandaluzż tiegħu.
L-iskandlu tas-Sea Malta mhux se jinħafer u lanqas jintesa.
Il-Gvern b’mod despotiku ġab fix-xejn u għal xejn
l-impjieg ta’ 144 ħaddiem tas-Sea Malta.
B’mod sfaċċat u diskriminatorju se jimpjega 57 biss mill-144 li se jissensja.
Bil-mod li l-Gvern mexa, wera li la għandu
kuxjenza soċjali u lanqas diċenza politika.
Biex mingħalih jiggwadanja politikament, il-Gvern ma
skruplax iċaħħad 144 familja mill-mezz ta’ l-għixien tagħhom, li hu x-xogħol
tal-kapijiet tal-familji.
Għal daqshekk Gonzi u Austin Gatt jixirqilhom jibqgħu mfakkrin bħala li tellfu l-ħobża ta’ 144 ħaddiem.
Il-protagonisti
tal-Gvern mingħalihom ibellgħuha lill-poplu li mhux il-Gvern jaħti għas-sensji
tal-144 ħaddiem tas-Sea Malta.
Meta l-poplu jifli sewwa x’ġara, jintebaħ li d-deċiżjoni li jipprivatizza s-Sea Malta kienet tal-Gvern.
Id-deċiżjoni li jxolji s-Sea Malta minflok ifittex li jbiegħha lit-tieni aqwa offerent, kienet tal-Gvern.
Id-deċiżjoni li
jagħti x-xogħol u n-negozju b’xejn lill-ħbieb tiegħu, mingħajr ma jobbligahom
jimpjegaw lill-ħaddiema tas-Sea Malta, kienet tal-Gvern.
Id-deċiżjoni li jgħin biex ma jkunux onorati l-ftehim
kollettivi tal-baħħara tas-Sea Malta, kienet tal-Gvern.
Għalhekk it-tort ta’ dak li ġara huwa tal-Gvern.
Il-Ministru Gatt huwa responsabbli ta’ att frodolenti bi ksur
ta’ l-artiklu 303 tal-Liġi tal-Kumpaniji, għax ta b’xejn ix-xogħol u n-negozju
tal-kumpanija Sea Malta u b’hekk naqqas il-fondi taghha minn fejn iridu
jitħallsu l-kredituri fosthom il-ħaddiema, wara x-xoljiment tal-kumpanija.
L-aġir tal-Ministru Gatt huwa skandaluż ukoll għax huwa rregala x-xogħol u n-negozju tas-Sea Malta lill-ħbieb tiegħu b’dannu għall-kompetituri tagħhom.
Il-Gvern kellu jobbliga lil minn ħa x-xogħol u
n-negozju tas-Sea Malta, li jimpjega l-ħaddiema kollha tagħha mhux baħħara,
skond l-artiklu 38 tal-Liġi Industrijali.
Minflok mexxa kontra Grimaldi li kiser il-liġi, il-Gvern ħelsu billi se jimpjega huwa lill-ħaddiema.
Għal dan l-iskandlu
politiku, il-Ministru Gatt imissu jirriżenja.
Jekk il-Prim Ministru jkompli jipproteġġih, ikun kompliċi fl-iskandlu u ma jixraqlux jibqa’ fil-kariga.
Ġurament ta' lealta` li jieħdu l-Membri Parlamentari kollha
Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).
Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.
Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).
Ġurament għall-qadi xieraq tal-kariga ta’ President.
Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).
Sezzjoni 6 tal-Kostituzzjoni ta' Malta
6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.
Artiklu I-6 tal-Kostituzzjoni ta' l-Unjoni Ewropea
Dritt ta' l-Unjoni
Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.
Tista' tafda lil min KISER il-ĠURAMENT tiegħu/tagħha?
Is-Sibt, 24 ta’ Diċembru, 2005.
<< Lura http://www.cnimalta.org/2005.html
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat Lm2 flimkien ma' din il-formola liċ-
Chairman CNI,
Dr Karmenu Mifsud Bonnici LL.D.
81, Triq Ġuże Pace,
Ħamrun.
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