MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-PUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-interessi nazzjonali tal-Maltin m’huma xejn għall-Unjoni Ewropea. 

Dan il-fatt ta’ sogħba kixfitu l-kitba tas-Sur Louis Cilia, li dehret f’ġurnal lokali ħmistax ilu.

Is-Sur Cilia kien uffiċjal għoli governattiv li ħa sehem fl-1998 fid-diskussjonijijiet li l-Gvern Malti kien qed jagħmel ma’ l-UE dwar il-qasam tal-ġustizzja f’pajjiżna, qabel il-Ftehim ta’ Sħubija ta‘ Malta fl-UE.

Is-Sur Cilia saħaq li l-Unjoni Ewropea ma ċċedix dak li hija trid li jsir, lanqas jekk dan ma jkunx jaqbel għall-interessi nazzjonali tagħna. 

* Prova ta’ dan kienet il-kwistjoni ta’ kif pajjiżna jġib ruħu fil-kwistjoni tar-refuġjati.

* Il-Gvern Malti fl-1971 kien aderixxa għall-Konvenzjoni dwar ir-Refuġjat, iżda għamel riservi importanti għaliha, minħabba problemi speċjali għal pajjiżna, il-qagħda tagħna f’nofs ir-rotot tal-Mediterran u ċ-ċirkostanzi partikolari ta’ gżiritna.

* Fid-diskussjonijiet fl-1998 dwar il-Ftehim ta’ Sħubija fl-Unjoni, il-Gvern Malti saħaq li kellhom jibqgħu jgħoddu r-riservi li kienu saru fl-1971 għall-Konvenzjoni dwar ir-Refuġjati, u dan minħabba l-popolazzjoni kbira għad-daqs ċkejken ta’ pajjiżna, ma stajniex fl-interess nazzjonali tagħna, naċċettaw għadd mingħajr limitu ta‘ refuġjati.

* Iżda l-uffiċjali ta’ l-Unjoni Ewropea ma ridux jafu bir-raġunijiet li l-uffiċjali governattivi Maltin kienu qegħdin iġibu ħalli jibqgħu jgħoddu r-riservi għall-Konvenzjoni dwar ir-Refuġjati.

* L-istess xorta ta’ riservi għall-Konvenzjoni kienu għamluhom ukoll xi pajjiżi kbar imsebbħin fl-Unjoni Ewropea u l-uffiċjali Maltin sostnew li kif dawk il-pajjiżi ta’ l-Unjoni kellhom dawk ir-riservi, Malta meta tissieħeb fl-Unjoni, setgħet ikollha l-istess riservi meħtieġa fl-interess nazzjonali tagħna.

* Iżda l-uffiċjali ta’ l-Unjoni Ewropea ma aċċettawx li jsir xebh ma’ pajjiżi diġà membri ta’ l-Unjoni. 

* Huma qalu lill-Gvern Malti li kull pajjiż ġdid li jrid jissieħeb fl-Unjoni, kellu jew jaċċetta l-Konvenzjoni dwar ir-Refuġjati kollha kemm hi mingħajr riservi jew l-Unjoni ma taċċettahx imsieħeb fiha. 

* L-uffiċjali ta’ l-Unjoni saħqu li mhux kull ma japplika għall-membri qodma ta’ l-Unjoni, bilfors se jkun japplika għall-membri li jissieħbu ġodda.

* B’għajb kbir, il-Gvern Malti, għax ried akkost ta’ kollox idaħħal lil pajjiżna fl-Unjoni, ittradixxa l-interessi nazzjonali u ħassar ir-riservi li kienu saru fl-1971 għall-Konvenzjoni dwar ir-Refuġjati. 

* Illum qegħdin inbatu l-konsegwenzi ta’ dak l-aġir anti-nazzjonali billi jkollna naċċettaw mijiet ta’ refuġjati u dan bis-saħħa tas-sħubija fl-Unjoni Ewropea.

* TLIET mitt suldati Maltin se jkunu moħlijin il-ħin kollu fuq ir-rondi għall-immigranti illegali, fil-missjoni ta’ l-Aġenzija Dwar il-Fruntieri ta’ l-UE (il-Frontex), fin-nofs tal-Mediterran. 

