MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

L-interessi nazzjonali jitħarsu bil-kunsens

Gvern ta’ pajjiż indipendenti, jekk ma jkunx imxekkel mill-kostituzzjoni tal-pajjiż, jista’ meta jrid, jiftiehem u jintrabat ma’ Gvern ieħor dwar kull ma jaqbillu.

Kollox isir bil-kunsens.

Gvern li jrid jibqa’ indipendenti, qatt ma jaqbillu jintrabat dwar xi ħaġa li tkun deċiża minn ħaddieħor u li hu jista’ ma jkunx jaqbel magħha.

Jekk jintrabat bil-quddiem li joqgħod għal dak li jkun deċiż b’maġġoranza, jista’ jsib ruħu li jkollu jaċċetta u jagħmel dak li ma jaqbillux.

F’din il-qagħda l-ftehim ta’ sħubija fl-Unjoni Ewropea ġab lil Malta jkollha taċċetta deċiżjonijiet, politika u liġijiet magħmulin mill-maġġoranza tal-pajjiżi l-oħrajn ta’ l-UE, allavolja ma naqblux magħhom u nifhmu li huma aktar ta’ ħsara milli ta’ ġid għalina.

Li pajjiż jintrabat li ma jagħmel xejn li jkun ta’ ħsara għal pajjiż ieħor, mhix politika ħażina.

Iżda li jintrabat li jwettaq politika li jiddeċiedi ħaddieħor anke jekk ma jkunx jaqbel magħha, hi ħaġa ħażina ħafna għal pajjiż.

Hekk intrabtet ħażin Malta meta ntrabtet bil-ftehim tas-sħubija fl-Unjoni Ewropea.

F’dan qiegħed il-qofol ta’ l-oġġezzjoni tagħna għall-ftehim tas-sħubija fl-UE u n-nuqqas tal-ħtieġa tal-kunsens ta’ pajjiżna għad-deċiżjonijiet li jittieħdu bis-sistema ta’ l-UE.

Mhux minnu li mingħajr is-sistema tal-maġġoranza, unjoni ta’ pajjiżi ma tistax timxi ’l quddiem.

Unjoni tista’ timxi u timxi tajjeb f’kull qasam bil-kunsens ta’ kulħadd.

Fejn ma jkunx hemm il-kunsens ta’ kulħadd, kull pajjiż jibqa’ ħieles li jimxi kif jemmen hu l-aħjar, sakemm ma jkunx ta’ ħsara għall-pajjiżi l-oħrajn fl-unjoni.

Jekk ikun hemm sħubija bejn tlieta, m’għandekx tistenna li wieħed ikollu joqgħod għal dak li t-tnejn l-oħrajn iridu.

Tistenna li jintlaħaq ftehim ta’ kompromess li kull wieħed mit-tlieta jista’ jaċċetta.

Biex iseħħ dan, kull wieħed jagħmel sforz biex tinstab triq li tista’ tiġi aċċettata mit-tnejn l-oħrajn.

Iżda jekk fi sħubija ta’ tlieta, id-deċiżjonijiet jittieħdu b’maġġoranza, tnejn ifittxu li jiftehmu kif jaqbel lilhom, mingħajr ma jaraw x’ma jaqbilx lit-tielet.

Dan il-prinċipju tal-kunsens ta’ kull parti hu importanti fil-każ ta’ bejn persuni, kumpaniji u organizzazzjonijiet.

Iżda hu ferm aktar importanti fir-rigward ta’ pajjiżi fejn hemm l-interessi nazzjonali fin-nofs.

Politika żbaljata ta’ l-Unjoni Ewropea

Il-politika ta’ l-UE f’xi oqsma żbaljata u pajjiżna jiżbalja li jsegwiha.

Il-politika ta’ l-Unjoni fir-rigward ta’ l-“għajnuna” lill-industrija qiegħda teqridha fil-pajjiżi membri, u qiegħda tgħin biex tikber f’pajjiżi fejn il-ħaddiema jitħallsu miżerjament, jaħdmu sigħat esaġerati u l-kundizzjonijiet l-oħra tax-xogħol huma mill-agħar.

L-UE qiegħda tħaddem politika li tkabbar il-kummerċ a spejjeż tad-dgħajfin ta’ l-industrija u tan-nuqqas ta’ l-impjiegi.

Qegħdin f’sitwazzjoni fejn kumpaniji kbar Ewropej tal-manifattura jagħfsu fuq l-UE biex tħallihom jimportaw bla xkiel ta’ kwantità u ta’ tariffi fl-UE, il-prodotti tagħhom li jinħadmu barra l-UE, u li qabel kienu jsiru fl-Unjoni.

U l-UE, minflok tiskoraġġixxi li dan isir, qiegħda tħaddem politika li tgħin biex dan iseħħ.

