MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Barroso ġie għal xejn

Mis-seduta tal-Parlament ma ħareġ xejn utli u ta’ sustanza.

Tlifna l-ħin u tlifna l-opportunità li nwasslu lill-President tal-Kummissjoni Ewropea kritika f’waqtha dwar n-nuqqasijiet ta’ l-Unjoni Ewropea u dwar il-politika tagħha li hija ta’ ħsara għall-poplu tagħna.

Issemma t-Trattat tal-Kostituzzjoni għall-Ewropa, miċħud mill-popli ta’ Franza u l-Olanda u approvat unanimament mir-rappreżentanti Parlamentari tagħna sentejn ilu.

Skond dawn m’għandux jinbidel ħafna u huma lesti biex jaqblu ma’ dak li se jsir minfloku, mingħajr ma jafu x’se jsir.

Għar-rappreżentanti Parlamentari tagħna l-Unjoni Ewropea tissaħħaħ jekk tiżdied l-integrazzjoni tal-pajjiżi membri.

M’għandhomx id-dehen jifhmu li għall-poplu Malti, biex ma jintradamx bħala poplu, għandha tikber il-koperazzjoni bejn il-pajjiżi ta’ l-Unjoni, mhux tiżdied l-integrazzjoni tagħhom.

Għax l-integrazzjoni politika, soċjali u ekonomika tagħna fl-Unjoni Ewropea tagħmilna belt żgħira fl-Unjoni u ma nibqgħux iktar nazzjon żgħir u stat ħieles.

Ir-rappreżentanti politiċi tagħna jaraw li l-poplu tagħna jinbela’ fil-miljuni ta’ l-Ewropa u jintradam bid-drawwiet tagħhom.

Iżda għal min hu ta’ fibra, aħjar il-pesta milli jitlef ġieħu ta’ Malti ħieles.

Ħadd ma fakkru li qabel ir-referendum żgurawna li l-ħaddiema se jkunu aħjar bis-sħubija.

* fil-waqt li eluf ta‘ ħaddiema barranin mill-Unjoni ġew jieħdu l-ħobż tal-Maltin.

Ħadd ma qal lil Barroso li bis-sħubija l-ħaddiema minflok għall-aħjar marru għall-agħar.

Setgħu almenu qalulu lil Barroso li l-pjan li l-Unjoni Ewropea kienet għamlet għat-Tarzna ma kienx tajjeb u hemm bżonn li nfasslu pjan ieħor li jsaħħaħ it-Tarzna, mhux li jdgħajjifha.

Għamlu ħażin ħafna li tawh x’jifhem li kollox sejjer tajjeb f’pajjiżna, minbarra l-immigrazzjoni illegali.

Għax b’dik l-impressjoni li ħa, ma jkunx lest ifiehem lil sħabu tal-Kummissjoni Ewropea jagħtuna l-għajnuna li hemm bżonn biex negħlbu d-diffikultajiet kbar li għandna ma’ wiċċna fis-snin li ġejjin, kollha frott tas-sħubija fl-Unjoni.

Politika żbaljata dwar l-immigranti illegali

IL-PROPOSTA tal-‘burden sharing’ ta’ l-immigranti illegali, jiġifieri li nqassmu l-immigranti illegali bejn il-pajjiżi kollha ta’ l-Unjoni Ewropea, skond id-daqs tal-popolazzjoni, mhux soluzzjoni għall-problema ta’ l-immigrazzjoni illegali.

Mhix soluzzjoni għax iktar jitħajru jiġu immigranti ladarba jkunu jafu li l-pajjiżi ta’ l-Unjoni se jeħduhom.

Soluzzjoni waħda hemm.

Jekk irridu nwaqqfu l-immigranti illegali, l-immigranti jridu jkunu jafu li se jintbagħtu lura minn fejn ġew.

Jekk jafu li żgur mhux se jitħallew joqogħdu fl-UE, ma jbaħħrux u jissograw ħajjithom għal xejn.

Dwar il-problema ta’ dawk l-immigranti illegali li ma jgħidux mnejn ġew, dawn għandhom ikunu jafu li se jibqgħu maqfulin sakemm jitkellmu.

Din il-linja iebsa ma’ l-immigranti illegali ma tfissirx li m’għandniex nagħmlu li nistgħu f’kull ħin biex niġbruhom mill-għarqa, nitimgħuhom u nieħdu ħsiebhom daqs li kienu Maltin.

Iżda xorta waħda nibagħtuhom lura għax pajjiżna ma jiflaħx jieħu immigranti.

