MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!
Fis-seba’ snin 2007 – 2013 il-Maltin u l-Għawdxin se jkunu ħallsu lill-Unjoni Ewropea €420,000,000
Iridu
jqajmu l-Kostituzzjoni ta’ l-UE mill-mewt!
' Skond ir-regolamenti ta’ l-Unjoni Ewropea, il-Kostituzzjoni
ta’ l-Unjoni li kienet ġiet imfassla minn Konvenzjoni mmexxija minn
Valery Giscard d’Estaing, ma setgħetx tidħol fis-seħħ anki
jekk pajjiż wieħed biss ma jirratifikax il-Kostituzzjoni, kemm wara
referendum jew sempliċiment b’vot fil-parlament nazzjonali – bħalma
sar f’Malta.
Ejja ngħiduha mill-ewwel, kieku l-Unjoni Ewropea verament kienet temmen
fid-demokrazija kieku kienet tobbliga lill-gvernijiet nazzjonali tal-pajjiżi
membri, li biex jirratifikaw il-Kostituzzjoni, kellhom l-ewwel jistaqsu
lill-poplu permezz ta’ referendum.
Inzerta li kemm fi Franza kif ukoll fl-Olanda r-ratifika kienet suġġetta
li l-Kostituzzjoni tiġi approvata mill-poplu f’referendum.
Fiż-żewġ pajjiżi l-popli qalu LE!
U għalhekk suppost li skond l-istess regolamenti ta’ l-Unjoni Ewropea, il-proċess tar-ratifika kellu jieqaf immedjatament la dik il-Kostituzzjoni ma setgħetx tidħol fis-seħħ.
Dan però ma seħx taħt skużaa jew oħra, fosthom anki
f’Malta.
L-Unjoni Ewropea hawn daħlet fi kriżi x’se tagħmel.
Għax l-Unjoni Ewropea qatt ma kienet imdorrija li xi pajjiż jgħidilha LE għal xi passi importanti li tkun trid tieħu biex taħkem aktar lill-popli Ewropej!
B’xi mod jew ieħor tibqa’ ssus u tagħfas lill-gvern fejn
il-poplu jkun qalilha LE, biex jara x’se jagħmel biex dak il-LE jinbidel
f’IVA, hekk ġara, per eżempju fl-Irlanda dwar it-Trattat ta’
Nizza.
Issa anki dwar il-Kostituzzjoni ta‘ l-Unjoni Ewropea, qegħdin jaraw kif
se jduru mal-lewża biex jerggħu jqajmu l-Kostituzzjoni mill-mewt wara
li joħorġuha mill-friża!
Il-Ministri ta’ l-Affarijiet Barranin ta’ l-Unjoni Ewropea se jiltaqa’ fl-Awstralja f’Mejju li ġej biex jaraw kif se jagħmlu biex jinjoraw il-vot demokratiku tal-poplu Franċiż u dak Olandiż.
U b’hekk ikomplu jikkonvinċuna li d-demokrazija, l-Unjoni Ewropea lanqas taf biss fejn toqgħod, aħseb u ara kemm tipprattikaha!
Fejn huwa s-suq ta’ 450 miljun persuna?
TGĦIDX
kemm reddnulna li jekk nissieħbu fl-Unjoni Ewropea se nkunu nistgħu
nesportaw ferm aktar għax ikollna suq ta’ 450 miljun ruħ!
Issemmi biss in-numru “450 miljun ruħ” taqta’ nifsek.
Alla biss jaf
kemm bdew joħolmu l-esportaturi f’pajjiżna li lanqas se jkunu jistgħu
jlaħħqu ma’ l-ordnijiet, anki jekk jaħdmu lejl u nhar sebgħat
ijiem fil-gimgħa!
Mela dan l-aħħar ħarġu l-figuri ta’ l-importazzjoni u
esportazzjoni minn u lejn l-Unjoni Ewropea.
Minn dawn il-figuri jirriżulta li fl-ewwel xahrejn ta’ din is-sena (2006), il-valur ta’ prodotti importati mill-Unjoni Ewropea kien ta’ Lm133 miljun (ħallejna barra l-eluf).
Din
il-figura tammonta għal 63.5 fil-mija ta’ l-importazzjoni kollha.
Iżda fl-istess xahrejn l-esportazzjoni lejn il-pajjiżi kollha ta’
l-Unjoni Ewropea (il-famuż suq ta’ 450 miljun ruħ!) ammontaw għal
Lm65 miljun. Jew 49.6 fil-mija ta‘ l-esportazzjoni kollha.
Dan kollu jfisser li xtrajna mill-Unjoni Ewropea Lm67 miljun aktar milli aħna
biegħna lill-pajjiżi ta’ l-Unjoni Ewropea.
U jfisser ukoll li lill-Unjoni Ewropea begħnielha anqas (49.5%) milli biegħna lill-pajjiżi li m’humiex fl-Unjoni Ewropea!!!
Mela aktar qegħdin qasba tixxejjer mar-riħ milli konna qabel, Sinjuri Ewroffissati!
