MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA

L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

minn Karmenu Mifsud Bonnici KAMPANJA ĦELSIEN NAZZJONALI

L-iżvantaġġ tal-munita ewro

Dan għax dawn il-pajjiżi kellhom joħorġu €110 biljun biex isalvaw lill-Greċja u kellhom iwaqqfu fond ta’ €740 biljun biex jgħinu lill-pajjiżi b’diffikultajiet finanzjarji.

Li kieku ma kienx hemm l-ewro, ma kienx ikun hemm il-ħtieġa ta’ self ta’ €110 biljun u lanqas tal-garanzija ta’ €740 biljun.

Kieku dan l-ammont ta’ flus seta’ ġie investit f’inizjattivi produttivi li jkattru l-ġid, barra li joħolqu miljuni ta’ impjiegi.

Kieku ma kienx hemm l-ewro, pajjiżi falluti kienu jsolvu l-kriżi finanzjarja tagħhom billi jiżvalutaw il-muniti nazzjonali tagħhom, u b’hekk, jerġgħu jiġu fuq saqajhom.

Minħabba l-ewro, ma jistgħux jieħdu r-ruħ, u magħhom salbu lill-pajjiżi l-oħrajn, li bħal Malta, kellhom jisselfu miljuni ta’ ewro biex jgħinu lill-pajjiżi oħrajn falluti.

Il-pajjiżi ta’ l-UE li bħal Malta għandhom id-dejn, komplew kabbru d-dejn meta aċċettaw li jagħtu s-sehem tagħhom.

X’uħud mill-pajjiżi ta' l-UE li qegħdin fi kriżi finanzjarja, bħal Spanja u l-Irlanda, issellfu ammonti kbar għax sabu rati ta’ imgħax fuq is-self, wara li daħħlu l-ewro, aktar baxxi mir-rati li bihom kienu jissellfu meta kellhom il-muniti nazzjonali tagħhom.

Bħala konsegwenza ta’ dan, huma ssellfu ħafna iżjed milli kien imisshom jagħmlu, u llum jinsabu fi gwaj finanzjarju kbir, minħabba l-ewro.

F’Malta, id-dħul ta' l-ewro għolla l-ħajja u żied l-ispejjeż tal-produzzjoni u tas-servizzi, u dan kien fattur li ġab nuqqas fl-esportazzjoni u laqat ħażin l-industrija turistika.

Bħala konsegwanza ta’ dan kellna telfien ta’ ħafna impiegi u żdied il-qgħad u tbaxxa l-livell tal-għajxien ta’ ħafna familji.

Għalhekk l-ewro mhux talli ma swiet xejn ta’ ġid għal pajjiżna, iżda saħansitra swiet ta’ deni u minħabba fiha pajjiżna qiegħed ikollu jissellef u jiddejjen aktar.

Il-kritika kontra l-ewro hi mifruxa ħafna.

Pree Steinbrick, li kien Ministru tal-Finanzi tal-Ġermanja, fil-ktieb “The Bottom Line”, li ħareġ il-ġimgħa l-oħra, wasal biex isejjaħ l-ewro “the lame duck” tal-Ewropa.

Hu qal li l-ewro kienet waħda mill-konċessjonijiet li l-Ġermanja kellha tagħmel lil Franza biex din ma tkunx ta’ oppożizzjoni għall-għaqda taż-żewġ Ġermanji.

Franza riedet li l-Ġermanja magħquda ċċedi l-munita li kienet l-aktar b’saħħitha, id-Deutschmark, u ddaħħal il-munita komuni għall-UE, l-ewro.

Kohl, li kien il-Kanċillier tal-Ġermanja tal-Punent, intebaħ li biex tingħaqad il-Ġermanja kellu jissagrifika d-Deutschmark fl-interessi ta' l-Unjoni Ewropea.

Dak li qal Steinbrick juri li t-twaqqif mgħaġġel ta' l-ewro kien att politku u kontra kull parir tekniku li kien isostni li la darba la kien għad hemm unjoni politika u lanqas ma kien hemm fir-realtà “mobility of labour” bejn il-pajjiżi ta’ l-UE minħabba prinċipalment id-differenzi tal-lingwa, ma kienx għaqli li jkun hemm munita komuni.

Illum kulħadd jaf bid-diffikultajiet tekniċi li l-munita komuni ħolqot għal ħafna mill-pajjiżi ta’ l-UE, u li dawn ma jistgħux jissolvew f’qasir żmien għax l-ewro hi mażżra m’għonqhom li ma tippermettix li jittieħdu l-miżuri meħtieġa biex jerġgħu jqajmu l-ekonomiji tagħhom, mingħajr miżuri kiefra ta’ awsterità fuq il-poplu.

