MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Ikun sagrileġġ li ndgħajfu t-Tarzna

Is-CNI ssostni li l-aġir ir-responsabbli tal-Gvern dwar it-Tarzna qiegħed iqanqal ħafna suspetti u kritika.

Xi wħud jixlu lill-Gvern li ma jridx ġenwinament li t-Tarzna tkompli tiffunzjona, iżda fil-fatt irid li tagħlaq ħalli jkun jista’' jiddisponi mill-art u l-bini tagħha lil żviluppaturi għal spekulazzjoni kummerċjali.

Oħrajn jissuspettaw li l-Gvern diġà jaf lil min se jqassam partijiet differenti tat-Tarzna, u kemm se jħaddmu nies, u s-sejħa pubblika għal min għandu interess fit-Tarzna, huwa eżerċizzju falz.

Hemm kritiċi oħrajn iżda, li jgħidu li l-Gvern huwa mitluf, imħawwad u ma jafx kif se joħroġ mis-saram li ħoloq meta ntrabat mal-Unjoni Ewropea li wara l-aħħar ta’ din is-sena, ma jagħtix aktar għajnuna lit-Tarzna u li jipprivatizzaha.

Għalkemm ma hemmx qbil dwar l-intenzjonijiet veru tal-Gvern, il-kritiċi kollha jaqblu dwar punt wieħed: 

li l-Gvern mhux miexi sewwa f'din il-kwistjoni li mhix bħal każ ta’ għeluq ta’ fabbrika oħra, iżda hija, fil-ħsieb tal-poplu kollu, kwistjoni nazzjonali li jixirqilha sfroz nazzjonali ħalli tinstab soluzzjoni għaliha.

Is-CNI hija tal-fehma li ħafna dikjarazzjonijiet li l-Prim Ministru u l-Ministri għamlu dwar it-Tarzna, ma jgħinux ħalli jintlaħaq ftehim dwar il-ġejjieni tagħha.

Il-Prim Ministru qal li anke kieku t-Tarzna kienet tagħmel qligħ, xorta kien jipprivatizzaha, għax mhux xogħol il-Gvern li jmexxi t-Tarzna. 

Dan huwa raġunar żbaljat, għax investiment li jirrendi, il-Gvern m’għandux jitilfu. 

Jekk f'idejn il-privat it-Tarzna tista’ tirrendi aktar, il-Gvern m’għandux jgħaddiha lill-privat, iżda għandu jsieħeb miegħu lill-privat u jagħtih it-tmexxija tat-Tarzna, ħalli mit-tmexxija aħjar, l-investiment jirrendilu aktar (lill-Gvern u għalhekk lill-poplu).

Il-Prim Ministru qal ukoll li ma jarax għaliex il-Gvern għandu jkun l-’employer’ tal-ħaddiema tat-Tarzna. 

Dan huwa diskors bla sens, għax il-Gvern huwa l-ikbar ’employer’ direttament jew indirettament permezz tal-awtoritajiet, aġenziji u korporazzjonijiet ta’ eluf kbar ta’ impjegati, u ma tagħmillux differenza li ma’ dawk l-eluf kbar ta’ impjegati diretti jew indiretti tiegħu, ikun ukoll l-’employer’ indirett tal-1,700 ħaddiem tat-Tarzna.

L-akbar stonatura tal-Prim Ministru kienet dik meta sostna li m'għadux iż-żmien li l-Gvern jaħdem biex iġib xogħol għat-Tarzna. 

Il-Prim Ministru jmissu jirrealizza li xogħol għat-Tarzna ifisser esportazzjoni tas-servizzi tal-ħaddiema, u għalhekk, dħul ta’ ġid minn barra għal pajjiżna. 

Prim Ministri u Ministri ta’ pajjiżi kbar jagħmlu sforzi enormi ħalli jgħinu lill-industriji tagħhom ibiegħu l-prodotti u s-servizzi tagħhom lill-pajjiżi barranin, u għal dan il-għan jużaw il-kuntratti u l-mezzi diplomatiċi kollha tagħhom. 

Is-CNI temmen li gvern responsabbli Malti għandu d-dmir nazzjonali li jagħmel l-istess sforzi ħalli jgħin fl-esportazzjoni tal-prodotti u servizzi ta’ pajjiżna, fosthom, is-servizzi tat-tiswija u l-bini tal-vapuri u jotts li l-ħaddiema tat-Tarzna jagħtu.

Is-CNI tqis mill-aktar oġġezzjonabbli l-istqarrijiet tal-Ministru Tonio Fenech li qal li jekk ma jirtirawx volontarjament ma' l-elf ħaddiema tat-Tarzna, il-ħaddiema kollha, dawn jitilfu l-impjieg. 

Dawn l-istqarrijiet jixhdu nuqqas ta’ kuxjenza soċjali fil-Ministru Fenech, li jmissu jaf li huwa dmir ewlieni ta’ kull gvern li jagħmel kulma jista’ ħalli jħares l-impjiegi, u mhux li jeqridhom. 

Gvern responsabbli qatt ma jasal li jtellef l-impjieg ta’ 1,700 ħaddiem, meta l-pajjiż għandu bżonn li aktar ħaddiema jaħdmu, mhux li jieqfu mix-xogħol qabel iż-żmien. 

Wara kollox, żgur li l-Ministru Fenech ma jistax jgħid li l-ħaddiema tat-Tarzna qegħdin jaħdmu inqas milli jagħmlu l-Ministri u l-parti l-kbira tal-eluf ta’ impjegati diretti jew indiretti li l-Gvern iħallas mit-taxxi tal-poplu.

Lill-Ministru Fenech is-CNI tgħidlu li jekk jippersisti li jiddikjara t-Tarzna falluta minħabba li tagħmel telf, għaliex l-ewwel ma jiddikjarax li l-Gvern huwa fallut għax ilu mal-20 sena dejjem jagħmel telf ta’ miljuni kbar kull sena?

Is-CNI taċċetta ħaġa waħda li l-Gvern qal, dik li hawn ‘boom’ tat-tiswija u l-bini tal-vapuri u tal-jotts.

Għalhekk ikun sagrileġġ li l-poplu Malti ma jaħfirx, jekk minflok nisfruttaw il-‘boom’ li hawn fix-xogħol tat-tarznari, jittieħdu passi li jdgħajfu, jew agħar, jeqirdu l-assi nazzjonali tat-Tarzna ta’ Malta.

L-Erbgħa, 20 ta’ Awissu, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