MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Is-sehem ta’ l-Unjoni Ewropea fl-istorja tat-Tarzna jixraq li jkun magħruf ħalli l-poplu Malti jkun jista’ jiġġudika jekk is-sħubija fl-Unjoni għamlitx ġid jew għamlitx ħsara lit-tarznari li għal ħafna sekli kienu meqjusa bħala l-industrija nazzjonali ta’ pajjiżna.

F’ġurnal lokali bl-Ingliż tat-12 tax-xahar intqal ċar u tond li ftit tax-xhur ilu l-Unjoni Ewropea ssuġġeriet lill-Gvern Malti li jilliċenzja lill-ħaddiema kollha tat-Tarzna u jxolji l-kumpanija l-Malta Shipyard, li l-Gvern waqqaf fl-2003 biex tmexxi t-tarzna ta’ Bormla, dik tal-Marsa u dik ta’ Manoel Island.

Dan is-suġġeriment juri li l-Unjoni Ewropea ma jimpurtahiex mill-impieg ta’ 1,700 ħaddiema, u ma tapprezzax kemm l-industrija tat-tarznari hija importnti u meħtieġa għal Malta.

F’ġurnal lokali ieħor bl-Ingliż tal-14 tx-xahar intqal li l-Kummissarju Ewropew Neelie Kroes wissiet lill-Gvern Malti biex fil-privatizzazzjoni tat-Tarzna ma jagħżilx l-investituri li jintrabtu li jżommu l-akbar numru ta’ ħaddiema fit-Tarzna, għax l-offerta tagħhom tkun l-aktar baxxa minħabba f’hekk.

Din it-twissija turi li għall-Unjoni Ewropea, l-impieg ta’ l-akbar numru possibbli ta’ ħaddiema ma hux ta‘ siwi ewlieni, u għaliha d-daqs tal-prezz offrut huwa aqwa min-numru ta’ ħaddiema miżmumin fl-impieg.

L-indħil ta’ l-Unjoni Ewropea fit-tarznari ta’ Malta beda qabel ma pajjiżna ffirma t-Trattat ta’sħubija fl-Unjoni fis-16 ta’ April, 2003.

Biex pajjiżna seta’ jissieħeb fl-Unjoni, din rabtitu li jwettaq pjan ta’ ristrutturar tat-tarznari għal perijodu ta’ seba’ snin mill-2002 sa l-aħħar ta’ din is-sena.

Bil-pjan ta’ ristrutturar l-Unjoni Ewropea mponiet

* tnaqqis fin-numru ta’ ħaddiema fit-tarznari,

* limitu fl-ammont ta’ xogħol li t-tarznari setgħu jagħmlu,

* kemm ta’ tiswija kif ukoll ta’ bini ta’ vapuri,

* l-għeluq ta’ wieħed mill-baċiri,

* kif ukoll iffissat l-ammont ta’ għajnuna finanzjarja li l-Gvern seta’ jagħti lit-tarznari.

Dak il-pjan ta’ ristrutturar uriena li l-Unjoni Ewropea kellha aktar interess li trażżan il-kompetizzjoni li t-tarznari Maltin setgħu jagħmlu lil dawk tal-pajjiżi l-oħrajn ta’ l-Unjoni, milli li t-tarznari Maltin jagħmlu kemm jifilħu xogħol ta’ tiswija u bini ta’ vapuri u jħaddmu l-aktar numru li jistgħu ta’ ħaddiema.

L-iskuża ta’ l-Unjoni Ewropea kienet li l-vijabbiltà tat-tarznari setgħet tintlaħaq biss b’dawk il-kundizzjonijiet tal-pjan ta’ ristrutturar.

Illum kulħadd jammetti li dak kien pjan ħażin u l-Unjoni li fasslitu, kienet żbaljata.

L-inġinier Lawrence Ciantar, li tħarreġ fit-tarzna u għal ħafna snin mexxa l-‘Power Station’, f’ġurnali lokali kiteb hekk, fid-19 ta’ Jannar ta’ din is-sena.

“L-hekk imsejjaħ programm ta’ risturtturar ma kien xejn ħlief eżerċizzju ta’ tnaqqis ta’ ħaddiema biex tonqos l-ispiża kurrenti.

Ma sarux investimenti f’għodda u makkinarju modern biex titjieb l-effiċjenza u l-kwalità tax-xogħol. Ma sarx taħriġ ta’ l-impjegati f’dawk li huma teknoloġiji ġodda, u partikolarment fil-maniġment. It-tnaqqis fid-dħul ta’ apprendisti, tant meħtieġa biex it-Tarzna tibqa’ tiżviluppa, iddgħajjef ħafna l-potenzjal tat-Tarzna għas-snin li ġejjin.”

“Għall-kuntrarju, it-tmexxija tat-Tarzna ġiet imgħoddija effettivament f’idejn maniġment barrani.“

Bil-maqlub ta’ dan, l-Inġinier Lawrence Ciantar sostna li

“l-amministrazzjoni tat-Tarzna għandha tkun tinkludi element qawwi ta’ maniġers ikkwalifiatki Maltin, u tħalli spazju għas-servizzi ta’ esperti barranin, fejn ikun hemm bżonn”.