* Huma se jieħdu sehem fir-rondi ma’ membri tal-forzi navali ta’ l-Italja, Franza u l-Ġermanja.

* Minbarra t-300 suldat fuq ir-rondi tal-Frontex, il-Forzi Armati ta’ Malta għandhom numru ta’ suldati u l-Korp tal-Pulizija għandu għadd ta’ membri, li qegħdin jgħassu u jieħdu ħsieb mijiet ta’ immigranti illegali li għandna miżmumin fiċ-ċentri tad-detenzjoni f’pajjiżna.

* Fl-aħħar ħames snin huwa stmat li ġew ’il fuq minn 8,000 immigrant illegali f’pajjiżna. 

* Mijiet minnhom ingħataw l-istatus ta’ refuġjati u għandhom dritt jgħixu u jaħdmu f’pajjiżna u huma intitolati għall-benefiċċji kollha li għandhom il-barranin li jkunu b’mod regolari f’pajjiżna.

* Wara li jinżammu għal 18-il xahar fiċ-ċentri tad-detenzjoni, l-immigranti jitqegħdu fiċ-ċentri miftuħin u huma ħielsa li jmorru fejn iridu f’pajjiżna. 

* Ħafna minnhom jaħdmu mingħajr permess u jitħaddmu b’kundizzjonijiet ħżiena.

* L-Unjoni Ewropea qiegħda tiddiskuti biex tqassar iż-żmien li fih nistgħu nżommu maqfulin l-immigranti illegali.

* Iżda l-Unjoni mhix lesta taċċetta li l-immigranti illegali li jgħixu fiċ-ċentri miftuħin u li jistgħu jmorru fejn iridu f’pajjiżna, ikollhom ukoll id-dritt imorru fejn iridu fl-UE, bħalma l-Maltin jistgħu jmorru f’liema pajjiż iridu ta’ l-Unjoni.

* B’din il-politika tagħha dwar l-immigranti illegali li ma jistgħux imorru fil-pajjiżi l-oħrajn ta’ l-Unjoni, l-Unjoni qiegħda ġġiegħel lil pajjiżna jżomm għandu l-eluf ta’ immigranti illegali li joħorġu miċ-ċentri tad-detenzjoni, wara li jagħmlu ż-żmien stabbilit fiċ-ċentri.

* L-UE taf li l-immigranti illegali li jinsabu f’Malta ma jridux ikunu hawn, iżda jridu jmorru fil-pajjiżi kbar ta’ l-Unjoni. 

* Taf ukoll li Malta ma tiflaħx iżżommhom. 

* Iżda xorta waħda l-Unjoni ma tridx tħallina nħalluhom imorru fejn huma jridu, jiġifieri, fejn riedu jmorru meta telqu minn pajjiżhom.

* Għalhekk l-UE taħti għall-problemi li għandna bl-immigranti illegali. 

* Għax jinsabu f’pajjiżna fi triqithom lejn il-pajjiżi l-oħrajn ta’ l-Unjoni. 

* Huma miżmumin f’pajjiżna għax l-UE żżommna milli nħalluhom imorru minn pajjiżna għal fejn iridu fl- Unjoni.

* Jekk ninħallu mill-irbit ta’ l-UE, inkunu nistgħu nsolvu l-problema ta’ l-immigranti illegali. 

* Anke ftehim mal-Libja nkunu nistgħu nilħqu biex nibagħtu lura dawk li jiġu minn hemm. 

* L-Unjoni mhix se tħares l-interessi tal-poplu tagħna f’din il-kwistjoni.

Ftit ta’ jiem ilu l-Prim Ministru Franċiż Francois Fillon ġie Malta u tkellem mal-Prim Ministru Gonzi dwar x’biħsiebha tagħmel Franza meta f’Lulju li ġej ikollha l-Presidenza tal-Kunsill tal-Ministri ta’ l-Unjoni Ewropew.

Huwa fatt magħruf li l-President Franċiż Nicolas Sarkozy qed jinsisti li l-UE tħejji politika ta’ difiża komuni għall-pajjiżi kollha ta’ l-Unjoni u li jissaħħu l-forzi militari tagħhom.

