MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Il-protagonisti ta’ l-Unjoni Ewropea qegħdin jagħmlu sforzi kbar ħalli jipperswadu lill-poplu, li huwa rrabjat għalihom, li s-sensji li ngħataw u l-oħrajn li huma mhedda m’humiex marbuta mal-ftehim ta’ sħubija fl-UE. 

Iżda l-verità hi li l-ftehim ta’ sħubija fl-UE huwa kemm il-kaġun tas-sensji, kif ukoll l-kaġun tan-nuqqas ta’ miżuri li għandhom jittieħdu ħalli l-pajjiż jilqa’ għas-sensji u joħloq xogħol alternattiv għalihom.

Qabel ir-Referendum u l-Elezzjoni Ġenerali lill-poplu ngannawh b’ħafna gideb. 

Issa qegħdin jipprovaw ikomplu jidħku bih billi jżaħħdulu l-verità.

L-UE hija ħatja fl-ingann tal-poplu daqs il-protagonisti Maltin favur is-sħubija sħiħa ta’ Malta fl-Unjoni. 

Hija taf li l-politika ekonomika u soċjali tagħha qiegħda tagħmel ħerba mill-industriji tal-manifattura u mill-industriji ta’ l-informatika fil-pajjiżi membri tagħha. 

Dawn l-industriji qegħdin joħorġu mill-UE u jemigraw għal pajjiżi oħrajn, speċjalment iċ-Ċina u l-Indja. 

L-istess ħaġa qiegħda sseħħ f’Malta minħabba l-politika ekonomika u soċjali li l-ftehim tas-sħubija fl-UE qed iġiegħel lill-Gvern iwettaq.

Bil-ftehim ta’ sħubija fl-UE li l-Gvern għamel, l-ewwel ma tħarbtet kienet l-industrija li taħdem għas-suq Malti.

Il-Gvern ċeda d-dritt li jagħti għajnuniet lill-industrija lokali għax l-UE tgħidlu li l-għajnuna tal-Gvern tikser ir-regoli tal-kompetizzjoni u tas-suq.

Fiċ-ċokon tas-suq Malti, l-industrija lokali tista’ tmexxi biss jekk tingħata għajnuna. 

Bl-għajnuna li l-Gvern ta lill-industrija fl-imgħoddi, kibret l-industrija f’Malta u ħadet post ix-xogħol u l-impjiegi li qabel kienu pprovduti biss mis-servizzi Ingliżi f’Malta.

Bl-industrija lokali jgawdu l-industrijalisti u l-imprendituri Maltin u dawn jipprovdu xogħol u mpjieg lill-ħaddiema Maltin. 

Il-ftehim ta’ sħubija fl-UE, li ħarbat l-industrija lokali, ta daqqa ta’ ħarta lil ħafna industrijalisti u imprendituri Maltin u kkaġuna s-sensji ta’ ħafna ħaddiema Maltin.

Sakemm jibqa’ l-ftehim ta’ sħubija fl-Unjoni li l-Gvern Malti għamel, l-industrija lokali tibqa’ tmur għall-agħar u s-sensji jiżdiedu.

L-ekonomisti li ma jagħtux kas tas-sensji u l-konsulenti li ma jimportahomx mill-qgħad, lill-industrijalisti u l-imprendituri Maltin jagħtuhom il- parir iwaqqfu l-fabbriki mhux f’Malta, iżda fil-pajjiżi barranin barra l-Unjoni Ewropea fejn jaqblilhom aktar.

Dawn l-ekonomisti u l-konsulenti huma ħatja daqs il-Gvern Malti u daqs l-UE għall-ħerba li saret u aktar se ssir mill-industrija lokali u mill-impjiegi tal-ħaddiema Maltin.

Tajjeb li niftakru li l-Unjoni Ewropea u l-Gvern Malti qablu fil-ftehim tas-sħubija, li l-Prim Ministru Fenech Adami u l-Ministru Joe Borg iffirmaw f’Ateni fis-16 ta’ April tas-sena l-ohra, li l-impjiegi f’ċerti setturi għandhom jonqsu. 

Minflok l-UE intrabtet li tħares l-impjiegi f’pajjiżna, rabtet lill-Gvern Malti li jnaqqas l-impjiegi.

Mhux hekk biss, iżda bil-ftehim tas-sħubija, li ffirmaw Fenech Adami u Borg u li d-deputati Nazzjonalisti vvotaw biex jirratifikaw fil-Parlament Malti u li xi Laburisti jriduna naċċettaw bl-iskuża li l-maġġoranza vvotat favurih, il-Gvern Malti ma jistax jagħmel miżuri biex jgħin lill-fabbriki li jkunu f’diffikultà.

* Ma jistax jgħinhom fil-kera tal-fabbriki, 

* ma jistax jagħtihom għotja ta’ flus, 

* ma jistax jissussidjalhom l-imgħax fuq is-self li jagħmlu, 

* ma jistax inaqqsilhom ir-rati tad-dawl, 

* ta’ l-ilma, 

* tat-telefon, 

* tal-gass, 

* tad-diesel u 

ta’ servizzi oħrajn li jiddependu mill-Gvern stess.

Għax, skond l-UE, dawn il-miżuri governattivi jiksru r-regoli tal-kompetizzjoni u tas-suq.

Aqwa u qabel ir-regoli tal-kompetizzjoni u tas-suq hemm il-ħtieġa tax-xogħol u ta’ l-impjiegi għall-ħaddiema.

Iżda għall-UE il-kompetizzjoni u s-suq jiġu qabel u huma aqwa mix-xogħol tal-ħaddiema u mid-dinjità tagħhom.

