MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!
Fis-seba’ snin 2007 – 2013 il-Maltin u l-Għawdxin se jkunu ħallsu lill-Unjoni Ewropea €420,000,000
Prosit
Gulia u Abela
Jidher
li fl-aħħar anke xi politiċi u artikolisti bdew jitħarrku
bis-serjetà dwar il-problema – jew aħjar kriżi – ta’
l-immigrazzjoni illegali.
Aħna
tas-CNI ilna żmien twil li konna l-ewwel li tkellimna permezz taċ-Ċermen
l-Avukat Karmenu Mifsud Bonnici, li kien qal bla tlaqliq ta’ xejn, li dak li
kellna nagħmlu biex verament ngħinu lil immigranti illegali li ma
ridux jispiċċaw jiġu f’pajjiżna, kien li ngħinuhom
biex huma jmorru lejn dak il-pajjiż fejn xtaqu jmorru.
Dak
in-nhar, li qal Karmenu Mifsud Bonnici kien waqa’ fuq widnejn torox.
Dawn l-aħħar ftit ġimgħat is-sitwazzjoni bdiet tinbidel.
Il-ġimgħa
l-oħra wrejnikom x’qal il-Ministru Michael Frendo.
Semmejnilkom
ukoll li d-Deputat Laburista Josè Herrera kien tkellem fil-Parlament dwar din
il-kriżi.
U
kkwotajnilkom ukoll x’qal il-kantant famuż Bob Geldof dwar din
il-problema u kif kienet qiegħda tiġi ttrattata ħażin
mill-UE.
Illum
għandna pjaċir nikkwotaw xi siltiet, forsi l-aktar qawwija s’issa
dwar din il-problema, minn artikli tad-Deputat Laburista Gavin Gulia u l-Avukat
Toni Abela.
Minn
hawn ngħidulhom mill-qalb prosit u j’Alla iktar politiċi u kittieba
fl-aħħar jieħdu l-eżempju tagħkom biex fl-aħħar
il-karba tal-maġġoranza assoluta tal-poplu Malti tinstema’ u
tissarraf f’azzjoni radikali.
U
mhux nibqgħu nisimgħu tpaċpic fil-vojt li ma jwassal imkien.
Nibdew
b’xi siltiet tad-Deputat Dr Gavin Gulia.
Taħt
it-titlu: “Il-krizi ta’ l-immigrazzjoni – ‘about time ministri’
(l-orizzont, 4 ta’ Lulju), Gavin Gulian kiteb hekk:
1. “Wara li għamlu snin sħaħ jgħorku u jimlew bix-xemghħa
lill-UE, fl-aħħar milli jidher (il-ministri) intebħu li l-UE qiegħda
tittratta lil pajjiżna bħala s-“Cindirella” ta’ l-UE. Ħlief
retorika u paroli…izda l-ebda azzjoni konkreta ma ttieħdet biex verament
il-pajjiżi Ewropej iwettqu l-politika ta’ solidarjetà li tant
jippriedkaw”.
2. “… ara l-UE kemm marret tiġri saqajha ma’ daharha biex tgħin
lil Spanja meta sfat inondata bl-istess mewġ ta’ immigranti
irregolari…”
3. “Jistgħu issa n-Nazzjonalisti jgħidulna x’riedu jgħidu
biha, qabel l-aħħar elezzjoni, li Malta fl-UE, ikollha vuċi fuq
il-mejda tan-negozjati. Il-Ministri Borg u Frendo qegħdin jinebħu li
lanqas biss fuq kwistjoni li tolqot lill-Unjoni Ewropea kollha, u mhux lil Malta
biss, bħalma hija l-immigrazzjoni irregolari, m’hu qiegħed ikollna
wens mill-UE, aħseb u ara”.
Xtaqna kellna aktar spazju għax Gavin Gulia kiteb ferm iktar minn hekk, iżda
rridu nikkwotaw ukoll xi siltiet ta’ l-iktar avukat li hawn f’pajjiżna
li jitkellem u jikteb bla kantunieri ta’ xejn u b’mod stupend dwar kull
problema li tkun qiegħda tolqot ħażin lill-poplu Malti. Qiegħed
nirreferi għall-Avukat Toni Abela.
