MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Xmara ta’ liġijiet mill-UE

Lord Vinson, li għal xi żmien kien Chairman ta’ l-Institute for Economic Affairs ta’ l-Ingilterra, stqarr dan l-aħħar li llum jisgħobbieh ħafna li kien qatta’ ħafna snin jipperswadi bosta nies jemmnu li l-Unjoni Ewropea kienet ħaġa tajba. 

Illum huwa jaħsibha mod ieħor. 

Il-ħolma sabiħa li kellu ta’ l-Unjoni sabiħa hija llum realtà kerha.

Huwa jaf li din il-bidla fil-fehma dwar l-Unjoni Ewropea ma seħħetx lilu biss, iżda ħafna oħrajn li llum bħalu biddlu l-fehma tagħhom dwar l-Unjoni. 

Kienu jarawha sabiħa. 

Issa jarawha kerha ħafna.

Ħafna fl-Unjoni jħossuhom bħal Lord Vinson, mifxulin u mdejqin bil-kwantità kbira ta’ regolamenti li l-Unjoni ma tieqaf qatt li tagħmel.

Wieħed mill-ħafna nuqqasijiet ta’ l-Unjoni huwa li mhux possibbli għal gvern ta’ pajjiż membru jbiddel regolamenti magħmulin mill-Unjoni li jinstabu li huma ta’ ħsara għall-pajjiż membru. 

Sabiex regolament jinbidel il-pajjiż membru jrid jikseb il-kunsens tal-maġġoranza tal-pajjiżi membri l-oħrajn, u dan il-kunsens ma jingħatax minn dawk il-pajjiżi li jaraw ir-regolament tajjeb għalihom.

Lord Vinson jikkritika wkoll lill-Unjoni dwar il-prinċipju tas-sussidjarjetà, li jfisser li l-Unjoni tħalli għall-pajjiżi membri li jmexxu huma dawk l-oqsma li jistgħu jmexxu tajjeb huma aħjar minnha. 

Dan il-prinċipju l-Unjoni ma tħaddmux. 

Tiftaħar bih fil-vojt u tkompli taħtaf taħt idejha aktar oqsma u qatt ma treġġa’ lura lill-pajjiżi membri xi setgħat milli jkollha.

Il-gurnalist Ingliż Charles Robinson jikkritika bl-aħrax lill-Unjoni Ewropea għal “xmara” ta’ liġijiet tagħha li ma tieqaf qatt. 

Huwa jistma li 20 fil-mija biss minnhom joriġinaw mill-Parlament Ewropew, u 80 fil-mija joriġinaw mill-Kummissjoni Ewropea u dak li huwa jsejjah il-“Lobby” li hemm fi Brussels. 

Dan il-“Lobby” huwa magħmul minn madwar 15,000 “lobbyists” li jaħdmu fi Brussels u li jfaqqsu l-ideat, jagħmlu suġġerimenti, juru t-tħassib tagħhom, u jagħmlu rappreżentazzjonijiet dwar elf ħaġa, biex jinfluwenzaw l-Unjoni ħalli toħroġ il-liġijiet li għalihom il-“lobbyists” ikunu qegħdin jitħabtu (naturalment bi ħlas).

Fi Brussels hemm ukoll madwar 2,600 gruppi li għandhom skopijiet u interessi varjati li lkoll għandhom uffiċċju hemm.

Huwa stmat li bejn 60 u 90 miljun Ewro huwa d-dħul tal-ħidma tal-“lobbyists” fi Brussels. 

Dawn huma meqjusin bħala l-ġungla tal-burokrazija mhix demokratika li hemm fil-belt kapitali ta’ l-Unjoni.

Kull xahar l-Unjoni tagħmel madwar 50 liġi u regolamenti u dawn imbagħad iridu jidħlu fil-liġijiet tal-pajjiżi membri. 

Jekk il-Parlament ta’ pajjiż membru jonqos milli jdaħħal dawn il-liġijiet u regolamenti fil-liġijiet tal-pajjiż, l-Unjoni, permezz tal-Qorti tagħha, twaħħal multi kbar.

Il-membru tal-Parlament Ewropew, Syed Kamall, jgħid li l-Unjoni Ewropea hija proġett immexxi minn minoranza organizzata li tħabbrek sabiex isseħħ l-integrazzjoni tal-pajjiżi membri, kontra dak li jridu l-popli tagħhom. 

Qiegħda tgħaddi dik li trid il-minoranza, għax hawn apatija kbira fost iċ-ċittadini li ma għandhomx mezz kif iwaqqfu l-mixja ta’ l-Unjoni, ħlief meta jingħataw l-opportunità li jivvotaw f’xi referendum.

Il-qalba tal-minoranza organizzata li tmexxi l-Unjoni hija l-Kummissjoni Ewropea li għandha kull interess li tkabbar u żżid is-setgħat tagħha u l-oqmsa li l-Unjoni għandha d-dritt li tirregola hija u mhux il-parlamenti nazzjonali.

