MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!
Fis-seba’ snin 2007 – 2013 il-Maltin u l-Għawdxin se jkunu ħallsu lill-Unjoni Ewropea €420,000,000
Qassmu
l-ħelu biex itaffu l-morr!
Fost l-attivitajiet, skond il-programm uffiċjali, kellu jsir marċ mill-banda tal-pulizija akkumpanjata minn studenti jġorru l-bnadar ta' l-Unjoni Ewropea.
Kellna
wkoll dibattitu bejn xi 400 student dwar il-futur ta' l-UE. U anki l-qsim
tal-kejk ta' l-UE!
Tafu min qasam il-kejk? Minbarra l-Ambaxxatriċi Awstrijaka, kien hemm il-Ministru Michael Frendo u Joanna
Drake, li llum hija l-Kap tar-Rappreżentanza
tal-Kummissjoni Ewropea f'Malta.
Niftakru tajjeb ħafna lil Joanna Drake tħambaq li s-sħubija fl-UE
"kienet għalina u għal uliedna".
Kellha mitt elf raġun tgħid hekk.
Lilha u lil uliedha żgur li s-sħubija ġabitilha ħafna ġid.
U biex tikkonfermalna dan, rajniha taqsam
il-kejk ta’ l-Ewropa li hi tant qiegħda tiekol minnu!
Fl-istess jum, bħala parti mill-attivitajiet li organizzat il-Presidenza
ta' l-UE (l-Awstrija), tqassam fl-istati kollha ta' l-UE il-ġurnal Ġermaniz
Frankfurter Allgemaine Zeitung.
Għal din l-okkażjoni ta'
Jum l-Ewropa kien hemm artikli dwar kull stat ta' l-UE, fosthom dwar Malta.
Huwa tal-mistħija li f'dan l-artiklu, sar attakk viljakk mill-artikolista
fuq il-Partit Laburista Malti fejn Heinz-Joachim Fischer wasal biex kiteb li
l-Partit Laburista rebaħ l-elezzjoni fl-1996 bis-saħħa ta'
kampanja bbażata fuq propaganda kontra "l-bhima
tat-tramuntana"
(kien qed jirreferi għall-UE)!
Ara fejn qatt it-tmexxija ta’ l-MLP iddeskriviet l-UE bħala
"bhima"!
Kien biss jingħad li jekk
ir-regolamenti ta' l-UE kienu tajbin u jgħoddu għall-pajjiżi
l-kbar ta' l-UE, għalina dawn ma kinux jgħoddu.
Ara kieku dak l-artikolist kiteb li l-elezzjoni ta' l-2003 il-PN rebaħha
bl-indhil dirett sfaċċat ta' l-UE.
U bl-ingann tal-Gvern Nazzjonalista, mgħejjun mill-MIC, almenu kien ikun kiteb fatt li seħħ.
U mhux gidba faħxija!
Tgħid il-Partit Laburista se jirreaġixxi għal dak l-insult f'jum
li fih suppost l-UE kienet qiegħda tiċċelebra jum storiku li
suppost "jgħaqqad" u mhux ikompli jifred, bħalma għamel
Heinz-Joachim Fischer?
Il-verità
dwar “l-abjad” u “l-iswed”
IL-ĦABIB tagħna Anton Cassar irrisponda għal kitba tagħna f'din il-paġna:
"Għalina l-abjad "abjad" u l-iswed "iswed" (13 ta' Mejju).
Il-ħabib tagħna reġa' rrepeta li "r-regoli ta' l-UE, fihom infushom m'humiex ħżiena", u l-uniku ħaġa ħażina li jara hu "li ma konniex ippreparati".
Qal ukoll: "U dan qaluh ukoll il-mexxejja
Laburisti…"
Aħna fakkarnih x'kienu qalu l-mexxejja Laburisti.