U bla tlaqliq saħaq li

“ikun tassew għajb kbir jekk dak li bnew missirijietna fuq medda ta’ mijiet ta’ snin, tkun il-ġenerazzjoni tagħna li teqirdu”.

L-Unjoni Ewropea ma tistax taħrab li taqsam mal-Gvern Malti r-responsabbiltà għan-nuqqasijiet u għat-telf li t-Tarzna għamlet fl-aħħar sitt snin.

Għax filwaqt li l-Gvern kellu f’idejh it-tmexxija sħiħa tat-Tarzna mis-sena 1998 ‘l hawn, wara li spiċċa s-sehem li kellhom id-diretturi ħaddiema fit-tmexxija tat-Tarzna, l-Unjoni Ewropea kellha, skont il-pjan ta’ ristrutturar, kull sena tagħrif dettaljat u komplet ta’ dak li kien qiegħed iseħħ fit-Tarzna.

Il-pjan ta’ ristrutturar jgħid li Malta kellha tipprovdi lill-Kummissjoni Ewropea

“rapporti annwali dwar l-implimentazzjoni tal-pjan. Dawn ir-rapport għandhom jinkludu kull informazzjoni rilevanti biex jgħin lill-Kummissjoni tqis is-sitwazzjoni fir-rigward l-implimentazzjoni tal-programm ta’ ristrutturar, inkluż kif it-tarznari jiffissaw il-prezzijiet għal kuntratti ġodda tat-tiswija tal-vapuri u ta‘ bini ta’ vapuri li jinkisbu mit-tarznari.

Ir-rapport annwali ta’ tarzna dwar il-produzzjoni għandu jispeċifika t-tunnellaġġ gross ikkumpensat ta’ xogħlijiet eliġibbli li jsiru barra minnha. It-Tarzna għandha wkoll tkun f’pożizzjoni li turi l-kuntratti kollha relatati mal-għoti ta‘xogħlijiet li jsiru barra minnhom” fil-każ ta’ bini ta’ vapuri.

Il-pjan ta’ ristrutturar ikompli jgħid li

“minn Marzu 2003 Malta għandha tforni dawn ir-rapporti fi żmien xahrejn mill-aħħar ta’ kull sena. L-aħħar rapport għandu jingħata sa l-aħħar ta’ Marzu 2009, ħlief jekk ma jiġix miftiehem mod ieħor mill-Kummissjoni u Malta”.

Imma l-Unjoni Ewropea ma kinetx kuntenta b’tagħrif dettaljat dwar it-Tarzna li jingħata fir-rapporti annwali.

Il-pjan ta’ ristrutturar ta s-setgħa lill-Unjoni li tgħasses x’qed jiġri fit-Tarzna, għax il-pjan jgħd ukoll li

“Malta għandha tikkopera mal-arranġamenti ta’kontroll stabbiliti mill-Kummissjoni, inklużi spezzjonijiet fuq il-post minn esperti indipendenti, matul il-perjodu ta‘ ristrutturar”.

Għaldaqstant l-Unjoni Ewropea ma tistax tgħid li ma kinetx taf bit-tmexxija diżastruża tat-Tarzna fl-aħħar snin.

Kienet taf, u ma tniffetx, u għalhekk kienet kuntenta b’dak li kien qiegħed jiġri li seta’ jwassal biex it-Tarzna jkollha tagħlaq u l-ħaddiema kollha tagħha jispiċċaw mill-impieg.

Kieku l-Unjoni Ewropea tħares ġenwinament l-interessi ta’ pajjiżna, hija tapplika dak li l-pjan ta’ ristrutturar stess jipprovdi jekk it-Tarzna ma tkunx ġiet fuq saqajha sa l-aħħar ta’ Diċembru li ġej.

Infatti l-pjan jgħid:

“Jekk il-vijabbiltà tat-tarznari ma tistax tinkiseb minħabba ċirkostanzi eċċezzjonali u li ma kienux previsti fiż-żmien meta ġie mfassal il-pjan ta’ ristrutturar, il-Kummissjoni Ewropea tista’ tirrevedi l-kundizzjonijieet tal-pjan” u qabel tagħmel dan, “il-Kummissjoni għandha tqis sew il-vedut ta’ l-Istati Membri dwar l-eżistenza ta’ ċirkostanza eċċezzjonali”.

Issa ma hemmx dubju li d-diżastru finanzjarju tal-kuntratt tal-konverżjoni tal-Fairmount, huwa ċirkostanza eċċezzjonali li seħħet fl-aħħar sentejn u li ma kinetx prevista fis-sena 2002, meta tfassal il-pjan ta’ ristrutturar.

Kieku hemm rieda tajba mill-Kummissjoni u l-Istati Membri ta’ l-Unjoni ma joġġezzjonawx minħabba l-kompetizzjoni li t-Tarzna ta’Malta tagħmel lit-tarznari tagħhom, il-kundizzjonijiet tal-pjan jinbidlu billi l-perjodu ta’ ristrutturar tat-Tarzna jitwal aktar mill-aħħar ta’ din is-sena.