Min-naħa tal-mexxejja ta’ l-UE qegħdin jittieħdu passi biex jisfruttaw il-kriżi li ġabet l-ewro ħalli l-UE ssir Unjoni politika waħda.

“So the European Union has now finally opened the door to economic union. Europeans will soon start to wonder how much national sovereignty they will be left with”.

Hekk iridu l-mexxejja ta’ l-UE, li l-pajjiż membri ma jkunux pajjiżi sovrani, għax l-UE se tindaħal kmieni fit-tfassil tal-baġits tagħhom, mingħajr mal-Ministri tal-Finanzi rispettivi jkollhom is-setgħa li jiddeċiedu huma xi jkun il-baġit.

Din il-mixja lejn unjoni politka u ekonomika tal-pajjiżi membri ta’ l-UE qiegħda sseħħ mingħajr ma l-popli jingħataw l-opportunità jagħtu l-approvazzjoni tagħhom għaliha.

Għalhekk ukoll qegħdin isiru l-protesti u l-irvellijiet kontra l-miżuri mħabbrin fil-baġits, kif wieħed seta’ jara mill-protesta kbira li saret fi Brussels il-ġimgħa l-oħra, bl-għajta ta’

Politika żbaljata tal-UE dwar l-immigrazzjoni illegali

Il-politiċi Maltin aċċettaw il-politika ta’ l-UE dwar l-immigrazzjoni illegali minkejja li kienu jafu li hi ta’ ħsara għal pajjiżna.

Meta kienu għaddejjin in-negozjati dwar is-sħubija ta’ Malta fl-UE, din sostniet li jekk ir-rappreżentanti Maltin ma jaċċettax ir-regoli kollha ta’ l-UE dwar l-immigranti illegali l-UE ma taċċettax li Malta tissieħeb.

Illum il-poplu Malti qiegħed ibati l-konsegwenzi ta’ dik id-deċiżjoni ħażina.

L-ewwel nuqqas tal-politika ta’ l-UE dwar l-immigrazzjoni illegali hi li din bdiet tapplika għall-immigranti illegali r-regolamenti li kienu saru fil-Konvenzjoni dwar ir-refuġjati, biex refuġjati jingħataw ażil.

Huma refuġjati dawk li jkollhom jitilqu minn pajjiżhom jew minħabba gwerer, jew minħabba persekuzzjoni politika.

Il-konvenzjoni internazzjonali tagħraf li dawn il-persuni għandhom jingħataw ażil bħala refuġjati.

Malta ffirmat fl-1970 din il-Konvenzjoni, iżda xorta waħda ma aċċettatx l-obbligu li żżomm joqogħdu hawn refuġjati, u dan minħabba ċ-ċirkostanzi taċ-ċokon tal-pajjiż u tal-kobor tal-popolazzjoni.

L-UE saħqet li Malta ċċedi dawn ir-riservi li għamlet fil-1970 għall-Konvenzjoni dwar ir-Refuġjati.

Iżda l-UE rabtet ukoll lil Malta li tħares ir-regolamenti ta’ l-UE dwar il-protezzjoni umanitarja li tingħata lill-immigranti illegali.

L-immigranti illegali huma dawk li jħallu pajjiżhom għar-raġunijiet ekonomiċi, l-aktar biex isibu xogħol.

Meta l-UE għamlet li l-pajjiżi membri għandhom jagħtu protezzjoni umanitarja lill-immigranti illegali, hi inkoraġġiet lil mijiet ta’ eluf li jħallu l-pajjiż tagħhom biex imorru jsibu xogħol fil-pajjiżi ta’ l-UE.

Għalhekk l-UE qanqlet l-invażjoni ta’ immigranti illegali bir-regolamenti u l-politka tagħha.

L-UE tgħid li l-pajjiżi ta' l-Afrika ta’ Fuq ma għandhomx iħallu immigranti illegali jitilqu minn dawk il-pajjiżi għall-pajjiżi ta’ l-UE.

Fl-istess ħin l-UE tgħid li l-pajjiżi ta’ l-UE m’għandhomx jibagħtu lura lejn il-pajjiżi tal-Afrika ta’ Fuq minn fejn l-immigranti illegali jkunu telqu.

Jekk l-immigranti illegali m’għandhomx jintbagħtu lura f’dawk il-pajjiżi minħabba l-qagħda ħażina tal-pajjiżi minn fejn ġew, mhux l-istess qagħda ħażina jkunu l-immigranti illegali li l-UE ma tridx li jitħallew jitilqu minn dawk il-pajjiżi?

