MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Kif l-UE tiġi taqa’ u tqum mill-ħaddiema u l-popli

Żewġ eżempji li juru kif l-Unjoni Ewropea ma tagħtix każ x’konsegwenzi jkun hemm fuq il-ħaddiema u l-popli fl-istati membri tagħha b’riżultat tad-deċiżjonijiet “kattivi” li kultant timponi fuq il-gvernijiet ta’ l-istati membri, huma dawk li hija imponiet fuq it-tarznari tal-Polonja u fuq ir-rejattur nukleari tal-Bulgarija.

Il-kundizzjonijiet li l-Unjoni Ewropea qiegħda tordna fuq it-tarznari ewlenin tal-Polonja, fi Gdansk, Gdyna u Szezercin jixhdu ħafna l-kundizzjonijiet li imponiet fuq it-tarznari ta’ Malta.

L-Unjoni Ewropea qiegħda tesiġi li dawn it-tarznari Pollakki għandhom inaqqsu l-produzzjoni tagħhom b’40 fil-mija.

Jekk il-Gvern Pollakk ma jkunx lest li jagħmel dan, allura dawn it-tarznari għandhom iħallsu lura lill-Gvern Pollakk is-somma ta’ 580 miljun Ewro li rċevew bħala għajnuna fl-imgħoddi mill-Gvern Pollakk.

Naturalment dan qiegħda tesiġih l-Unjoni Ewropea u mhux għax il-Gvern Pollakk irid li jsir hekk.

Din l-ordni ta’ l-Unjoni Ewropea ġiebet dilemma kbira lill-Gvern Pollakk u lit-tarznari Pollakki, għax jekk tonqos il-produzzjoni, jintilfu l-impjieg 15,000 ħaddiem u jonqos iċ-ċans li t-tarznari jinbiegħu lil investituri privati li huma interessati fihom minħabba li d-domanda għall-bini ta’ vapuri u tiswija u konversjoni ta’ vapuri hija akbar mill-produzzjoni, jew mill-kapaċità ta’ produzzjoni li dawn it-tarznari għandhom illum.

Jekk min-naħa l-oħra, it-tarznari jkunu mġiegħla jħallsu lura 580 miljun Ewro li kienu rċevew f’sussidju, dawn ifallu u jkollhom jagħlqu.

It-tieni eżempju hu ta’ l-ordni li l-Unjoni Ewropea ġiegħlet lill-Bulgarija fil-2003 tagħlaq żewġ rejatturi nukleari li kienu jipprovdu ammont sostanzjali ta’ elettriku, li parti minnu kien jiġi esportat jew mibjugħ lil pajjiżi tal-Balkani, bħal l-Albanija, il-Kosovo, il-Maċedonja u anki lir-Rumanija u Montenegro.

Din l-ordni kellha tiġi obduta biex il-Bulgarija titħalla tidħol fl-Unjoni Ewropea fl-1 ta’ Jannar ta’ din is-sena.

Hekk kif daħlet fl-Unjoni Ewropea, il-Bulgarija ġiet ordnata tagħlaq żewġ rejatturi nukleari oħra li kien fadal.

Bl-għeluq ta’ l-erba’ rejatturi nukleari il-Bulgarija tilfet 800 megawatt ta’ elettriku li kellu effett bil-kbir fuq il-produzzjoni u l-esportazzjoni ta’ l-elettriku lill-pajjiżi ġirien tal-Bulgarija.

Fejn is-sena l-oħra (2006) il-Bulgarija kienet tesporta 7.6 biljun Kilowatt Hour ta’ elettriku, din is-sena se tesporta biss 1.5 Kilo-watt Hour.

Ir-riżultat ta’ dan hu li f’dawn il-pajjiżi girien li kienu jixtru l-provvista ta’ l-elettriku mill-Bulgarija, il-provvista naqsitilhom b’40 fil-mija.

