MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Is-sħubija fl-UE ċekknet lill-Parlament Malti

Għalkemm l-Avukat Toni Abela jgħidilna “Ma naqbilx magħkom”, aħna naqblu miegħu f’dak li kiteb il-Ħadd li għadda dwar il-Parlament Malti.

Huwa qal li jibza’ li l-proċess oċeaniku ta’ liġijiet li pajjiżna jirċievi mill-Unjoni Ewropea qiegħed jagħmel il-Parlament tagħna wieħed tat-Tieni Divizjoni.

Id-deputati tagħna, lanqas kieku jridu, ma jistgħu jlaħħqu mat-tsunami ta’ liġijiet li tibgħatilhom l-Unjoni.

L-Avukat Abela kompla jgħid li kieku d-deputati tagħna jridu jbiddlu partijiet mil-liġijiet li l-Unjoni tibgħatilhom, lanqas jistgħu, għax bit-trattat tas-sħubija ta’ Malta fl-Unjoni, il-Parlament Malti aċċetta li dak kollu li jiġi f’forma ta’ liġi mill-Unjoni ma jistax jintmess jew jinbidel mill-Parlament Malti.

Aktar minn hekk, il-Parlament Malti aċċetta li kwalunkwe liġi li jagħmel li mhix konformi jew kompatibbli ma’ xi liġi ta’ l-Unjoni Ewropea, titqies li hija liġi li ma għandha ebda effett.

Toni Abela lmenta li l-umiljazzjoni tal-Parlament tagħna hija akbar għax fil-waqt li liġi tiegħu hija attakkabbli minn kull ċittadin Malti billi kulħadd jista’ jitlob lill-Qorti tiddeċiedi li l-liġi li l-Parlament Malti għamel hija kontra l-Kostituzzjoni ta’ pajjiżna, fil-każ ta’ liġi ta’ l-Unjoni Ewropea dan ma jistax jagħmlu.

Waqt li ċ-ċittadini Maltin jistgħu jagħmlu użu minn referendum abbrogattiv biex iwaqqgħu liġi tal-Parlament Malti, dan ma jistgħux jagħmluh dwar liġi li tibgħatilna l-Unjoni Ewropea, anki jekk tkun kontra l-Kostituzzjoni ta’ Malta.

Masġar ta’ liġijiet

L-Avukat Abela qal li l-aktar impressjonanti hu l-mod kif l-Unjoni tagħmel kwantità kbira ta’ direttivi u regolamenti fuq kull ħaġa ta’ xejn.

Qisu r-rigment ta’ l-uffiċjali burokratiċi ta’ l-Unjoni jridu jiġġustifikaw is-salarji tagħhom billi jivvintaw kemm jifilħu liġijiet, bħal kemm għandha tkun il-kurvatura ta’ ħjara u tal-banana, kemm buttuna għandha tkun kbira u kemm għandha jkollha toqob, u saħansitra x’tip ta’ linka trid tintuża fl-istampar tal-liġi.

Ifasslu l-liġijiet mingħajr ma jqisu d-differenzi kulturali u soċjali tal-pajjiżi msieħba fl-Unjoni.

Toni Abela jikkummenta li l-masġar wara masġar ta’ liġijiet li l-Unjoni Ewropea tagħmel, lanqas il-Kremlin ta’ l-Unjoni Sovjetika fl-aqwa tiegħu ma kien jagħmel.

Ma jagħtix it-tweġiba ħlief li josserva li l-Parlament Malti llum huwa pjuttost qisu guva kbira ta’ pappagalli għax sar qisu gaġġa ta’ kliem.

L-għasafar ma jinqatlux, it-trabi iva

“Mingħajr abort se naqtgħulek il-flus”.

Dan qiegħda tgħidu l-Unjoni Ewropea lill-Gvern tan-Nikaragwa, kif irrapporta tant tajjeb il-ġurnalist kapaċi, Victor Vella ta’ l-orizzont fil-ħarġa tat-12 ta’ Frar.

Fit-30 ta’ Novembru tas-sena l-oħra, f’din l-istess paġna tas-CNI, kellna artiklu bit-titlu:

Dak in-nhar konna qabbilna l-fatt li l-Unjoni Ewropea ma tridx li l-kaċċaturi Maltin u Għawdxin jikkaċċjaw fir-Rebbiegħa ħalli l-gamiem u s-summien ikollhom iċ-ċans jibqgħu telgħin lejn l-Ewropa fejn ibejtu u jwelldu l-frieħ tagħhom, mal-fatt li l-istess UE taċċetta l-qtil ta’ trabi li ma jkunux għadhom twieldu, iżda li diġà jkunu hadu l-ħajja.

