MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
Mill-Kampanja Ħelsien
Nazzjonali CNI
L-Unjoni
Ewropea maħkuma mill-biża’
Il-biża’
tat-terrorizmu ħakem ħafna pajjiżi ta’ l-Unjoni Ewropea, u
ħafna mill-ibliet ewlenin jidhru qishom fi stat ta’ gwerra bil-pulizija u
s-suldati armati sa snienhom lesti biex jisparaw lejn kull min jidher suspettuż.
Kontrolli li kienu tneħħew fil-fruntieri u fid-dwana b’riżultat
tal-ftehim tal-moviment ħieles bejn il-pajjiżi ta’ l-Unjoni, issa reġgħu
qegħdin isiru saħansitra anke iktar iebsa minn dawk ta’ qabel il-mewġa
ta’ l-attakki terroristiċi.
Il-bliet ewlenin ta’ l-Unjoni saru qishom kamp ta’ battalja, b’kull ftit
tal-ħin jinstemgħu sireni tal-karozzi tal-forzi tas-sigurtà jiġru
minn naha għall-oħra, u minn mument għall-ieħor tistenna li
tisma’ xi splużjoni tfaqqa’.
L-Unjoni Ewropea, li tiftaħar li twaqqfet bil-għan ewlieni, fost oħrajn,
biex toħloq kontinent wieħed ta’ sigurtà, paċi u sliem, qiegħda
ftit ftit tara l-għan jitbiegħed.
Hija qiegħda jkollha tarma ruħha iktar minn qabel biex teħodha
kontra għadu iktar perikoluż mill-għedewwa minn barra ta’
qabel, għax jinsab fiha, moħbi u mhux magħruf.
Xi pajjiżi ta’ l-Unjoni (fosthom l-Ingilterra u l-Italja), waslu biex iħassru
jew almenu jissospendu għal xi żmien, liġijiet li għamlu
biex jitħarsu d-drittijiet fundamentali tal-bniedem, biex il-gvernijiet
ikunu jistgħu jeħduha bla xkiel kontra kull min jissuspettawh.
Insew
dawn il-pajjiżi ta’ l-Unjoni li fil-waqt li qegħdin iħassru jew
jissospendu l-liġijiet tad-drittijiet tal-bniedem, qegħdin japprovaw
jew jirratifikaw il-Kostituzzjoni Ewropea li fit-tieni parti tagħha, fiha
ċ-Charter tad-Drittijiet Fundamentali tal-Bniedem.
Jekk l-Unjoni Ewropea ma tridx tkompli tgħix fil-biża’ (u aħna
f’Malta magħha, issa li sseħibna fiha), jeħtieġilha tifhem
li trid tibdel il-politika tagħha u minflok timmilitarizza ruħha
iktar, tiddikjara li se żżarma l-armamenti tagħha u tfittex biss
il-mezzi tad-djalogu u tal-ftehim bejn il-ġnus.
L-Unjoni
jeħtiġilha tqatta’ l-Kostituzzjoni għall-Ewropa li fasslet, u
tagħmel oħra li tibda biex tgħid li l-Unjoni twaqqfet biex taħdem
attivament għall-paċi u s-sliem fost il-ġnus, u biex tkattar l-iżvilupp
soċjali u ekonomiku tagħhom permezz ta’ koperazzjoni fejjieda li tħalli
lil kull pajjiż jitmexxa demokratikament skond ir-rieda tal-poplu tiegħu.
Biex teħles mit-theddida ta’ attakki terroristiċi, l-Unjoni Ewropea
jeħtiġilha tiddikjara ruħha newtrali fit-taqtiegħa bejn
l-Istati Uniti ta’ l-Amerika u l-popli li jaraw lill-Istati Uniti bħala
x-Xitan għadu ta’ Alla.
Għal Malta t-triq li teħlisna mit-theddida terroristika, hija diġà mibnija fil-Kostituzzjoni tagħna.
