MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
Mill-Kampanja Ħelsien Nazzjonali CNI
JEKK TIRRISPETTA L-KOSTITUZZJONI TA' PAJJIŻEK GĦID LID-DEPUTAT PARLAMENTARI TIEGĦEK JIRRISPETTA L-FEHMIET TIEGĦEK U MA JIVVOTAX FAVUR IL-KOSTITUZZJONI TA' L-UNJONI EWROPEA LI TKASBAR IL-KOSTITUZZJONI TA' MALTA.
GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!
Fis-seba’ snin 2007 – 2013 il-Maltin u l-Għawdxin se jkunu ħallsu lill-Unjoni Ewropea €360,000,000
Is-sħubija fl-UE għamlitilna ħsara kbira
Ħafna minn dawk li ngħaqdu flimkien biex jgħidu ‘IVA’ għall-ftehim tas-sħubija fl-Unjoni Ewropea li l-Gvern Malti għamel is-sena l-oħra, qegħdin illum jintebħu li r-rebħa li għamlu kienet rebħa ta’ Pirru (Phyric victory).
Jiġifieri, kienet rebħa tal-mument, iżda l-poplu Malti ma
rebaħ xejn minnha, anzi tilef.
Il-poplu Malti tilef finanzjarjament għax bis-sħubija fl-Unjoni mbarka
bi spejjeż fenomenali li ma nifilħux għalihom.
Biżżejjed insemmu kemm jeħtieġilna mpjegati fl-ambaxxata Maltija fl-UE.
Se jkollna ’l fuq minn 50 ruħ li jgħixu fi Brussels, li jqumulna ’l fuq minn miljun lira Maltin fis-sena.
Dawn il-miljun lira u fuqhom se joħorġu mill-ekonomija Maltija u jintefqu fil-Belġju.
Eżempju ieħor ta’ l-ispejjeż fenomenali li se jbażwruna huma l-ispejjeż kbar ta’ numru kbir ta’ passaġġi bl-ajru ta’ politiċi u mpjegati pubbliċi li l-ħin kollu sejrin lejn Brussels u ġejjin lura lejn Malta.
Ħsara lill-ekonomija
L-EKONOMIJA Maltija ntlaqtet ħażin bil-ftehim ta’ sħubija fl-UE.
* Bil-ftehim, kibret l-importazzjoni f’Malta u naqas il-bejgħ tal-prodotti maħdumin f’Malta.
* Żdiedu s-servizzi mogħtijin f’Malta mill-barranin minflok dawk
li kienu jingħataw mill-Maltin.
* Kibru l-ispejjeż tal-manifattura u tas-servizzi f’Malta u b’hekk
naqsitilna l-kompetittività.
* L-investiment barrani li joħloq ix-xogħol ġdid ma kibirx.
* Ix-xogħol ma żdiedx,
* l-impjiegi anzi naqsu u
* l-qgħad għola,
* it-taxxi ndiretti (bħall-VAT u l-Eco-Tax) żdiedu u
* għollew il-ħajja.
*
Is-sħubija fl-UE faqqritna politikament.
* Fl-oqsma kollha ċivili li l-Unjoni għandha setgħa fuqhom, id-deċiżjoni politika m’għadhiex f’idejn il-maġġoranza tar-rappreżentanti maħturin fil-Parlament Malti, iżda għaddiet f‘idejn il-maġġoranza tar-rappreżentanti tal-pajjiżi kollha membri fl-UE.
* Il-politika tar-relazzjonijiet tagħna mal-pajjiżi barranin ma bqajniex nagħmluha aħna, iżda tiddeċidiha l-UE.
* Il-poplu tagħna m’għadux sovran kemm kien.
* Pajjiżna m’għadux indipendenti u ħieles.
Jiddgħajjef in-nazzjon
ANKI fil-qasam amministrattiv morna lura bis-sħubija fl-U E.
Ir-regoli ta’ l-Unjoni żiedu l-burokrazija u l-eluf ta’ regolamenti ta’ l-Unjoni taqqlulna t-tmexxija tal-pajjiż.
Kibret l-ispiża tat-tmexxija amministrattiva u żdiedu l-ispejjeż
biex jitħarsu r-ruxxmata regolamenti ġodda u biex nistgħu nimxu
skond ir-regoli ta’ l-Unjoni.
