MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Id-dittatura ta’ l-UE u t-Tarzna

IL-KUNDIZZJONIJIET li l-Unjoni Ewropea mponiet ghax-xogħol fit-Tarzna biex l-Unjoni taċċetta li Malta tissieħeb fl-Unjoni jagħmlu diffiċli, jekk mhux impossibbli, li t-Tarzna taħdem tajjeb bla ma tagħmel telf.

Dan ifisser li jekk ikun hemm dawn is-siegħat ta’ xogħol ta’ tiswija u konverżjoni, xogħol ta’ bini jrid jiġi limitat għal mhux aktar minn 365,000 siegħa.

Jekk ikun hemm xogħol aktar, il-ħaddiema jkollhom joqogħdu jħarsu jew jintbagħtu d-dar ħalli ma jinqabiżx il-limitu ta’ 2.4 miljun siegħa xogħol.

It-Tarzna hija marbuta b’dawn il-figuri għal kull sena għal għaxar snin.

Konsum ta’ l-azzar

Skond ma xxandar fl-aħbarijiet, il-kuntratt għall-għaxar vapuri għall-Cala Corporation ifisser li jridu jinħadmu madwar 2,300 tunellata azzar kull xahar.

Dan ifisser li jkunu jridu jintużaw madwar 27,600 tunellata ta’ azzar fis-sena.

Iżda l-Unjoni rabtitna li ma jistgħux jintużaw aktar minn 10,000 tunellata ta’ azzar fis-sena.

Dan hu l-ostaklu għat-Tarzna biex tieħu l-kuntratt tal-bini ta’ l-għaxar vapuri.

Għax il-kuntratt ta’ l-għaxar vapuri jfisser 27,600 tunellata azzar fis-sena, li huma tliet darbiet l-10,000 tunellata li tippermettilna l-Unjoni Ewropea.

Jekk tgħaddi ta’ l-Unjoni Ewropea, it-Tarzna ma tieħux ix-xogħol tal-bini ta’ l-għaxar vapuri.

Jekk inħarsu l-interessi nazzjonali u l-ħobż tal-ħaddiema Maltin, m’għandniex noqogħdu għad-dittatura ta’ l-Unjoni, u għandna ngħidu lill-Unjoni ma xxekkilniex li nkattru x-xogħol f’pajjiżna, anki jekk dan ikun b’kompetizzjoni ma tarzni fil-pajjiżi l-oħrajn ta’ l-Unjoni.

Xi tlifna bis-sħubija fl-UE

IS-SĦUBIJA ta’ pajjiżna fl-Unjoni Ewropea aktar ħolqitilna problemi milli solvitilna problemi.

Problema ewlenija li l-Unjoni ħolqitilna tirrigwardja l-qasam tax-xogħol f’pajjiżna.

Minħabba s-sħubija, għalqu għadd ta’ fabbriki u tilfu l-impjieg numru kbir ta’ ħaddiema.

Din hija l-agħar daqqa li stajna nieħdu għax in-nuqqas tax-xogħol f’pajjiżna huwa l-akbar problema minn dejjem.

Ix-xogħol ġdid li nħoloq f’pajjiżna fl-aħħar żmien mhux dovut għas-sħubija fl-Unjoni, iżda għall-ħila tal-ħaddiema Maltin u Għawdxin li jaddattaw ruħhom għal xogħol ġdid u għat-taħriġ edukattiv u tekniku li ħadu, mingħajr ma kellha x’taqsam xejn l-UE.

M’hemmx dubju li, kieku ma sseħibniex fl-Unjoni, kellna mezz kif ma nħallux fabbriki jitilqu minn pajjiżna u konna nistgħu wkoll inrażżnu l-ispejjeż tal-produzzjoni li għolew minħabba l-Unjoni.

Konna nistgħu wkoll inkomplu nużaw l-inċentivi li fl-imgħoddu użajna biex inħajru jitwaqqfu fabbriki barranin f’pajjiżna, iżda li l-Unjoni ma tħalliniex nużaw.

Fil-qasam tax-xogħol, sagrileġġ kbir mill-Unjoni sar fit-Tarzni Maltin, bl-għeluq ta’ waħda u billi ċċekknet l-oħra.

Barra mit-telfien ta’ l-impjiegi, l-akbar ħsara sseħħet għat-taħriġ tas-snajja, għax it-Tarzna kienet l-Universita` tas-snajja f’Malta.

