MERĦBA FIL-PAĠNA TAS-CNI

KAMPANJA ĦELSIEN NAZZJONALI

 

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAHDMU BIEX NEHILSU LIL MALTA MILL-JASAR, IL-KOLONJALIZMU U L-HAKMA ILLEGALI TA' L-UNJONI EWROPEA

 Mill-Kampanja Ħelsien Nazzjonali CNI 

JEKK TIRRISPETTA L-KOSTITUZZJONI TA' PAJJIŻEK GĦID

LID-DEPUTAT PARLAMENTARI TIEGĦEK JIRRISPETTA L-FEHMIET

TIEGĦEK U MA JIVVOTAX FAVUR IL-KOSTITUZZJONI TA' L-UNJONI EWROPEA

LI TKASBAR IL-KOSTITUZZJONI TA' MALTA.

 

Appell għal ħidma favur kostituzzjoni Ewropea ġdida

 

F’konferenza ta' l-aħbarijiet li saret it-Tnejn li għaddew, is-CNI appellat kemm lill-Gvern kif ukoll lill-Oppożizzjoni ħalli jaħtfu l-opportunità tajba li nħolqot wara li l-Franċiżi u l-Olandiżi qatlu t-Trattat li jistabbilixxi kostituzzjoni għall-Ewropa, biex jaħdmu ħalli titfassal kostituzzjoni ġdida għall-Unjoni Ewropea għal kollox differenti minn dik li l-Franċiżi u l-Olandiżi ċaħdu.

Fl-istess konferenza s-CNI fissret seba' raġunijiet ewlenin li minħabba fihom il-membri tal-Parlament Malti m'għandhomx jivvutaw favur il-Kostituzzjoni Ewropea stabbilita bit-Trattat li se jitressaq għar-ratifika fil-Parlament Malti, minkejja li ma jistax jidħol fis-seħħ la darba mhux il-25 pajjiżi membri ta' l-Unjoni japprovawh.

Fil-konferenza ntqal li l-Partit Laburista għandu jaħdem mal-forzi progressivi kollha fil-pajjiżi membri ta' l-Unjoni biex tinkiteb kostituzzjoni li tħares l-indipendenza, il-ħelsien u s-sovranità tal-pajjiżi mseħbin fl-Unjoni.

Din il-kostituzzjoni ġdida għandha tkattar fost il-pajjiżi membri ta' l-Unjoni l-koperazzjoni għall-iżvilupp fl-oqsma kollha, fil-waqt li għandha tħares l-ambjent sostenibbli.

Fuq kollox is-CNI seħqet li l-Partit Laburista għandu jfittex li kostituzzjoni ġdida għandha jkollha bħala għan ewlieni tagħha, il-kisba tal-paċi u l-ħarsien tas-sliem, imsejsa fuq politika ta' newtralità.

Il-kostituzzjoni għandha wkoll trazzan l-armamenti u l-armi tal-qerda tal-massa.

Waħda mir-raġunijiet li minħabba fihom il-Parlamentari Maltin ma għandhomx jivvutaw favur il-Kostituzzjoni għall-Ewropa, tirreferi għall-obbligu li hija timponi fuq il-pajjiżi mseħbin fl-Unjoni Ewropea li jkabbru l-ispiża militari tagħhom, minflok li jnaqqsu l-ħela tal-flus fl-armamenti.

Raġuni oħra kontra l-Kostituzzjoni Ewropea hija li din tobbliga lil kull pajjiż membru ta' l-Unjoni li jagħti għajnuna lil kull pajjiż membru ieħor li jġarrab jew agressjoni militari jew attakk terroristiku.

L-ewwel raġuni mogħtija mis-CNI biex il-Membri Parlamentari Maltin ma jivvutawx favur it-Trattat tal-Kostituzzjoni Ewropea hija minħabba l-fatt li din tiddikjara li l-liġijiet li l-Unjoni għandha s-setgħa li tagħmel, jipprevalu fuq il-Kostituzzjoni ta' Malta.

It-tieni raġuni mogħtija mis-CNI tgħid li l-Kostituzzjoni Ewropea tikkonferma l-aspetti negattivi kollha ta' żvantaġġ u ħsara għall-poplu Malti u speċjalment għall-ħaddiema, tal-Ftehim tas-16 ta' April 2003 ta' Atene.

Mill-Ftehim ta' Atene tħallew barra mill-Kostituzzjoni Ewropea, id-dikjarazzjoni dwar in-newtralità ta' Malta u d-dikjarazzjoni dwar ir-reġjun ta' Għawdex.

Is-CNI fil-konferenza ta' l-aħbarijiet seħqet ukoll fuq ir-raġuni għala l-Membri Parlamentari m'għandhomx jivvutaw favur it-Trattat tal-Kostituzzjoni Ewropea minħabba li din iżżid is-setgħat u tkabbar il-ħakma ta' l-Unjoni Ewropea fuq Malta u l-pajjiżi l-oħra mseħbin fl-Unjoni.