L-UE għandha regolament assurd ieħor li jgħid li immigrant illegali li daħal f’pajjiżi tal-UE m’għandux jitħalla jmur f’pajjiż ieħor ta’ l-UE, anke jekk l-immigrant ma jridx li jmur fl-ewwel pajjiż u dejjem ried imur f’xi pajjiż ieħor ta’ l-UE.

B’dan ir-regolament l-UE qiegħda tikkundanna lill-immigrant illegali joqgħod ikkalzrat f’pajjiż li ma jridx joqgħod fih, u qiegħda timponi lill-pajjiż iżomm għandu immigrant li l-pajjiż ma jridux jibqa’ għandu.

Bla sens hi wkoll in-nefqa ta’ miljuni kbar ta’ ewro min-naħa ta’ l-UE fuq l-immigrazzjoni illegali.

L-UE tagħmel spiża biex tmantni l-Aġenzija Frontex li għandha l-għan li tħares il-fruntieri ta’ l-UE.

Iżda mbagħad l-UE tagħti wkoll fondi kbar lill-pajjiżi membri biex iżommu joqogħdu għandhom l-immigranti li jirnexxilhom jidħlu illegalment.

Issa l-UE tidher li lesta tħallas il-biljuni biex il-Libja ma tħallix immigranti illegali jitilqu minn hemm għall-UE.

L-UE qiegħda tinsa li dawn l-immigranti jistgħu jkunu intitolati għal protezzjoni umanitarja.

Ma tridhomx fil-pajjiżi ta’ l-UE u lesta tħallas biex ma jmorrux f’dawn il-pajjiżi.

Allura għaliex l-UE mhix lesta li tgħid li mhux se tilqa’ aktar immigranti illegali, u jekk trid dan, l-immigranti ma jipprovawx imorru fl-UE la darba jkunu jafu li l-UE se tibgħathom lura?

U l-fondi li l-UE għandha għall-immigrazzjoni tgħaddihom lill-pajjiżi minn fejn l-immigranti jitilqu, biex il-fondi jintużaw biex jinħoloq xogħol għan-nies ta’ dawk il-pajjiżi?

Ħafna kritiċi tal-politika ta’ l-UE dwar l-immigrazzjoni illegali jsostnu li wara kollox l-UE trid li jidħlu immigranti fil-pajjiżi tal-UE li għandhom bżonnhom għat-tkabbir ta' l-ekonomija.

L-UE ma tagħtix każ li xi pajjiżi, bħal Malta, ma jistgħux jaċċettaw refuġjati u immigranti, għax għandhom poplazzjoni kbira għaċ-ċirkostanzi tal-pajjiżi.

Għalhekkk l-UE ma tħallix lil Malta tħalli l-immigranti illegali jmorru fil-pajjiżi l-oħrajn ta’ l-UE fejn iridu jmorru.

Ma jimpurtahiex li Malta ma tiflaħx iġġor il-piż ta’ eluf ta’ immigranti illegali, meta lanqas setgħet iżżomm lill-eluf ta’ uliedha stess milli jfittxu xogħol f’pajjiżi oħrajn.

Bi sħubija fl-Unjoni Ewropea tlifna l-Indipendenza ta’ pajjiżna

Fl-attivitaijiet ta’ Jum l-Indipendena, il-kelliema nqdew bl-okkażżjoni biex iqarrqu lill-poplu dwar x’kiseb bis-sħubija ta’ pajjiżna fl-UE.

Donnu ħassew il-ħtieġa li jnessu lill-poplu li pajjiżna tilef l-Indipendenza tiegħu meta għadda lill-UE s-setgħa f’ħafna oqsma importanti tal-ħajja.

Il-kelliema fl-attivitaijiet tal-Indipendenza żgur li riedu jnessu lill-poplu li saħansitra l-baġit mhux deċiż mill-Parlament Malti, imma jrid ikun hemm l-approvazzjoni tal-UE qabel ma titressaq quddiem il-Parlament Malti.

Minflok jipprovaw jiġġustifikaw lill-poplu t-telfien ta' l-Indipendenza tal-pajjiż biex ikollhom l-opportunità li joqogħdu madwar l-istess mejda mal-Ministru u l-mexxejja tal-pajjiżi l-oħrajn ta’ l-UE, il-Prim Ministru, il-Ministri u l-kelliema l-oħrajn pprofanaw il-kisba tal-Indipendena bil-ħrafa li l-pajjiż iggwadanja ħafna bis-sħubija fl-UE.

