MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Relazzjonijiet industrijali fl-UE

Pajjiżi kbar ta’ l-Unjoni Ewropea – il-Ġermanja, Franza u l-Italja – il-ġimgħa l-oħra spiċċaw ipparalizzati bi strajks ta’ miljuni ta’ ħaddiema.

Fil-ġimgħat ta’ qabel, seħħew ħafna strajks oħrajn f’aktar pajjiżi ta’ l-UE, fosthom il-Greċja, il-Portugall, l-Ungerija u l-Isvezja.

Dawn l-istrajks kollha jixhdu li l-Unjoni Ewropea ma tiżgurax relazzjonijiet industrijali mingħajr inkwiet, u lanqas li l-ħaddiema jiksbu d-drittijiet tagħhom mingħajr ma jkollhom jieqfu minn xogħolhom.

F’ħafna każi l-ħaddiema jkollhom jieqfu mix-xogħol mhux biex jiksbu pagi ogħla jew benefiċċji ġodda, iżda biex ma jitilfux mill-benefiċċji li għandhom u biex ma jonqsilhomx id-dħul tagħhom jew jiddgħajfulhom il-pensjonijiet li għandhom dritt għalihom.

Dan barra meta l-ħaddiema jipprotestaw kontra t-telfien ta’ l-impjieg tagħhom għax l-impriżi jew jonqsilhom ix-xogħol jew ikollhom jagħlqu għal kollox.

F’dan ix-xenarju ta’ inkwiet industrijali mifrux fl-Unjoni Ewropea, jinstemgħu vojta u foloz dawk il-Maltin propagandisti ta’ l-Unjoni (sfortunatament fosthom anke xi trejdunjonisti) li jiftaħru li l-ħaddiema Maltin jistgħu jserrħu rashom bl-Unjoni Ewropea.

Il-verità li tnikket hija li fl-UE minoranza ta’ ħaddiema jgawdu u jmorru tajjeb, fil-waqt li l-maġġoranza kbira hija mhedda minn telfien ta’ l-impjieg, jew tnaqqis tal-kundizzjonijiet tax-xogħol tagħhom, jew fil-pensjonijiet.

Dawn l-istrajks kollha fl-UE għandhom jgħallmuna wkoll ħwejjeġ oħrajn f’pajjiżna.

L-Unjoni, bil-maqlub ta’ dak li jiġri f’pajjiżna, ma tqisx l-istrajks la bħala theddida għad-demokrazija u lanqas bħala azzjonijiet ta’ partiġġjaniżmu politiku.

Tqishom bħala azzjonijiet leġittimi normali f’pajjiżi demokratiċi u t-trejdunjins għandhom ikollhom kull dritt li jorganizzawhom, anke jekk jistgħu ma jsirux għar-raġunijiet ġustifikati.

Għalhekk ir-reazzjoni ostili f’pajjiżna għall-istrajks hija ta’ theddida għad-demokrazija industrijali u mhux li huma ta’ theddid għad-demokrazija politika.

Għandna nieħdu tagħlima oħra minn dak li jseħħ f’pajjiżi Ewropej oħrajn fir-rigward ta’ strajks.

Waqt strajks, għandhom jintensifikaw id-diskussjonijiet u n-negozjati bejn it-trejdunjins u s-sidien jew il-gvernijiet, u mhux jieqfu (kif jiġri f’pajjiżna) sakemm jieqfu l-azzjonijiet mill-ħaddiema.

Kieku n-naħat f’tilwim ta’ xogħol jiddiskutu u jinnegozjaw waqt strajks, kieku jintlaħqu ftehim f’iqsar żmien u l-istrajks ikunu ħafna iqsar, għall-ġid tan-naħat kollha u għall-pubbliku li jġarrab tbatija bl-istrajks.

Għajnuna lill-impriżi Ewropej

L-Unjoni Ewropea ma tħallix lill-Gvern Malti jagħti għajnuna finanzjarja lill-impriżi biex ikunu jistgħu jżommu fl-impjieg lill-ħaddiema, iżda ma żżommx lill-Gvern milli jagħti l-“unemployment benefit” lill-ħaddiema meta jingħataw is-sensja.

Din hija politika ħażina moralment u ta’ ħsara ekonomikament, speċjalment fil-każ ta’ impriżi li jesportaw il-prodotti tagħhom jew ibiegħu s-servizzi tagħhom lill-barranin.

Biex nifhmu kemm il-politika ta’ l-UE hija ta’ ħsara ekonomikament, nieħdu eżempju ta’ ħaddiem f’impriża li taħdem għall-barranin, u li għandu paga ta’ Lm100 fil-ġimgħa.

Jekk l-impriża ma tkunx tiflaħ tħallas aktar dik il-paga u għalhekk tkeċċi lill-ħaddiem, il-Gvern jieqaf jirċievi l-kontribuzzjoni tas-sigurtà nazzjonali kemm ta’ l-‘employer’ kif ukoll tal-ħaddiem, li jlaħħqu Lm20 fil-ġimgħa.