Agħar minn kollox, is-sħubija fl-UE qiegħda ddgħajjef
lill-poplu Malti bħala nazzjoni żgħir, iżda mogħni bil-ħwejjeġ
kollha li jagħmlu nazzjon.
Minflok nazzjon, pajjiżna se jispiċċa jsir belt żgħira f’wieħed mir-reġjuni ta’ l-UE.
Malta, flok gżira nazzjon, issir belt f’reġjun, maħkuma mill-gdid mill-mentalità kolonjali li fl-imgħoddi żammet lill-poplu Malti kuntent li jitmexxa mill-barrani, għax kien nieqes mill-kuraġġ u l-kburija li bil-ħila tiegħu u bla biża’ jofroq il-ġejjieni mhux magħruf.
Bżonn ta’ mexxejja qalbiena
QABEL ma l-poplu Malti kiseb l-indipendenza u l-ħelsien,
il-mexxejja politiċi tagħna kienu jitkejlu b’kemm kienu kapaċi
jiġġieldu ħalli jfehmu lill-poplu l-ħtieġa li jqum fuq
saqajh, jirbaħ il-biża’, jieħu d-destin tiegħu f’idejh u
jissagrifika ruħu ħalli jikseb il-ġieħ ta’ poplu nazzjon.
Is-sħubija fl-UE qerdet il-fiduċja tal-poplu Malti fil-ħila tiegħu
li jmexxi lil pajjiżu aħjar mill-barranin u kkundizzjonat l-imħuħ
taż-żgħażagħ Maltin biex sfaw jaħsbu li ħajjithom
tkun aħjar jekk titmexxa skond kif jgħidulhom il-barranin.
* Reġgħet għamlitna poplu dipendenti.
* Telfitna l-ħelsien tal-ħsieb tagħna.
* Dgħajfitilna r-rieda tagħna.
* Neżżgħatna mill-ġieħ ta’ nazzjon ħieles.
* Ikkorrompitilna l-fibra morali.
Din hija l-akbar telfa li ġarrabna bis-sħubija fl-UE.
Fil-qagħda ta’ mistħija li waqajna fiha, reġa’ għandna bżonn kbir ta’ mexxejja politiċi li jkollhom il-ħila jkaxkru warajhom lill-poplu Malti ħalli nagħmlu s-sagrifiċċji meħtieġa kollha biex nibnu mill-ġdid nazzjon ħieles.
L-ikbar diżgrazzja hija li jkollok mexxejja politiċi li l-ħila li juru hija biss min minnhom kapaċi l-aktar jitmiegħek fi friex barrani.
Kritika ħarxa lill-Kummissjoni
JIM Dougal irriżenja ftit ta’ ġimgħat ilu mill-kariga ta’ Kap ta’ l-Uffiċċju tal-Kummissjoni Ewropea fl-Ingilterra.
Telaq mill-impjieg li kellu b’kundizzjonijiet tajbin ħafna, minħabba
l-fatt li ma felaħx aktar jaħdem f’ambjent ta’ burokrazija li
ġġennek u muntanji ta’ karti.
Huwa lmenta għax il-Kummissjoni Ewropea tagħti flejjes kbar lil
organizzazzjonijiet li jagħmlu seminars ta’ propaganda għall-Unjoni,
li fihom jieħdu sehem biss nies li diġà huma ħafna favur
l-Unjoni.
Iżda l-Kummissjoni ma ssibx mezz kif tilħaq lil dawk li huma
xettiċi dwar l-Unjoni.
Dougal kixef li kemm dam jaħdem mal-Kummissjoni Ewropea ma ltaqa’ ma’
ebda mpjegat tagħha li ma kienx entużjast dwar l-Unjoni u li kien iħaddan
twemmin kritiku lejha.
Għalhekk il-Kummissjoni mhix rappreżentattiva taċ-ċittadini
kollha ta’ l-Ewropa għax thħalli barra dawk li huma xettiċi.
Issir kritika tal-Kummissjoni Ewropea għax trid tmexxi qisha hija xi
Gvern.
Hija tippretendi li għandha s-setgħa li tgħid lil Gvern ta’ stat membru ta’ l-Unjoni x’għandu jagħmel u kif għandu jmexxi l-pajjiż u tikkontrollah.
