MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Inti qed tħallas Lm70.75 lill-UE

Ħadd ma jgħid lill-votanti Maltin u Għawdxin kemm qegħdin kull wieħed u waħda minnhom iħallsu kull sena lill-Unjoni Ewropea. 

Skond l-estimi tas-sena 2007, l-Unjoni se tirċievi minn Malta l-ammont ta’ Lm22,030,000. 

F’Malta u Għawdex, skond l-aħħar taghħrif, għandna 311,341 votant. 

Mela kull votant se jħallas taxxi lill-Unjoni, s-sena d-dieħla, l-ammont ta’ Lm70.75c. 

Din is-somma titħallas mit-taxxi diretti u indiretti li l-Gvern Malti jiġbor minn fuq il-Maltin u l-Għawdxin.

Il-propagandisti ta’ l-Unjoni Ewropea f’Malta qatt ma jsemmu l-fatt li kull Malti u Għawdxi jkollu jħallas Lm70.75c fis-sena lill-Unjoni minħabba s-sħubija fiha. 

U dan mhux il-piż sħiħ tas-sħubija. 

Għax barra dan l-ammont, kull Malti u Għawdxi jkollu jħallas għall-ispiża tas-sħubija li tammonta għal miljuni ta’ liri li jiġu mit-taxxi diretti u indiretti li jkollna nħallsu lill-Gvern.

Jgħidulna biss kemm se jiġu miljuni mill-Unjoni. 

Ma jgħidulniex la kemm se nagħtu lill-Unjoni u lanqas kemm tiswielna s-sħubija fl-Unjoni. 

Dan ma jgħiduhx għax ma jaqblilhomx jgħiduh. 

Kieku jagħmlu l-kontijiet sewwa, il-poplu Malti u Għawdxi jintebaħ li wara kollox m’hemmx gwadan kbir bis-sħubija fl-Unjoni Ewropea. 

Żgur il-ftit gwadan ma jagħmilx tajjeb għal dak kollu li tlifna u li se nkomplu nitilfu fil-ġejjieni.

Mhux biżżejjed li jkollna nħallsu prezzijiet miżjudin bid-dazji li toħodhom l-Unjoni għal oġġetti li nixtru minn pajjiżi barra l-Unjoni. 

Mhux biżżejjed li jkollna nħallsu t-taxxi li trid l-Unjoni fuq il-prodotti taż-żejt li nixtru kull sena, li s-sena d-dieħla se jammontaw għal Lm38,300,000. 

Mhux biżżejjed li l-poplu jkollu jħallas it-taxxa tal-VAT skond ma trid l-Unjoni Ewropea fuq l-oġġetti li jixtri u s-servizzi li jingħata, li s-sena d-dieħla se jammontaw għal mija u tmenin miljun lira. 

Issa se jkollna nħallsu l-multi bil-miljuni lill-Unjoni.

L-Unjoni Ewropea għadha kif waħħlet lil Malta multa ta’ miljun Ewro għax in-negozjanti Maltin kienu bil-għaqal li xtraw kwantità kbira ta’ zokkor minn barra l-Unjoni meta kienu jafu li bis-sħubija fl-Unjoni kien se jkollhom iħallsu prezz tliet darbiet ogħla għaz-zokkor mixtri mill-pajjiżi ta’ l-Unjoni. 

Il-multa se titħallas mit-taxxi miġburin minn fuq il-poplu Malti u Għawdxi. 

Il-prezz ogħla taz-zokkor ibatih ukoll il-poplu Malti u Għawdxi minhabba s-sħubija fl-Unjoni.

L-Unjoni ġimgħatejn ilu għamlet dazju ta’ 16 fil-mija fuq iż-żraben tal-ġild li nixtru miċ-Ċina. 

Id-dazju tieħdu l-Unjoni u jħallsu l-poplu Malti u Għawdxi meta jixtri ż-żraben Ċiniżi.

Bħal dawn hemm mijiet ta’ eżempji oħrajn ta’ kemm il-Maltin u l-Għawdxin qegħdin imorru minn taħt minħabba s-sħubija fl-UE.

Futur inċert għall-Kostituzzjoni

Angela Merkel, il-Kanċillier tal-Ġermanja, fis-sitt xhur mill-1 ta’ Jannar li ġej, se tkun il-President ta’ l-Unjoni Ewropea. 

Hija diġà qalet li fi ħsiebha tqanqal il-kwistjoni tal-Kostituzzjoni Ewropea li ilha mejta ’l fuq minn sena wara li l-Franċiżi u l-Olandiżi vvotaw kontra l-Kostituzzjoni.

Merkel trid li jitfassal pjan (roadmap) għad-diskussjonijiet dwar il-Kostituzzjoni Ewropea u li jintlaħaq ftehim dwarha qabel l-elezzjonijiet għall-Parlament Ewropew li għandhom isiru fl-2009. 

Hija ssostni li l-Kostituzzjoni Ewropea ma tinbidilx u ma taqbilx li minflokha ssir verżjoni qasira tal-Kostituzzjoni.

