MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
Mill-Kampanja Ħelsien Nazzjonali CNI
Fl-istraġi tas-Sea Malta għandhom ħtija kemm il-Gvern
Malti kif ukoll l-Unjoni Ewropea.
Għax il-Gvern bla sinsla aċċetta dak li trid l-Unjoni
li jżarma l-kumpaniji tal-poplu u jgħaddi n-negozju tagħhom lill-privat.
Din hija l-politika meskina ta' l-Unjoni li ċċahhad
lill-poplu kollu mill-qligħ tal-kumpaniji biex il-qligħ jiehdu l-privat.
Il-Gvern Malti wasal biex jgħid li huwa llegali li
jgħin kumpanija nazzjonali tal-poplu li tikkompeti ma' kumpaniji tal-privat.
Ma għandna ebda liġi Maltija li tagħmel dan illegali.
Hija biss l-Unjoni Ewropea li tgħid li dan ma għandux
iseħħ.
B'danakollu, pajjiżi kbar li ilhom madwar 50 sena
fl-Unjoni Ewropea, xorta waħda jħossu l-ħtieġa li jgħinu lill-kumpaniji ħalli
jkomplu jmexxu, avolja l-għajnuna tal-gvern titqies li tistorna l-kompetizzjoni
bejn il-kumpaniji mgħejjuna u kumpanji oħrajn kompetituri tagħhom.
Għadu kif sar magħruf li l-Gvern Ġermaniz jagħti 17-il
biljun euro f'sussidji lill-kumpaniji kummerċjali, Franza tagħti f'sussidji
lill-kumpaniji kummerċjali disa' biljun euro, u l-Italja tħallas seba' biljun
euro f'sussidji lill-kumpaniji kummerċjali.
Il-Gvern Malti, meta jaf b'dan kollu, jħobb jistqarr
li s-sistema ta' għajnuna governattiva lill-kumpaniji kummerċjali hija sistema
qadima u li llum pajjiżi moderni ma jħaddmuhiex.
Il-Gvern Malti huwa għal kollox żbaljat meta biex
jogħġob lill-Unjoni Ewropea, ma jagħtix kull għajnuna li jkollhom bzonn ħalli
jkomplu jmexxu u jżommu fl-impjieg l-ħaddiema tagħhom.
Il-kumpanji barranin li magħhom il-kumpaniji f'Malta
jikkompetu, joperaw f'ċirkostanzi differenti minn dawk ta' Malta u jgawdu minn
ħafna vantaġġi li l-kumpaniji f'Malta ma għandhomx u għandhom spejjeż inqas
milli għandhom il-kumpaniji f'Malta.
L-ammont ta' investimenti mill-Maltin huwa żgħir ħafna
meta tqabblu ma' l-ammonti ta' investimenti li jsiru f'pajjiżi oħra ta' l-Unjoni
Ewropea.
Għalhekk jeħtiġilna ngħinu lill-kumpaniji li għandna
ħalli jkomplu joperaw, għax jekk jieqfu, ftit għandna opportunità biex jitwaqqfu
kumpaniji oħrajn ħalli jipprovdu l-postijiet tax-xogħol għall-ħaddiema
tagħna.
Fil-każ tas-Sea Malta, id-deċiżjoni tal-Gvern li
jxoljiha, kienet żball kbir għal ħafna raġunijiet.
Barra mill-fatt li l-Gvern illiċenzja mill-impjieg 144
ħaddiem bix-xoljiment tas-Sea Malta, huwa tellef lill-pajjiż id-dħul li s-Sea
Malta kienet tagħmel min-noll li kienet iddaħħal għat-trasport
tal-merkanzija.
In-noll li s-Sea Malta kienet iddaħħal mill-merkanzija
li kienet iġġib lejn Malta u li kien jitħallas mill-importaturi, kien jibqa'
f'pajjiżna permezz tal-pagi tal-ħaddiema Maltin tas-Sea Malta.
Issa n-noll imħallas mill-importaturi f'Malta
lill-imprenditur barrani li ħa n-negozju tas-Sea Malta, se jmur għand
l-imprenditur barrani u jmur fil-bwiet tal-baħħara barranin ta' l-imprenditur
barrani.