Jeħtieġ
li ma nitbegħdux minn dik it-triq biex nimxu wara l-Unjoni Ewropea li skond
il-Kostituzzjoni Ewropea li l-Parlament Malti approva fis-6 ta’ Lulju ta’
din is-sena se tfassal politika barranija komuni li mhix waħda ta’
newtralità għall-pajjiżi kollha membri tagħha.
It-tagħlima
ta’ Katrina ghall-UE
Nistgħu ngħidu li New Orleans fl-Istati Uniti ta’ l-Amerika għebet u issa aktarx niftakru fiha bħala Old Orleans.
Il-forza ta’ l-elementi tan-natura
wrew li huma aqwa mis-saħħa ta’ l-istrutturi ta’
l-amministrazzjoni Amerikana.
Nuru sogħba u simpatija bla qies mal-popolazzjoni Amerikana li ġarrbet
tbatijiet kbar bid-diżastru enormi li wettaq l-uragan mlaqqam Katrina.
Din il-grajja ta‘ niket tat aktar minn tagħlima waħda lill-pajjiżi
ta’ l-Unjoni Ewropea.
L-ewwelnett kixfet fil-beraħ
il-kruha kiefra tas-sistema kapitalista u liberali Amerikana li l-Unjoni Ewropea
qiegħda titqanżaħ biex tikkopja.
Huwa sagrileġġ li ma jinħafirx li fil-pajjiż l-aktar għani
fid-dinja hemm 45 miljun li m’għandhomx dritt għal ebda forma ta’
kura b’xejn tas-saħħa u fl-istess hin m‘għandhomx il-mezzi
finanzjarji biex ilaħħqu ma’ l-ispejjeż tal-kura medika li jeħtiġilhom.
Iżda l-Unjoni Ewropea, minflok issaħħah is-sistema tal-welfare soċjali
li l-pajjiżi membri tagħha irnexxielhom jibnu qabel issieħbu
fl-Unjoni, qiegħda tinsisti mal-gvernijiet tal-pajjiżi membri tagħha
biex iħottu l-welfare state ħalli l-Unjoni tkun tista’ tikkompeti
ma’ l-Istati Uniti ta’ l-Amerika.
Huwa skandlu li jkexkex li s-sistema demokratika ta’ l-Istati Uniti ta’
l-Amerika tippermetti tant faqar soċjali u livell tant baxx ta’
edukazzjoni ċivika bħal ma rajna li kien hemm fi New Orleans, kollha
konsegwenza tal-politika tas-suq ħieles u kompetizzjoni bla rażan.
Iżda l-Unjoni Ewropea trid
timponi fuq il-pajjiżi membri tagħha l-istess sistema ta’ suq ħieles
u kompetizzjoni mingħajr rażan li jkattru l-profitti ta’ ftit u
jwasslu għal faqar akbar tal-kotra.
L-Unjoni Ewropea qiegħda twettaq l-istess politika ta’ tkabbir ta’
l-inugwaljanzi u d-differenzi soċjali li rajna li jeżistu u li nafu li
qegħdin jiżdiedu fl-Istati Uniti ta’ l-Amerika, minkejja r-rata għolja
tat-tkabbir ta‘ l-ekonomija tal-pajjiż.
Ix-xeni orribbli ta’ ġlied, sparar, qtil u serq li seħħew
f’New Orleans u li ntwerew fuq it-televizjoni f’dawn il-ġranet, fetħulna
għajnejna għall-fatt li l-politika ekonomika u soċjali
kapitalista u liberali tista’ toħloq ġid materjali kbir għal
ftit u avvanz tekonoloġiku enormi fil-pajjiż iżda ma jissarrafx
f’soċjetà ċivili ġusta li tgħix f’sigurtà u s-sliem.