Għall-Unjoni Ewropea l-frieħ tas-summien u l-gamiem huma aktar importanti mit-trabi tal-bnedmin u tagħtihom aktar protezzjoni.

Jekk forsi fit-30 ta’ Novembru kien hemm min ħaseb li konna qegħdin nesaġeraw, issa jaħsibha mod ieħor wara li qara r-rapport tat-12 ta’ Frar tal-ġurnalist Victor Vella, li tana raġun.

Fir-rapport qrajna kif f’ġurnali Kattoliċi nkixef li l-Unjoni Ewropea qiegħda tagħmel pressjoni fuq il-Gvern tan-Nikaragwa biex iħassar liġi li għadda s-sena l-oħra kontra kull tip ta’ abort.

Skond il-Catholic News Agency, ir-rappreżentanti ta’ l-Unjoni Ewropea heddew li jaqtgħu l-għajnuna ekonomika lil Nikaragwa jekk il-pajjiż ma jneħħix dik li liġi li għamel li tipproteġi l-ħajja ta’ trabi li għadhom ma twieldux.

Ir-rappreżentant ta’ l-Unjoni Ewropea fin-Nikaragwa, Marc Livine, ġie kkwotat li qal:

“L-Unjoni Ewropea tqis l-abort legali hu assoċjat ma’ programmi ta’ għajnuna

Aħna kemm-il darba ktibna f’din il-paġna u għidna fuq is-Smash TV li l-Unjoni Ewropea, mhux biss m’għandix ruħ soċjali, iżda lanqas għandha ruħ ta’ xejn.

Naraw imbagħad l-ipokresija bla limitu ta’ l-Unjoni Ewropea meta din tgħid li ma taqbilx u ma tridx li anki min iwettaq l-agħar atti kriminali, inkluż qtil, li jingħata sentenza ta’ mewt.

Dan urietu biċ-ċar meta saħqet li l-eks-President dittatur ta’ l-Iraq, Saddam Hussein, ma kellux jinqatel, minkejja li kien responsabbli għal-mewt ta’ mijiet, jekk mhux ta’ eluf ta’ Iraqqini.

L-istess Unjoni Ewropea mhux biss qiegħda taċċetta l-qtil ta’ trabi innoċenti li għadhom ma twieldux, meta tħalli l-istati membri tagħha jwettqu l-abort, iżda “hi stess” qiegħda tesigi li titneħħa liġi li hija kontra l-abort.

B’hekk, l-Unjoni Ewropea trid il-qtil ta’ dawk it-trabi innoċenti li lanqas jingħataw id-dritt li jitwieldu, bħal ma hija trid li jitwieldu l-gamiem u s-summien.

Mhux ta’ xejn li d-“dittaturi” ta’ l-Unjoni Ewropea ma riedux isemmu l-għeruq Kristjani ta’ l-Ewropa fil-Kostituzzjoni ta’ l-Unjoni Ewropea.

Jidher li Alla ma riedx iħalliha għaddejja lixxa għax il-poplu ta’ Franza u l-Olanda qatluha!

L-Ewropa tgħolli l-petrol, id-diżil, id-dawl u l-ilma

Meta l-prezz taż-żejt għola mas-smewwiet, l-UE ġagħlet lill-gvernijiet tal-pajjiżi membri fl-Unjoni jagħmlu taxxi għoljin fuq il-prodotti taż-żejt, bħall-petrol, diżil u pitrolju, bl-iskuża li jitrażżan il-konsum tagħhom.

Anki f’pajjiżna, il-prezzjijiet ta’ dawn il-prodotti għandhom parti kbira minnhom taxxi miżjudin mill-Gvern.

Issa l-Unjoni trid terġa’ tgħolli t-taxxi fuq il-prodotti taż-żejt u tfasslet direttiva ġdida li se titressaq għall-approvazzjoni tal-Kunsill tal-Ministri tal-pajjiżi ta’ l-Unjoni.

* mis-sena 2014 l-inqas taxxa tkun ta’ 380 Ewro fuq kull 1000 litru ta’ fjuwil u

* mis-sena 2018, it-taxxa titla għal 400 Ewro kull 1000 litru fjuwil (240 gallun).

Dan ifisser li kull gallun fjuwil ikollu madwar 72-il ċenteżmu taxxa mposta mill-UE.

Kull pajjiż membru ta’ l-Unjoni jrid jimponi taxxa fuq il-fjuwil mhux inqas mill-inqas rata li tgħid l-Unjoni, iżda jista’ jimponi taxxa aktar għolja.

M’hemmx dubju li t-taxxi fuq il-prodotti taż-żejt jkomplu jgħollu l-ispiża tal-produzzjoni u tas-servizzi u tat-trasport u jgħollu b‘konsegwenza l-prezzijiet ta’ kollox.