Iżda huma ma fissrux lill-poplu kemm hu l-ammont ta’ miljuni ta’ ewro li pajjiżna jkollu jħallas lill-UE (din is-sena €66.5 miljun), u lanqas l-ammont akbar ta’ flus li l-pajjiż ikollu jonfoq kull sena fi spejjeż minħabba s-sħubija.

Meta jingħaddu flimkien il-ħlasijiet magħmulin lill-UE u l-ispejjeż minfuqin minħabba s-sħubija kull sena, jinstab li jgħaddu bil-bosta l-ammont ta’ fondi li pajjiżna jirċievi mingħand l-UE.

Ma jridux li dan il-fatt ikun magħruf mill-poplu u għalhekk qatt ma aċċettaw l-isfida magħmula diversi drabi, biex isir “cost-benefit analysis” tas-sħubija ta’ Malta fl-UE.

“Cost-benefit analysis” tas-sħubija ta’ Malta fl-UE jikxef il-gideb li pajjiżna ggwadanja bis-sħubija.

Fl-attivitajiet ta’ Jum l-Indipendenza l-Prim Ministru qal li l-poplu rnexxielu jirbaħ id-diffikultajiet tal-kriżi ekonomika għax laħaq il-miri tiegħu li jkun membru ta’ l-UE u rnexxa wkoll għax daħal fiż-Żona Ewro.

Iżda l-fatti huma bil-maqlub ta’ dak li qal il-Prim Ministru, għax il-politika u r-regoli tal-UE żammew lill-pajjiż lura fl-esportazzjoni u anke fl-impjiegi, u fit-turiżmu minħabba l-għoli tal-prezzijiet.

L-ewro ma kinitx ta’ għajnuna lill-ekonomija tal-pajjiż u spiċċajna li minħabba l-ewro, il-pajjiż kellu jissellef il-miljuni kbar biex jislifhom lill-Greċja u biex jikkontribwixxi fil-fond li twaqqaf mill-UE biex jgħin lill-pajjiżi tal-ewro li jkunu f’diffikultajiet finanzjarji kbar.

Il-Viċi-Prim Ministru u Ministru ta' l-Affarijiet Barranin ftaħar li bis-sħubija fl-UE, Malta kabbret ir-rowl internazzjonali tagħha.

Iżda fil-fatt seħħ bil-maqlub għax leħen Malta ntilef fost is-27 pajjiż ta’ l-UE u Malta ma baqgħalhiex politika barranija tagħha, iżda timxi skont il-politika barranija komuni deċiża mill-UE.

Il-Viċi-Prim Ministru ftaħar ukoll li Malta saret interlokutur ewlieni bejn diversi pajjiżi.

Ma qalx li ftit taż-żmien ilu Malta lanqas setgħet tibgħat liċ-ċittadini Maltin il-Libja għax il-pajjiżi ta’ l-UE fiż-Żona Schengen ibbojkottjaw liċ-ċittadini Libjani.

Hu qal ukoll li r-relazzjonijiet bilaterali ta’ Malta maċ-Ċina u d-dinja Għarbija ssaħħew ħafna bis-sħubija fl-UE.

Mentri fil-fatt ġara li r-relazzjonijiet kemm maċ-Ċina kif ukoll mad-dinja Għarbija u partikolarment mal-Libja marru lura kemm Malta ilha li abbandunat l-politika ta’ newtralità u non-allinjament biex timxi fuq il-politka barranija komuni ta’ l-UE.

L-aktar li għaxqitha kienet il-Ministru Debono li żgarret tgħid li s-sħubija fl-UE qiegħda tippermetti lill-poplu Malti jgħix il-livell ta’ għajxien li jgawdi llum.

Insiet il-Ministru li minħabba l-għoli tal-ħajja u ż-żieda fl-ispejjeż dovuti għall-politika ta’ l-UE ħafna familji Maltin u Għawdxin raw il-livell tal-għajxien tagħhom jitbaxxa l-aktar il-familji tal-eluf ta’ ħaddiema li tilfu l-impjieg jew li l-kundizzjonijiet tal-impjieg tagħhom jitbaxxew.

Żgur li mhux f’waqtu li wieħed jitkellem dwar is-sħubija fl-UE meta wieħed ikun qiegħed ifakkar il-kisba tal-Indipendenza għax bis-sħubija hi l-Indipendenza tal-pajjiż li l-aktar intilfet.

Fittex li tiffirma l-petizzjoni popolari lill-Parlament Malti biex jgħaddi miżuri li jrażżnu l-immigrazzjoni illegali f’pajjiżna.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.