Fl-artiklu tiegħu f’dan il-ġurnal (L-Orizzont) ta’ l-4 ta’
Lulju, wara li ddeskriva l-biżgħat, kultant esaġerati tal-poplu
Malti fl-imgħoddi, meta kiteb dwar “l-invażjoni” li għandna
llum ta’ klandestini, qal li la għandna nibżgħu żżejjed
izda lanqas m’għandna “nibqgħu b’ħalqna magħluq jew
nagħmlu ta’ bir-ruħna li s-sitwazzjoni hi taħt kontroll
assolut”.
Ħalli niġu issa għal xi siltiet lejn l-aħħar ta’
l-artiklu ta’ Toni Abela:
“Mela jekk il-Gvern Malti jieħu
deċiżjoni ħażina, malajr ninżlu t-toroq u
nipprotestaw… allura meta l-Kummissjoni Ewropea jew il-Kunsill tal-Ministri
jagħmlu paprata li tolqotna fil-laħam il-ħaj ma nistgħu nagħmlu
xejn?”
2. “Issa li qegħdin fl-UE rridu niftakru li kważi tliet kwarti
tat-tmexxija tal-pajjiż fl-aktar ħwejjeġ importanti, m’għadhiex
f’idejn il-Gvern Malti iżda f’idejn ir-rigmenti u leġjuni ta’
burokratiċi u politiċi fi Brussels. Ma jidhirx li dan fimnih”. (Ma
taħsbux li dan ezatt li ilna ngħidu aħna tas-CNI?)
3. “L-UE taħti għas-sitwazzjoni li ninsabu fiha u ma jidhirx li hija
tassew sensittiva għall-ilmenti tagħna”.
4. “Meta għandna din il-passa
kontinwa ta’ bnedmin li jiġu u jibqgħu (f’pajjiżna),
il-burokratiċi fi Brussels iridu jitkellmu fuq il-passa ta’ l-għasafar!
Wasal iż-żmien li nibagħtuhom jixxejru u dawk li jiġu
f’pajjiżna meta riedu jmorru f’pajjiż ieħor, jibdew jitħallew
imorru fid-destinazzjoni tagħhom”. (Eżatt kif kien qal Karmenu
Mifsud Bonnici!)
5. “Jekk l-Ewropej tassew jemmnu fil-moviment ħieles tal-bniedem, jekk
tassew jemmnu li kull immigrant irregolari li ma jiġix ripatrijat, illum għaliex
m’għandniex nirrispettaw ix-xewqat tiegħu? Kull ma rridu nagħmlu
nistaqsuh fejn jixtieq imur”.
U hawn niġu għall-kaxxa nfernali li Toni Abela ħalla għall-aħħar,
bħalma jiġri fil-festi tagħna. Toni Abela spiċċa hekk:
“......Iżda rridu nuru snina u
mhux paroli biss. Flimkien ninżlu fit-toroq nipprotestaw kontra
l-insensittività ta' l-UE lejn Malta fuq din il-kwistjoni. Il-membri
Parlamentari Ewropej isiru blokk wieħed u jagħmlu kemm jifilħu
storbju ġewwa u barra l-Parlament Ewropew. Jekk ikun hemm bżonn nofru
reżistenza billi xi wħud minn dawn l-immigranti irregolari noħorġulhom
passaport Malti u allura jkollhom il-libertà li jmorru fejn iridu fl-Ewropa, li
l-Afrika qiegħda hemm mhux biss biex tifridna.
J'Alla aktar u aktar politiċi u artikolisti jkollhom l-istess kuraġġ
bħalma wrew l-Avukati Gavin Gulia u Toni Abela, li poġġew
bil-fatti l-interess ta' Malta u tal-Maltin l-ewwel u qabel kollox!
Grazzi mill-qalb għal darb'oħra!
U nisperaw ukoll li ħadd issa ma
jakkuża lil Gavin Gulia, Toni Abela, Josè Herrera u l-Ministru Frendo
b'xenofobija jew razziżmu għax qalu dak li għidna u ktibna aħna
u l-ANR!
Grazzi
wkoll lil Muscat
Tafu
kemm ilna nħambqu dwar il-kwistjoni ta' l-għoli fil-prezz tal-mediċini
minħabba r-reġistrazzjoni tal-mediċini li trid l-UE.
Fl-aħħar il-Membru Parlamentari Ewropew Joseph Muscat għamel pressjoni fuq il-Kummissjoni Ewropea u jidher li din fl-aħħar qiegħda tagħti widen u taqbel, li la darba mediċina tkun diġà rreġistrata f'xi pajjiż ieħor ta' l-UE, allura l-istess mediċina tkun tista' tiġi rreġistrata awtomatikament f'kull pajjiż ieħor ta' l-UE, inkluża Malta, bla ma jidħlu spejjeż kbar kif qiegħed jiġri llum.