L-istess diskors jista' jingħad għall-merkanzija
esportata minn Malta.
In-noll li kienet iddaħħal is-Sea Malta kien jitħallas
mill-barranin li kienu jixtru minn Malta u jmur fil-bwiet tal-baħħara u
l-ħaddiema l-ohra Maltin tas-Sea Malta.
Issa n-noll li l-barranin iħallsu għall-esportazzjoni
tal-merkanzija minn Malta, jmur għand l-imprenditur barrani li ħa n-negozju
tas-Sea Malta u għand il-baħħara barranin tiegħu.
Il-ħaddiema u l-baħħara
tas-Sea Malta li mhux se jsibu impjieg alternattiv, barra t-tbatijiet tagħhom u
tal-familji tagħhom, se jkunu wkoll piż fuq il-pajjiż u l-Gvern mhux se jiġbor
il-kontribuzzjonijiet tas-sigurtà soċjali u t-taxxi li kien jigbor
mingħandhom.
Dan it-telf kollu għall-pajjiż qiegħed iseħħ b'kapriċċ
tal-Prim Ministru Gonzi u l-Ministru Gatt li bid-deċiżjonijiet ħżiena tagħhom
qerdu l-kumpanija tas-Sea Malta, basta jogħġbu lill-Unjoni Ewropea.
Fil-konferenza ta' l-aħbarijiet li s-CNI tat kmieni
din il-ġimgħa, iċ-Chairman tas-CNI, Karmenu Mifsud Bonnici, saħaq fuq il-ħtija ta'
l-Unjoni Ewropea għat-tkissir tas-Sea Malta u d-dmir li l-Ministru Austin Gatt
għandu li jirriżenja minħabba l-falliment tal-privatizzazzjoni tas-Sea
Malta.
Intqal li l-Ministru Gatt għandu jirriżenja għal
diversi raġunijiet.
Huwa kellu l-inkarigu li jipprivatizza s-Sea Malta,
jiġifieri jbiegħ l-isħma tal-Gvern lill-privat.
Huwa falla f'dan l-inkarigu.
Il-Ministru Gatt kellu d-dmir li jdaħħal kemm jista'
flus mill-privatizzazzjoni tas-Sea Malta u mill-bejgħ ta' l-isħma tal-Gvern.
Huwa ma rnexxilux idaħħal ċentezmu wieħed, minħabba
d-deċiżjoni bla kuxjenza li ħa li jxolji s-Sea Malta.
Agħar minn hekk, il-Ministru Gatt ta rigal u b'xejn
in-negozju u x-xogħol li kienet tagħmel is-Sea Malta.
In-negozju u x-xogħol tas-Sea Malta kien tal-poplu
Malti kollu u l-Ministru Gatt mingħajr ebda dritt, qabad u tahom b'xejn, minflok
tħallas tagħhom.
Meta Grimaldi rtira l-offerta li jixtri l-isħma li
l-Gvern kellu fis-Sea Malta, il-Ministru Gatt kellu d-dmir li jfittex xerrej
ieħor, anki jekk dan kien se jagħmillu offerta inferjuri għal dik ta' Grimaldi.
Minflok aġixxa b'dan il-mod kif kellu jagħmel,
il-Ministru Gatt qabad u ta n-negozju u x-xogħol b'xejn lil Grimaldi li sfratta
l-offerta li jixtri l-isħma.
Il-Ministru Gatt kellu d-dmir sagrosant li jiżgura li
min jieħu n-negozju u x-xogħol tas-Sea Malta, jieħu miegħu l-akbar numru ta'
ħaddiema tas-Sea Malta.
Minflok żgura li dan iseħħ, il-Ministru ta s-setgħa
lil Grimaldi li ma jieħu lil ħadd f'impjieg miegħu mill-ħaddiema li kienu
impjegati mas-Sea Malta.
Għalhekk huwa sar responsabbli għas-sensji ta' 144
ħaddiema.
Grimaldi ma riedx jonora l-ftehim kollettiv
tal-baħħara tas-Sea Malta.
Il-Ministru Gatt kellu d-dmir jinsisti ma' Grimaldi li
jħares il-ftehim kollettiv.
