GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Fis-seba’ snin 2007 – 2013 il-Maltin u l-Għawdxin se jħallsu lill-Unjoni Ewropea €420,000,000

L-Unjoni Ewropea u t-theddida ta’ gwerra

Għalkemm il-mexxejja ta’ l-Unjoni Ewropea ma jurux li resqin ftit ftit lejn gwerra oħra li l-Istati Uniti ta’ l-Amerika tista’ tfaqqa’ kontra pajjiżi li huma meqjusin ta’ theddida għas-sigurtà ta’ l-Amerika, ħafna osservaturi politiċi serji qegħdin iwissu li ninsabu f’xifer l-irdum ta’ gwerra li fiha jistgħu jintużaw anki l-armi nukleari.

Jekk l-Unjoni Ewropea tidħol fi gwerra, Malta, sakemm tibqa’ msieħba fl-Unjoni, tieħu sehem fil-gwerra u tlaqqat il-konsegwenzi koroħ kollha tal-gwerra.

Iżda anki meta l-Unjoni Ewropea ma appoġġjatx lill-Istati Uniti fl-invażjoni ta’ l-Iraq mingħajr il-kunsens tal-Ġnus Magħquda, il-Gvern Malti appoġġja lill-Istati Uniti u ta’ dan l-appoġġ il-President Bush irringrazzja pubblikament lill-Gvern Malti.

Għalhekk fi gwerra oħra li l-Istati Uniti jagħmlu, nistgħu nbassru li pajjiżna se jkun imdaħħal fiha, minkejja li l-poplu Malti la jrid u lanqas jaqbillu jiċċappas bi gwerer.

Huwa fl-interess tal-poplu tagħna li l-Parlament Malti minn issa jistqarr li pajjiżna ma jappoġġjax lil min jagħmel gwerra, anki jekk l-UE tieħu sehem jew tappoġġja l-gwerra.

Huwa importanti li deċiżjoni bħal din tittieħed fuq bażi tal-prinċipju li pajjiżna huwa kontra l-gwerer bħala mezz li jsolvu l-kwistjonijiet bejn il-pajjiżi.

Għax jekk ma nagħmlux hekk, ikollna kull darba noqogħdu niddiskutu meta tinqala’ gwerra għandniex nappoġġjaw naħa jew l-oħra, u nispiċċaw sabiex nagħmlu kif tagħmel l-Unjoni Ewropea, jew kif iriduna l-Istati Uniti ta’ l-Amerika.

Anki jekk mhix il-politika ta’ l-UE li tqanqal gwerra, xorta waħda l-Unjoni qiegħda tħejji ruħha għal waħda.

Aktar u aktar jekk l-Ewropa tkompli tqis li tiddependi għal kollox fuq iż-żejt u l-gass li timporta minn pajjiżi li m’humiex fl-Unjoni.

L-UE issa qiegħda tintebaħ li s-saħħa ekonomika tagħha tiddependi għal kollox fuq il-provvista taż-żejt u tal-gass, u li l-pajjiżi ta’ l-Unjoni kollha flimkien m’għandhomx kwantità ta‘ żejt u gass biex jinqdew għall-bżonnijiet essenzjali tagħhom.

L-Unjoni jeħtiġilha tiżgura mhux biss il-kwantitajiet li tikkonsma, iżda li l-prezzijiet taż-żejt u l-gass ma jogħlewx tant li l-Ewropa ma tkunx tista’ tiflaħ għalihom.

Kemm dwar iż-żejt, kif ukoll dwar il-gass, Malta ma tista’ tgawdi xejn billi sseħibna fl-UE.

Dwar iż-żewġ prodotti, Malta tkun tista’ tiżgura l-provvista tagħhom u l-orħos prezzijiet possibbli, mhux bis-sħubija fl-UE, iżda bi ftehim ta’ ħbiberija speċjali u koperazzjoni ma’ l-Alġerija u mal-Libja li għandhom iż-żewġ prodotti kemm iridu.

Iżda l-UE ma tippermettilniex nagħmlu ftehim preferenzjali ma’ dawn iż-żewġ pajjiżi barra l-Unjoni.  

L-UE miżgħuda b’kontradizzjonijiet

L-UNJONI Ewropea hija miżgħuda b’kontradizzjonijiet.

