MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Ineffiċjenza u ħela fl-UE

L-Unjoni Ewropea, li tippretendi li ġġiegħel lill-gvernijiet tal-pajjiżi membri imexxu b’mod effiċjenti, ħwejjiġha tmexxihom bl-aktar mod ineffiċjenti, b’ħela enormi ta’ flus.

Eżempju ta’ dan huwa l-għadd kbir ta’ aġenziji li hija twaqqaf ħalli jieħdu ħsieb oqsma speċfiċi, bħalma huma l-vizzju tad-droga, id-drittijiet tal-bniedem u t-taħriġ professjonali.

Illum l-aġenziji fl-Unjoni Ewropea jgħoddu 23.

Fost dawk li ma jaqblux dwar il-ħtieġa ta’ ħafna minnhom, insibu lill-Awstrijak Herbert Bosch, iċ-Ċermen tal-Kummissjoni tal-Parlament Ewropew li tikkontrolla l-baġit ta’ l-Unjoni.

Bosch jgħid li l-Unjoni tbagħti mill-marda ta’ l-aġenziji li huwa jsejjaħ “aġenzijitis”.

Din qiegħda tixrob flejjes kbar ta’ l-Unjoni, madwar biljun Ewro fis-sena, li wara kollox jiġu mit-taxxi li jħallsu ċ-ċittadini tal-pajjiżi ta’ l-Unjoni, inklużi l-Maltin.

Hemm 3,737 impjegati fl-aġenziji ta’ l-Unjoni.

Skond Bosh, ħadd fl-Unjoni Ewropea ma jifli kemm huma tassew siewja dawn l-aġenziji kollha li joperaw mingħajr kontroll ta’ ħadd u mingħajr ħadd m’huwa responsabbli tagħhom.

Huwa jasal biex jilmenta li fl-Unjoni Ewropea qiegħda titrawwem kultura li huwa jsejjaħ “kultura ta’ l-irresponsabbiltà”.

Il-Parlament Ewropew ikkritika lill-Kummissjoni Ewropea dwar it-twaqqif ta’ l-aġenziji.

Iżda mhux biss minħabba ’l ħafna aġenziji li l-Parlament Ewropew ikkritika lill-Kummissjoni Ewropea.

Il-Parlament ilmenta wkoll għal numru kbir ta’ impjegati li hemm mal-Kummissjoni Ewropea, li llum jlaħħqu 19,004.

Inge Grafsle, kelliema tal-Membri tal-Parlament Ewropew tal-Partit Popolari Ewropew, issostni li ma tidhirx li hemm il-ħtieġa għal ħafna mill-impjegati li tqabbdu dan l-aħħar mill-Kummissjoni.

Eżempju ta’ dan hija t-taqsima tal-Kummissjoni Ewropea responsabbli mill-informazzjoni u l-propaganda li għandha 1,200 impjegat.

Minkejja dawn l-impjegati kollha, Inge Grafsle tirrimarka li d-dehra tal-Kummissjoni f’għajnejn il-pubbliku m’hija tajba xejn.

Eżempju ieħor ta’ l-iffangar ta’ l-Unjoni Ewropea fin-numru ta’ impjegati, ngħata dan l-aħħar meta l-Bulgarija u r-Rumanija ssieħbu fl-Unjoni, fil-bidu ta’ din is-sena.

Fil-bidu tas-sena l-Kummissjoni Ewropea qabdet 741 impjegati ġodda biex jaraw li jitħaddem sewwa s-suq komuni fiż-żewġ pajjiżi membri ġodda.

Grafsle tgħid li l-ispejjeż tal-Kummissjoni Ewropea qegħdin jisparaw ’l fuq, fosthom il-fondi li l-Unjoni trid twarrab għall-pensjonijiet ta’ l-impjegati, li għas-sena d-dieħla huma stmati li jkollhom żieda ta’ għaxra fil-mija.

Dawn ifissru piżijiet akbar ta’ taxxi li jħallsu ċ-ċittadini ta’ l-Unjoni, inklużi l-Maltin u l-Għawdxin.

L-Unjoni Ewropea tagħmel propoganda biex tbeżża’

Il-propoganda saret il-ħobża ta’ kuljum li mingħajrha l-Unjoni Ewropea tispiċċa tmut bil-ġuħ!

Tant jafu li l-Unjoni Ewropea tista’ tibqa’ teżisti biss jekk tibqa’ tbeżża lill-poplu ta’ l-Ewropa bil-babaw ta’ l-aħħar gwerra, li spiss jaqgħu għar-redikolu b’dak li jgħidu l-Kummissarji ta’ l-Unjoni Ewropea u dawk li jirrepetu bħal pappagalli dak li jkunu qalu l-Kummissarji.

L-aktar frażi li jħobbu jirrepetu hi li “l-Unjoni Ewropea ġabet il-paċi fl-Ewropa”.