L-immigranti illegali huma msejknin għax qegħdin jiġu sfruttati minn organizzaturi negozjanti u jeħdulhom flushom bil-wegħda li jwassluhom f’pajjiżi ta’ l-UE.

Jgħabbuhom fuq bċejjeċ tal-baħar mhux kapaċi għall-vjaġġi fil-maltemp u jsuquhom bit-tama li xi ħadd isalvahom jekk ikunu se jegħrqu, jew li jirnexxilhom jaslu fl-ewwel art ta’ l-Ewropa bil-moħbi ħalli ma jintbagħtux lura.

Ħafna minnhom jispiċċaw jitilfu ħajjithom, jew jitilfu lil qrabathom fil-vjaġġ.

Sar u qed isir ħafna diskors dwar rondi minn bastimenti tal-pajjiżi ta’ l-Unjoni Ewropea taħt il-‘‘Frontex” imwaqqfa biex tieħu ħsieb tikkontrolla l-ibħra tal-Mediterran.

Minbarra l-fatti li dawn ir-rondi ilhom ġejjin u qatt ma waslu, mhux magħruf jekk jiswewx biex iżommu l-immigranti illegali milli jiġu.

Għax jekk bastiment jilmaħ dgħajsa mgħobbija bl-immigranti u jgħidilha tmur lura u hija ma taċċettax tagħmel dan, x’se jagħmel il-bastiment tal-“Frontex”?

Ikollu jsalva lill-immigranti u jwassalhom fl-eqreb pajjiż minn fejn jiġborhom.

L-Unjoni Ewropea m’għandhiex politika tajba għall-problema ta’ l-immigranti illegali.

Ma tippermettix lil pajjiżna jimxi kif jidhirlu hu ma’ l-immigranti illegali, fl-istess ħin li mhux lesta terfa’ l-piż tagħhom, avolja taf li l-immigranti illegali riedu jmorru fil-pajjiżi kbar ta’ l-Unjoni, u ma kinitx ir-rieda tagħhom li jispiċċaw f’pajjiżna.

Sadanittant in-negozjanti li jorganizzaw il-vjaġġi ta’ l-immigranti iħaxxnu bwiethom bil-flus li jieħdulhom.

Ħafna oħrajn isibu ruħhom maqfulin għal xhur sħaħ imċaħħdin mill-ħelsien u minn qrabathom.

U din it-traġedja kollha tibqa’ sejra sena wara l-oħra għax m’għandniex il-kuraġġ nieqfu lill-UE.

Il-qalb xierfa ta’ l-Unjoni Ewropea

KIENU żgurawna li l- Unjoni Ewropea ma tindaħalx fit-taxxi li l-pajjiżi membri jagħmlu.

Mhux biss, iżda l-Unjoni tordna x’oġġetti u x’servizzi jkollhom il-VAT fuqhom.

L-Unjoni trid li kulħadd iħallas l-istess rata ta’ VAT, is-sinjur u l-fqir, fuq l-oġġetti li jixtru u s-servizzi li jingħataw.

Għax skond il-ġustizzja soċjali, min għandu l-mezzi jmissu jħallas taxxa aktar minn min huwa nieqes mill-mezzi.

Lanqas lill-morda, lil dawk li għandhom bżonnijiet speċjali u persuni b’diżabilità l-Unjoni ma taħfrilhomx milli jħallsu t-taxxa tal-VAT.

Prova tal-ħruxija tal-qalb ta’ l-Unjoni jagħtuhilna r-regolamenti ta’ l-Avviż Legali numru 123 ta’ din is-sena li l-Gvern ħareġ biex jobdi lill-Unjoni.

B’dawn ir-regolamenti l-Gvern daħħal it-taxxa ta’ VAT ta’ 5% fuq is-servizzi ta’ għajnuna domestika għall-kura tat-tfal żgħar, għall-kura tax-xjuħ, għall-kura tal-morda u għall-kura ta’ persuni b’diżabilità.

Il-poplu Malti, qabel ma sseħibna fl-Unjoni Ewropea, kien ħanin biżżejjed biex servizzi bħal dawn għat-tfal żgħar, għax-xjuħ, għall-morda u għall-persuni b’diżabilità, jagħtihom, mhux jintaxxahom, kif trid l-Unjoni.

M’għandniex noqogħdu għal din il-kefrija li ġejja mill-Unjoni Ewropea, u li tmur kontra t-twemmin soċjali tal-poplu Malti.

Il-poplu Malti jħaddan it-twemmin li lill-morda għandu jingħatalhom is-servizzi tal-kura fl-isptar b’xejn.