L-aqwa nies tas-sengħa trawwmu fit-Tarzna, u pajjizna għad jibki meta ma jsibx nies tas-sengħa biżżejjed għall-ħtiġijiet tagħna, għax ma għadniex inħeġġu żgħażagħ jidħlu jaħdmu fit-Tarzna, u minflok bżajna għall-ħaddiema tas-sengħa li kellna fit-Tarzni, tfajnihom fuq xogħol mhux tas-sengħa jew tajnihom il-pensjoni.

Dan ġiegħlitna nagħmlu l-Unjoni Ewropea bħala kundizzjoni biex isseħibna fl-Unjoni.

Fil-qasam tas-servizzi finanzjarji, is-sħubija fl-Unjoni Ewropea hija ta’ xkiel kbir.

L-Unjoni ġiegħlitna nneħħu dawk il-benefiċċji fiskali (ta’ taxxi) li bihom ġbidna impriżi barranin lejn pajjiżna għax ma riditniex nikkompetu maċ-ċentri finanzjarji fil-pajjiżi l-oħrajn ta’ l-Unjoni, bħal ma jagħmlu b’suċċess gżejjet bħal ċ-Channel Islands u Jersey.

Il-qasam tas-servizzi finanzjarji f’pajjiżna kiber meta ma konniex fl-Unjoni, u kien ikompli jikber aktar li kieku ma ġejniex suġġetti għar-regolamenti ta’ l-Unjoni.

Sfrattatilna l-ftehim għax-xiri taż-żejt bi prezz anqas minn tas-suq, u ġiegħlitna nagħmlu taxxi u ‘levies’ fuq prodotti taż-żejt.

Issa se ġġielgħelna nilliberalizzaw ix-xiri u l-importazzjoni taż-żejt u b’hekk il-profitti fuqu ma tibqax tagħmlu l-Enemalta ħalli bih tissussidja l-elettriku, iżda l-profitti igawduhom il-privat, minflok il-pubbliku.

Hemm bżonn li l-poplu jkun mgharraf x’qegħdin nitilfu bis-sħubija fl-Unjoni u mhux jisma biss propaganda x’qablilna bl-Unjoni Ewropea.

Il-proposta ta' Unjoni Mediterranea

Il-President ġdid ta’ Franza, Nicholas Sarkozy, ippropona li titwaqqaf Unjoni tal-pajjiżi tal-Mediterran, li jissieħbu fiha l-pajjiżi Ewropej kollha li jmissu mal-Mediterran, kif ukoll il-pajjiżi kollha ta’ l-Afrika ta’ Fuq u tal-Lvant Nofsani li jagħtu ghall-Mediterran.

Din il-proposta hija ta’ interess kbir ħafna għal Malta li tkun fiċ-ċentru ta’ l-Unjoni Mediterranea proposta minn Sarkozy.

Daqskemm aħna f’Malta għandna x’nitilfu bis-sħubija fl-Unjoni Ewropea, għandna x’nirbħu bi sħubija fl-Unjoni Mediterranea.

Għandna naħtfu l-opportunità biex minnufih nitkellmu mal-President Franċiż u nuruh l-interess tagħna għall-proposta tiegħu, u niddiskutu miegħu x’passi għandhom jittieħdu ħalli l-proposta tibda tieħu ħajja.

Malta għandha tagħmilha tagħha din il-proposta u tieħu l-inizjattiva ħalli tinteressa lill-pajjiżi kollha tal-Mediterran jaqblu mal-proposta ta’Sarkozy.

Huwa mportanti għal pajjiżna li jieħu sehem attiv mill-bidu fit-twaqqif ta’ din l-Unjoni ħalli niżguraw li tkun unjoni differenti minn kif inbniet l-Unjoni Ewropea u nevitaw id-difetti u n-nuqqasijiet kbar ta’ l-Unjoni Ewropea u mhux nirrepetuhom.

L-Unjoni proposta minn Sarkozy għandha tkun il-mezz ħalli jinkisbu fost oħrajn, l-għanijiet li l-Unjoni Ewropea kienet xandret snin ilu f’Barċellona għall-koperazzjoni fil-Mediterran u l-għanijiet li għalihom twaqqaf il-EuroMed Forum, iżda li qatt ma taw ir-riżultati konkreti mistennijin minnhom.

Il-qofol ta’ l-Unjoni Mediterranea għandu jkun li tkabbar il-koperazzjoni f’kull qasam bejn il-pajjiżi tal-Mediterran, mhux li timponi regolamenti dwar it-tmexxija tal-pajjiżi u l-politika li jwettqu.

Koperazzjoni volontarja, mhux impożizzjoni ħalli l-pajjiżi jgħinu lil xulxin jimxu ’l quddiem politikament, soċjalment u ekonomikament, iżda qabel kollox biex issaltan fosthom il-paċi u jitħares l-ambjent.