Fenech Adami u Joe Borg, li jiftaħru li huma demokratiċi Insara, baxxew rashom għar-regoli tal-kompetizzjoni u tas-suq u nsew il-prinċipji soċjali Insara dwar id-dinjità tal-bniedem u d-dritt għax-xogħol.

Għamlu dan id-dnub għax poġġew l-UE qabel ħuthom il-ħaddiema Maltin li tilfu u se jitilfu l-impjieg u qabel ħuthom l-industrijalisti u l-imprendituri Maltin li tilfu u se jitilfu n-negozju tagħhom minħabba l-politika ħażina ta’ l-UE.

Fil-qagħda mwegħra li ninsabu fiha llum għandu jkollna l-kuraġġ li naraw xi żball kbir sar bil-ftehim ta’ sħubija ta’ Fenech Adami u Joe Borg. 

Għandu jkollna l-irġulija li mhux naċċettawh l-iżball, iżda nwegħdu li nagħmlu minn kollox ħalli nirrangawh billi ma nibqgħux marbutin bi ftehim li se jeqridna.

Minnu se jgawdu ftit, li bħal Joe Borg, se jaħtfu l-okkażjoni li toffrilhom l-Unjoni u jiġu jaqgħu u jqumu mill-eluf ta’ Maltin li se jġarrbu t-tbatijiet li l-UE se ġġibilna.

Id-Deputat Laburista Leo Brincat żvela fl-artiklu regolari tiegħu f’dan il-ġurnal (l-orizzont 12 ta’ Jannar) li waqt li delegazzjoni miż-żewġ naħat tal-Kamra tar-Rappreżentanti kienet qiegħda żżur lill-Monsinjur Arċisqof Ġużeppi Mercieca fl-okkażjoni tal-bdil ta’ xewqat għas-sena l-ġdida, l-Arċisqof għamel kumment dwar kif iqis is-sħubija fl-Unjoni Ewropea.

Skond Brincat, l-Arcisqof Mercieca qal li jqis is-sħubija bħal dak iż-żarbun li għall-ewwel tħossu skomdu f’riġlejk, sakemm joqgħod aktar għall-għamla tar-riġlejn. 

Brincat stqarr li sab dan il-kumment bħala “interessanti”.

Aħna tas-CNI ma naqblu xejn ma’ dak il-kumment ta’ l-Arċisqof. 

L-ewwelnett għax it-tixbiha ma treġix – għax min imur jixtri żarbun ġdid, jekk iħossu li hu skomdu meta jipprovah, mhux se jixtrih. 

It-tieninett, għax inħossu li jekk l-Arċisqof ħass jew xtaq jagħmel kumment dwar is-sħubija ta’ pajjiżna fl-Unjoni Ewropea, aktar messu ħataf l-okkażjoni biex iwassal it-tagħlim soċjali tal-Knisja dwar il-pjaga tal-qgħad li qegħdin jiffaċċjaw eluf ta’ ħaddiema Maltin u Għawdxin.

Inħossu li kien ikun aħjar kieku qal kif l-awtoritajiet tal-Knisja f’Malta jħarsu lejn il-fatt li l-UE ma tħallix lill-gvernijiet nazzjonali ta’ l-istati membri jgħinu b’diversi inċentivi u miżuri oħrajn kumpaniji li jkunu f’xi diffikultà li twassalhom biex jissensjaw lill-ħaddiema.

Jew kif l-awtoritajiet tal-Knisja jaħsbuha dwar il-projbizzjoni ta’ l-UE għal benefiċċji fiskali (dwar taxxi) biex jattiraw investiment ħalli jinħoloq ix-xogħol għal ħaddiema bla mpjieg.

Naħsbu li kien ikun aktar interessanti kieku ntqal x’inhi l-pożizzjoni tal-Knisja f’Malta dwar il-fatt li minħabba s-sħubija fl-Unjoni Ewropea, il-prezzijiet tal-proprjetà komplew splodew ’il fuq u qegħdin jagħmluha impossibbli għal koppji żgħażagħ Maltin li jsibu post ħalli jkunu jistgħu jieħdu l-istat tagħhom u jifformaw familja.

Fl-opinjoni tagħna kien aktar xieraq li Mons. Arċisqof tkellem f’dan is-sens, milli għamel kumment “politiku partiġġjan”, li wara kollox, assolutament ma jreġix!

Is-Sur Tony Zarb, Segretarju Ġenerali tal-General Workers’ Union, fit-Times tat-13 ta’ Jannar, 2004, qal hekk:

“Idejn il-Gvern issa huma tant marbutin bir-regoli ta’ l-Unjoni Ewropea, li lanqas jista’ jgħin kumpaniji li nixfulhom l-ordnijiet, anke kieku jixtieq jgħinhom.”

Dun Anġ Seychell, f’l-orizzont tat-8 ta’ Dicembru, 2003, kiteb hekk: 

“Eżatt kif qal Dr Simon Busuttil – ‘Jekk tikser il-proporzjonalità, taqa’ fl-illegalità’. U allura l-argument oriġinali jkun falz. X’jista’ jsir issa? Żewġ toroq hemm. It-tnejn trid tiddeċiedi dwarhom l-Unjoni Ewropea. Jew tfassal liġijiet għal pajjiżi zgħar ħafna jew direttivi għall-gżejjer żgħar, kemm jekk huma pajjiż, kif ukoll jekk huma parti minn pajjiż. Inkella twaqqaf id-dħul ta’ Malta fl-UE.”

Il-Ħamis, 22 ta’ Jannar, 2004

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