Għaldaqstant qiegħda tagħmel ħażin
l-Unjoni Ewropea li taddotta l-istess politika ekonomika u soċjali
kapitalista u liberali Amerikana għall-pajjiżi membri tagħha,
meta hija ħaġa ċara li din il-politika mhix imsejsa fuq il-valuri
veri u sani tal-ħajja, iżda biss fuq il-profitt li jagħti s-suq.
Nixtiequ li l-Uragan Katrina qatt ma seħħ.
Iżda jekk kellu jseħħ, kien ikun utli li
seħħ qabel is-6 ta’ Lulju li għadda, ħalli l-Parlament
Malti kienu jkollu twissija oħra għax ma jivvotax favur
il-Kostituzzjoni Ewropea li tagħmel is-sistema kapitalista liberali tas-suq
ħieles u kompetizzjoni bla rażan, kmandament kostituzzjonali li Malta
jkollha tħares.
Maġġoranza
favur sħubija fl-Unjoni b’ingann kbir
Aħna tas-CNI dejjem sostnejna li r-referenfum u l-aħħar
elezzjoni ġenerali ntrebħu b’ingann kbir u mhux, kif oħrajn iħobbu
jgħidu, “għax il-maġġoranza tal-poplu riedet hekk”.
Tant dejjem sħaqna li seħħ ingann kbir tal-Maltin u l-Għawdxin
fil-kampanja favur is-sħubija fl-Unjoni Ewropea kemm fir-referendum, kif
ukoll fl-elezzjoni ġenerali, li fid-29 ta’ Marzu tas-sena l-oħra,
jumejn qabel Jum il-Ħelsien, iffirmajna għand Nutar u xandarna
pubblikament Dikjarazzjoni Solenni li fiha tajna tagħrif dettaljat ta’
kif sar ingann kbir tal-poplu u għax minħabba f’hekk, aħna niċħdu
s-sħubija fl-Unjoni Ewropea.
Kemm kellna u għandna raġun qegħdin jagħtuhulna mhux biss
nies li jkellmuna u jgħidulna kif ġew ingannati, iżda tagħhulna
wkoll dan l-aħħar l-istess Segretarju Ġenerali tal-Malta
Farmers’ Association, is-Sur Peter Axisa.
Is-Sur Axisa kien inħatar mill-ex-Prim Ministru,
Fenech Adami, konsulent tal-Gvern fin-negozjati dwar il-biedja ma’ l-Unjoni
Ewropea.
Is-Sur Axisa kien strumentali biex ħafna bdiewa u l-familji tagħhom
ivvotaw favur is-sħubija fl-Unjoni Ewropea, għax lilu l-Gvern kien
żgurah li l-bdiewa ma kinux se jmorru ħażin billi kellhom
is-salvagwardja ta’ dik li hija magħrufa bħala is-‘safeguard
clause’.
B’din is-salvagwardja l-bdiewa kellhom jitħarsu
mill-importazzjoni tal-prodotti barranin f’każ li jaqa’ ħafna
l-prezz tal-prodotti Maltin.
U s-Sur Axisa bl-assigurazzjoni li kellu mingħand Fenech Adami, seta’
iserraħ ras il-bdiewa Maltin u Għawdxin qabel ir-referendum u l-aħħar
elezzjoni ġenerali.
Illum iżda, is-Sur Axisa qiegħed pubblikament jammetti li huwa u
l-bdiewa ġew ingannati u li daħku bihom, għax dak li kienu ġew
imwegħda dwar is-salvagwardja tas-‘safeguard clause’ mhux se jseħħ.
Dan tal-bdiewa huwa settur wieħed li ngannaw. Bħalu hemm setturi oħra
li qegħdin jintebħu kemm ta’ l-IVA u l-UE ngannawhom qabel
ir-referendum u l-aħħar elezzjoni ġenerali.
Urewhom id-debba u qabbżulhom il-ħmara. B’danakollu, il-Parlament
Malti fis-6 ta’ Lulju li għadda, ivvota favur il-ftehim ta’ sħubija
fl-Unjoni, meta vvota favur il-Kostituzzjoni Ewropea.