Minflok, il-Gvern jibda jħallas lill-ħaddiem mat-Lm30 fil-ġimgħa f’benefiċċju tal-qgħad.

Li kieku l-Gvern, flok iħallas Lm30 f’benefiċċju tal-qgħad lill-ħaddiem, jagħti għajnuna ta’ Lm30 lill-impriża, u din b’dik l-għajnuna tkun tista’ tkompli tħallas lill-ħaddiem il-paga ta’ Lm100 fil-ġimgħa, hija ma tkeċċix lill-ħaddiem, u bix-xogħol li jibqa’ jagħti hu, l-impriża ddaħħal mingħand il-barranin li lilhom tbiegħ il-prodotti jew is-servizzi tagħha, id-differenza fil-paga ta’ Lm70.

Iżda jekk dan iseħħ, il-Gvern, għat-Lm30 li huwa jkun ta f’għajnuna lill-impriża, idaħħal lura Lm20 f’kontribuzzjonijiet tas-sigurtà nazzjonali mingħand l-impriża u mingħand il-ħaddiema li jkun baqa’ fl-impjieg tiegħu.

B’dan il-mod il-Gvern ikun qiegħed ibati Lm10 fil-ġimgħa, minflok Lm30 fil-ġimgħa fir-rigward ta’ dak il-ħaddiem, u l-pajjiż jibqa’ jdaħħal mingħand il-barranin Lm70 fil-ġimgħa, u l-ħaddiem jibqa’ jonfoq fl-ekonomija tal-pajjiż Lm90 fil-ġimgħa (il-paga nieqsa l-bolla).

Fil-każ ta’ impriża li tbiegħ il-prodotti jew is-servizzi tagħha lill-barranin, li tkun tħaddem 1,700 ħaddiema li jkollhom medja ta’ Lm100 paga fil-ġimgħa, bl-istess kalkolu li għamilna fil-każ ta’ ħaddiem wieħed, jekk il-ħaddiema jiġu qgħeda, l-ispiża tal-Gvern titla’ għal Lm2,652,000 fis-sena f’benefiċċju tal-qgħad, filwaqt li l-Gvern jispiċċa jbati biss Lm884,000 fis-sena jekk jagħti lill-impriża għajnuna ta’ Lm30 fil-ġimgħa għal kull ħaddiem li jibqa’ fl-impjieg.

U jekk jiġri dan, il-pajjiż jibqa’ jdaħħal mingħand il-barranin, għax-xogħol mogħti mill-1,700 ħaddiema Lm7,072,000 fis-sena, u l-ħaddiema jonfqu Lm7,956,000 fis-sena (il-pagi neqsin il-bolla) fis-suq Malti.

Dan il-gwadann ekonomiku kollu jintilef meta l-Gvern iħaddem il-politika ta’ l-Unjoni li ma jagħtix għajnuna lill-impriżi.

L-UE fi kriżi morali u politika

Il-kredu ta’ l-UE hu s-suq ħieles u għas-suq ħieles tissagrifika l-impjiegi u d-dinjità tal-ħaddiema.

Iżda l-ġimgħa l-oħra fil-Parlament Ewropew instema’ leħen li sfida dan il-kredu ekonomiku Ewropew.

Kien il-President Franċiż Nicolas Sarkozy li indirizza laqgħa plenarja tal-Parlament Ewropew fi Strasbourg.

Lill-Membri Parlamentari Ewropej, Sarkozy qalilhom li l-UE tinsab fi kriżi morali u politika, bla ma taf x’inhuma l-għanijiet u r-raġunijiet tad-deċiżjonijiet li hija trid tieħu.

Għalhekk hu kien ippropona li jitwaqqaf kumitat ta’ “għorrief” (nies ta’ esperjenza) biex jiddiskutu ’l fejn għandha timxi l-Ewropa fil-kriżi profonda maħluqa mill-globalizzazzjoni u l-kummerċjalizzazzjoni dinjin.

Sarkozy ilmenta li l-Unjoni qiegħda tagħmel l-iżball li tqis li l-valuri ekonomiċi huma kollox fil-ħajja u mhux qiegħda tagħti każ il-valuri kulturali.

Huwa jemmen li l-Ewropa tkun stmata fid-dinja jekk jarawha tħares il-valuri spiritwali u l-valuri taċ-ċiviltà, u jekk tiddefendi bil-qawwa kollha tagħha l-valuri taċ-ċiviltajiet u kulturi diversi.

Iżda Sarkozy saħaq fit-tul fid-diskors tiegħu dwar il-protezzjoni li għandha tingħata lill-kummerċ u l-industrija tal-pajjiżi Ewropej.

Hu qal li mhux sewwa li ma titħaddimx politika ta’ protezzjoni għas-swieq ta’ l-UE, għax kif pajjiżi oħrajn jipproteġu l-interessi tagħhom, il-pajjiżi ta’ l-UE għandhom ukoll jipproteġu s-swieq u l-industriji tagħhom.