Per eżempju:
"Alla hares qatt nidħlu fl-UE";
"Jekk nidħlu fl-UE nkunu pajjiż maħkum";
"Uliedna jgħidulna grazzi jekk nagħtuhom pajjiż ħieles b'rajh f'idejh", eċċ.
Anton Cassar ma kitibx hux veru jew le li t-tmexxija Laburista kienu qalu dan id-diskors.
Naturalment jaf li jekk jammetti li kienu qalu dan
il-kliem kien iwaqqa’ kompletament l-argument tiegħu li "r-regoli
ta' l-UE m'humiex ħżiena, iżda li aħna ma konniex
ippreparati".
Illum infakkruh fi kliem ieħor li kienu jgħidu:
"Iridu jlibbsuna ġlekk li ma jiġiniex";
"Jekk ċertu regoli huma tajbin għall-pajjiżi kbar ta' l-UE, għalina m'humiex".
Naħsbu li m'hemmx għalfejn inkomplu għax
ċerti li l-ħabib tagħna jaf b'dawn il-kwotazzjonijiet li semmejna
u ħafna aktar ukoll.
Huwa fis-sens biss li kkwotajna aħna hawn fuq:
"Jekk ċertu regoli huma tajbin għall-pajjiżi l-kbar …",
li t-tmexxija Laburista kienet issemmi li r-regoli ta' l-UE jistgħu jkunu tajbin għall-pajjiżi l-kbar iżda mhux għalina!
Mhux kif qed jagħti l-impressjoni Anton Cassar!
Jekk fi ħsiebu jerġa' jikteb nistednuh imeri xi waħda mill-kwotazzjonijiet li ktibna.
Nerġgħu nirrepetu wkoll li mhux veru li "l-poplu għażel" kif reġa' kiteb.
L-aħħar darba kien qal li l-poplu kien "imqarraq".
Din id-darba il-kelma "imqarraq" ma reġax kitibha.
Tgħid għaliex?
Li "l-poplu ġie ngannat" mhux aħna tas-CNI biss għidniha
iżda qaluha wkoll il-mexxejja Laburisti!
U kellhom mitt elf raġun!
Kif tista' qatt tgħid li poplu li ġie mqarraq "għażel"?
Tkun verament qed "tagħżel" meta tkun ħieles biex taghżel.
U meta jkollok l-informazzjoni kollha – kemm dik bajda u kemm dik sewda – dwar l-UE.
U mhux dik "bajda" biss kif kien għamel
il-Gvern Nazzjonalista.
Aħna nafu li l-partiti kollha llum ħadd minnhom mhu qed jgħid li jridu li Malta toħroġ mill-UE.
Li jridu lil Malta toħroġ mill-UE qegħdin
jgħiduh eluf kbar ta' Maltin u Għawdxin kif irriżulta mill-aħħar
stħarriġ ta' l-opinjoni pubblika li għamel il-ġurnal
MaltaToday!
Aħna nafu li l-politiċi spiss jaġixxu mhux skond dak li jkun irid
il-poplu iżda skond kif jaħsbu li jista' jivvantaġġja
lill-partit tagħhom ħalli jiksbu l-poter.
L-għan tas-CNI mhux li nikkonvinċu relattivament ftit politiċi (però li għandhom f'idejhom setgħa enormi), iżda li nkomplu nikkonvinċu lill-eluf dejjem akbar ta' Maltin u Għawdxin, li t-triq fl-UE m’hi se twassalna mkien!
Iż-żmien jagħtina parir!
Dwar li "ma konniex ippreparati", nistiednu jistaqsi x'ġara lid-diretturi ta' Simonds Farsons Cisk, li ftit ilu ħabbru li tilfu Lm400,000 s-sena l-oħra minħabba l-kompetizzjoni li kellhom mill-UE.
U dawn kienu qalu li huma ppreparati.
U kienu favur is-sħubija!
Nistaqsu
aħna wkoll
IL-KAP ta' l-Oppożizzjoni għamel mistoqsija interessanti ħafna lill-ministru li jħobb "jilgħab il-flus", Dr Austin Gatt.