Iżda l-Prim Ministru ta’ l-Olanda, Jan Peter Balkenende, huwa kontra li jerġa’ jsir referendum f’pajjiżu dwar Kostituzzjoni Ewropea għax hemm il-biża’ li l-poplu Olandiż għat-tieni darba jivvota kontriha. 

Huwa għalhekk lanqas jara skop li jkun hemm diskussjoni kif trid Merkel dwar il-Kostituzzjoni Ewropea, qabel ma jinstab mezz kif tintgħeleb l-oppożizzjoni popolari għaliha.

Fi Franza, il-Ministru ta’ l-Intern, Nicolas Sarkozy, li s-sena d-dieħla se jikkontesta għal President tal-pajjiż, ħareġ bil-proposta li titħalla barra t-tielet parti tal-Kostituzzjoni Ewropea, li hija l-parti tal-Kostituzzjoni li l-Franċiżi l-aktar li oġġezzjonaw għaliha.

Il-Ministru ta’ l-Intern ta’ l-Italja, Giuliano Amato, li kien wieħed mill-Viċi-Presidenti tal-Konvenzjoni li fasslet il-Kostituzzjoni Ewropea, qiegħed imexxi grupp ta’ “għorrief” li qiegħed jistħarreġ x’jista’ jsir dwar il-Kostituzzjoni biex tikseb l-appoġġ popolari. 

Jidher li dan jaqbel li tinqata’ barra t-tielet parti tal-Kostituzzjoni Ewropea fejn hemm marbuta l-politika ekonomika u soċjali ta’ l-Unjoni Ewropea.

Il-Membru Olandiż tal-Parlament Ewropew, Jens Peter Bonde, qiegħed jisħaq li minflok isiru tibdiliet għall-Kostituzzjoni Ewropea, għandha ssir diskussjoni ħalli titfassal waħda ġdida. 

Għal dan l-iskop għandha tissejjaħ Konvenzjoni oħra li tkun magħmula minn għaxar rappreżentanti eletti direttament mill-votanti ta’ kull pajjiż membru ta’ l-Unjoni. 

Dawn ikollhom ix-xogħol li jfasslu żewġ kostituzzjonijiet, waħda għall-Unjoni Ewropea li tkun stat li fih il-pajjiżi membri ma jkunux indipendenti, u kostituzzjoni oħra għall-Unjoni Ewropea li tkun Ewropa tad-demokraziji li jikkoperaw bejniethom iżda jibqgħu indipendenti.

Bonde qed jipproponi li wara jsir referendum ma’ l-Unjoni Ewropea kollha fl-istess jiem u ċ-ċittadini ta’ l-Unjoni jkollhom id-dritt li jivvotaw favur il-Kostituzzjoni li jridu mit-tnejn imfasslin. 

Dik li tikseb l-appoġġ tal-maġġoranza ssir il-Kostituzzjoni ġdida ta’ l-Unjoni Ewropea.

Bonde ddikjara li huwa jippreferi l-Kostituzzjoni tad-demokraziji li tħalli l-pajjiżi mseħbin indipendenti u sovrani.

Dan kollu juri li l-ġejjieni tal-Kostituzzjoni Ewropea huwa inċert ħafna. 

Ħaġa waħda hemm ċerta. 

Din hija li l-Parlament Malti vvota għalxejn favur il-Kostituzzjoni mfassla mill-Unjoni Ewropea wara li din kienet miċħuda mill-Franċiżi u l-Olandiżi.

Kundanna ħarxa

F’pajjiżna l-politiċi, l-ekonomisti u l-midja kollha jkantaw il-vantaġġi li se niksbu billi ndaħħlu l-Ewro fl-1 ta’ Jannar, 2008. 

Iżda f’pajjiżi oħrajn ta’ l-Unjoni Ewropea fejn għandhom esperjenza ta’ l-Ewro, jaħsbuha mod ieħor minn kif jaħsbuha l-politiċi, l-ekonomisti u l-midja tagħna.

Fi Franza hemm Kunsill dwar l-Ekonomija (Conseil d’Analyse Economique) li jħaddan fih għadd ta’ ekonomisti magħrufin u l-president tiegħu huwa l-Prim Ministru Dominique de Villepin. 

Dan l-aħħar, dan il-Kunsill ħareġ rapport li janalizza l-politika ekonomika u t-tkabbir ekonomiku ta’ l-Unjoni.

Ir-rapport juri biċ-ċar kemm it-tkabbir ekonomiku ta’ l-Unjoni, u aktar u aktar it-tkabbir tal-pajjiżi ta’ l-Unjoni li daħħlu l-Ewro, huwa fqir ħafna, li dan in-nuqqas ġej mis-sistema tal-politika ekonomika li l-Unjoni tħaddem, li hija ineffiċjenti u li hija l-kaġun tat-tkabbir ekonomiku kajman ħafna.

Skond ir-rapport tal-Kunsill Franċiż dwar l-Ekonomija, is-sistema tal-politika ekonomika ta’ l-Unjoni Ewropea hija difettuża u ma tistax taħdem sewwa (dysfunctional).

