MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Ċaħda tad-demokrazija

Illum u għada l-mexxejja tal-pajjiżi ta’ l-Unjoni Ewropea qegħdin jiltaqgħu f’Lisbona ħalli jiftehmu dwar l-abbozz finali tat-Trattat ġdid ta’ Riforma li qiegħed jieħu post it-Trattat Kostituzzjonali ta’ l-Unjoni li kien iffirmat f’Ruma f’Ottubru 2004, u li l-Franċiżi u l-Olandiżi vvotaw kontrih u għalhekk ma daħalx fis-seħħ.

Il-Prim Ministru Malti se jieħu sehem fil-laqgħa ta’ Lisbona, fejn se jikkommetti lil Malta b’dak kollu li t-Trattat il-ġdid jgħid.

La l-membri tal-Parlament tagħna, u inqas u inqas il-poplu tagħna, ma ngħataw tagħrif x’se jkun fih it-Trattat li se jorbotna jekk jidħol fis-seħħ.

Il-politiċi tagħna għażlu li jżommu lill-poplu fid-dlam dwar x’fih dan it-Trattat, ħalli jevitaw il-kritika u l-oppożizzjoni popolari għalih, biex imbagħad il-membri parlamentari kollha japprovawh, bħal ma kienu vvotaw favur it-Trattat tal-Kostituzzjoni, f’Lulju 2005.

Il-mexxejja tal-pajjiżi ta’ l-UE se jiftehmu li ma jħallux kemm jista’ jkun lill-popli tagħhom jgħidu f’referendum, jaqblux mat-Trattat il-ġdid, għax jibżgħu li jkun hemm min jivvota kontrih u t-Trattat imissu x-“xorti ħażina” li t-Trattat ta’ qablu dwar il-Kostituzzjoni kellu.

Dan huwa att ta’ disprezz tad-demokrazija, li jikxef l-ipokresija grassa ta’ l-Unjoni Ewropea, li tant tħambaq favur id-demokrazija, iżda le tipprattikaha, fejn tibża’ li l-poplu ma jridx li jseħħ dak li l-mexxejja ta’ l-Unjoni jridu jagħmlu.

Il-Prim Ministru Malti jaf li b’dak li se jiftiehem illum u għada f’Lisbona, se jorbot lill-membri parlamentari tal-Gvern biex jivvotaw favur, u jaf ukoll li ebda membru parlamentari mhu se jkollu d-dehen u l-kuraġġ li jivvota kontra, meta t-Trattat jitressaq fil-Parlament għar-ratifika.

Għalhekk nistennew li jsiru sforzi kbar biex jiddefendu akkost ta’ kollox dak li t-Trattat jgħid, jaqbel jew ma jaqbilx lill-poplu Malti.

Għalhekk ma nistennewx li tintwera l-oġġettività meħieġa fid-diskussjoni li ssir dwar it-Trattat, wara li jkun iffirmat f’Diċembru li ġej mill-mexxejja tal-pajjiżi ta’ l-UE.

Dan se jkun ta’ dannu għall-interessi tal-poplu tagħna, li jixraqlu min iħarishomlu, mhux min jissuġġettahom għal interessi oħrajn.

M’hemmx dubju li t-Trattat il-ġdid se jkompli jnaqqsilna s-sovranità, billi jagħti aktar setgħat lill-UE li tiddeċiedi b’maġġoranza f’numru akbar ta’ oqsma.

F’dawn l-oqsma, il-poplu Malti jkollu jbaxxi rasu u joqgħod sakemm nibqgħu fl-UE, għal dak li l-maġġoranza ta’ l-Unjoni tiddeċiedi, anke jekk il-poplu Malti jkun kontra dawk id-deċiżjonijiet.

Għalhekk ir-rieda tal-poplu tagħna mhux se tibqa’ suprema u dan ikun ifisser iċ-ċaħda tad-demokrazija f’pajjiżna.

L-UE xkiel għall-kompetittività tagħna

Biex pajjiżna jimxi ’l quddiem jeħieġilna nesportaw aktar prodotti tagħna u nbiegħu iżjed servizzi tagħna.

Mhux biss ma tgħinniex, iżda tagħmilha aktar diffiċli biex nesportaw iżjed u nbiegħu aktar il-prodotti u s-servizzi tagħna.

Għax is-sħubija fl-UE għollietilna l-ħajja u żieditilna l-ispejjeż, u b’hekk mhux talli m’għamlitniex aktar kompetittivi, iżda naqqsitilna l-kompetittività tagħna.

In-nuqqas tal-kompetittività għalqilna l-fabbriki u tefgħana lura fil-bejgħ tas-servizzi, bħalma huma dawk tat-tiswija tal-vapuri u tal-qasam tat-turiżmu.

Il-bidla għall-Ewro f’Jannar li ġej se tkompli tnaqqsilna l-kompetittività, għax se tkompli tgħollilna l-ħajja u tkabbrilna l-ispejjeż.

Is-saħħa ta’ l-Ewro kontra l-muniti l-oħrajn, l-aktar id-Dollaru Amerikan, se tkompli tnaqqsilna l-kompetittività.

