MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Disgha u għoxrin sena ilu ħlisna mill-bażi barranija. 

Issa jridu li s-sena d-dieħla, ikollna bażi marittima barranija, billi t-Tarzna tingħata lill-barranin. 

Għax 

* il-baċiri,

* il-mollijiet, 

* il-ħwienet tax-xogħol,

* l-attrezzi u 

* l-għodda tat-Tarzna 

jagħmlu mit-Tarzna bażi marittima mill-aqwa li l-Gvern irid jgħaddi lill-barranin. 

Minn bażi navali Ingliża, it-Tarzna se ssir bażi marittima barranija. 

Is-CNI toġġezzjona li f’pajjiżna se jerġa’ jkollna bażi barranija.

La l-privatizzazzjoni tat-Tarzna u lanqas it-twaqqif tas-sussidju lilha ma jeħtieġu li t-Tarzna tinbiegħ lill-barranin. 

Privatizzata u tmexxi mingħajr sussidji, it-Tarzna tista’, u għandha tibqa’ f’idejn Maltin. 

Il-ġieh nazzjonali hekk jitlob minn kull veru Malti li jgħożż lil pajjiżna u lill-poplu tagħna.

Jekk it-Tarzna wkoll tkun tal-barranin, is-CNI tistaqsi, x’jibqa’ tal-Maltin? 

* L-aqwa bank, il-Mid-Med tajnih lill-barranin. 

* Il-Freeport hu f’idejn il-barranin. 

* L-Air Terminal għaddejnih lill-barranin. 

* Il-Maltacom benieha lill-barranin. 

* Il-ħatt u t-tagħbija tal-merkanzija fil-Port il-Kbir huwa f’idejn il-barranin. 

* Il-Lottu jmexxuh il-barranin. 

* Il-Posta spiċċat ċens lill-barranin. 

* Parti kbira minn Ta’ Qali ħaduha l-Amerikani. 

* Tlifna kważi l-industrija lokali tal-manifattura. 

* It-trasport ta’ l-esportazzjoni li Sea Malta kienet tagħmel, ingħata lill-barranin u 

* s-Sea Malta nqerdet.

Dak kollu li b’għaqal u ħila kbira bnew ta’ qabilna għal ġensna, begħnih, u minkejja li begħna dal-ġid kollu, għabbejna lil pajjiżna bil-biljuni dejn. 

Il-Parlament tagħna m’għadux sovran,

Il-Gvern m’għadux ħieles li jiddeċiedi huwa, u rajna m’għadux f’idejna, għax kollox isir kif tgħid l-Unjoni Ewropea.

Is-CNI ssostni li erġajna sirna kolonja, mhux ta’ l-Ingliżi, iżda ta’ l-Unjoni Ewropea. 

Bħalma qabel kellna Maltin li ħasbu għar-rashom u servew lill-Imperu, mhux lil Malta, l-istess illum għandna Maltin li jfittxu l-interessi tagħhom qabel kollox, u għalihom l-Unjoni Ewropa tiġi qabel Malta. 

Il-ġibda tal-flus ta’ l-Unjoni seħtet liż-żgħażagħ tagħna, telfitilhom ġiehhom u jasrithom. 

M’humiex aktar lesti jissagrifikaw ruħhom għal art twelidhom u għal għajrhom. 

Is-sħubija fl-Unjoni Ewropea mhux biss għamlitilna ħsara materjalment, iżda li huwa ħafna agħar, dgħajfitna moralment. 

Ma’ ġidna, tlifna ruħna u ġiehna.

Il-ġejjieni tat-Tarzna joffrilna l-opportunità biex inwaqqfu l-emoraġija tar-riżorsi nazzjonali Maltin milli jkomplu jinbidlu fi proprjetà tal-barranin. 

Jekk il-Gvern irid jobdi l-Unjoni Ewropea u jitlaq minn idejh it-Tarzna u jwaqqfilha l-għajnuna wara l-aħħar ta’ din is-sena, il-ħaddiema li jridu jissoktaw jaħdmu fit-Tarzna, għandhom joħduha f’idejhom u jsieħbu magħhom imsieħeb li kapaċi jipprovdi tmexxija professjonali effiċjenti u ‘marketing’ effettiv kif it-Tarzna teħtieġ, mingħajr aktar indħil u għajnuna mingħand il-Gvern.

Is-CNI temmen li l-poplu Malti, li ma jixtieqx li bit-taxxi tiegħu jagħmel tajjeb għat-telf tat-Tarzna, għandu jkun kburi li t-Tarzna tibqa’ tal-Maltin u ma terġax taqa’ f’idejn il-barranin, għax it-Tarzna hija parti strateġika minn pajjiżna, u hija magħġuna ma’ l-istorja ta’ Malta.

Is-Sibt, 16 ta’ Awwissu, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