Il-kelliem staqsa għaliex pajjiżi oħrajn għandhom dritt ma jħallux importazzjoni ta’ prodotti li jifqgħu s-swieq tagħhom u jeqirdulhom l-industrija u l-pajjiżi ta’ l-Unjoni Ewropea m’għandhomx id-dritt jagħmlu l-istess?

Staqsa jekk pajjiżi oħrajn iħarsu l-biedja tagħhom, għaliex l-UE m’għandhiex tħares lill-bdiewa tagħha?

Il-President Franċiż sostna li għalkemm l-UE għandha tkun marbuta mal-prinċipji tal-kompetizzjoni tas-suq, m’għandhiex tagħmel kredu mill-kompetizzjoni tas-suq.

Huwa ssokta jgħid li għalkemm l-Unjoni għażlet li tħaddan politika ta’ ekonomija tas-suq u l-kapitaliżmu, dan m’għandux ifisser kapitaliżmu mingħajr rażan.

Il-membri tal-Parlament Ewropew ċapċpu kemm felħu għall-kliem ta’ Sarkozy.

Iżda għalina f’Malta, dan mhux biżżejjed jekk ma nipprattikawhx fil-politika tagħna, kif konna nagħmlu fl-imgħoddi meta l-Perit Mintoff ħaddem l-istess politika li llum Sarkozy qed jippriedka, meta ta l-għajnuna sħiħa u l-protezzjoni kollha lill-industrija u lis-suq tal-prodotti Maltin.

Aktar tagħrif dwar l-UE…

Press releases

Eżempju ta’ dan nieħdu kemm ħarġet ’press releases’ il-Kummissjoni Ewropea s-sena l-oħra.

Is-sena l-oħra l-Kummissjoni ħarġet 1,907 ’press releases’, mhux biex tagħti tagœrif, iżda wkoll biex tiġġustifika l-ħidma tagħha u ta’ l-Unjoni, u biex turi għaliex il-ħidma saret mill-Unjoni u mhux mill-istati membri.

Minbarra n-numru esaġerat ta’ ’press releases’ li l-Kummissjoni Ewropea toħroġ, ta’ min iqis ukoll il-ħin twil ħafna li jittieħed biex jinkitbu.

Għax biex jitlesta t-text finali li jixxandar tal-’press release’, irid jieħu ħafna żmien u jgħaddi minn ħafna jdejn ta’ esperti f’ħafna dipartimenti tal-Kummissjoni u ta’ ħafna konsulenti politiċi.

Studju li sar tal-’press releases’ tal-Kummissjoni isemmi każ fejn inkitbu 15-il verżjoni ta’ ’press release’ qabel ma ġiet maqbula dik finali li xxandret.

B’danakollu, aktarx li l-’press releases’ li l-Kummissjoni tispiċċa toħroġ, ikunu miktubin b’mod li ma tantx iġiegħlek taqrahom, u kultant, lanqas tant jinftehmu.

Immigranti illegali

L-immigrazzjoni lejn il-pajjiżi ta’ l-Unjoni Ewropea saret issa qasam li l-Unjoni għandha s-setgħat li tiddeċiedi l-politika tiegħu.

Dak li qed iseħħ f’pajjiżna dwar l-immigranti illegali huwa għalhekk konsegwenza tal-politika u tar-regolamenti ta’ l-Unjoni dwarhom.

Iżda mhix magħrufa l-qagħda eżatta ta’ l-immigranti illegali f’pajjiżna, għax qatt ma jingħata tagħrif sħiħ dwarha.

L-aħħar tagħrif li xxandar fil-ġurnali jqanqal ħafna mistoqsijiet.

Skond il-Gvern bħalissa hemm 1,700 immigranti illegali miżmumin fiċ-ċentri ta’ detenzjoni, fil-waqt li hemm 2,106 li joqogħdu fiċ-ċentri miftuħin governattivi u ta’ għaqdiet volontarji.

Dawn flimkien iġibu 3,806 immigranti illegali.

Iżda skond il-Gvern, mill-2002 ’l hawn, ġew 7,000 immigranti illegali f’pajjiżna.

Dan ifisser li hemm ’il fuq minn 3,000 immigranti illegali li la huma fiċ-ċentri maqfulin u lanqas m’huma fiċ-ċentri miftuħin.

Ħadd ma jaf jagħti tifsira ta’ dan il-fatt inkwetanti għalina, iżda ma jidhirx li jinkwieta.

L-Unjoni Ewropea taf bih u ma tgħid xejn dwaru, bit-tama li dawn l-eluf ta’ immigranti illegali b’xi mod jintegraw fis-soċjetà Maltija.

Għalkemm l-immigranti illegali jridu jmorru fil-pajjiżi l-oħrajn ta’ l-Unjoni, din ma tħalliniex ngħinuhom jagħmlu dan.

L-Unjoni tagħraf li dawn l-immigranti illegali huma problema tagħha, iżda ma tridx tagħraf ir-responsabbiltà li għandha li ma tħalliniex inġorru l-piż tagħhom meta pajjiżna ma jiflaħx għalih.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.