Ir-rapport jgħid li meta tifli l-istrutturi tas-swieq ta’ l-oġġetti, tal-ħaddiema u tal-kapital tal-pajjiżi membri ta’ l-Unjoni, issib li s-sħubija fl-Unjoni ma kellhiex xi mpatt kbir fuq riformi li setgħu saru u b’liema ħeffa saru, f’dawk il-pajjiżi, it-tibdil li sar kien minħabba fatturi li laqtu l-pajjiżi kollha tad-dinja, u mhux b’konsegwenza tas-sħubija fl-Unjoni.

Ir-raport ifisser li fil-pajjiżi ta’ l-Unjoni ma kienx hemm tkabbir f’daqqa tal-kummerċ u tas-servizzi wara li daħal fis-seħħ it-trattat ta’ l-Unjoni Ewropea, magħruf bħala s-“Single Act” ta’ l-1993, jew wara li daħal l-Ewro fl-1999. 

s-“Single European Act” għaqqad flimkien ħafna ftehim li kienu saru matul is-snin minn mindu twaqqfet il-Komunità Ewropea, tejjeb il-mod kif titmexxa l-Unjoni, u wiegħed aktar integrazzjoni tal-pajjiżi membri.

Skond ir-rapport Franċiż lanqas ma ntlaħaq l-għan li l-prezzijiet ikunu l-istess fil-pajjiżi kollha ta’ l-Unjoni Ewropea, kif kien mistenni meta saret l-għaqda monetarja (“Monetary Union”). 

Dawn in-nuqqasijiet kollha kienu konsegwenza tal-mod ħażin kif jaħdmu l-istituzzjonijiet ta’ l-Unjoni.

Ir-rapport kompla jsostni li l-ekonomiji tal-pajjiżi ta’ l-Unjoni ma ntegrawx flimkien u dan il-fatt ma kienx qed jgħin biex ikun hemm tkabbir ekonomiku fl-Unjoni. 

Fuq kollox, l-Ewro ma ġabx il-benefiċċji li kienu mistennijin. Iż-żieda fil-kummerċ ma kinetx kbira u s-swieq finanzjarji baqgħu mifrudin.

Fir-rapport insibu li d-dħul tal-munita komuni, l-Ewro, kellha effett li ddgħajjef lill-pajjiżi ta‘ l-Unjoni għax dawn ma baqgħux iħossu l-ħtieġa li jisħqu ħalli ma jsibux ruħhom fi kriżi li ma jkollhomx riżervi barranin, u ma baqgħux jagħfsu biex irażżnu l-infiq pubbliku u biex iwettqu r-riformi meħtieġa. 

Ir-rapport jissokta jgħid li l-istrateġija miftehma mill-Unjoni f’Lisbona (magħrufa bħala “Lisbon Agenda”) inkaljat f’ħafna proċeduri, tant li llum ma tfisser xejn għajr kliem vojt fix-xejn u retorika.

Imbagħad insibu fir-rapport tal-Kunsill Franċiż dwar l-Ekonomija punt mill-aktar interessanti għalina f’Malta li tant qegħdin nisimgħu tifħir dwar l-Ewro. 

Ir-rapport jgħid li l-esperjenza ta’ l-Ewro hija bil-maqlub ta’ dak li kien imbassar meta ddaħħal. 

L-impatt tad-dħul ta’ l-Ewro kien żgħir, u l-pajjiżi li ma daħħlux l-Ewro kabbru l-esportazzjoni lejn il-pajjiżi li daħħlu l-Ewro, mhux bil-maqlub.

Il-kittieba tar-rapport Franċiż jistqarru li huma konvinti li l-qagħda ekonomika fl-Unjoni hija ħazina, u l-fatt li l-Unjoni mhux qiegħda jirnexxilha tagħti ħajja ġdida lill-ekonomija, qiegħed ikun kaġun li l-investimenti qegħdin jitbegħdu mill-pajjiżi ta’ l-Unjoni. 

In-nuqqas dejjiemi ta’ l-impjiegi u t-tkabbir ekonomiku żgħir ħafna qegħdin jimminaw s-servizzi soċjali. Id-damma flimkien tal-problemi ekonomiċi jmewtu l-moral ta’ l-Unjoni u t-tkabbir ta’ l-Unjoni li ma sarx sewwa u l-proċeduri twal li jifnuk, kollha jwasslu għaċ-ċirku vizzjuż li se jispiċċa biex anki jħott l-‘acquis communitaire ’(jiġiferi, dak kollu li ġie deċiż mill-Unjoni kemm ilha li twaqqfet).

Tajjeb li niftakru li din il-kundanna qawwija tal-politika u t-tmexxija ekonomika ta’ l-Unjoni Ewropea u ta’ l-Ewro ġejja mhux minn Ewroxettici bħalna, iżda minn ekonomisti li huma favur l-Unjoni Ewropea.

Il-Ħamis, 16 ta’ Novembru, 2006.

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