MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Pajjiżna m’għadux l-ewwel u qabel kollox

Il-maġġoranza fl-2003 ivvotat li tissieħeb fl-Unjoni Ewropea kif kienet magħmula dak iż-żmien. 

Issa t-Trattat ta’ Lisbona biddel lill-Unjoni. 

Għalhekk kien xieraq li lill-poplu jistaqsuh jaqbilx li jibqa’ msieħeb fl-Unjoni kif mibdula.

Mhux biss lill-poplu ma staqsewħx iridx jibqa’ msieħeb fl-Unjoni kif mibdula, iżda lanqas biss għarrfuh kif l-Unjoni ġiet mibdula. 

Għax ħallewh fl-għama dwar x’fih it-Trattat.

Għamlu ħażin li ma għarrfux lill-poplu b’dak li fih it-Trattat. 

Iżda għamlu agħar meta ma talbux mandat mill-poplu biex għan-nom tal-poplu qabdu u approvaw fil-Parlament it-Trattat. 

Biex issa l-poplu se jsib ruħu marbut f’unjoni li ma jafx kif tbiddlet u mingħajr ma ngħata l-opportunità jgħid iridx ikun imsieħeb fiha kif mibdula.

Din l-istorja li wara li l-poplu jiftiehem li jissieħeb fl-Unjoni, isib ruħu marbut f’Unjoni oħra mibdula mill-ewwel waħda, sejra tirrepeti ruħha kull darba li l-Unjoni tiddeċiedi li tibdel l-istatut tagħha, mingħajr ma tistaqsi lill-poplu jridx it-tibdil, jekk mhux ukoll, mingħajr ma jkun mgħarraf x’tibdil hu. 

Għax it-Trattat il-ġdid ta’ Lisbona jagħti s-setgħa lill-Unjoni tbiddel li trid, mingħajr il-ħtieġa ta’ l-approvazzjoni popolari u bil-kunsens biss tal-mexxejja tal-popli imseħbin fl-Unjoni.

F’ebda pajjiż demokratiku ma ssib mexxejja politiċi li għandhom is-setgħa li jibdlu l-Kostituzzjoni tal-pajjiż mingħajr ma jiksbu l-approvazzjoni tal-poplu jew qabel jagħmlu dan, jew wara li jagħmlu dan. 

Iżda fil-każ ta’ l-Unjoni Ewropea, it-tibdil fl-istatut tagħha ma jissodisfax it-test demokratiku għax ir-rieda tal-poplu msieħba mhix stmata, lanqas imfittxija.

Mexxejja ta’ l-affari tagħhom, u li jistmaw lill-poplu tagħhom u jħarsu l-ġieħ ta’ pajjiżhom, m’għandhomx jaċċettaw li l-Unjoni Ewropea tittratta b’dan il-mod anti-demokratiku u abbużiv lill-poplu u lil pajjiżhom. 

Jekk jaċċettawh, juru li jpoġġu lill-Unjoni qabel pajjiżhom u lill-poplu tagħhom. 

Poplu ta’ pajjiż imsieħeb fl-Unjoni Ewropea jeħtieġlu mexxejja ta’ kwalità li jħarsu l-interessi tiegħu qabel dawk ta’ l-Unjoni Ewropea, u li jistmawh, jekk mhux aktar aħjar, mhux anqas milli jistmaw lill-Unjoni Ewropea.

B’sogħba kbira jkollna nistqarru li pajjiżna messitu din ix-xorti ħażina. 

M’għadux jiġi l-ewwel u qabel kollox. 

L-ewwel tiġi l-Unjoni Ewropea.

L-gholi tal-ħajja qiegħed issa jinħass sew speċjalment mill-familji li għandhom dħul baxx. 

Il-pagi baxxi, il-pensjonijiet minimi u l-għajnuniet soċjali mhux qegħdin iżommu l-pass maż-żidiet fil-prezzijiet.

Minħabba f’hekk, il-livell ta’ l-għajxien ta’ ħafna qiegħed jonqos u diffiċli li dawn ilaħħqu mal-ħajja.

Il-politika ta’ l-Unjoni Ewropea ma tgħinx biex titrażżan l-għoli tal-ħajja. 

L-Unjoni tisħaq li s-suq jirregola l-prezzijiet u l-Gvern m’għandux jindaħal biex iżommhom baxxi. 

L-Unjoni tisħaq ukoll li l-prezz ta’ kull oġġett li jinbiegħ u ta’ kull servizz li jingħata jrid jiżdied bir-rata tat-taxxa tal-VAT u li l-prezz tal-prodotti li jidħlu minn pajjiżi li m’humiex fl-Unjoni, din timponi tariffi komuni għall-pajjiżi kollha tagħha (il-Common External Tariff) li jkomplu jgħollu l-prezzijiet tal-prodotti.

L-Unjoni Ewropea ma tħallix lill-Istat jissusidja l-ikel, jew ineħħi t-taxxa tal-VAT minn fuq l-oġġetti u s-servizzi, jew ineħħi t-tariffi minn fuq oġġetti importati minn barra l-Unjoni.

B’hekk l-Unjoni ma tħalli lill-Gvern jagħmel xejn biex irażżan l-għoli tal-ħajja jew ibaxxiha.

Din il-politika ta’ l-Unjoni Ewropea li ma tħallix lill-Gvern jadotta miżuri li bihom jikkontrolla l-prezzijiet, hija politika anti-soċjali li tgħaffeġ l-aktar lil dawk is-setturi tas-soċjetà li għandhom dħul żgħir.