Iżda forsi l-akbar kritika għall-Kostituzzjoni Ewropea li s-CNI għamlet fil-Konferenza tat-Tnejn li għadda, kienet dwar il-politika ekonomika u soċjali li hemm imfissra fil-Kostituzzjoni.

Is-CNI qalet li l-Kostituzzjoni Ewropea "tagħmilhom kmandamenti kostituzzjonali għall-gvernijiet tal-pajjiżi membri ta' l-Unjoni Ewropea li jwettqu politika ekonomika anti-soċjali u politika kummerċjali msejsa fuq il-globalizzazzjoni ta' l-isfruttament tal-ħaddiema".

Is-CNI kompliet tisħaq li l-Kostituzzjoni Ewropea "ma taħseb għal ebda miżuri għall-ħolqien ta' l-impjiegi u għat-trażżin tal-qgħad".

U l-Kostituzzjoni Ewropea "timponi l-privatizzazzjoni tal-ġid komuni tal-poplu, it-trażżin tas-servizzi soċjali tal-welfare state u tkabbar l-inugwaljanzi u l-inġustizzji soċjali".

Ta' min jinnota li din il-kritika għall-politika ekonomika u soċjali ta' l-Unjoni Ewropea saret ukoll fil-kampanja tar-referendum dwar il-Kostituzzjoni Ewropea fi Franza u l-maġġoranza qablet magħha.

Anke l-Ġermaniżi huma kontra l-Kostituzzjoni Ewropea

DAK li aħna tas-CNI ilna nbassru – jiġifieri li fl-Ewropa qedgħin iqumu movimenti popolari ta’ ċittadini li xebgħu jkunu sottomessi għal-liġijiet u direttivi li jsiru mill-burokratiċi ta’ l-Unjoni Ewropea, mingħajr ebda kontroll u parteċipazzjoni tal-popli – beda jseħħ u issa sar magħruf minn kulħadd.

Fi Franza u fl-Olanda rajnieh iseħħ billi l-popli ta’ dawn iż-żewġ pajjiżi, li kienu fost l-ewwel sitta li waqqfu l-Unjoni Ewropea, qalu: ISSA DAQSHEKK, u vvutaw bi ħġarhom kontra l-Kostituzzjoni l-ġdida ta’ l-Unjoni Ewropea.

Hemm popli ta’ stati membri oħrajn ta’ l-Unjoni li qegħdin iħejju biex jagħmlu l-istess bħall-Franċiżi u l-Olandiżi u jagħtu taptipa lill-gvernijiet tagħhom u anki lill-partitarji politiċi kbar tagħhom.

Għax hija ħaġa kbira li minkejjja li l-partiti politiċi fil-Gvern u l-partiti politiċi fl-oppożizzjoni kemm fi Franza, kif ukoll fl-Olanda, kienu favur il-Kostituzzjoni ta’ l-UE, il-maġġoranza kbira tas-sostenituri tagħhom marru kontra l-linja uffiċjali tal-partiti u tal-mexxejja tagħhom u vvotaw kontra l-Kostituzzjoni.

Hija wkoll ħaġa ċara li minkejja l-isforz kbir ħalli l-poplu jaħseb li fin-nofs kien hemm biss trattat diplomatiku bejn l-istati fiż-żewġ pajjiżi l-poplu fehem li fin-nofs kien hemm kostituzzjoni li torbtu u tolqtu fil-laħam il-ħaj.

Il-poplu fehem li din il-kostituzzjoni msejjħa ta’ l-Ewropa tirregola x-xogħol u l-impjiegi, tirregola s-servizzi soċjali, il-pensjonijiet, l-għoli tal-ħajja u ħafna aktar oqsma oħra tal-ħajja u tirregola b’mod li jagħmel ħsara lill-poplu.

Għalhekk il-poplu vvota le għaliha.

Dak li seħħ fi Franza, jidher li se jseħħ f’pajjiżi oħra membri ta’ l-Unjoni Ewropea.

Ftit kienu jemmnu li l-poplu Ġermaniż, minkejja li l-Parlament Ġermaniż għadu kif irratifika l-Kostituzzjoni l-ġdida ta’ l-UE, ma qabilx mal-Kostituzzjoni l-ġdida ta’ l-Unjoni.

Infatti, stħarriġ ta’ l-opinjoni pubblika li għadu kif sar mill-ġurnal li l-aktar jinqara fi-pajjiż, il-Bild Zeitung, wera riżultat mill-aktar sorprendenti li wieħed seta’ jimmaġina.

Mill-istħarriġ ta’ dan il-ġurnal importanti Ġermaniż, irriżulta li għall-mistoqsija ta’ kif kienu jivvotaw dwar il-kostituzzjoni ġdida ta’ l-UE, kieku ngħataw ċans jivvotaw f'referendum, il-maġġoranza assoluta ta’ 96% Germaniz li wieġbu, iddikjaraw li kienu kontra l-Kostituzzjoni l-ġdida ta’ l-Unjoni Ewropea.