Kellna eżempju ta’ dan meta l-Kummissjoni Ewropea ma aċċettatx
li l-Kunsill tal-Ministri ma jieħdux passi din is-sena kontra l-Gvernijiet
tal-Ġermanja u Franza li ma rnexxilhomx iżommu l-iżbilanċ
tal-budgets ma jaqbiżx it-tlieta fil-mija tal-Prodott Gross Domestiku
tal-pajjiż.
Eżempju ieħor tagħtulna l-Kummissjoni Ewropea li qiegħda
tinsisti li tikkontrolla l-gvernijiet tal-pajjiżi membri dwar ftehim ta’
servizzi bl-ajru li għamlu ma’ l-Istati Uniti ta’ l-Amerika.
Hija qiegħda titlob lill-gvernijiet tal-pajjiżi membri ta’ l-Unjoni (fosthom Malta) iħassru l-ftehim li għamlu, wara li hija kisbet mill-Qorti tal-Ġustizzja ta’ l-Unjoni deċiżjoni li parti mill-ftehim dwar is-servizzi bl-ajru ma’ l-Istati Uniti kien illegali.
L-għażla stramba tal-Kummissarji
SKOND Jim Dougal, il-Kummissjoni Ewropea hija mtaqqla wisq kif timxi, u għandha tant regolamenti u burokrazija li qajla tista’ tkun effettiva.
Kulħadd jammetti li l-burokrazija ħarbet mill-kontroll
tal-Kummissjoni.
Nistgħu nżidu kritika oħra tal-Kummissjoni Ewropea.
Tinħatar b’mod stramb li ma jispirax fiduċja fil-ħila tagħha
li tmexxi tajjeb il-politika li hija teddeċiedi għall-Unjoni Ewropea.
Nieħdu l-każ ta’ Joe Borg, il-Kummissarju Malti li Fenech Adami għażel
li jinnomina biex jinħatar Kummissarju.
Huwa kellu biss esperjenza ministerjali fil-qasam ta’ l-affarijiet barranin.
Wara li nħatar Kummissarju minn Prodi u approvat mill-Parlament Ewropew bit-tqanzieħ, intbagħat ma’ Kummissarju ieħor ħalli jikseb l-esperjenza.
Iżda issa ngħata mill-President il-ġdid tal-Kummissjoni
Ewropea, Barroso, il-kariga ta’ Kummissarju ta’ l-Affarijiet Marittimi u
s-Sajd.
Il-Kummissarju Joe Borg m’għandu ebda esperjenza tas-sajd u lanqas ta’
l-affarijiet marittimi.
(Ma nafux jekk qattx qabad qażba b’idu u kemm jaf jghum).
Allura kif jista’ jmexxi l-politika ta’ l-Unjoni Ewropea fil-qasam
ta’ l-affarijiet marittimi u tas-sajd meta huwa m’għandux esperjenza
tagħhom?
Minflok li jinħatru Kummissarji li jkunu kompetenti fil-qasam li jingħataw,
il-Gvern ta’ pajjiż membru jagħmel għażla politika għall-kariga
ta’ Kummissarju mingħajr ma jkun hemm ħsieb kemm il-persuna magħżula
hija kompetenti fil-qasam li tiegħu se tingħata l-kariga ta’
Kummissarju.
U b’hekk nispiċċaw biex ikollna l-Kummissarju Joe Borg imexxi l-affarijiet marittimi u s-sajd ta’ 350, miljun ċittadin Ewropew f’25 pajjiż, meta ma kellux esperjenza jmexxi l-affarijiet marittimi u s-sajd ta’ 400,000 Maltin!
Ġurament ta' lealta` li jieħdu l-Membri Parlamentari kollha
Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).
Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.
Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).
Ġurament għall-qadi xieraq tal-kariga ta’ President.
Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).
Sezzjoni 6 tal-Kostituzzjoni ta' Malta
6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.
Artiklu I-6 tal-Kostituzzjoni ta' l-Unjoni Ewropea
Dritt ta' l-Unjoni
Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.
Tista' tafda lil min jikser il-ĠURAMENT tiegħu/tagħha?
Il-Ħamis 19 ta' Awissu 2004
IRRIDU L'INDIPENDENZA MILL-UNJONI EWROPEA
e-mail: cnimalta at yahoo.co.uk
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat Lm2 flimkien ma' din il-formola liċ-
Chairman
CNI,
Dr
Karmenu Mifsud Bonnici B.A. LL.D.
81,
Triq Ġuże Pace,
Ħamrun.
Isem .......................................................
Indirizz ..................................................
ID Numru...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