Syed Kamall isostni li jew l-UE treġġa’ lura ħafna mis-setgħat li ħatfet, jew x’uħud mill-popli mseħbin fl-Unjoni, l-ewwel fosthom, l-poplu Ingliż, jinsistu li jinnegozjaw mill-ġdid il-ftehim li jkollhom ma’ l-UE għal wieħed differenti minn dak tas-sħubija tal-lum.

Ħtieġa ta’ propaganda favur l-Unjoni Ewropea

Tista’ tgħid li f’kull pajjiż imsieħeb fl-Unjoni Ewropea hemm sezzjoni tal-popolazzjoni li hija kontra s-sħubija, u jekk ma ssibx li hemm partit politiku li għandu fil-programm tiegħu l-ħruġ tal-pajjiż mill-Unjoni, għandek issib organizzazzjoni jew għadd ta’ organizzazzjonijiet li jaħdmu biex l-opinjoni pubblika ddur kontra s-sħubija tal-pajjiż fl-Unjoni.

F’pajjiżna hawn kemm il-Kampanja Ħelsien Nazzjonali (CNI), kif ukoll l-Alleanza Nazzjonali Repubblikana (ANR) kontra s-sħubija ta’ Malta fl-Unjoni Ewropea.

Fl-Ingilterra l-United Kingdom Independent Party (UKIP) irid li l-Ingilterra toħroġ mill-Unjoni Ewropea.

Fl-aħħar elezzjonijiet għall-Parlament Ewropew dan il-Partit ġab miljuni ta’ voti u tella’ għadd ta’ rappreżentanti fil-Parlament Ewropew. 

Il-UKIP mhux waħdu kontra s-sħubija ta’ l-Ingilterra fl-Unjoni, għax hemm numru ta’ membri tal-Parlament Ingliż, kemm Laburisti kif ukoll Konservattivi, li jridu li pajjiżhom joħroġ mill-Unjoni.

Fil-Polonja hemm il-partit imsejjah “Self-Defence Party”, immexxi minn Andrzej Lepper, li jagħmel parti mill-Gvern ta’ kaolizzjoni, li huwa kontra l-Unjoni Ewropea.

Fir-Repubblika Ċeka, il-President Vaclav Klaus, huwa kontra s-sħubija ta’ pajjiżu fl-Unjoni Ewropea u pubblikament jikkritika l-Unjoni.

Fid-Danimarka u fl-Isvezja l-maġġoranza tal-poplu vvotaw biex l-Ewro ma tidħolx flok il-munita nazzjonali, minkejja li l-Gvern u l-partiti ħadmu bis- sħiħ favur l-introduzzjoni ta’ l-Ewro.

Fi Franza u fl-Olanda l-maġġoranza tal-poplu ma qablitx mal-mexxejja tal-partiti politiċi u vvotat kontra l-Kostituzzjoni li l-Unjoni Ewropea fasslet.

F’Malta l-oppożizzjoni għas-sħubija qiegħda tikber għax biż-żmien qegħdin jinħassu iktar l-konsegwenzi ħżiena taghħha.

Il-politiċi Maltin qegħdin iqarrqu bil-poplu meta jsostnu li l-kwistjoni tas-sħubija ta’ pajjiżna fl-Unjoni hija deċiża darba għal dejjem. 

Huma jafu li eluf ta’ Maltin u Għawdxin huma kontra s-sħubija u jistennew il-mument meta noħorġu mill-Unjoni. 

Dawn ma jitmewtux meta jisimgħu l-politiċi jgħidu li l-kwistjoni tas-sħubija m’għadhiex teżisti, iżda jiħraxu iktar kontra l-politiċi u jsaħħu l-oppożizzjoni tagħhom kontra s-sħubija.

L-Unjoni Ewropea taf li f’ħafna pajjiżi mseħbin fl-Unjoni, jekk m’hemmx oppożizzjoni kbira kontra l-Unjoni, hemm apatija kbira dwarha. 

Tant hi kbira l-apatija popolari, li lanqas nofs il-popolazzjoni ma tħoss li għandha tmur tivvota fl-elezzjonijiet għall-Parlament Ewropew. 

Għalhekk l-Unjoni Ewropea jeħtieġilha tonfoq miljuni kbar ħalli tagħmel propaganda favuriha kull sena.

F’Malta qegħdin ninnotaw li l-kampanja ta’ propaganda favur l-Unjoni tikber u tiżdied kuljum. 

Dan ifisser li l-Unjoni tifhem li l-Maltin u Għawdxin m’humiex kuntenti biha.

Fid-Danimarka, il-partit Ewro-xettiku, id-Danish People Party, immexxi minn Pia Kjaerskaard, qiegħed iżid fl-appoġġ popolari.

Fin-Norvegja, il-Partit tal-Progress, immexxi minn Siv Jensen, illum sar l-akbar partit fil-pajjiż. 

Huwa kontra l-UE u jiżgura li l-maġġoranza tan-Norvegiżi jibqgħu kontra s-sħubija ta’ pajjiżhom fl-Unjoni.

Fl-Isvizzera, għalkemm il-Gvern huwa favur l-UE, il-maġġoranza tal-poplu ma jridx li l-pajjiż jissieħeb fl-Unjoni.

