MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Mhux minnu li ma nistgħux noħorġu mill-Unjoni Ewropea.

Araw dan il-video tal-Parlament Ewropew kif nistgħu noħorġu

It-traffikar tal-immigranti illegali għandu jitqies li huwa delitt bħat-traffikar tad-droga.

Bil-politika tagħha l-Unjoni Ewropea qiegħda tgħin lit-traffikanti kriminali tal-immigranti illegali jagħmlu l-flus minn fuq it-tbatijiet tal-immigranti.

Kull pajjiż ċivilizzat iżomm id-dritt li jikkontrolla min jidħol fil-pajjiż.

Pajjiżi li l-aktar jippretendu li huma avvanzati 

* bħall-Istati Uniti u l-Ingilterra,                      

* saħansitra jesiġu li persuni minn ċerti pajjiżi

* jrid ikollhom visa biex jaċċettawhom,           

* u visa ma tingħatax lil kulħadd li jitlobha,    

* u min jinstab bla permess fil-pajjiż,               

* jintbagħat il-ħabs u wara jitkeċċa mill-pajjiż.

La darba hu aċċettat minn kulħadd li pajjiż għandu dritt jikkontrolla min jidħol fil-pajjiż m’għandhiex tinstab oġġezzjoni li dan il-prinċipju japplika wkoll fir-rigward ta’ immigranti illegali.

Pajjiż għandu dritt ma jaċċettahomx bħalma għandu dritt li ma joħroġx visa lil min ikun ġej minn ċerti pajjiżi.

Nagħmlu żball meta nħalltu d-dmir li nagħtu għajnuna lil min ikun fil-periklu li jegħreq, li ma nħalluhx jidħol u joqgħod fil-pajjiż.

Li nsalvawh huma obbligu tagħna, iżda li naċċettawh joqgħod f’pajjiżna mhux.

Persuna li ma jkollhiex visa, għalkemm tħallas biex tiġi b’vapur tal-passiġieri ma titħallhiex toqgħod hawn.

Jekk din il-persuna minflok b’vapur tal-passiġġieri tinġieb b’lanċa tal-Forzi Armati ta’ Malta li jiġbruhom f’nofs il-baħar, xorta waħda m’għandhiex dritt tibqa’ toqgħod hawn.

Fiż-żewġ każi għandna dritt nġagħluha tħalli l-pajjiż, għax fiż-żewġ każi il-persuna tkun qiegħda tikser il-liġi tal-pajjiż.

Dan ir-raġunar li kien jgħodd għal kull pajjiż ċivilizzat, ma baqgħax jgħodd għall-Unjoni Ewropea li ħawwdet il-kunċett ta’ refuġjat li jfittex azil u politiku mal-każ tat-traffikar ta’ immigrazzjoni illegali li jfittex gwadan ekonomiku.

L-Unjoni Ewropea qatgħet li pajjiż membru tagħha għandu l-obbligu li jżomm fil-pajjiż immigranti illegali li jaslu jew jinġiebu fil-pajjiż.

L-Unjoni Ewropea ġġiegħel lil pajjiż membru li jara jekk l-immigranti illegali għandhomx jitqiesu bħala refuġjati, u jekk m’għandhomx, jekk għandhomx jingħataw protezzjoni umanitarja.

Fiż-żewġ każi l-pajjiż ikun obbligat li jħalli l-immigranti illegali joqgħodu fil-pajjiż.

Bil-politika tagħha dwar l-immigranti illegali, l-UE ħolqot in-negozju tat-traffikar kriminali tal-immigranti illegali.

It-traffikanti tal-immigranti qegħdin jagħmlu flejjes kbar minn fuqhom, u agħar minn hekk, qegħdin jesponu lill-immigranti għal periklu imminenti li jegħrqu għax f’ħafna każi mhux qegħdin jipprovdulhom mezzi ta’ trasport li jifilħu għall-vjaġġ bil-baħar jekk ikun imqalleb.

L-Unjoni Ewropea taf b’dan it-traffikar kriminali ta’ immigranti illegali, iżda ma jimpurtahiex mit-tbatija umana u lanqas mill-mewt ta’ ħafna mill-immigranti.