Tgħid li trid li kull pajjiż imsieħeb jitmexxa demokratikament, iżda fil-fatt ma tħallix li l-maggoranza demokratika fih tagħżel politika differenti minn dik deċiża mill-Unjoni.

B’hekk ma titwettaqx ir-rieda tal-maġġoranza tal-poplu ta’ dak il-pajjiż.

Jiġri li anke jekk il-poplu kollu ta’ Malta ma jkunx jaqbel ma’ dak li tiddeċiedi l-Unjoni, ikollu joqgħod għal dak li tgħid l-Unjoni.

Dan imur kontra prinċipju ewlieni tas-sistema demokratika.

L-Unjoni Ewropea stess, bħala organizzazzjoni, m’hiex mibnija demokratikament u lanqas immexxija demokratikament.

Tiftahar li għandha parlament magħżul direttament mill-popli tal-pajjizi membri, iżda dan m’għandux is-setgħat li jimponi r-rieda tiegħu fuq il-mexxejja ta’ l-Unjoni.

Huma l-mexxejja tal-pajjiżi membri flimkien, fil-Kunsill Ewropew, li fl-aħħar mill-aħħar jiddeċiedu għall-Unjoni, u mhux il-membri tal-Parlament Ewropew, u iktar minn darba dak li jiftehmu bejniethom il-mexxejja tal-pajjiżi membri fil-Kunsill Ewropew, ma jkunx skond ma jridu r-rappreżentanti tal-poplu ta’ l-Unjoni fil-Parlament Ewropew.

Iżda l-akbar kontradizzjonijiet ta’ l-Unjoni Ewropea jinsabu fil-politika li tħaddan fl-oqsma differenti ta’ l-ekonomija.

Fil-qasam tal-kummerż, tippriedka l-liberalizzazzjoni u s-suq ħieles, fl-waqt li fil-qasam ta’ l-agrikoltura, tipprattika l-kontroll tas-suq u l-protezzjoni.

Bħallikieku l-prinċipju tal-‘free trade’ huwa tajjeb biss fil-każ ta’ l-oġġetti maħdumin, u huwa ħażin fil-każ tat-tkabbir tal-ħwejjeġ ta’ l-ikel.

Mhux għalhekk l-UE tħaddan politika waħda dwar il-kummerċ ta’ l-oġġetti maħdumin, u politika bil-maqlub dwar il-kummerċ tal-ħwejjeġ ta’ l-ikel!

Timxi hekk għax il-mexxejja ta’ l-Unjoni jqisu li hekk jaqbel lill-pajjiżi ta’ l-Unjoni, minkejja li jafu li mhux qegħdin jagħmlu sewwa, u anzi li qegħdin jagħmlu ħsara kbira lil pajjiżi oħrajn barra l-Unjoni.

L-Unjoni waslet fil-qagħda assurda li ma tħallix lil pajjiż membru jimxi b’politika għalih bħalma l-Unjoni tmexxi għaliha stess.

Għalhekk insibu li l-Unjoni tipproteġi l-biedja tagħha billi tikkontrolla d-dħul tal-ħwejjeġ tal-biedja minn barra l-Unjoni, iżda l-Unjoni ma tippermettix lil Malta tikkontrolla d-dħul minn barra l-pajjiż ta’ ħwejjeġ tal-biedja, biex Malta tipproteġi l-biedja tagħha.

Fil-qasam tal-kummerċ ta’ l-oġġetti maħdumin, il-politika ta’ l-Unjoni hija iktar oxxena.

L-Unjoni tħeġġeġ l-imprendituri tagħha jinvestu f’pajjiżi fejn hemm iċ-‘cheap labour’, u l-prodotti tac-‘cheap labour’ jinbiegħu fis-swieq ta’ l-Unjoni Ewropea, minflok il-prodotti maħdumin fil-pajjiżi ta’ l-Unjoni.

B’hekk qiegħed jinħoloq qgħad kbir fl-UE u sfruttament tal-ħaddiema fil-pajjiżi barra l-Unjoni.

Din mhix ħlief politika ta’ esplojtazzjoni.

Il-Parlament Ewropew ikkritikat

DEJJEM ikkritikajna lill-Parlament Ewropew kemm għan-nuqqas ta’ setgħat u siwi, kif ukoll għall-mod imħawwad kif jiffunzjona u jivvota.