Minħabba dan, qed ikun hemm qtugħ kbir fil-provvista ta’ l-elettriku f’dawn il-pajjiżi.

B’eżempju, f’Tirana, il-belt kapitali ta’ l-Albanija, id-dawl jinqata’ għal ħames sigħat kuljum.

Fi bliet oħra ta’ l-Albanija, il-qtugħ tad-dawl jitla’ għal seba’ sigħat kuljum.

Waqt li fl-irħula fil-kampanja, il-povri nies li joqogħdu f’dawn l-irħula jdumu bla dawl elettriku għal 15-il siegħa kuljum.

Naturalment, anki f’dawk il-pajjiżi l-oħra li semmejna li kienu jimportaw l-elettriku mill-Bulgarija, il-popli tagħhom qegħdin isofru dawn l-inkonvenjenzi wkoll kuljum.

Tistgħu timmaġinaw x’qed jiġri fil-produzzjoni industrijali fil-fabbriki u f’dawn il-pajjiżi b’dan il-qtugħ fil-provvista ta’ l-elettriku minħabba d-diktat ta’ l-Unjoni Ewropea.

Imbagħad tisma’ xi dixxipli ta’ l-Unjoni Ewropea f’pajjiżna jippriedkawlna li “l-Unjoni Ewropea trid tkun viċin in-nies”.

Xi ngħidu lil Barroso

Minflok jibgħatuh jixxejjer lil Barroso, il-membri tal-Parlament tagħna lill-President tal-Kummissjoni Ewropea sejrin illum jilqugħ, jisimgħuh, jinċensawh u jċappċpulu fil-laqgħa tal-Parlament li se ssir illum apposta għalih.

Lil Barroso imisshom jgħidulu li bil-politika ta’ l-Unjoni Ewropea dwar l-immigranti llegali, pajjiżna dieħel fi kriżi soċjali kbira.

Jgħidulu li l-immigranti llegali ma ridux jiġu joqogħdu f’Malta, iżda riedu jmorru fil-pajjiżi kbar ta’ l-Unjoni.

Għalhekk l-Unjoni għandha, mhux tgħina nġorru l-piż tagħhom, imma terfa’ l-piż ukoll hija billi tħallina ngħinuhom imorru għandha fejn riedu jmorru meta telqu minn pajjiżhom.

Lil Barroso nuruh li xbajna nisimgħu paroli dwar l-għajnuna li se tagħtina l-Unjoni għall-immigranti.

Lill-Unjoni ma rriduhiex tagħtina għajnuna għalihom, iżda aħna nagħtu lilha, nagħtuha l-immigranti li jiġu għandna.

Kwistjoni oħra ewlenija għall-pajjiżna hija dik tat-Tarzna.

Lil Barroso l-Membri Parlamentari jmisshom jgħidulu li l-pjan dwar it-Tarzna li l-UE bellgħet lill-Gvern huwa pjan li se jwassal għall-għeluq tat-Tarzna, mhux pjan li jsaħħah it-Tarzna.

Imisshom jgħidulu li l-Unjoni ngannat lill-Gvern u lill-poplu Malti dwar il-pjan tat-Tarzna meta l-Unjoni iddettat li ebda għajnuna ma tingħata lit-Tarzna wara Diċembru 2008, meta naqqset in-numru ta’ ħaddiema fit-Tarzna u s-siegħat tax-xogħol li jista’ jkun hemm fis-sena, u minħabba dawn il-kondizzjonijiet, it-Tarzna ma tistax tifdi.

Ma’ Barroso jmissna nagħmluha ċara li jekk inkunu sfurzati nagħżlu jew nagħlqu t-Tarzna, jew noħorġu mill-Unjoni, bla tlaqlieq nagħżlu li nitilqu mill-Unjoni ħalli t-Tarzna tibqa’ tħaddem lill-ħaddiema tagħna.