Il-Gvern u l-Unjoni Ewropea jaqblilhom li l-prezzijiet jogħlew, għax l-ammont li jdaħħlu mit-taxxi jkun akbar.

Meta oġġett ikun jiswa Ewro, il-Gvern idaħħal 18 il-ċenteżmu ta’ Ewro mit-taxxa tal-VAT, li parti minnha teħodha l-Unjoni. 

Jekk l-oġġett jogħla għal żewġ Ewro, il-Gvern idaħħal 36 ċenteżmu ta’ Ewro mit-taxxa tal-VAT u s-sehem minnhom ta’ l-Unjoni jirdoppja.

Skond l-estimi uffiċjali, il-Gvern Malti se jdaħħal 447 miljun Ewro mit-taxxa tal-VAT matul din is-sena. 

Dan ifisser li l-poplu se jħallas għall-oġġetti li jixtri u għas-servizzi li jingħata 447 miljun Ewro aktar mill-prezz reali tagħhom jew li l-poplu kien iħallas 447 miljun Ewro inqas għall-istess oġġetti u servizzi li kieku l-Unjoni Ewroea ma ordnatx li jkun hawn it-taxxa tal-VAT f’pajjiżna.

Persuna li tonfoq €100 fil-ġimgħa għall-ħajja, kienet tonfoq biss €85 li kieku l-Unjoni ma ġiegħlitniex indaħħlu t-taxxa tal-VAT.

Din hija waħda mill-ħsarat li s-sħubija fl-Unjoni għamlitilna. 

L-aktar li ntlaqtu huma dawk li d-dħul u li jonfquh kollu għall-ħajja.

Bis-saħħa tas-sħubija fl-Unjoni Ewropea, qegħdin iħallsu, dawk li jdaħħlu €50 fil-ġimgħa, aktar minn €360 taxxa VAT fis-sena, meta ma kinux ikollhom iħallsu lanqas Ewro waħda f’income tax.

L-abbuzi u l-irregolari-tajiet fl-Unjoni Ewropea qatt ma jonqsu.

Dan l-aħħar, rapport dwar l-‘allowances’ li jingħataw lill-Membri tal-Parlament Ewropew għall-ħlasijiet li jagħmlu lill-assistenti li jimpjegaw, kixef għadd ta’ abbużi u anki każi ta’ frodi.

Kull membru tal-Parlament Ewropew għandu ‘allowance’ ta’ €15,496 fix-xahar għall-pagi ta’ l-assistenti tiegħu.

L-ammont totali ta’ dawn l-“allowances” għal 785 membru tal-Parlament, ilaħħqu mal-140 miljun Ewro fis-sena, madwar għaxra fil-mija tal-baġit kollu ta’ l-Unjoni.

Minn ‘audit’ li sar fuq kampjun ta’ ‘allowances’ imħallsin lil 167 membri tal-Parlament, irriżultaw ħafna abbużi u irregolaritajiet fil-ħlasijiet li l-membri jiddikjaraw li għamlu lill-assistenti tagħhom.

F’każ minnhom instab li ‘allowances’ mogħtijin lil membru, tħallsu lil min jeħodlu ħsieb it-tfal tiegħu, u f’każ ieħor, l-‘allowances’ intużaw għan-negozju li l-membru kellu.

Fil-każ ta’ 18-il membru tal-Parlament, ma kellhomx riċevuti għall-ħlasijiet li ddikjaraw li għamlu lill-assistenti.

Instab li ġew iddikjarati li tħallsu somom fit-terminazzjoni ta’ l-impjieg ta’ 42 assistenti. 

Fir-rigward ta’ għaxra minnhom, filwaqt li ntqal li l-impjieg ġie tterminat għax il-membri tal-Parlament li kienu jimpjegawhom lill-assistenti, ma reġgħux ġew eletti, dan ma kienx minnu għax il-membri msemmijin kienu għadhom fil-Parlament.

F’żewġ każi l-membri ddikjaraw li għollew is-salarji ta’ l-assistenti b’71 fil-mija u b’117 fil-mija, fil-perjodu ta’ tliet xhur ‘notice’ qabel it-terminazzjoni ta’ l-impjieg ta’ l-assistenti.

Irriżulta li f’ħames każi l-membri tal-Parlament iddikjaraw li ħallsu lill-assistenti tagħhom salarji esaġerati, 19-il darba aktar mis-salarju normali f’xahar li jitħallas lill-assistent.

Instab li membru tal-Parlament għamel ħlas ta’ salarju f’bank f’pajjiż li mhux fejn joqgħod jew fejn jaħdem l-assistent tiegħu, u la naqqas it-taxxa u lanqas il-kontribuzzjoni soċjali skond ir-regolamenti ta’ l-impjieg.

Fir-rigward ta’ wieħed mill-assistenti partajm instab li fl-aħħar tliet xhur ta’ l-impjieg tiegħu abbużivament irċieva ħlasijiet minn 12-il membru tal-Parlament, għas-somma ta’ €8,890 kull xahar.

Irriżulta li kumpanija li kienet tipprovdi s-servizzi ta’ assistenti lill-membri tal-Parlament, kienet ta’ wieħed mill-membri stess, bla ma dan kien iddikjara l-interessi tiegħu fiha.

Il-Parlament Ewropew iddeċieda li dan ir-rapport ma jkunx ippubblikat. 

M’hemmx membru Malti mdaħħal fl-abbużi.

IRRIDU L'INDIPENDENZA MILL-UNJONI EWROPEA

Il-Ħamis, 24 ta’ April, 2008

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