Issa, il-President stess tal-Parlament, Josef Borrell, għamel kritika ħarxa dwar il-ħidma tal-Parlament, f’rapport li għadu kif ħejja għall-kapijiet tal-gruppi politiċi fil-Parlament Ewropew.

Borrell ħassu mbarazzat ħafna bl-attendenza fqira tal-membri tal-Parlament.

Dwar dan, ilmenta wkoll il-President tal-Kummissjoni Ewropea, Josè Manuel Barroso, li rrimarka li meta mar jindirizza l-Parlament biex jippreżenta l-programm ta’ ħidma tal-Kummissjoni Ewropea għas-sena 2006, fil-Parlament kien hemm aktar Kummissarji u uffiċjali ta’ l-Unjoni, milli membri parlamentari.

L-attendenza fqira tal-membri parlamentari timmina l-fiduċja tal-pubbliku fil-Parlament Ewropew. In-nuqqas ta’ diskussjoni dwar kwistjonijiet importanti tal-mument ittellef l-interess tal-pubbliku fil-ħidma tal-Parlament.

L-aġenda tal-laqgħat tal-Parlament turi li hu magħmul għan-nies teknokrati biss, bil-mod kif tkun miktuba u mid-dokumenti li tagħmel referenza għalihom.

Diskussjonijiet veri ma jsirux fil-laqgħat tal-Parlament, iżda l-membri jaqraw id-diskorsi tagħhom li jkunu ta’ ftit minuti biss.

Ma jsirx għalhekk dibattitu billi wieħed iwiegeb lil ieħor.

Il-votazzjonijiet isiru f’ħakka ta’ għajn wara xulxin, u mhux darba jew tnejn li jkunu membri parlamentari li jħawdu fil-votazzjonijiet.

Il-President tal-Parlament stqarr li l-Parlament Ewropew jidher maqtugħ mill-ħwejjeġ li jkunu qegħdin jiġru fl-Ewropa u fid-dinja, u qajla jiddiskuti kwistjonijiet politiċi ta’ importanza ghall-poplu.

Minflok, il-Parlament jintilef fuq ħwejjeġ żgħar u f’ħafna każi, ta’ ftit siwi, bħal x‘għandu jkun id-daqs tat-tuffieħ, u xi “spices” jistgħu jintużaw għal-laħam!

Il-fatt li l-membri parlamentari jistgħu jitkellmu bl-ilsien ta’ pajjiżhom ifisser li jista’ jinstemgħu 20 lingwi fil-Parlament, u dan itellef ħafna u jmewwet id-diskussjonijiet.

Josef Borrell ikkritika wkoll is-safar esaġerat tal-membri parlamentari, li jtellifhom milli jattendu l-laqgħat tal-Parlament.

Huwa ma jaqbilx li l-membri jmorru bħala osservaturi ta’ l-elezzjonijiet li jsiru f’pajjiżi barra l-Unjoni, u li jieħdu sehem f’missjonijiet ta’ l-UE għal-laqgħat internazzjonali, fejn spiss jattendu mingħajr ma jagħtu ebda kontribut ta’ siwi.

Dan huwa biss ħela ta’ żmien u ta’ flus.

L-ispiża tal-Parlament Ewropew hija enormi u żgur mhux ġustifikata bil-ħidma tal-membri parlamentari, aktar u aktar, meta l-ħidma tagħhom titqabbel ma’ dik tal-membri tal-parlamenti nazzjonali.

Awguri lill-Graffitti

Il-Kampanja Ħelsien Nazzjonali tawgura lill-attivisti qalbenin tal-Moviment Graffiti li jirbħu l-kawża Kostituzzjonali li għamlu biex jiddefendu d-dritt fundamentali tagħhom ta’ l-espressjoni ħielsa li tkasbar meta ma tħallewx jifirxu l-‘banners’ “Peace Not War” u “Warships Kill” bi protesta kontra d-dħul ta’ ħames bastimenti tal-gwerra tan-NATO fil-Port il-Kbir fid-19 ta’ Frar.

Nappellaw lill-pubbliku juri l-appoġġ tiegħu għal dawn iż-żgħażagħ Maltin li jridu jħarsu n-newtralità ta’ pajjiżna.

Is-Sibt, 18 ta’ Marzu, 2006.  

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien?

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