Dr Sant staqsa jekk hux veru li l-proġett ta' Smart
City, minbarra li se jkun jinkludi fih proġett ta' lukanda, se jsir ukoll
żvilupp ta' appartamenti lussużi f'żona mill-aqwa mal-kosta?
Jekk verament se jsir hekk u Tecom Investments jibnu dawn l-appartamenti lussużi
faċċata tal-baħar il-profitti li jistgħu jagħmlu
bil-prezzijiet tal-bini kif inhuma llum u kif jistgħu jsiru aktar ’il
quddiem, faċli li, jekk mhux l-investiment kollu li suppost se jagħmlu
– ta' Lm110 miljun – almenu parti sewwa minnu iġibuh lura mill-bejgħ
ta' l-appartamenti!
Wisq nibżgħu li d-deċiżjoni li Tecom Investments jigu
jinvestu f'Malta ma kellu xejn x'jaqsam mas-sħubija ta' Malta fl-UE iżda
għax kienu se jingħataw art f'pożizzjoni mill-aqwa li setgħu
jisfruttaw b'mod li jħalli profitt enormi għalihom.
U jidher ukoll li kienu kważi ċerti li se jirbħu t-tender għall-Maltacom bi prezz favorevoli għalihom.
Fil-fatt issa nafu uffiċjalment li l-isħma
tal-Gvern se jgħaddu f'idejn Tecom Investments bi prezz ta' 40 ċentezmu
kull sehem inqas mill-prezz li ġiebu l-ishma tal-Maltacom fl-istess jum li
ħarġet l-ahbar b'mod uffiċjali!
Ma nistgħux nifhmu għaliex il-Gvern Malti stess, li għandu
artijiet f'postijiet hekk tajbin għall-iżvilupp ta' appartamenti lussużi,
ma jagħmilx l-iżvilupp hu stess flok li l-art tingħata
lill-privat, ħalli l-profitti kbar imorru fil-but tal-Gvern stess flok fi
bwiet ftit nies li huma diġà sinjuruni.
U agħar minn hekk, meta l-qligħ imur fi bwiet
ta' żviluppaturi jew spekulaturi barranin!
Kieku jagħmel hekk, il-qligħ kbir ta' miljuni ta' liri l-Gvern ikun
jista' jużahom għall-ġid tal-poplu.
Per eżempju, billi jiffinanzja bini ta' appartamenti bħala akkomodazzjoni soċjali għal dawk il-ħafna familji u individwi li qegħdin jispiċċaw bla post fejn joqogħdu.
U n-numru ta' dawn mistenni li jiżdied bil-bosta fil-futur.
Għax
flok il-poplu Malti daħħluh fl-art imwegħda, daħħluh
f'nassa!
Mid-dehra l-esperjenza ta' kif l-HSBC ħadulna minn ħalqna l-aqwa bank
li kellna bil-karawett, ma swiet għal xejn.
L-istorja tidher li qed tirrepeti ruħha!
Jum L-Ewropa
Jum l-Ewropa fid-9 ta’ Mejju ċċelebraw
Biex itaffu l-imrar tas-sħubija, sa l-ħelu taw!
F’għajnejn il-poplu tefgħu xi ftit bżar,
Ħasbu li l-Maltin kollha għadhom tfal żgħar!
Subgħajna dritt!
Kultant ikun hemm mn jikkritikana,
Għax għal xi raġuni, ma jkunux jaqblu magħna.
Forsi għax aħna ma nagħmlu xejn għall-profitt,
Għax konna, għadna u se nibqgħu subgħajna dritt!
Is-Sibt, 20 ta’ Mejju, 2006.
e-mail: cnimalta at yahoo.co.uk
IRRIDU L'INDIPENDENZA MILL-UNJONI EWROPEA
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat €5 flimkien ma' din il-formola lis-
Segretarju Finanzjarju CNI,
60A, Triq id-Dejqa,
Valletta
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