Iżda l-Kummissarju Ewropew Neelie Kroes ma tridx taf b’xejn,għax għalha r-regoli ta’ l-Unjoni Ewropea dwar il-kompetizzjoni huma aktar sagri mill-impieg ta’1,700 ħaddiema tat-Tarzna u aktar importanti mill-ħtieġa li pajjiżna għandu li jkompli jkollu l-industrija tradizzjonali tat-tiswija u bini ta’ vapuri.

L-Unjoni Ewropea la qatt tat u lanqas hija mitluba tagħti ewro waħda għat-Tarzna ta’ Malta.

B’danakollu, l-Unjoni tindaħal x’jagħmel il-Gvern Malti dwar it-Tarzna. It-Tarzna tista’ tkun vittma oħra tas-sħubija ta’ pajjiżna fl-Unjoni, jekk ma nieqfux lill-Unjoni.

L-istqarrijiet pubbliċi li l-Kummissarju Ewropew responsabbli għall-kompetizzjoni Neelie Kroes, għamlet fis-sena ta’ wara li ġiet teżamina lill-Gvern Malta dwar il-pjan li għamel għat-Tarzna, waħħlitu u qaltlu biex għan-nofs Diċembru jħejji ruħu bi pjan rivedut għar-riparatorju, jammontaw għal att ta’ umiljazzjoni nazzjonali.

Dan l-att diżgustanti jixhed li l-Gvern elett demokratikament mill-poplu Malti mhux Sovran li jiddeċiedi ħwejjeġ nazzjonali kif jidhirlu hu fl-aħjar interessi tal-poplu Malti.

Ir-rieda ta’ l-UE hija superjuri għar-rieda tal-maġġoranza tal-poplu Malti.

L-interessi nazzjonali mħarsin mill-Gvern Malta għandhom ikunu ssagrifikati għar-regoli ta’ l-Unjoni Ewropea dwar il-kompetizzjoni.

Independentament minn kemm hija tajba jew ħażina d-deċiżjoni tal-Gvern Malti li jaħfer id-dejn li l-Malta Shipbuilding għamlet mit-twaqqif tagħha hames snin ilu, la darba l-Gvern iddeċieda li fl-aħjar interessi tal-pajjiż għandu jaħfer dak id-dejn, m’għandux jaċċetta l-umiljazzjoni li burokratiċi barranin mhux maġturin mill-poplu, jaqilbu d-deċiżjoni tal-Gvern Malti.

Barra l-fatt li l-aġir tal-Kummissarju Kroes huwa oġġezzjonabbli għal nazzjon, li jiftaħar li huwa indipendenti, id-deċiżjoni tagħha fiha nfisha hija stupida.

Għax id-dejn tal-Malta Shipyards huwa fil-fatt dejn tal-Gvern mal-Gvern stess.

Il-Malta Shipyards hija tal-Gvern.

Id-dejn tagħha huwa tal-Gvern.

Id-dejn tagħha huwa dovut lill-Gvern.

Jekk id-dejn ma jinħafirx, il-kumpanija xorta ma tħallsux lill-Gvern.

Jekk min jixtri l-kumpanija jkun mistenni li jħallas id-dejn tagħha, il-prezz li joffri għaliha jkun imnaqqas bl-amont tad-dejn li jkun irid jitħallas.

Għalhekk il-Gvern jiġbor prezz inqas illi jiġbor jekk min jixtri mhux mistenni li jħallas id-dejn.

Dan ifisser li d-dejn huwa dejjem talf tal-Gvern.

Jekk il-Malta Shipyards tiġi xolta, xorta waħda d-dejn ma jitħallasx lill-Gvern.

Tgħid x’tgħid l-Unjoni Ewropea, id-dejn tal-kumpanija se jġorru l-Gvern.

Wara kollox il-kumpanija hija tal-Gvern u l-Gvern huwa responsabbli għad-dejn tagħha.

Is-CNI tħeġġeġ lill-ħaddiema li jridu jkomplu jaħdmu fit-Tarzna jwaqqfu koperattiva u jieħdu f’idejhom it-Tarzna, flimkien ma “partner” strateġiku barrani li jista’ jagħti “management” professjonali effiċjenti u “marketing” aggressive lt-it-Tarzna.

B’hekk it-Tarzna tibqa’ f’idejn il-Maltin u ma ssirx mill-ġdid bażi marittima barranija.

Jekk investituri barranin jikkalkolaw li jistgħu jagħmlu qligħ jekk it-Tarzna jkollha ‘l fuq minn sitt mitt ħaddiema anqas, koperattiva tal-ħaddiema msieħba ma’ partner strateġiku m’għandhiex titlef mit-Tarzna.

La darba l-Gvern ma jkunx se jagħti sussidji lill-koperattiva, m’għandux għax joġġezzjona li t-Tarzna tibqa’ f’idejn il-ħaddiema tagħha.

Il-Ħamis, 17 ta’ Settembru, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