Il-ħrieqi, ix-xagħar, ir-roti u l-UE!
LANQAS titwemmen!
Mela dan
l-aħħar il-Ministri tal-Finanzi ta’ l-Unjoni Ewropea (allura anki
l-Prim Ministru Malti għax huwa wkoll il-Ministru tal-Finanzi ta’ pajjiżna)
kienu ddeċidew li jestendu d-dritt li pajjiż membru seta’ jiċċarġja
rata ta’ VAT imnaqqsa fuq ċerti prodotti u servizzi b’ħames snin oħra,
sa l-aħħar ta’ Diċembru, 2010.
Fost il-lista l-ġdida ta’ prodotti u servizzi li l-gvernijiet nazzjonali
setgħu jagħżlu minnhom biex ibaxxu r-rata tal-VAT fuqhom sa
ħamsa fil-mija flok bil-minimu uffiċjali ta’ l-Unjoni Ewropea ta’
15 fil-mija, insibu l-qtugħ tax-xagħar u t-tiswija tar-roti.
Iżda
l-ħrieqi tat-trabi, u li anki jintużaw ġeneralment minn anzjani
li jkunu jbatu mill-kundizzjoni ta‘ inkontinenza, tneħħew mil-lista
ta’ qabel u ma ssibhomx fil-lista l-ġdida.
Fil-fatt il-Gvern Malti diġà ġie mwissi uffiċjalment biex ma jħallix
aktar li l-ħrieqi jinbiegħu b’rata mnaqqsa ta’ VAT, inqas mir-rata
minima stabbilita ta’ l-Unjoni Ewropea, jiġifieri 15 fil-mija.
Jekk
il-Prim Ministru Gonzi ma jobdix (aħna ċerti li se jobdi, la dejjem
ikun l-ewwel wieħed li normalment jobdi lil Brussels), l-Unjoni Ewropea tieħu
lill-Gvern Malti quddiem il-Qorti tal-Ġustizzja ta’ l-Unjoni Ewropea.
Mela ghall-Unjoni Ewropea li mara tmur tagħmel xagħarha darba kull
ġimgħatejn hija meqjusa li jixirqilha aktar ħniena minn omm ta’
tarbija li tkun trid tbiddel il-harqa tat-tarbija, ħames darbiet kuljum!!!
Jistghu jekk jogħġobhom, Joanna Drake, li hija l-Kap tar-rappreżentanza
tal-Kummissjoni Ewropea f’Malta, u dawk l-iffissati kollha fl-Unjoni Ewropea,
jgħidulna fejn marret toqgħod ir-ruħ soċjali ta’ l-Unjoni
Ewropea għax ma nistgħu nsibuha mkien!
Il-“Mars” aktar importanti mill-mediċini!
KEMM-IL darba tkellimna u ktibna dwar it-Taxxa ta’ Reġistrazzjoni fuq il-mediċini li mponiet fuqna l-Unjoni Ewropea.
Din serviet biex jew tgħolli l-prezz tal-mediċini.
Jew saħansitra serviet biex sparixxew eluf ta’ tipi ta’ mediċini
mill-ispiżeriji!
Huwa kkalkolat li qabel dħalna fl-Unjoni Ewropea kien hawn fl-ispiżeriji
madwar 5,000 tip ta‘ mediċina differenti.
Il-lum, li dħalna fil-ġenna ta’ l-art imsejhħa Unjoni Ewropea, in-numru ta’ mediċini fl-Unjoni Ewropea l-għażla kellha tikber mhix tiċkien.
Ir-raġuni għal
dan hi waħda! Dik il-misħuta Taxxa ta’ Reġistrazzjoni!
Il-viltà hi li dawn il-mediċini jkunu diġà gew irreġistrati
f’pajjiżi oħrajn ta’ l-Unjoni Ewropea.
U allura x’sens jagħmel li xorta jkollhom jerġgħu jiġu rreġistrati f’pajjiżna?
Tgħid biex ikomplu jikkonvinċuna kemm l-Unjoni Ewropea għandha ruħ
soċjali u tħenn għall-marid?
Fis-snin 70 u 80 tgħidx kemm kienu jħambqu li kien diffiċli biex
issib tixtri biċċa ċikkulata Mars.
Id-dritt ta’ l-għażla kienet fuq fomm ħafna nies.
Qatt smajtu issa l-istess nies jikkundannaw dan
in-nuqqas enormi ta’ prodott ferm aktar importanti għal saħħitna
minn xi biċċa ċikkulata Mars – il-mediċini?
Il-kliem ta’ Sidna Ġesù Kristu: “Oqbra mbajda” joqgħodilhom
perfettament!
Imma la s-swat ikun gej mill-Unjoni Ewropea allura kollox sew!
Il-Sibt, 15 ta’ April, 2006
IRRIDU L'INDIPENDENZA MILL-UNJONI EWROPEA
e-mail: cnimalta at yahoo.co.uk
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat €5 flimkien ma' din il-formola lis-
Segretarju Finanzjarju CNI,
60A, Triq id-Dejqa,
Valletta
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