Iżda aħna tas-CNI qatt mhu se naqblu li l-poplu jkollu jsofri dak li ntrebaħ
b’ingann kbir.
Illum
jew għada, il-poplu jħassru.
L-UE
kontra l-Kristjaneżmu
Biex jinfluwenzaw lill-Maltin u l-Għawdxin jivvotaw favur is-sħubija fl-UE, kienu jsostnu li bis-sħubija jissaħħu l-valuri nsara tal-poplu tagħna.
Din
il-gidba kienet tagħmel parti importanti mill-kampanja ta’ qerq orkestrat
tal-propagandisti bla skrupli ta’ l-Unjoni Ewropea f’pajjiżna.
Min-naħa tas-CNI
dejjem sostnejna li l-UE mhux biss ma tħaddanx il-valuri nsara, iżda
saħansitra twettaq politika li hija kontra l-etika u l-morali nisranija.
Dan l-aħħar, żewġ kittieba Taljani, Lucetta Scaraffia, għalliema
fl-Università La Sapienza ta’ Ruma, u Eugenia Roccella, ġurnalista,
ħarġu ktieb bl-isem “Contro il Cristianesimo”, li fih huma
jipprovaw li l-Unjoni Ewropea, l-istess bhal GM, hija kontra l-Kristjaneżmu.
Scaraffia u Roccella jgħidu li għall-UE r-reliġjonijiet huma
l-akbar tfixkil għall-ħidma taghha favur id-drittijiet tal-bniedem.
Fl-Unjoni
jiddomina l-Lajċiżmu li jikkunsidra r-reliġjonijiet kollha bħala
fundamentalisti, waqt li huwa jiggarantixxi li jeżistu flimkien kull xorta
ta’ ideat religjużi differenti.
Iż-żewġ kittieba juru kif l-UE ssostni li l-abort huwa dritt
tal-mara, u l-maternità għandha valur negattiv.
Ir-reliġjon
Kattolika hi partikolarment ikkontestata fl-Unjoni fejn hija meqjusa għadu
tal-bniedem u tal-libertà ta’ l-individwu u tal-feliċità li tiġi
mil-libertà sesswali.
Dwar il-ktieb “Contro il Cristianesimo” ikkummenta tajjeb Mons Anton Gauci,
fil-ħarġa tat-3 ta’ Settembru, tal-Leħen is-Sewwa.
Skond stħarriġ ta’ l-opinjoni pubblika magħmul mill-UE, irriżulta
li fil-waqt li f’Malta 95 fil-mija jemmnu fl-eżistenza ta’ Alla, 47
fil-mija biss tal-Ġermanizi jemmnu li hemm Alla, 38 fil-mija ta’ l-Ingliżi
jemmnu f’Alla, u 34 fil-mija biss tal-Franċiżi jemmnu li Alla jeżisti.
Mhux magħruf kif il-Maltin u l-Għawdxin jistgħu jsaħħu l-valuri nsara billi jintegraw ma’ dawn il-popli ta’ l-UE, kif bellgħu lill-poplu qabel ir-referendum.
Ġurament ta' lealta` li jieħdu l-Membri Parlamentari kollha
Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).
Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.
Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).
Ġurament għall-qadi xieraq tal-kariga ta’ President.
Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).
Sezzjoni 6 tal-Kostituzzjoni ta' Malta
6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.
Artiklu I-6 tal-Kostituzzjoni ta' l-Unjoni Ewropea
Dritt ta' l-Unjoni
Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.
Tista' tafda lil min KISER il-ĠURAMENT tiegħu/tagħha?
L-Erbgħa, 14 ta’ Settembru, 2005.
<< Lura http://www.cnimalta.org/2005.html
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat Lm2 flimkien ma' din il-formola liċ-
Chairman
CNI,
Dr
Karmenu Mifsud Bonnici LL.D.
81,
Triq Ġuże Pace,
Ħamrun.
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