L-Unjoni Ewropea ma tirdx li l-immigrazzjoni illegali tieqaf, peress li ħafna mill-pajjiżi tagħha għandhom bżonn kbir ta’ demm ġdid ħalli jintela l-vojt tal-popolazzjoni li qiegħda tonqos u biex tikber l-ekonomija tal-pajjiżi.

F’pajjiżna qabel ma dħalna fl-Unjoni Ewropea kull partit politiku kien jaqbel li l-barranin ma jitħallewx jiġu joqgħodu u jaħdmu hawn, jekk għandna Maltin li jistgħu jagħmlu x-xogħol tal-barranin.

Ħadd f’pajjiżna ma kien joħlom li naċċettaw immigranti.

L-Unjoni Ewropea ġagħlitna nibdlu l-politika tagħna dwar l-immigranti u ma ridetx tħalli pajjiżna jissieħeb fl-Unjoni Ewropea jekk ma naċċettaw li l-immigranti illegali jibqgħu f’pajjiżna.

L-UE ma jimpurtahiex mill-kobor tal-popolazzjoni fiċ-ċokon ta’ pajjiżna u li għandna nuqqas ta’ xogħol għal eluf ta’ Maltin u Għawdxin, u li l-mezzi finanzjarji u s-servizzi soċjali tal-pajjiż ma jifilħux għall-infieq meħtieġ biex jinżammu eluf ta’ immigranti barranin.

Bl-akbar oxxenità l-Unjoni Ewropea filwaqt li ġġegħlna nżommu l-eluf ta’ immigranti illegali joqgħodu f’pajjiżna, ma tippermettilniex li nħalluhom imorru fejn iridu fil-pajjiżi l-kbar li jifformaw parti mill-Unjoni Ewropea.

Il-politiċi Maltin                                                                    

* li huma servili għall-Unjoni Ewropea,                              

* jaċċettaw il-politika tagħha dwar l-immigrazzjoni illegali

* bi ħsara kbira tal-interessi nazzjonali tal-poplu tagħna.  

X’inhi l-akbar ħtieġa li l-poplu Malti għandu llum?

It-tweġiba kien taha l-Perit Mintoff    

* meta fl-aħħar tal-Appell tat-twaqqif

* tal-“Front Maltin Inqumu”,             

* qabel ir-referendum tal-2003,          

* għajjat “Malta jeħtiġilha tqum”.     

B’sogħba jkollna nistqarru li l-poplu Malti ma qamx fl-2003, u llum, għadu ma qamx mit-telqa li ħakmitu.

Għalhekk inħossu li llum jixraq aktar minn qabel, li ntennu l-fehma ta’ Mintoff meta qal “Malta jeħtiġilha tqum”.

Fl-Appell tal-Front “Maltin Inqumu" Mintoff kien qal,

“…fir-rabtiet tagħna mal-UE rridu nassiguraw li l-ħidma tagħna għall-paċi tibqa’ bla mittiefsa. Għandna nagħmlu aktar minn hekk. Aħna nemmnu li anki l-UE jeħtiġilha l-paċi.”

Wara li qal dawn il-kliem, Mintoff għamel stqarrija importanti ħafna fej qal,

“jekk l-UE tasal biex tħaddan politika ta’ paċi billi tiċħad għal dejjem il-gwerra, għandna nkunu lesti naqsmu magħha dik il-parti tas-sovranita’ biex jintlaħaq l-għan komuni tagġna tal-paċi”.

B’sogħba ngħidu li l-UE ma tidhirx li hi lesta tiċħad għal dejjem il-gwerra.

Għalhekk aħna m’għandniex naqsmu magħha parti mis-sovranita’ tagħna.

Aktar u aktar m’għandniex aħna nħaddnu l-politika barranija komuni tal-UE, li mhix bħall-politika tagħna ta’ newtralita’ u paċi.

Fl-appell tal-Front “Maltin Inqumu” Mintoff kien qal ukoll li barra l-għan tal-ħarsien tal-paċi

“għandna għan kbir ieħor li nħarsu x-xogħol f’pajjiżna u li nkattru l-mezzi għal-ħolqien tal-ġid għall-poplu tagħna. Għalhekk irridu nfehmu lill-UE li ma għandhiex ixxekkilna b’regoli li jnaqqsu x-xogħol f’pajjiżna u li ma jgħinuniex biex nikbru ekonomikament.”