Aħna ċerti li anke f’Malta, kieku jsir referendum, il-maġġoranza tal-Maltin u l-Għawdxin jivvotaw ukoll kontra din il-Kostituzzjoni ta’ l-UE.

Il-Franċiżi u l-Olandiżi tkellmu għalina wkoll

IL-LE qawwija tal-poplu Franċiż u tal-poplu Olandiż għat-Trattat tal-Kostituzzjoni ta' l-Unjoni Ewropea għandha tifsiriet kbar mhux biss għalina f'Malta, iżda wkoll għall-popli kollha tal-pajjiżi membri ta' l-Unjoni.

Il-Franċiżi u l-Olandiċi tkellmu mhux biss għalihom, iżda għalina u għall-popli kollha ta' l-Unjoni Ewropea.

Inkunu boloħ jekk ma nagħtuhomx widen u nibqgħu għaddejjin qisu ma seħħ xejn.

L-għaqal jgħidilna li għandna nieqfu biex nixtarru x'ifisser dak li ġara.

Ikun għajb jekk ma nagħtux kas x'qalu oħrajn dwar il-ġrajja li regħdet lill-Unjoni Ewropea u li se jkollha mpatt fuq il-ġejjieni tagħha u għax aħna imseħbin fiha, fuq il-ġejjieni tagħna wkoll.

Il-Prim Ministru Ingliz Tony Blair ikkummenta li barra l-kwistjoni ta' x'se jiġri mill-Kostituzzjoni ta' l-UE, hemm fin-nofs kwistjoni ta' importanza akbar.

Huwa sostna li din hija dwar il-ġejjieni ta' l-ekonomija tal-pajjiżi ta' l-Unjoni, u x'għandna nagħmlu dwar il-problemi tal-lum maħluqa mill-globalizzazzjoni u mit-tibdil teknoloġiku li qiegħed iseħħ.

Huwa wera l-fehma li għandna nwessgħu d-diskussjoni dwar dawn il-problemi u mhux niddiskutu biss il-Kostituzzjoni ta' l-UE, għax dawn il-problemi jinfluwenzaw lill-poplu kif iħares lejn il-Kostituzzjoni ta' l-UE.

Margot Wallstrom, Viċi Presidenta tal-Kummissjoni Ewropea, qalet li rridu nkunu bla ħajja jekk ma nieħdux tagħlima minn dak li ġara fi Franza u fl-Olanda.

It-tagħlima hija li l-poplu jrid li jieħu sehem f'dak li jkun qed jiġri; irid li nagħtu każ dak li huwa jgħid; irid li l-politika tagħna tissarraf f'riżultati prattiċi ta' ġid għall-poplu; irid li jkun ċert li se jirnexxilna noħolqu l-impjiegi ġodda fl-Ewropa u nkabbru l-ekonomija tagħha.

Il-membru Soċjalista tal-Parlament Franċiż, Henri Emmanuelli, qal li l-vot le għall-Kostituzzjoni Ewropea jfisser li l-poplu qam biex juri li mhux lest jafda aktar l-ġejjieni tiegħu f'idejn ir-regoli tas-suq biss u biex isostni li l-UE għandha timxi b'politika li l-Unjoni tieħu sehem dirett u b'qawwa fil-qasam ta' l-ekonomija (mhux tħalli s-suq imexxi huwa l-ekonomija).

Hubert Vedine, Ministru ta' l-Affarijiet Barranin ta' Franza, wera l-fehma li l-poplu jħoss li l-proġett ta' l-integration tal-pajjiżi ta' l-Unjoni Ewropea mexa iżżejjed u li l-poplu jrid ikun jaf f'hiex se twasslu din l-istorja.

Il-Prim Ministru ta' l-Olanda, Jan Peter Balkenende, wara l-LE ta' l-Olandiżi, stqarr li ħa t-tagħlima li huwa għandu jisħaq biex is-sovranità ta' pajjiżu u tal-pajjiżi l-oħra ta' l-Unjoni tkun imħarsa mit-theddid taż-żieda tas-setgħat ta' l-Unjoni Ewropea.

Ġurament ta' lealta` li jieħdu l-Membri Parlamentari kollha

Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).

Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.

Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).

Ġurament għall-qadi xieraq tal-kariga ta’ President.

Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).

Sezzjoni 6 tal-Kostituzzjoni ta' Malta

6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.

Artiklu I-6 tal-Kostituzzjoni ta' l-Unjoni Ewropea

Dritt ta' l-Unjoni

Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.

Tista' tafda lil min jikser il-ĠURAMENT tiegħu/tagħha?

L-Erbgħa, 15 ta' Ġunju, 2005. 

<< Lura http://www.cnimalta.org/2005.html

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien?

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat Lm2 flimkien ma' din il-formola liċ-

 Chairman CNI,

Dr Karmenu Mifsud Bonnici LL.D.

81, Triq Ġuże Pace,

Ħamrun.

 

Isem .......................................................

Indirizz ...................................................

ID Numru ...............................................

 

Inroddulek ħajr ta’ l-għajnuna tiegħek

 

Malta ħielsa u newtrali fl-aħħar