Lil Barosso l-Membri tal-Parlament imisshom jgħidulu li jekk għas-seba’ snin li ġejjin l-Unjoni Ewropea wegħditna 855 miljun Ewro, Malta se tmur minn taħt b’dak li se tagħti kull sena lill-Unjoni, b’dak li tilfet mill-Protokol Taljan u mill-profitti tal-Bank Ċentrali Malti li issa se jmorru għand il-Bank Ċentrali ta’ l-Unjoni, u bl-ispejjeż enormi li jkollna nagħmlu minħabba s-sħubija fl-Unjoni.

Ngħidulu lil Barroso li huwa għajb għall-Unjoni li tisloħ b’dan il-mod lill-pajjiżna li huwa żgħir u fqir ħdejha.

Nistaqsu lil Barroso kemm se tgħinna l-Unjoni Ewropea biex inżidu x-xogħol u l-impjiegi f’pajjiżna u nagħmlu tajjeb għall-fabbriki li tlifna u l-impjiegi li tlifna minħabba l-politika u d-direttivi ta’ l-UE?

Nistaqsuh lil Barroso għaliex l-Unjoni trid li l-pajjiżi membri jżidu fl-ispiża militari tagħhom u fl-armamenti li għandhom?

Qagħda skandaluża fl-UE

GĦADU kif tħabbar li se ssir liġi f’pajjiżna li tagħti ħarsien lil min jikxef frodi jew korruzzjoni fis-settur pubbliku (magħrufa bħala “whistleblowers”).

Mhux hekk jiġri fl-Unjoni Ewropea, għax l-Unjoni, minflok teqred il-korruzzjoni, teqred lil dawk li jikxfu l-korruzzjoni.

Hu magħruf aktar minn każ wieħed ta’ inpjegati ta’ l-Unjoni li, wara li rraportaw egħmejjel ta’ korruzzjoni, intalbu jirriżenjaw mill-impjieg, jew ingħataw il-pensjoni bl-iskuża li mardu, jew tkeċċew mill-impjieg mixlija bi ksur tal-kuntratt ta’ l-impjieg tagħhom.

L-aħħar każ ta’ impjegat ta’ l-UE li nħareġ bil-forza mill-uffiċċji ta’ l-Unjoni għax kien magħdud marid b’moħħu (“paranoid megalo-maniac”), hu dak ta’ l-impjegat Portugiż Josè Segueira.

Iżda Josè Segueira ma qagħadx għaliha kif l-Unjoni ttrattatu, u huwa ressaq fil-Qorti l-każ tat-tkeċċija tiegħu mill-impjieg.

Huwa ppreżenta fil-Qorti ċertifikat minn erba’ sptarijiet li kollha ddikjaraw li ma kellu ebda mard mentali.

Huwa rebaħ il-każ, iżda l-UE se tappella d-deċiżjoni tal-Qorti.

Kumitat tal-membri tal-Parlament Ewropew għadu kif ħareġ rapport fejn intqal li l-mod li bih l-Unjoni qiegħda timxi f’dawn il-każi mhux aċċettabbli.

Anki fost il-21 elf impjegati tal-Kummissjoni Ewropea hemm ferment dwar dan, skond ma rraporta ġurnal ta’ nhar ta’ Ħadd fl-Ingilterra, li qal li l-Unjoni qiegħda tiġġennen biex tagħmel dawn l-affarijiet.

Il-qagħda tal-kontijiet (“accounts”) ta’ l-UE hija skandaluża.

L-awdituri ilhom 12-il sena jirroftaw li jiffirmaw l-“accounts” għax m’humiex miżmuma tajjeb u m’hemmx kontroll effiċjenti għall-infieq tal-fondi ta’ l-Unjoni.

L-ammont ta’ infieq illegali u irregolari huwa kbir, u dan qalu l-istess President tal-Awdituri ta’ l-Unjoni Ewropea, Hubert Weber.