Dawn it-taxxi jgħollu r-rati tad-dawl u ta’ l-ilma u għalhekk għandhom impatt kbir fuq l-ispejjeż tal-familji u l-għoli tal-ħajja.

Jekk Gvern ta’ pajjiż ta’ l-Unjoni jifhem li fl-interess nazzjonali m’għandux jintaxxa l-fjuwil jew għandu jbaxxi t-taxxi fuq il-fjuwil ma jistgħax jagħmel dan allavolja tkun qiegħda ssir ħsara lill-pajjiz jekk dan ma jsirx.

Qabel ir-referendum dwar is-sħubija fl-Unjoni, kienu jiżguraw lill-poplu li l-Unjoni ma tindaħalx fit-taxxi tal-pajjiż.

It-taxxi li l-Unjoni timponi fuq il-prodotti taż-żejt jgiddbu dak li l-propogandisti ta’ l-Unjoni kienu jgħidu lill-poplu.

L-istess hija t-taxxa ambjentali u d-dazji fuq l-oġġetti li ninportaw minn pajjiżi li m’humiex fl-Unjoni.

Tlifna bis-sħubija

Kemm ilu li pajjiżna ssieħeb fl-Unjoni Ewropea, sar aktar diffiċli għall-ħaddiema li jitilfu l-impjieg li jsibu xogħol alternattiv, kemm għax naqas ix-xogħol f’ħafna fabbriki, kif ukoll għaliex ħaddiema mill-Unjoni Ewropea għandhom dritt jiġu jaħdmu Malta u jieħdu x-xogħol tal-Maltin u l-Għawdxin.

Minn tagħrif mogħti wara mistoqsija parlamentari jirriżulta li hawn f’Malta uffiċjalment jaħdmu 2,759 ħaddiema mill-pajjiżi ta’ l-Unjoni Ewropea.

Jidher li hawn oħrajn li ma humiex reġistrati iżda xorta waħda qegħdin jagħmlu xogħol f’Malta flok ħaddiema Maltin.

It-tort huwa ta’ l-Unjoni Ewropea li tinsisti fuq id-dritt tal-moviment ħieles tal-ħaddiema ta’ l-Unjoni.

Minn mistoqsijiet parlamentari sar magħruf ukoll li hemm ftit aktar minn 200 Maltin u Għawdxin li marru jaħdmu ma’ l-Unjoni Ewropea.

Dan ifisser li għal kull persuna li marret taħdem minn Malta ma’ l-Unjoni Ewropea, ġew 13-il persuna jaħdmu f’pajjiżna mill-Unjoni Ewropea.

Hekk nistgħu naraw kemm morna minn taħt minħabba s-sħubija fl-Unjoni Ewropea.

Il-ħaddiema Maltin u Għawdxin jiġu tilfu 2,559 post tax-xogħol (2759-200) li ttieħdu mill-ħaddiema ta’ l-Unjoni Ewropea.

Mal-ħsara li l-ħaddiema Maltin qegħdin iġarrbu minħabba l-ħaddiema ta’ l-Unjoni Ewropea li qegħdin jeħdulhom ħobżhom, irridu nżidu l-ħsara l-oħra li qiegħda ssir minħabba l-mijiet ta’ immigranti illegali li għandna f’pajjiżna, ukoll tort tas-sħubija fl-Unjoni Ewropea.

Ir-regolamenti ta’ l-Unjoni Ewropea dwar l-immigranti illegali ma jħalluniex nieħdu l-passi meħtieġa biex l-immigranti illegali ma jibqgħux f’pajjiżna.

X’uħud minnhom, wara ċertu żmien f’pajjiżna, jingħataw jagħmlu xogħol minflok ħaddiema Maltin.

Dawn jitħallsu inqas mill-ħaddiema Maltin u għalhekk is-sidien jippreferuhom għall-Maltin.

* L-immigranti illegali li jispiċċaw jaħdmu f’pajjiżna,

* l-ispejjeż l-oħrajn kollha li l-Gvern għandu bl-immigranti illegali.

Il-Gvern qal li s-sena l-oħra nefaq kważi tlett miljuni u nofs liri Maltin fuq l-immigranti illegali.

Dawn il-flus ġew mit-taxxi tal-poplu u kienu jintefqu għall-ġid tal-poplu li kieku ma marrux għall-immigranti illegali li r-regolamenti ta’ l-Unjoni Ewropea jġagħluna nżommu f’pajjiżna, minkejja li pajjiżna ma jiflaħx għall-ispiża u ma għandux xogħol x’joffrilhom għax ma għandniex biżżejjed għall-Maltin u l-Għawdxin kollha.

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.