Il-waqfien mill-gwerra ġabuha l-armati tal-Gran Brittanja, ta’ l-Istati Uniti ta’ l-Amerika u ta’ l-Unjoni Sovjetika.

Urejniekom kif, fil-fatt, mhux “ġiet il-paċi” iżda nħolqot “il-gwerra bierda flok dik bl-armi” bejn il-blokk Sovjetiku u l-Warsaw Pact min-naħa u l-blokk tan-NATO min-naħa l-oħra.

Din il-ħrafa għadhom jirrepetuha sa llum.

Iżda f’ċerti ċirkostanzi qegħdin iżidu d-doża billi jipprovaw idaħħlu fl-imħuħ taċ-ċittadini u politiċi Ewropej, li jekk il-Kostituzzjoni ta’ l-Unjoni Ewropea, li issa iridu jdaħħlu taħt isem ieħor, dak ta’ Trattat ta’ Riforma, jibqa’ ma jidħolx fis-seħħ, tista’ terġa’ tfaqqa’ gwerra oħra fl-Ewropa.

Taħsbux li qegħdin nesaġerew biex inpinġu kerha lill-Unjoni Ewropea.

Araw il-prova, kif dejjem tajna aħna tas-CNI.

Mela l-Kummissarju Svediża Margot Wallstrom, li għandha r-responsabbiltà li tippromwovi d-dħul tal-Kostituzzjoni ta’ l-Unjoni Ewropea taħt il-maskra tat-Trattat ta’ Riforma, marret tagħmel diskors f’dak li fi żmien l-aħħar gwerra kien magħruf bħala “il-Ghetto Lhudi” f’Terezin fir-Repubblika Ċeka, fl-okkażjoni taċ-ċelebrazzjonijiet tat-tmiem tat-Tieni Gerra Dinjija (VE Day).

Margot Wallstrom kellha l-ardir tgħid li dawk il-politiċi li se jirreżistu li pajjiżhom “jaqsam is-sovranità nazzjonli” ikunu qegħdin jirriskjaw li jmorru lura għall-ħruxijiet (‘horrors’) ta’ żmien in-Nażist tas-snin Tletin u Erbgħin.

Wallstrom qalet li t-Tieni Gwerra Dinjija kienet riżultat ta’ ‘pride’ u ‘greed’ nazzjonali u għar-rivalità għall-poter u l-ġid (‘wealth’).

Din il-Kummissarju Svediża kompliet tgħid li l-Unjoni Ewropea bidlet din ir-rivalità fi ftehim storiku li l-pajjiżi ta’ l-Ewropa jibdew jaqsmu bejnithom is-sovranità nazzjonali tagħhom!

Il-Kummissarji Ewropej l-oħrajn, sħab ta’ Wallstrom, ukoll daqqew l-istess diska billi ħarġu dikjarazzjoni li fiha qalu li ċ-ċittadini ta’ l-Unjoni Ewropea imisshom iqimu lil dawk li mietu fit-Tieni Gwerra Dinjija billi jivvotaw “iva” għall-Kostituzzjoni Ewropea.

Jidher li dawn il-Kummissarji, b’għamad quddiem għajnejhom, “insew li dawk li mietu fl-aħħar gwerra taw ħajjithom għal dik l-istess libertà li l-Unjoni Ewropea qiegħda teqred!”

L-UE tinqeda bil-pornografija

L-Unjoni Ewropea waqgħet għall-pornografija biex tagħmel propoganda għall-għanijiet ta’ l-Unjoni.

Xahar ilu ħarġet ‘video-clip’ ta’ 44 sekondi bit-titolu “Id-dilettanti tal-films jogħġobhom dan” (‘Film lovers will love this’) li juri 18-il koppja jkollhom relazzjonijiet sesswali.

Ix-xeni tal-vidjo huma meħudin mill-films “Amilie” u “All about my brother” li nħaddmu b’fondi mogħtijin mill-Unjoni.

Tnejn mix-xeni jġibu koppji ‘gay’ jinħabbu u x-xeni għandhom l-iskop li juru l-ugwaljanza sesswali li l-Unjoni tippriedka.

Il-vidjo jispiċċa bis-sejħa “Ejjew niġu flimkien” (‘Let’s come together’) waqt li jinstemgħu l-ħsejjes ta’ koppji li qegħdin jkollhom relazzjonijiet sesswali.

Dan il-’video clip’ sar mill-Press Unit tal-Kummissarju dwar il-Komunikazzjoni, Margot Wallstrom, bl-iskop li tqanqal interess popolari fil-ħidma ta’ l-Unjoni Ewropea.

Iżda dan il-vidjo waqqa’ lill-Unjoni għar-redikolu u qanqal ħafna kritika.

Membru tal-Parlament Ewropew, Mariej Grietych, xela lill-Unjoni Ewropea li qiegħda tinqeda b’mezzi mmorali biex tagħmel propaganda għaliha.

Membru ieħor tal-Parlament Ewropew, Godfret Boom, saħansitra qal li l-għemil tal-koppji fil-vidjo jixhed dak li l-Unjoni qiegħda tagħmel lill-popli tal-pajjiżi membri.