L-Unjoni qiegħda tħaddem politika li filwaqt li ma tħallix li tingħata għajnuna lill-industriji tal-pajjiżi ta’ l-UE, ma tħallix lanqas li tingħata protezzjoni lill-industrija kontra l-importazzjoni minn pajjiżi fejn il-ħaddiema huma sfruttati u mhux trattati diċentement, partikolarment fil-każ tal-ħaddiema nisa u tal-ħaddiema tfal.

Għalhekk l-Unjoni Ewropea, bil-politika industrijali u kummerċjali tagħha, qiegħda tbierek u tgħin l-isfruttament tal-ħaddiema fil-pajjiżi minn fejn timporta l-prodotti li qabel kienu jinħadmu minn ħaddiema tal-pajjiżi ta’ l-Unjoni.

L-Unjoni tħaddem din il-politika għalkemm taf li toħloq qgħad kbir u konsegwenzi soċjali koroh fil-pajjiżi ta’ l-UE.

Tant hi żbaljata l-politika ta’ l-Unjoni Ewropea li lesta tħalli li l-istat iħallas miljuni f’pagamenti ta’ għajnuniet lill-ħaddiema qgħeda, iżda mhux lesta li tħalli minflok jagħti l-istess ammont ta’ miljuni f’għajnuna lill-industrija biex tkompli tħaddem l-istess numru ta’ ħaddiema.

Għax għall-Unjoni, il-prinċipju tal-kompetizzjoni ħielsa u mhux mgħejjuna, huwa aqwa mill-prinċipju tad-dinjità tal-bniedem li x-xogħol biss jiżgura.

Forsi mhux kulħadd jirrealizza li meta tissieħeb fl-Unjoni Ewropea, taċċetta li tħaddem din il-politika żbaljata u qerrieda għad-dinjità tal-bniedem.

Dan iseħħ għax l-Unjoni tagħmel propaganda qawwija u qarrieqa dwar id-drittijiet tal-bniedem, filwaqt li tkasbar id-dritt fundamentali tiegħu għax-xogħol li jagħmilha possibbli għal bniedem biex jgħix huwa, u jgħajjex lill-familja, b’dinjità u mhux bil-karità.

Aktar tagħrif dwar l-Unjoni Ewropea

‘Accounts’

In-nuqqas ta’ serjetà ta’ kif l-Unjoni Ewropea żżomm il-kontijiet tal-fondi kbar tagħha għandu jiskreditha f’għajnejn il-popli kollha tad-dinja.

Matul l-aħħar 12-il sena, l-Awdituri ta’ l-Unjoni rrifjutaw li jiċċertifikaw l-‘accounts’ ta’ l-Unjoni minħabba li kellhom nuqqasijiet u rregolaritajiet.

Sar magħruf li l-Awdituri sejrin għat-13-il sena jgħidu li ma jistgħux jiċċertifikaw l-‘accounts’ ta’ l-aħħar sena ta’ l-Unjoni, għax l-awdituri m’humiex sodisfatti mill-korrettezza u l-eżattezza tagħhom.

‘Lobbyists’

Diffiċli li wieħed ikun jaf x’wassal lill-Unjoni Ewropea tieħu ċerti deċiżjonijiet, minħabba l-għadd kbir ta’ kumpaniji kbar, organizzazzjonijiet ta’ setturi differenti u għadd kbir ta’ ‘lobbyists’ oħrajn li jinfluwenzaw lill-Unjoni.

Huwa stmat li fi Brussels hemm bejn 15,000 u 20,000 rappreżentant ta’ organizzazzjonijiet ta’ setturi ekonomiċi, ta’ taqsimiet tar-relazzjonijiet pubbliċi ta’ mpriżi kummerċjali kbar, tad-ditti internazzjonali ta’ avukati u ta’ NGOs li xogħolhom huwa li jinfluwenzaw x’deċiżjonijiet tieħu l-Unjoni Ewropea.

Il-Kummissjoni Ewropea tammetti pubblikament li jkollha kuntatti ma’ dawn il-“lobbyists”, iżda tinsisti li ma tikxifx ma’ min.

Iżda dan l-aħħar il-Qorti ta’ Ġustizzja ta’ l-Unjoni qatgħet li l-Kummissjoni m’għandhiex taħbi ma’ min iddiskutiet qabel waslet għad-deċiżjonijiet tagħha.

Anke l-Ombudsman ta’ l-Unjoni wera l-fehma tiegħu li l-Kummissjoni għandha fid-dokumenti tagħha turi ma’ min iddiskutiet qabel iddeċidiet.

Għajnuna statali

Skond il-kumpanija ta’ l-ajru ‘low cost’ Ryanair, il-Gvern Franċiż matul dawn l-aħħar seba’ snin, ta lill-kumpanija ta’ l-ajru Air France għajnuna finanzjarja ta’ biljun Ewro.

Ir-Ryanair qiegħda tixli lill-Kummissjoni Ewropea li qiegħda tħalli li tingħata din l-għajnuna statali lill-Air France, u dan bi ksur tal-liġi ta’ l-Unjoni Ewropea dwar il-kompetizzjoni kummerċjali mhux imbagħbsa b’għajnuna tal-Gvern.

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.