MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

minn Kampanja Ħelsien Nazzjonali CNI

JEKK TIRRISPETTA L-KOSTITUZZJONI TA' PAJJIŻEK GHID LID-DEPUTAT PARLAMENTARI TIEGHEK JIRRISPETTA L-FEHMIET TIEGHEK U MA JIVVOTAX FAVUR IL-KOSTITUZZJONI TA' L-UNJONI EWROPEA LI TKASBAR IL-KOSTITUZZJONI TA' MALTA.

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Il-ftehim ta’ sħubija ta’ Malta fl-Unjoni Ewropea se jġib inkwiet soċjali kbir f’pajjiżna. 

Illum qegħdin nassistu għall-oxxenità li l-Gvern għamel lill-ħaddiema tat-Tarzni. 

Għada se jagħmel oxxenità oħra mal-ħaddiema tax-Xatt. 

Imbagħad se jdur għall-ħaddiema tal-Public Broadcasting Services (PBS). 

Wara jkun imiss lill-ħaddiema ta’ l-Air Malta, u nibqgħu sejrin hekk sakemm inħallu lill-Unjoni Ewropea timponi l-politika anti-soċjali tagħha fuqna.

Sadanittant il-Gvern qed jarma lill-Pulizija ħalli jilqgħu għall-irvellijiet. 

Din il-ġimgħa rajna xeni ta’ għadd ta’ pulizija lesti għall-inkwiet jgħassu ma’ Kastilja, ma’ l-istamperija tat-Times u mal-Qorti. 

Rajna mijiet ta’ ħaddiema tas-sengħa, kapijiet tal-familja, mgħaddba għall-Gvern u għal Fenech Adami, Gonzi u Dalli, fit-toroq tal-Belt, minflok fuq xogħolhom jaħdmu ħalli jitkattar il-ġid ta’ pajjiżna.

Il-Gvern tagħna – ħali u bla kuxjenza soċjali, mifni bi skandli kbar – minflok jippjana l-ewwel kif jutilizza s-snajja’ tal-ħaddiema li mhux se jibqgħu fuq xogħol tat-tiswija u tal-bini tal-vapuri, hu kuntent li jħallashom bla ma jagħmlu xejn ħlief jhewdnu x’se jiġri minnhom u mnikkta għax ma jafux fejn u ma’ min se jmorru jaħdmu. 

Fl-istess ħin il-Prim Ministru u l-Ministru qishom m’hu qed jiġri xejn, jiftaħru kemm se mmorru tajjeb bis-sħubija fl-UE, u bl-aktar mod servili jwettqu r-regoli u l-impożizzjonijiet ta’ l-Unjoni, minkejja li dawn huma anti-soċjali u ta’ dannu kbir għal pajjiżna.

Is-CNI tikkundanna l-agir anti-nazzjonali tal-Gvern Malti. 

Tikkundanna l-politika anti-socjali ta’ l-Unjoni Ewropea. 

Tiċħad il-ftehim tas-sħubija li l-Gvern għamel ma’ l-Unjoni Ewropea.

Twiegħed solidarjetà sħiħa mal-ħaddiema Maltin u li qeghdin iġarrbu din l-umiljazzjoni kollha.

Tappoġġja l-isforzi kollha li l-GWU qiegħda tagħmel biex tħares l-interessi tal-ħaddiema milquta bit-twettiq tal-politika ta’ l-UE.

Tappella lill-ħaddiema Maltin kollha jingħaqdu fl-union ħalli din tkun tista’ tiddefendi l-interessi u d-drittijiet tagħhom.

Minflok ir-rebbiegħa li Fenech Adami jinsulentana biha, ġejja xitwa ħarxa għall-ħaddiema Maltin. 

L-ewwel se jkollna t-tempesta tal-Budget. 

Imbagħad wara li jgħaddu l-elezzjonijiet tal-Parlament Ewropew f’Ġunju li ġej, ikollna t-tempesti l-oħra dwar

* il-pensjonijiet, 

* il-kura tas-saħħa,

* is-servizzi soċjali, u

* beraq ieħor, 

kollu frott tas-sħubija tagħna fl-Unjoni Ewropea.

It-torċa tal-Ħelsien ma tintefiex

Wara li l-Konferenza Ġenerali tal-Partit Laburista qatgħet x’għandha tkun il-politika tal-partit dwar l-Unjoni Ewropea, nafu ftit aħjar x’forzi hawn illum f’Malta li mhux bi ħsiebhom jitkaxkru b’dak kollu li l-UE tiddeċiedi għall-pajjiżi membri tagħha. 

F’dan il-kamp hawn partit politiku, il-Partit Laburista, u żewġ organizzazzjonijiet mhux governattivi, il-Front Maltin Inqumu (FMI) u l-Kampanja Ħelsien Nazzjonali (CNI).

Il-Partit Laburista ntrabat mad-delegati tiegħu li jaħdem bla heda ħalli jara li l-ftehim ma’ l-UE ma jkunx żvantaġġjuż u ta’ ħsara għall-poplu Malti u speċjalment għall-ħaddiema.

Il-Front Maltin Inqumu (FMI) stqarr li l-ftehim li l-Gvern Nazzjonalista għamel ma’ l-UE għandu jinbidel bi ftehim li jħares il-Kostituzzjoni ta’ Malta, ma jirfisx il-politika ta’ newtralità u favur il-ħidma għall-paċi, li jħalli lil Malta ħielsa fil-qasam ekonomiku li tkattar ix-xogħol u l-impjiegi u tagħmel ftehim ta’ kummerċ ma’ kull pajjiż li lest jgħin lil pajjiżna.