Lil Joseph Muscat ngħidulu “grazzi u prosit”!
Li ma nistgħux nifhmu però, hu kif soluzzjoni daqstant sempliċi kellu
jgħaddi daż-żmien kollu biex il-Kummissjoni Ewropea tinduna
bil-paprata li kienet qed issir u li kienet qiegħda tolqotna ħażin
ħafna.
Konna
nippretendu li l-istess Kummissjoni Ewropea kellha tinduna b'dan żmien ilu
u mhux qagħdet tistenna lil Joseph Muscat, għan-nom tal-Partit
Laburista, li jqajjem din il-problema li tant qiegħda ġġib
tbatija lill-morda u pazjenti Maltin u Għawdxin!
Lil
Gvern Nazzjonalista ngħidulu “imissek tistħi” li int m'għamilt
xejn tul dan iż-żmien kollu u issa, bil-wiċċ tost kollu,
qiegħed ukoll tipprova tnaqqas il-mertu ta' Joseph Muscat u l-Oppozizzjoni
Laburista għal inizjattiva li ħadu għall-ġid tal-poplu
Malti!
Kelmtejn
lil “stordut” ta' Il-Mument!
Dak li jikteb il-paġna 30 tal-ġurnal
Nazzjonalista Il-Mument taħt il-psewdonomu “Stordut”, reġa' ħaseb
fina tas-CNI.
Għadha ma tistax tinżillu
minn griżmejh li kkwotajna siltiet minn artiklu ta' Anna Mallia fil-Malta
Today, u li kien kollu difiża għal pajjiżna u l-poplu Malti f'din
il-kriżi li għandna bil-wasla ta' eluf ta' klandestini f'pajjiżna.
Billi l-esponenti tal-Gvern ma kinux lesti li jitkellmu ċar fil-pubbliku (għalkemm
fil-privat tgħidx kemm kienu u għadhom jitkellmu) dwar din il-problema
għax jibżgħu li tat-Times tgħajjarhom “razzisti”, allura
kull min lest li jpoġġi l-interess ta' pajjiżna l-ewwel,
‘Stordut’ u sħabu tal-PN malajr jittimbrawh “tal-Lemin estrem”!
Però kif rajna ġimgħa ilu u qed nuru wkoll illum f'din l-istess paġna,
anke l-Ministru Michael Frendo fl-aħħar qabżitlu ċ-ċinga.
U qal kliem ta' kritika li
l-Kummissjoni Ewropea ma tantx ħadet gost bih, rigward din il-problema.
Illum qegħdin nikkwotaw ukoll x’kitbu l-Onor Gavin Gulia u l-Avukat Toni
Abela.
Għalhekk jidher li esponenti miż-żewġ
partiti bdew jiċċaqilqu u ‘Stordut’ aktar se jistordi jsib ruħu
waħdu jiġġieled ma’ l-imtieħen tar-riħ!
Parir wieħed nagħtuh: imur jorqod raqda twila forsi jiġi f'sensih
u ma jibqax aktar ‘Stordut’!
Taqbila :
“lil
Stordut”
ta’ Il-Mument
Mhux ta’ b’xejn li int Stordut,
Ta’ l-PN tidher kelb tal-but !
U la stordut ma timxix dritt,
Ħmerijiet biss int erġajt
żidt !
Għad ma ndunajtx li l-poplu tagħna,
Dwar il-klandestinji qiegħed jgħid
bħalna.
Issa anki Gavin, Toni u Mikiel,
L-argument tiegħek għamluh
għarbiel.
Li tiddefendi lil art twelidek,
U ma tħalli ‘l ħadd illi jkun sidek,
Hu d-dover tagħna l-Maltin,
Biex ma nibqgħux hekk maħkumin !
Qawl Malti
“Il-barrani
jixwik u jieklok. Ta’ ġewwa jixwik u ma jiklokx”
Tifsira: Jagħmlu kemm jagħmlulek ħsara niesek qatt
m’huma se jeqirduk għax id-demm jiġbed.
Is-Sibt, 22 ta’ Lulju, 2006
e-mail: cnimalta at yahoo.co.uk
IRRIDU L'INDIPENDENZA MILL-UNJONI EWROPEA
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat €5 flimkien ma' din il-formola lis-
Segretarju Finanzjarju CNI,
60A, Triq id-Dejqa,
Valletta
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