Minflok, huwa appoġġja lil Grimaldi li jikser
il-ftehim kollettiv u jbiddel il-kundizzjonijiet tax-xogħol tal-baħħara tas-Sea
Malta.
B'dan il-mod il-Ministru Gatt għen biex tinkiser
il-liġi li tgħid li s-sidien ma jistgħux ma jonorawx il-ftehim kollettiv.
Minflok għen lill-General Workers' Union ħalli din
tfiehem lill-baħħara tas-Sea Malta jagħmlu kompromess dwar il-kundizzjonijiet
tax-xogħol tagħhom, huwa insulenta lill-baħħara li kellhom dritt skond il-liġi
ma jħallux jinbidlu arbitrarjament minn Grimaldi l-kundizzjonijiet tal-ftehim
kollettiv tagħhom.
Lil Grimaldi l-Ministru Gatt kien wegħdu li jeħodlu 76
ħaddiema mis-Sea Malta u jħalli biss 68 mal-kumpanija mixtrija minn Grimaldi.
Kieku l-Ministru Gatt iffranka lis-Sea Malta l-pagi
ta' 76 ħaddiema kif huwa ftiehem li jagħmel lil Grimaldi, is-Sea Malta żgur
kienet tinxtara minn ħaddiehor, jew, aħjar, żgur setgħet tkompli taħdem bi
profitt kbir.
Fil-każ tal-Public Broadcasting Services, tal-Malta
Drydocks, tal-Marsa Shipbuilding, tal-Medigrain u tal-Malta Development
Corporation, il-Ministru Gatt kien ftiehem li l-impjegati li riedu jirtiraw u
jieħdu t-terminal benefits, setgħu jagħmlu dan.
Iżda mingħajr ebda ġustifikazzjoni, il-Ministru Gatt
ċaħħad lill-baħħara tas-Sea Malta li jieħdu t-terminal benefits u jirtiraw
mill-impjieg.
Skond il-liġi tar-Relazzjonijiet Industrijali, min
jieħu n-negozju ta' kumpanija li ma tkomplix topera, huwa obbligat iżomm
fl-impjieg, bl-istess kundizzjonijiet, l-impjegati tal-kumpanija li tieqaf
topera.
Il-Ministru Gatt minflok obbliga lil Grimaldi josserva
l-liġi, ħelsu minn dan l-obbligu legali.
Meta ta n-negozju u x-xogħol
tas-Sea Malta b'xejn lil Grimaldi, il-Ministru Gatt għamel att frawdolenti bi
ksur tal-liġi tal-kumpaniji.
Skond din il-liġi, ma tistax fi żmien sitt xhur qabel
ixxolji kumpanija, tagħmel transazzjoni li biha tnezza lill-kumpanija minn xi
gid jew dritt li jkollha.
In-negozju u x-xogħol tas-Sea Malta jiswa flus kbar.
Il-Ministru Gatt għamel att frawdolenti meta tahom lil
Grimaldi qabel ix-xoljiment tas-Sea Malta.
B'hekk, barra li nsteraq il-poplu Malti, seħħ dannu
lill-kredituri tas-Sea Malta, li fosthom hemm il-ħaddiema tagħha li għandhom
dritt jitħallsu t-terminal benefits.
Għal dawn ir-raġunijiet kollha, iċ-Chairman tas-CNI, fil-konferenza ta' l-aħbarijiet, sostna li d-diċenza titlob li l-Ministru Gatt jirriżenja għax żbalja u falla bl-ikraħ.
Ġurament ta' lealta` li jieħdu l-Membri Parlamentari kollha
Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).
Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.
Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).
Ġurament għall-qadi xieraq tal-kariga ta’ President.
Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).
Sezzjoni 6 tal-Kostituzzjoni ta' Malta
6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.
Artiklu I-6 tal-Kostituzzjoni ta' l-Unjoni Ewropea
Dritt ta' l-Unjoni
Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.
Tista' tafda lil min KISER il-ĠURAMENT tiegħu/tagħha?
Is-Sibt, 17 ta’ Diċembru, 2005.
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat Lm2 flimkien ma' din il-formola liċ-
Chairman CNI,
Dr Karmenu Mifsud Bonnici LL.D.
81, Triq Ġuże Pace,
Ħamrun.
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