MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Il-Kampanja għall-Ħelsien Nazzjonali (CNI) hi tal-fehma li l-Gvern irredikola ruħu fil-kwistjoni tal-karozzi tal-mejtin. 

Għax mhux se jikber in-negozju tal-ġarr tal-mejtin billi jiżdied in-numru tal-karozzi tagħhom. 

Is-CNI ssostni li l-Gvern, jekk irid li l-poplu jħallas inqas għall-ġarr tal-mejtin, kulma kellu jagħmel huwa li, bħala regolatur, ibaxxi n-nolijiet li jitħallsu llum. 

Jew, biex jagħti prova kemm irid li l-poplu jħallas mill-inqas li jista’ għas-servizz ta’ funeral, il-Gvern imissu neħħa t-taxxa tal-VAT minn fuq l-ispejjeż tal-funerali.

Iżda minflok baxxa n-nol tal-karozzi tal-mejtin u neħħa t-taxxa tal-VAT minn fuq l-ispejjeż tal-funerali, il-Gvern għażel li jobdi l-ordni ta’ l-Unjoni Ewropea biex jilliberalizza t-trasport, u beda mill-mejtin, minflok mit-trasport tal-ħajjin.

Fil-fehma tas-CNI l-Gvern dawwar il-kwistjoni tal-liberalizzazzjoni f’kummiedja, billi ftaħar li għall-ġid tal-pajjiż, biha se jeqred il-monopolju tas-sidien tal-karozzi tal-mejtin. 

Lill-midja u lill-pubbliku l-Prim Ministru u l-Ministru tat-Trasport bellgħulhom din il-ħrafa tal-ġid li se joħroġ miż-żieda fin-numru tal-karozzi tal-mejtin.

Mhux minnu li l-pajjiż se jgawdi minn numru akbar ta’ karozzi tal-mejtin. 

Għal ħafna raġunijiet ikun aħjar li ma jikbirx in-numru tal-karozzi tal-mejtin, ladarba tista’ taġevola lill-poplu billi sempliċiment tbaxxilu n-nolijiet.

Mhux fl-interess tal-pajjiż li joħorġu mill-pajjiż flejjes kbar li jintefqu fix-xiri ta’ karozzi tal-mejtin, meta diġà hawn fil-pajjiż numru ta’ karozzi tal-mejtin aktar minn biżżejjed għad-domanda li hawn għall-ġarr tal-mejtin.

L-eluf minfuqin fix-xiri ta’ karozzi żejda, għandhom jintefqu fuq proġetti ta’ siwi li jirrendu għal pajjiżna, mhux mogħtijin lid-ditti barranin tal-karozzi tal-mejtin.

L-effiċjenza ekonomika tgħallem li jekk il-ġarr tal-mejtin jista’ jsir diċentement u effiċjentement b’investiment ta’ kapital li sar ta’ għaxar karozzi li hawn, tiżbalja jekk tonfoq minflok investiment ta’ kapital akbar għax-xiri ta’ għaxar karozzi oħrajn.

Is-CNI jidhrilha li gvern li jkun responsabbli u ta’ l-affari tiegħu ma jinkoraġġix nefqa żejda ta’ kapital barra l-pajjiż, kif se jiġri fix-xiri minn barra tal-karozzi tal-mejtin, ladarba l-pajjiż diġà għandu aktar minn biżżejjed karozzi tal-mejtin.

Il-Gvern, minflok skoraġġixxa x-xiri ta’ aktar karozzi tal-mejtin, inkoraġġiha billi mit-taxxi tal-poplu se jissussidjahom b’mijiet ta’ eluf: €230,000. 

Deċiżjoni bla sens u irresponsabbli, għax jekk il-poplu se jħallas inqas għan-nolijiet, li se jiffranka se jħallsu fit-taxxi li sejrin għas-sussidju.

Il-Gvern qed isostni li n-nolijiet jonqsu biż-żieda fin-numru ta’ karozzi tal-mejtin. 

Skond is-CNI, iżda, jekk hemm lok li n-nolijiet jonqsu, aktar jistgħu jonqsu għall-ġarr mhux se tikber għax mhux se jiżdied in-numru tal-mejtin kuljum.

Nolijiet aktar baxxi

Jekk wieħed jieħu l-eżempju li llum hawn domanda kuljum għal sitt karozzi tal-mejtin, u li l-ħlas hu ta’ €100 kull karozza, id-dħul totali f’ġimgħa mill-karozzi tal-mejtin hu ta’ €4,200. 

Jekk illum hawn għaxar karozzi tal-mejtin, kull karozza ras għal ras iddaħħal €420 fil-ġimgħa.

Issa jekk in-numru tal-karozzi jirdoppja, u n-nol jonqos għal €80 kull karozza, id-dħul f’ġimgħa mill-20 karozza jkun ta’ €3,360, li jġib li kull karozza ddaħħal ras għal ras €168 f’ġimgħa. 

Dan ifisser li sid ta’ karozza li llum għandu dħul ta’ €420 fil-ġimgħa, jaqa’ għal dħul ta’ €158 fil-ġimgħa. 

Tnaqqis fid-dħul li ma tistax tistennieh.

Min-naħa l-oħra, jekk l-għadd ta’ karozzi jibqa’ għaxra bħalma hu llum, u l-Gvern jiffissa n-nol għal €70 kull karozza minflok il-€100 tal-lum, id-dħul totali fil-ġimgħa jkun ta’ €2,940, li jġib ras għal ras kull karozza ddaħħal €294 fil-ġimgħa.

Dan l-eżempju juri li jekk jinżamm in-numru ta’ karozzi tal-mejtin tal-lum, u l-Gvern iraħħas in-nol għal €70 kull karozza, ikun ħafna aħjar għall-pubbliku, u ħafna aktar ġust għas-sidien tal-karozzi, milli jekk jirdoppja n-numru tal-lum tal-karozzi u jitbaxxa n-nol għal €80 kull karozza.

X'inhu l-ahjar?

Is-CNI tisħaq li ssir ħsara mhux ġid lill-pajjiż, kull meta tiġi applikata l-politika ta’ l-Unjoni Ewropea dwar il-liberalizzazzjoni ta’ kollox, mingħajr ma jitqiesu jekk dik il-politika hiex adattata f’qasam partikolari għaċ-ċirkostanzi u ċ-ċokon tas-suq ta’ pajjiżna. 

Dwar il-każ tal-karozzi tal-mejtin, il-politika tal-liberalizzazzjoni hija għal kollox żbaljata ekonomikament u soċjalment.

Il-poplu Malti u Għawdxi jinqeda aħjar jekk il-Gvern – bħala regolatur – ibaxxi n-nolijiet u jmur kontra dak li trid l-Unjoni Ewropea, billi jneħħi t-taxxa tal-VAT minn fuq il-funerali.

L-Erbgħa, 23 ta’ Lulju, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