Bil-maqlub ta’ dan, l-Avviż Legali 123 ta’ din is-sena qed jimponi taxxa fuq is-servizz tal-kura tal-morda li tingħata fid-dar tagħhom.

Imissna nagħtu eżenzjoni mit-taxxa tad-dħul (income tax), mhux ninponu t-taxxa tal-VAT fuq l-ispiża ta’ l-għajnuna domestika għall-kura tal-morda f’darhom.

It-taxxa tal-VAT, għax hekk trid l-Unjoni Ewropea, titħallas minn persuni b’diżabilità fuq l-oġġetti li jixtru għalihom, bħalma huma ‘wheelchairs’ fost ħafna affarijiet oħrajn.

Tassew xierfa l-qalb ta’ l-Unjoni Ewropea biex tintaxxa dawn l-oġġetti meħtieġa minn persuni b’diżabilità.

L-Apostasija ta’ l-Unjoni Ewropea

SKOND l-aġenzija ta’ l-aħbarijiet Reuters, l-appoġġ popolari għall-Unjoni Ewropea fil-pajjiżi membri qiegħed dejjem jonqos, minħabba l-biża’ li l-Unjoni mhix qiegħda tħares lill-ħaddiema mill-effetti ħżiena tal-globalizzazzjoni u għax il-poplu qegħdin jaraw li qegħdin jitilfu l-identità nazzjonali u l-Unjoni qiegħda tindaħal iżżejjed fl-affarijiet nazzjonali tal-pajjiżi membri.

Skond stħarriġ magħmul mit-“think tank” Open Europe, fil-pajjiżi ta’ l-Unjoni li daħħlu l-Ewro, kważi nofs il-poplu jixtiequ li jerġgħu jkollhom il-munita nazzjonali li kellhom qabel l-Ewro.

Saħansitra l-Ġermaniżi, jidhru ċiniċi dwar il-burokrazija kbira ta’ l-Unjoni li tikkmanda ħajjithom minn Brussels.

Huma jiddejqu bil-kwantità kbira ta’ regolamenti li l-Unjoni tagħmel u bil-fatt li rappreżentanti li m’humiex magħżulin mill-poplu għandhom is-setgħa joħorġu dawn ir-regolamenti u spiss jagħmlu laqgħat bi spiża kbira li titħallas mit-taxxi tal-poplu, li fihom jingħad ħafna diskors iżda ftit li xejn jissarraf f’azzjonijiet konkreti.

Biċ-ċelebrazzjonijiet magħmula fil-50 anniversarju tat-Trattat ta’ Ruma, l-Unjoni riedet tqajjem appoġġ popolari akbar.

Iżda ftit jew xejn irnexxilha minkejja n-nefqa kbira li għamlet fil-propanganda.

Lanqas il-mexxejja tal-pajjiżi membri ma tqanqlu biżżejjed biex setgħu jintgħelbu d-diverġenzi ta’ bejniethom ħalli jiftehmu dwar dikjarazzjoni li huma kollha setgħu jiffirmaw.

In-nuqqas ta’ ftehim bejn il-mexxejja tal-pajiżi membri wassal biex id-Dikjarazzjoni ta’ Berlin fl-okkażjoni tal-50 anniversarju ta’ l-Unjoni tkun iffirmata mhux minnhom, iżda mill-President tal-Kunsill Ewropew, il-Kanċillier Ġermaniża Angela Merkel, mill-President tal-Kummissjoni Ewropea, Manuel Barroso u mill-President tal-Parlament Ewropew, Hans-Gert Pottering.

Sena ilu, Barroso kien stqarr li xtaq li d-Dikjarazzjoni ta’ Berlin tkun iffirmata mill-mexxejja tas-27 pajjiżi membri ta’ l-Unjoni.

Huwa kien qal li b’hekk setgħet tintwera r-rieda komuni tal-pajjiżi membri li riedu jaħdmu flimkien mal-Parlament Ewropew u mal-Kummissjoni Ewropea f’għaqda ta’ l-istituzzjonijiet kollha ta’ l-Unjoni.

Id-Dikjarazzjoni ta’ Berlin ma għoġbitx lanqas lill-Papa għax ma semmgħetx il-Kristjaneżmu fid-Dikjarazzjoni tagħha ta’ Berlin.

Il-Papa qal kif tista’ l-Unjoni tkun eqreb il-popli tagħha meta hija tiċħad parti essenzjali ta’ l-identità u ta’ l-istorja tagħha?

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.