Għalkemm ma ntqal xejn pubblikament, il-Prim Ministru Franċiż ma setax ma jħeġġiġx lill-Prim Ministru Malti biex Malta tieħu sehem fid-difiża komuni u l-bini ta’ l-armata ta’ l-Unjoni Ewropea, minkejja n-newtralità ta’ pajjiżna.

L-aħbar li qrajna f’dan il-ġurnal dan l-aħħar kompla kixef l-ipokresija grassa li teżisti fl-Unjoni Ewropea dwar il-kaċċa u l-insib, imma speċjalment il-kaċċa fir-rebbiegħa.

Wara li l-kaċċaturi Maltin u Għawdxin kienu ilhom mijiet ta’ snin jikkaċċjaw f’pajjiżna, din is-sena għall-ewwel darba f’dawn is-snin kollha, waslet il-mannara ta’ l-Unjoni Ewropea li waqqfet il-kaċċa fir-rebbiegħa, għalkemm suppost għad m’hemmx deċiżjoni finali dwar il-kaċċa fir-rebbiegħa mill-Qorti tal-Ġustizzja jew aħjar “ta’ l-inġustizzja” ta’ l-Unjoni.

L-aħbar li qiegħed nirreferi għaliha hi li skond statistika uffiċjali, fil-pajjiżi ta’ l-Unjoni kull sena jinqatlu 1,167,683 tarbija permezz ta’ l-abort. 

U dan il-qtil qed isir bil-barka ta’ l-Unjoni Ewropea. 

U m’hemmx staġuni li fihom ma jistax isir dan il-qtil ta’ trabi, għax l-abort jista’ jsir is-sena kollha.

Ħalli nispjega aħjar l-ipokresija grassa ta’ l-Unjoni Ewropea dwar il-kaċċa f’Malta fir-rebbiegħa. 

L-argument prinċipali hu li jekk titħalla l-kaċċa fir-rebbiegħa – meta l-gamiem u s-summien ikunu se jbejtu fl-Ewropa – jonqos in-numru ta’ gamiem u summien. 

U qisu jriduna nemmnu li dawn l-ispeċi ta’ tajr ikunu f’periklu li jinqerdu.

Fl-istess żmien li jgħidu dan, statistika ta’ l-Unjoni stess turi li t-twelid tat-trabi fl-Ewropa naqas sewwa u llum hemm 6,000,000 aktar anzjani (’il fuq minn 65 sena) milli hemm tfal taħt l-14-il sena. 

Meta fl-1980 kien hemm 36 miljun tifel/tifla iktar minn anzjani! 

Però mid-dehra dan in-nuqqas ta’ twelid mhux qiegħed jinkwieta lill-Unjoni Ewropea daqskemm jinkwetaha jekk jonqos in-numru ta’ gamiem u summien.

Mhux bilfors nistaqsu: 

La hemm dan in-nuqqas kollu ta’ twelid ta’ trabi, kif fl-istess ħin l-Unjoni tħalli l-qtil ta’ trabi li jkunu għad iridu jitwieldu, meta tant hemm bżonn ta’ aktar twelid ta’ tfal biex il-pajjiżi ta’ l-Unjoni jkunu jistgħu jibqgħu jkabbru l-ekonomiji tagħhom?

Jekk il-qtil tal-gamiem u s-summien mhux sostenibbli fir-rebbiegħa, allura l-qtil ta’ 1,167,683 trabi mhux imweldin kull sena hu sostenibbli, Sinjuri allat ta’ l-UE u tal-qorti “ta’ l-inġustizzja” ta’ l-Unjoni? 

U meta huma stess jgħidu li dan in-nuqqas ta’ twelid huwa diġà problema għall-Unjoni?

Ara kif qatt nistgħu aħna – u kull min irid ikun sinċier miegħu nnifsu – insiru nemmnu f’din il-kwalità ta’ Unjoni Ewropea, li tqis lill-gamiem u lis-summien ta’ iktar importanza mill-miljuni ta’ trabi li ta’ kull sena jinqatlu permezz ta’ l-abort!

IRRIDU L'INDIPENDENZA MILL-UNJONI EWROPEA

Il-Ħamis, 15 ta’ Mejju, 2008

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