Membru tal-kumitat dwar il-kontroll tal-baġit tal-Parlament Ewropew, l-Ingliż Chris Heaton-Harris, stqarr li hemm problemi orribbli fl-infieq tal-fondi ta’ l-Unjoni li ġejjin mit-taxxi mħallsa miċ-ċittadini tal-pajjiżi membri ta’ l-Unjoni.

Huwa xela lill-Unjoni li għal snin twal għaddset rasha fir-ramel dwar din il-kwistjoni u tat wieħed x’jifhem li l-affarijiet kienu qegħdin jirranġaw.

U Chris Heaton-Harris ikkummenta li kif wieħed jista’ jkollu fiduċja li l-Unjoni kapaċi tmexxi ’l quddiem il-qagħda ekonomika ta’ l-Ewropa, jekk lanqas għandha ħila żżomm tajjeb l-“accounts” tagħha!

Ġurnal ta’ nhar ta’ Ħadd fl-Ingilterra rraporta li seba’ fil-mija biss mill-infieq ta’ l-Unjoni Ewropea intqal mill-awdituri ta’ l-Unjoni li kien sar legalment u korrettament.

Il-politika anti-soċjali ta’ l-UE

FTIT tal-ġranet ilu xxandar rapport li wera li f’Malta l-paga minima ma żdiditx daqs kemm żdiedet l-inflazzjoni jew daqs kemm għoliet il-ħajja.

Minħabba f’hekk il-familji li jgħixu bil-paga minima naqsitilhom il-livell tal-ħajja jew l-istandard tal-għixien.

Għax jekk il-pagi ma jogħlewx daqs kemm togħla l-ħajja, bil-paga tkun tista’ tixtri inqas milli kont tixtri qabel.

Is-settur ta’ dawk il-familji li jaqilgħu l-paga minima f’pajjiżna qiegħed għalhekk imur minn taħt, u dawn il-familji ma jistgħux jgħixu diċentament.

X’uħud mill-benefiċċji soċjali u mill-pensjonijiet huma inqas mill-paga minima.

Għalhekk dawk il-familji li jdaħħlu biss dawn il-benefiċċji jew dawn il-pensjonijiet ma jistgħux jgħixu diċentament.

Jekk minħabba l-fatt li l-ħajja togħla aktar milli tiżdied il-paga minima, il-familji li jgħixu bil-paga minima qegħdin jitfaqqru, dawk li jgħixu b’benefiċċji soċjali jew b’pensjonjiet inqas mill-paga minima, qegħdin jaqgħu f’faqar akbar.

Għalkemm il-ġustizzja soċjali tagħmar li għandna naħsbu l-ewwel u l-aktar fil-klassi taż-żgħir fis-soċjetà, dan mhux qegħdin nagħmluh meta ma nżidux il-paga minima daqs kemm togħla l-ħajja, u meta nħallu min jgħix b’benefiċċji soċjali jew pensjoni inqas mill-paga minima.

Il-politika ekonomika u soċjali ta’ l-Unjoni Ewropea ma tħallix lill-gvernijiet tal-pajjiżi ta’ l-Unjoni iżidu l-ispiża governattiva billi jżidu l-paga minima, il-benefiċċji soċjali u l-pensjonijiet.

Lanqas tħalli lill-gvernijiet jikkontrollaw il-prezzijiet biex ma togħliex il-ħajja, għax l-Unjoni tisħaq li l-prezzijiet jagħmilhom is-suq ħieles mill-indħil governattiv.

Għalhekk il-politika ekonomika u soċjali ta’ l-Unjoni Ewropea hija kontra l-klassi taż-żgħir fis-soċjetà.

Hija għalhekk politika kontra l-ġustizzja soċjali u kontra l-prinċipju tas-solidarjetà soċjali, minkejja li l-Unjoni tiftaħar li hija mibnija fuq is-solidarjetà.

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.