Fl-Awstrija wkoll qed jikber il-kurrent kontra l-Unjoni Ewropea.

Ħadd ma jixli lil dawk kollha li fil-pajjiżi li semmejna huma kontra l-Unjoni Ewropea, jew dawk li huma kontra l-Ewropa. 

Għax l-Unjoni mhijiex l-Ewropa iżda parti kbira mill-Ewropa li m’għadhiex ħielsa u li hija marbuta b’politika ekonomika u soċjali ħażina li ebda maġġoranza f’pajjiż membru ma tista’ tbiddel skond ir-regoli tad-demokrazija. 

Lanqas f’Malta.

L-aħħar eżempju ta’ bniedem li kien favur l-UE u ra li żbalja jagħtiulna l-President tas-Slovenja, Janez Drnovsek. 

Huwa daħħal lil pajjiżu fl-Unjoni iżda llum jikkritikaha bl-aħrax. 

Jgħid li l-politika komuni ta’ l-UE dwar il-biedja hija ħela kbira, u jixli l-Unjoni li tħallas sussidji fuq il-baqar iktar milli nofs in-nies tad-dinja jaqilgħu flus.

Meta f’Malta se nikkonvertu bħalma għamel il-President tas-Slovenja?

Il-poplu mhux kuntent bl-UE

F’hafna pajjiżi ta’ l-UE l-politiċi qegħdin jimponu r tagħhom dwar l-Unjoni u jwettqu l-politika ta’ l-Unjoni fuq il-popli tagħhom kontra l-fehma tal-popli. 

F’dawk l-pajjiżi, meta l-popli ngħataw l-opportunità li juru kif jaħsbuha dwar l-Unjoni, ivvotaw kontra dak li l-politiċi qalulhom jagħmlu. 

Hekk seħħ fir-referendum fl-Isvezja dwar l-Ewro, fir-referendum fid-Danimarka dwar l-Ewro, fir-referendum fi Franza dwar il-Kostituzzjoni Ewropea, u fir-referendum fl-Olanda dwar l-istess Kostituzzjoni.

F’Malta wkoll il-partiti politiċi qegħdin jimponu fuq il-poplu l-politika u r-regolamenti ta’ l-UE, avolja l-kotra tal-Maltin u l-Għawdxin qed jilmentaw dwar l-effetti tas-sħubija ta’ pajjiżna fl-Unjoni. 

Iżda għad jasal il-mument mhux fil-bogħod meta l-kotra tal-Maltin u l-Għawdxin timponi hi fuq il-partiti politiċi tagħna u ġġieghelhom ibiddlu l-politika servili għall-Unjoni u jerġgħu jfittxu l-interessi tal-poplu Malti qabel iwettqu r-rieda ta’ l-UE.

Il-poplu għad irid jisħaq mal-partiti politiċi li jagħmlu sewwa l-kontijiet ta’ kemm is-sħubija fl-Unjoni qiegħda tiswa lil pajjiżna u kemm hija kbira l-ħsara li l-poplu Malti qiegħed iġarrab minħabba s-sħubija fl-Unjoni. 

Sal-lum il-poplu ma semax ħlief kemm kiseb u kemm qed igawdi mill-Unjoni, u l-politiċi jagħmlu minn kollox biex inessuh kemm qegħdin nirrifjutaw u x’aħna nbatu minħabba s-sħubija fl-UE.

Il-politiċi li jfittxu l-opportunitajiet personali mis-sħubija tagħtihom, jistinkaw biex iħarsu l-interessi personali tagħhom anke meta jafu li l-kotra mhux opportunijiet ta’ vantaġġ għandha bis-sħubija għoli tal-ħajja, taxxi indiretti, nuqqas ta’ impjiegi, ħlas għas-servizzi soċjali, u kundizzjonijiet agħar għall-pensjonanti. 

Il-midja li qiegħda tirċievi għajnuna mill-UE mhux se tagħmel kritika oġġettiva ta’ l-Unjoni u tal-politika u r-regolamenti tagħha. 

Iżda tajjeb infakkru li għalkemm fi Franza u fl-Olanda, fid-Danimarka u fl-Isvezja l-midja tefgħet is-saħħa kollha tagħha favur l-Ewro u l-Kostituzzjoni Ewropea, is-saħħa tal-kotra tal-poplu f’dawk il-pajjiżi għelbet is-saħħa tal-midja u vvotat kontra l-Ewro u kontra l-Kostituzzjoni Ewropea.

F’pajjiżna l-midja kollha tal-partiti politiċi, il-gazzetti li m’humiex tal-partiti, u x-xandir ta’ l-istat jissaraw bejniethom min l-iktar jipprova jinfluwenza l-opinjoni pubblika favur l-UE, u assolutament jinsew l-interessi tal-kotra tal-poplu li marret minn taħt bis-sħubija fl-Unjoni.

Madankollu, li ġara fi Franza, fl-Olanda, fl-Isvezja u fid-Danimarka għad irid jiġri f’Malta.

Il-Ħamis, 23 ta’ Novembru, 2006.

<<  Lura  

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