B’dan, se jintlaqtu ħażin il-fabbriki tagħna li jesportaw l-aktar għas-swieq ta’ barra l-UE, u l-aktar dawk is-swieq li jixtru bid-Dollaru Amerikan.

Il-prodotti maħdumin f’Malta se jqumu iżjed għal min iħallas bid-Dollaru Amerikan.

Il-politiċi tagħna qegħdin jonqsu lill-poplu tagħna meta jaħbulu t-theddida serja li għandna għall-esportazzjoni tagħna f’numru ta’ fabbriki tagħna.

U dan mhux aktar fil-każ ta’ fabbriki tat-tessuti, iżda f’fabbriki li għandhom valur miżjud għoli bil-pagi u s-salarji li jħallsu.

Ħadd mhu qed jgħid lill-poplu li l-akbar fabbrika li l-aktar tesporta minn Malta, diġà ssensjat wieħed minn kull sitta ta’ l-impjegati tagħha, u hija mhedda li tagħlaq, b’konsegwenza li madwar 2,000 jitilfu l-impjieg tagħhom.

Quddiem din t-theddida għall-impjiegi f’pajjiżna, is-sħubija fl-Unjoni Ewropea hija ta’ xkiel, mhux ta’ għajnuna għal pajjiżna.

Bħalma hija theddida għal impriża kbira oħra li l-UE qiegħda thedded li tagħlqilna, u b’hekk ittellef l-impjieg ta’ madwar 1,700 ħaddiem ieħor.

M’aħniex nieħdu passi ħalli nrażżnu l-għoli tal-ħajja u nnaqqsu l-ispejjeż biex inkabbru l-kompetittività, u lanqas m’aħna nagħtu inċentivi ħalli ngħollu l-effiċjenza u nżidu l-produttività.

Qegħdin nagħmlu bil-maqlub ta’ dan, għax qegħdin inkomplu nżidu l-piżijiet għall-impriżi tagħna, kemm dawk li jesportaw il-prodotti, kif ukoll dawk li jbiegħu s-servizzi.

Il-politika u r-regoli ta’ l-UE ma jħalluniex nieħdu l-passi meħtieġa u ndaħħlu l-miżuri xierqa biex intaffu l-piżijiet u nnaqqsu l-ispejjeż għall-impriżi tagħna.

Sakemm nibqgħu ma nagħmlux kull m’hemm bżonn, bla xkiel mill-UE, ħalli nżidu l-esportazzjoni tal-prodotti u l-bejgħ tas-servizzi tagħna, ma nistgħux nimxu ’l quddiem u ma nkunux nistgħu nħaddmu ż-żgħażagħ tagħna f’pajjiżna.

Qegħdin nagħmlu ħażin li ma nagħrfux li din hija l-ewwel problema li għandna u jmissna nagħmlu minn kollox biex insolvuha.

Pajjiżi “barra” li marru aħjar

Skond il-Ġnus Magħquda fl-2006 in-Norveġja u l-Islanda kienu l-ewwel u t-tieni l-aħjar pajjiżi fejn wieħed jgħix.

Iż-żewġ pajjiżi ma ssieħbux fl-Unjoni Ewropea, minkejja li din tridhom jagħmlu dan.

Il-Prim Ministru tan-Norveġja Jens Stoltenberg huwa favur li pajjiżu jidħol fl-Unjoni.

B’danakollu, hu jammetti pubblikament li l-poplu Norveġiż qiegħed illum igawdi l-benefiċċji li kiseb meta f’żewġ referendi vvota kontra li jidħol fl-Unjoni.

Dawn il-benefiċċji huma ekonomija b’saħħitha, qgħad ftit, u rata kbira ta’ tkabbir ekonomiku.

Mhux biss, iżda n-Norveġja għax baqgħet barra mill-Unjoni, salvat l-industrija tagħha tas-sajd (mhux kif ġralha l-Ingilterra li bis-sħubija fl-UE, naqqset bil-kbir l-industrija tagħha tas-sajd).

L-istess diskors jista’ jingħad għall-Islanda li qatt m’applikat biex tidħol fl-Unjoni Ewropea.

Dan il-pajjiż jagħmel kummerċ l-aktar ma’ l-Unjoni, u billi l-pajjiż hu fil-European Economic Area (EEA), għandu aċċess ħieles għas-suq komuni ta’ l-UE mingħajr ma huwa suġġett għal ħafna mir-regolamenti ta’ l-istess Unjoni.

L-Islanda hija wkoll meħlusa mill-politika diżastruża ta’ l-Unjoni, bħalma hija dik tal-biedja (Common Agricultural Policy).

U meta l-Islanda tħoss li hekk jaqblilha fl-interess nazzjonali, tista’ tħassar kull ftehim li għandha ma’ l-Unjoni.

Id-direttur tan-No Movement ta’ l-Islanda, Hortur J. Gudmundsson, jgħid li ma hemm ebda raġuni biex pajjiżu jissieħeb fl-UE, għax l-Islanda sejra tajjeb ħafna barra.

Huwa jsostni s-sisien tas-suċċess ta’ l-Islanda, hija l-indipendenza li żammet matul is-snin.