Madwar sentejn ilu, rappreżentanti Libjani, rappreżentanti Maltin u rappreżentanti Franċiżi, taw bidu għal dak li sejħu bħala “Mediterranean Exchanges” bl-iskop li jippromwovu koperazzjoni bejn il-pajjiżi Ewropej u l-pajjiżi Afrikani tal-Mediterran.

Il-proposta tal-President Sarkozy hija żvilupp fuq il-kunċett tal-“Mediterranean Exchanges” li kellu sehem fih l-ex Ministru ta’ l-Affarijiet Barranin Franciz, Dumas, u li kien interessa wkoll awtoritajiet għoljin tal-Ġemaħerija Libjana.

Għalhekk m’għandux ikun diffiċli biex jintlaħaq ftehim Franċiż, Malti u Libjan, li jkun il-fus li madwaru tinbena l-Unjoni Mediterranea proposta minn Sarkozy.

Aħna fiduċjużi li Unjoni Mediterranea tappella għall-kotra kbira tal-Maltin u l-Għawdxin.

Propaganda falza dwar l-Ewro

IL-FARSA ta’ l-eżami dwra id-dħul ta’ l-Ewro f’pajjiżna spiċċat kif konna bassarna bl-Unjoni Ewropea tiddikjara li pajjiżna għadda bl-unuri u li jista’ jaqleb għall-Ewro f’Jannar li ġej.

Ir-rata tal-kambju tal-Lira Maltija mal-Ewro attaparsi għad trid tiġi deċiża, iżda aħna nsostnu li fil-fatt ir-rata se tkun dik li hija llum.

Kif stennejna, ma naqasx li l-propagandisti ta’ l-Unjoni joħorġu jiftaħru li bid-dħul ta’ l-Ewro, pajjiżna se jidħol membru ta’ klabb ta’ pajjjiżi ekonomikament b’saħħithom.

Min qed jgħid dan, nesa għax hekk jaqbillu, il-pajjiżi kbar ta’ l-Ewro m’humiex ilaħħqu mal-kundizzjonijiet li għandhom jitħarsu biex il-pajjiżi jikkwalifikaw għall-Ewro.

Tlieta mill-pajjiżi kbar ta’ l-Ewro, il-Ġermanja, Franza u l-Portugall għandhom ‘deficits’ aktar milli jistgħu jkollhom (3%) tal-GDP (Prodott Gross Domestiku).

Pajjiż kbir ieħor ta’ l-Ewro, l-Italja, għandu dejn aktar milli jista’ jkollu (60% tal-GDP).

Dawn il-pajjiżi kollha huma membri tal-klabb ta’ l-ekonomikament b’saħħithom, li magħhom pajjiżna se jissieħeb, skond il-ftaħir tal-propagandisti ta’ l-Unjoni.

Dawn il-propagandsiti jinsew ukoll li tliet pajjiżi ta’ l-UE, l-Ingliterra, l-Isvezja u d-Danimarka, ma daħħlux l-Ewro u għandhom l-ekonomiji tagħhom sejrin aħjar mill-pajjiżi ta’ l-Ewro.

Żewġ pajjiżi oħrajn Ewropej, in-Norveġja u l-Isvizzera m’għandhomx l-Ewro, huma barra l-Unjoni, u għandhom ekonomiji b’saħħithom aktar minn dawk tal-pajjiżi fl-UE u bl-Ewro.

Dan kollu juri li mhux l-Ewro tagħmel l-ekonomija ta’ pajjiż b’saħħitha u li pajjiż li ma jdaħħalx l-Ewro jista’ jkollu l-ekonomija tiegħu miexja ‘l quddiem.

Għalhekk inssotnu li mhux se tkun l-Ewro li ssaħħaħ l-ekonomija ta’ Malta, u li mingħajr l-Ewro, pajjiżna mexa ‘l quddiem fl-imgħoddi, u jista’ jkompli jimxi ‘l quddiem anki kieku jżomm il-Lira Maltija.

Ħafna pajjiżi li m’għandhomx l-Ewro, jiġbdu investiment barrani ħafna aktar milli jagħmlu l-pajjiżi ta’ l-Ewro.

Anzi, aktar ma l-munita ta’ pajjiż tkun baxxa meta mqabbla ma l-Ewro, aktar ikun jaqbel għal min jinvesti f’dak il-pajjiż, għax il-prodott maħdum f’dak il-pajjiż u s-servizz mogġħti f’dak il-pajjiż, jiswew inqas meta jitħallsu bl-Ewro.

Bl-Ewro, il-prodott u s-servizzi Maltin se jkunu jiswew aktar għall-barranin.

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.