Membru ieħor tal-Parlment Ewropew, Chris Heaton-Harris, ikkritika lill-Unjoni Ewropea talli qiegħda taħli b’dan il-mod xejn brillanti, il-flus miġburin mit-taxxi tal-popli tal-pajjiżi membri.

Iżda l-Kummissarju Ewropew Margot Wallstrom iddikjarat li huwa importanti ħafna li l-Kummissjoni Ewropa tagħmel użu mill-mezzi kollha li tista’ ħalli tikkomunika maċ-ċittadini ta’ l-Unjoni.

Ta’ min ifakkar li l-Insara Maltin qegħdin jikkontribwixxu sehemhom kull sena ħalli l-Unjoni Ewropea tagħmel dawn il-pastazzi.

L-istess qiegħda tagħmel Malta Kattolika li tħallas sehmha kull sena lill-Unjoni ħalli din tissussidja l-kampanji favur l-abort fil-pajjiżi li jigħataw għajnuna finanzjarja mill-Unjoni Ewropea.

Barroso jxebbah l-Unjoni Ewropea ma’ “imperu”

Meta aħna nirreferu għas-sħubija ta’ pajjiżna fl-Unjoni Ewropea, spiss ngħidu li Malta issa saret “kolonja ta’ l-Unjoni Ewropea”.

Kemm għandna raġun niktbu u ngħidu dan, tahulna l-President tal-Kummissjoni Ewropea, Josè Manuel Barroso.

Dan l-aħħar meta Barroso kien qiegħed jitkellem ma‘ ġurnalisti li staqsewh kif jaħsiba dwar l-Unjoni Ewropea, huwa qalilhom:

“We are a very special construction, unique in the history of mankind. Sometimes I like to compare the European Union as a creation, to be organisation of an empire.”

Aħna (l-UE) għandna kostruzzjoni speċjali ħafna u unika fl-istorja tal-bniedem. Kultant inħobb inqabbel lill-Unjoni Ewropea mal-ħolqien ta’ organizzazzjoni ta’ imperu.

Dan il-kliem ta’ Barroso kixef għal darb’oħra l-għan aħħari ta’ l-elite u l-burokrati ta’ l-Unjoni Ewropea, jiġifieri dak li joħolqu “superstat” Ewropew jew fi kliem stess ta’ Barroso, “imperu ġdid Ewropew”.

Dawk il-politiċi li jgħidulna li mhux veru li ta’ l-Unjoni Ewropea jridu li l-Unjoni ssir “superstat”, issa għandkom prova oħra li huma jkunu qegħdin jingannawkom jew jgħaddukom biż-żmien meta jgħidulkom hekk.

Ftakru f’dawn il-kliem li kkwotajnielkom, il-kliem li qal Barroso u semmawhomlhom, ħalli turuhom li m’għandhomx aktar ċans ibellgħulkom ir-ross bil-labra.

It-tkabbir ta’ l-Unjoni Ewropea matul is-snin sar bħala riżultat tal-miljuni li l-Unjoni Ewropea tonfoq kull sena fil-propaganda biex il-popli tal-pajjiżi Ewropej jiġu mħeġġin favur sħubija fl-Unjoni.

L-ewwel l-Unjoni Ewropea tikkapparra lill-politiċi u l-midja prinċipali ta’ pajjiż u mbagħad tinqeda bihom biex huma jinfluwenzaw il-poplu favur sħubija fl-Unjoni.

Hekk ġara f’pajjiżna u hekk ġara f’kull pajjiż ieħor li ssieħeb fl-Unjoni Ewropea, barra f’dawk il-pajjiżi li kienu taħt l-influwenza Sovjetika.

Għax f’dawn il-pajjiżi ta’ l-Ewropa tal-Punent ma kienx hemm il-ħtieġa li jiġi influwenzat mill-politiċi.

Bħal kull stat li kellu imperu, l-Unjoni Ewropea qiegħda tibni l-armata tagħha u timmilitarizza ruħha.

U d-dudu ta’ l-imperu qiegħed fid-demm ta’ ħafna mill-popli ta’ l-Unjoni Ewropea.

Il-Franċiżi, il-Ġermaniżi, l-Ispanjoli, it-Taljani, il-Portugiżi, l-Ingliżi, il-Belġjani u l-Olandiżi – kollha kienu popli imperjali jew kellhom kolonji tagħhom.

Issa li dawn il-popli kollha tilfu l-imperi u l-kolonji tagħhom, iħossu l-ħtieġa li magħqudin flimkien jerġgħu jsibu l-kobor li kellhom.

L-Unjoni Ewropea timlilhom dak il-vojt f’qalbhom li t-telfien ta’ l-imperi u l-kolonji ġabilhom.

Għalhekk nefqu l-miljuni biex jiksbu l-kolonja Maltija.

IRRIDU LURA L-LIBERTA`

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.