Sfortunatament l-UE ma fehmitx din it-twissija li m’għandniex bir-regoli tagħha ixxekklilna x-xogħol.

Hi nsistiet li napplikaw ir-regoli tagħha                     

* li tellfuna ħafna mix-xogħol li pajjiżna kellu qabel,

* u għalhekk kellhom jagħlqu ħafna fabbriki,           

* naqqasna l-esportazzjoni minn pajjiżna,                  

* u eluf ta’ ħaddiema tilfu l-impjieg tagħhom,           

* fosthom l-1,700 ħaddiem tat-Tarzna.                      

Għalhekk l-UE rażżnitilna għan kbir ieħor li nħarsu l-paċi.

Fl-appell tal-Front “Maltin Inqumu” Mintoff, bħal ma dejjem għamel, ma beżgħax jgħid lill-poplu x’kellu jagħmel.

“Lill-poplu nħidulu li biex nilħqu l-għanijiet tagħna, jeħtiġilna naħdmu aktar, b’għaqal iżjed, b’aktar onesta’ u b’sagrifiċċju akbar. Irridu nkunu lesti nagħmlu kull ma hemm bżonn biex l-ewwel inwasqqfu t-tkabbir tad-dejn nazzjonali, imbagħad neqirdu għal kollox id-dejn li jkisser lil pajjiżna.”

B’sens ta’ diżappunt kbir ikollna nistqarru li ma ħdimniex aktar u ma wrejniex aktar għaqal u żgur ma mxejniex b’aktar onesta’ fl-aħħar seba’ snin.

Is-sagrifiċċji kellhom isiru mis-setturi tal-poplu ż-żgħir,        

* il-ħaddiem,                                                                            

* il-pensjonant,                                                                        

* li kellna nippretendu lanqas minnhom,                                

* filwaqt li s-setturi tal-poplu li jmisshom għamlu sagrifiċċji,

* komplew jiffangaw u jistagħnaw.                                         

Għalhekk ma lħaqniex l-għanijiet tagħna bħala pajjiż u morna lura fil-ħarsien tax-xogħol u fil-ħarsien tal-valuri morali.

Lanqas ma rnexxilna nwaqqfu t-tkabbir tad-dejn nazzjonali, għax kull sena kabbarnieh, biex illum skorra l-€4 biljuni, u ħadd mill-politiċi tagħna m’għandu l-kuraġġ jgħid li se jaħdem biex innaqqsuh billi nagħmlu s-sagrifiċċji li hemm bżonn.

Illum aktar minn qatt qabel Malta jeħtiġilha tqum.

Matul il-kampanja tar-referendum għad-dħul ta’ Malta fl-Unjoni Ewropea, tgħidx kemm qalulna li se jiġu fondi mill-Unjoni.

Konna qisna ħafna boloh ngħoddu kemm se nieħdu flus lill-UE kull sena ħlief tas-CNI.

Għadda ż-żmien u tar, u ta raġun lis-CNI, għaliex il-fondi li qegħdin nieħdu mill-UE ġejjin mill-flus tagħna stess li kull sena noħorġu bħala s-sehem tagħna li jkollna nħallsu lill-UE.

Qabel ir-referendum tal-2003,

* mal-propagandisti Maltin favur is-sħubija fl-UE,

* kienu ingħaqdu barranin prominenti,

* bħall-President tal-Kummissjoni Ewropea,

* Romano Prodi,

* u l-Kummissarju Gunther Verheugen,

* li żgurawna li se nieħdu ħafna flus

* jekk nidħlu fl-Unjoni Ewropea.

Il-Ministru tal-Affarijiet Barranin ta’ dak iż-żmien, Guido Demarco sa qal li se niksbu mitt miljun lira Maltija fis-sena mill-UE.

Illum dawn ma jipurtahomx kemm aħna l-Maltin indaħħlu jew noħorġu minħabba l-UE, għax aħna m’għadx għandna l-ħtieġa ta’ “baby walker” aktar.