Gudmundsson jisħaq li l-każ ta’ l-Islanda jagħti prova ta’ kif il-progress nazzjonali huwa marbut mal-ħarsien ta’ l-indipendenza ta’ pajjiż.

Għax pajjiż li jibqa’ indipendenti mill-UE jieħu deċiżjonijiet li huma fl-aħjar interessi tiegħu, skond iċ-ċirkostanzi tiegħu, u mhux ikollu joqgħod għad-deċiżjonijiet meħudin mill-Unjoni li tagħti importanza ċirkostanzi ta’ pajjiżi oħrajn fl-Unjoni, li m’humiex l-istess ċirkostanzi ta’ l-Islanda.

L-Isvizzera

L-Isvizzera wkoll, flimkien man-Norveġja u l-Islanda dejjem jitqiesu fost għaxar l-aħjar pajjiżi li sejrin f’dik li hija l-ekonomija dinjija.

It-tlieta m’humiex fl-UE u waqt li n-Norveġja u l-Islanda huma fil-European Economic Area, l-Isvizzera mhix.

Din, iżda, għamlet għadd ta’ ftehim bilaterali ma’ l-UE fl-oqsma li fihom hija trid tikkopera ma’ l-Unjoni.

Christa Markwalder Bar, il-Presidenta tal-Moviment Ewropew fl-Isvizzera, tammetti wkoll li l-ftehim ta’ pajjiżha ma’ l-UE huma pożittivi ħafna, għalkemm pajjiżha m’huwiex imsieħeb fl-Unjoni.

L-UE hija favur l-abort

Il-Qorti Ewropea tad-Drittijiet tal-Bniedem ordnat lill-Gvern Pollakk iħallas kumpens għad-danni li mara Pollakka, Alicja Tysiac, sofriet billi l-vista tagħha marret lura kaġun tat-tqala, li hija ma setgħetx twaqqaf, għax ma sabitx tabib fil-Polonja li jagħmlilha abort.

L-Insara Maltin jistgħu jistennew li l-istess jiġri lill-Gvern Malti bħalma ġara fil-Polonja.

Jew ma ndumux ma jkollna lill-UE tikkundanna lill-Gvern Malti jħallas l-ispejjeż li mara Maltija tagħmel meta tmur barra biex tagħmel abort, għax il-Gvern ma jkunx ipprovdilha mezzi f’Malta għall-abort.

Naturalment anke l-Isqfijiet Maltin jagħmlu bħalma għamlu dawk Pollakki, iħeġġu lill-Insara jipprotestaw.

Iżda jkun għalxejn, jekk l-Insara Maltin ma jqumux fuq tagħhom u jgħidu lill-UE tagħmel li trid, iżda tħalli lil Malta tagħmel dak li hi temmen li huwa tajjeb.

Il-ġimgħa l-oħra ġiet Malta t-tabiba Olandiża Dr Gomperts, magħrufa għall-vapur ta’ l-abort “Women on Waves” li hija tieħu minn pajjiż għall-ieħor biex tagħmel propaganda favur l-abort.

Kienu għalxejn l-isforzi li għamlu mal-Kummissarju tal-Pulizija biex ma jħallix lil Dr Gomperts pubblikament tagħmel propaganda favur l-abort f’pajjiżna.

Issa li pajjiżna huwa fl-Unjoni Ewropea, il-Pulizija m’ażżardatx twaqqaf lil Dr Gomperts mill-propaganda tagħha, għax kieku taqbeż fuqna l-UE u tikkundannana bi xkiel tal-libertà ta’ l-espressjoni u d-dritt tal-moviment ħieles ta’ ċittadina ta’ l-UE.

Din kienet tispiċċa twaħħalna xi multa u b’hekk tnaqqas mill-ammont ta’ flus li wegħdet li tagħtina.

Naturalment l-Insara Maltin jipprotestaw u l-Isqfijiet jikkundannaw dan, iżda kollu għalxejn, sakemm l-UE titħalla tikkmandana u tkasbar it-twemmin tagħna.

Għall-UE l-abort hu dritt tal-mara u tikkundanna lil min irażżan l-abort, mhux lil min iwettqu u jagħmel propaganda għalih.

Malta Nisranija, bis-sħubija tagħha fl-Unjoni, bil-miljuni f’kontribuzzjonijiet li tħallas kull sena lill-UE, qiegħda tgħin u tappoġġja l-politika Ewropea favur l-abort.

Dan l-aħħar kien hawn min ippropona li fil-Kostituzzjoni tagħna ndaħħlu kundanna ta’ l-abort.

L-Unjoni Ewropea ma tħalliniex nagħmlu dan.

Għax għalkemm għamilna protokoll li ma jobbliganiex indaħħlu l-liġijiet ta’ l-Unjoni dwar l-abort, fil-Kostituzzjoni tagħna daħħalna li l-liġijiet li nagħmlu ma jistgħux ikunu kontra dawk ta’ l-UE.

Iżda n-Nikaragwa hi indipendenti u sovrana, mhux bħal Malta li hija maħkuma mill-Unjoni.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.