Issa qegħdin nisimgħu stejjer dwar telf tal-fondi mill-UE,                     

* ħames mitt ewro intilfu mill-istudenti li jmorru jistudjaw barra,        

* u sitt mitt elf ewro intilfu mill-Korporazzjoni tal-Impjiegi u t-Taħriġ,

* u nisimgħu dwar qerq fil-ħlas tas-sussidji,                                          

* bħal dawk tal-ħames mitt elf ewro li ssemmew fil-qasam tal-biedja. 

Ma’ dawn rridu niftakru fil-mijiet ta’ ewro li kellna nħallsu f’multi lill-UE għal nuqqus ta’ ħarsien tar-regolamenti tagħna.

L-UE ma tibgħatilniex ċekk bil-posta bħalma l-pensjonanti jirċievu ċ-ċekk tal-pensjoni bil-posta.

Jidher li biex nieħdu l-fondi u biex ma neħlux multi għax ma nħarsux xi regolamenti tagħha, irridu nagħmlu ħafna xogħol, ħafna milli ta’ formoli li jrid isir b’mod preċiż u eżatt u mhux addoċċ “suq ħa mmorru” jew “ħaffu ħalli neħilsu”.

Issa qegħdin naraw li kellhom raġun                                                

* dawk li qabel ir-referendum tal-2003                                              

* kienu jwissu li m’aħniex armati biex nidħlu fl-UE                        

* u biex niksbu l-fondi tagħha,                                                         

* għax m’għandniex għadd biżżejjed ta’ persuni mħarrġin             

* biex ilaħħqu max-xogħol li l-UE trid li jsir fiż-żmien fiss li tagħti.

Imma ma smajniex minnhom, mhux għax konna torox iżda għax ma riduniex nisimgħu.

Jekk biex niksbu l-fondi mill-UE għandna ħafna diffikultajiet, m’hemm ebda diffikultà biex inħallsu s-sehem tagħna lill-UE.

Is-sehem ta’ Malta jiġi kkalkolat bil-quddiem fil-bagit li l-Ministru tal-Finanzi jip­preżenta fl-aħħar tas-sena.

Għal din is-sena s-sehem li se nħallsu lill-UE hu ta’ €66 miljun u dan jitħallas billi kull xahar bil-quddiem il-Gvern Malti jibgħat iċ-ċekk lill-UE.

Filwaqt li l-UE tibgħat il-fondi tagħha żmien wara li jsiru l-proġetti, pajjiżna jibgħat sehmu lill-UE kull xahar bil-quddiem.

M’hemmx diffikultajiet fil-ħlasijiet tagħna lill-UE bħalma hemm fil-ħlas tal-fondi tal-UE lilna.

Naħseb li sakemm nibqgħu fl-UE, ikun f’waqtu li jkollna Ministru direttament responsabbli mill-fondi kollha tal-UE biex jiżgura li ma jintilfux u li nħarsu sew ir-regolamenti tal-UE biex nevitaw li neħlu l-multi.

Ma jaqbilx li nibqgħu nħawwdu u ngħaddsu u bl-ineffiċjenza tagħna nitilfu l-flus jew inħallsu l-flus.

Qisna dħalna fi gwerra mingħajr m’aħna armati bl-armamenti għaliha.

B’Ministru responsabbli mill-fondi kollha tal-UE,                      

* jiġu evitati l-iskandli li kellna fil-Ministeru tal-Edukazzjoni,

* fil-Korporazzjoni tal-Impjiegi u t-Taħriġ,                               

* fil-qasam tal-biedja,                                                                

* fil-proġetti infrastrutturali li ma tlestewx fil-ħin,                   

* u fin-nuqqas ta’ tagħrif li obbligati nagħtu lill-UE.                

Hu dmir tagħna li nħarsu l-interessi nazzjonali qabel l-interessi tal-individwi, u l-interessi nazzjonali jitolbu li l-Ministri kollha jċedu t-tmexxija tal-fondi tal-UE lil Ministru wieħed li jkun direttament inkarigat mill-fondi kollha li għandna dritt għalihom mill-UE.

Il-Ħamis, 19 ta’ Awwissu, 2010

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