Is-CNI (Kampanja Ħelsien Nazzjonali) hija t-tielet organizzazzjoni f’Malta li mhix lesta tittradixxi lill-Maltin.

Għalhekk is-CNI qiegħda ssostni li la darba l-ftehim tas-sħubija ta’ Malta li l-Gvern Nazzjonalista għamel ma’ l-UE huwa ta’ dannu kbir għall-poplu Malti, dak il-ftehim m’għandux ikun il-bażi tar-relazzjonijiet ta’ pajjiżna ma’ l-UE. 

Is-CNI temmen ukoll li hija għandha tkompli tikkumbatti ħalli l-poplu Malti jgħożż l-Indipendenza u l-Ħelsien u s-sovranità tiegħu, li huma mhedda serjament bil-ftehim tas-sħubija fl-UE.

Illum qegħdin naraw li l-Gvern Nazzjonalista ħeba mill-poplu Malti x’inhu l-istat veru 

* tal-qasam finanzjarju, 

* tal-qasam tas-servizzi soċjali, 

* tal-qasam tas-saħħa, 

* tal-qasam industrijali u 

* l-impjiegi, u 

* ta’ oqsma oħra. 

Issa l-Gvern qed jgħidilna li l-istat ta’ ebda wieħed minn dawn l-oqsma m’huwa sostenibbli. 

Qabel l-elezzjoni, Fenech Adami u sħabu, imdawrin mill-kor ta’ 31 vuċi stonati, kienu jintonawlna ftaħir u ferħ kemm konna sejrin tajjeb f’dawn l-oqsma kollha, u kemm se mmorru aħjar fihom meta nissieħbu fl-Unjoni Ewropea.

Fil-kamp l-ieħor li lest jissagrifika kollox għal dak li l-Unjoni Ewropea trid, hawn il-Partit Nazzjonalista fil-Gvern, il-Partit ta’ l-Alternattiva, u l-31 organizzazzjonijiet u għaqdiet li fformaw il-kor ċelebri li akkumpanja lill-Gvern Nazzjonalista fil-ħadma li ħadem lill-maġġoranza żgħira tal-Maltin u l-Għawdxin fl-aħħar elezzjoni.

Iżda l-kundizzjonijiet tal-ftehim tas-sħubija fl-UE, minflok huma ta’ għajnuna għalina fl-oqsma kollha msemmija, se jkunu ta’ dannu aktar għalina, għax il-politika ta’ l-Unjoni f’dawk l-oqsma ma tgħoddx għalina u mhix addattata għaċ-ċirkostanzi tagħna, ta’ pajjiż żgħir iċken minn belt fil-pajjiżi l-oħra membri ta’ l-Unjoni. 

L-akbar saram li għandna bil-ftehim tas-sħubija fl-Unjoni huwa li m’aħniex ħielsa li nimxu f’kull qasam b’politika li l-maġġoranza tal-poplu Malti tagħżel fl-elezzjoni ġenerali, iżda jkollna bħal ilsira noqogħdu ghal dik il-politika li l-Unjoni Ewropea tiddeċiedi għal kull pajjiż imsieħeb fl-Unjoni.

Is-CNI ma tridx li l-fjamma ta’ l-Indipendenza u t-torċa tal-Ħelsien jintfew f’Malta. 

Għalhekk is-CNI se tkompli tħabbrek ħalli ż-żgħażagħ Maltin jerġgħu jifhmu li l-Indipendenza u l-Ħelsien huma l-għeżeż ħwejjeġ li kull ġens jista’ jkollu. 

Is-CNI trid tfiehem liż-żgħażagħ Maltin li għandhom ikunu huma li jfasslu l-ġejjieni ta’ pajjiżna u mhux il-ġejjieni tagħhom jitfassal mill-maġġoranza tal-popli barranin tal-pajjiżi l-oħra fl-Unjoni Ewropea.

Biex il-ġnus ta’ l-Ewropa naħdmu flimkien m’hemmx għaliex nitilfu l-ħelsien tagħna. 

In-nuqqas ta’ ħelsien għad f’qasir żmien ikun il-kawża li l-ġnus imgezza f’għaqda waħda jirribellaw u jerġgħu jitolbu l-ħelsien tagħhom.
 

F’qasir żmien, jerġa’ jseħħ dak li ġara fl-Unjoni Sovjetika meta r-repubbliki li kienu jifformaw l-USSR (Union of Soviet Socialist Republics), iġġieldu biex jieħdu l-indipendenza tagħhom.

Jiġri dak li seħħ miċ-Ċekoslovakkja, meta s-Slovakkja hadet l-indipendenza tagħha mir-Repubblika Ċeka. 

Jiġri dak li ġara fil-Jugoslavja, meta s-Slovenja, il-Kroazja, il-Herżegovina u l-Bosnia ġġieldu għall-helsien tagħhom minn mas-Serbia u l-Montenegro.

Din hija t-tagħlima ta’ l-istorja. 

L-istess jiġri fl-għaqda li mhix naturali tal-pajjiżi ta’ l-Unjoni Ewropea. 

Malta terġa’ tkun indipendenti u ħielsa sakemm il-fjamma ta’ l-Indipendenza u t-torċa tal-Ħelsien ma jintefgħux fil-qlub u fl-imħuħ tal-poplu tagħna.

Il-kefrija tal-politika ta’ l-Unjoni Ewropea qiegħda tinħass fil-ħruxija kollha tagħha fil-miżuri li l-Gvern ha fuq ordni ta’ l-Unjoni kontra l-ħaddiema tat-Tarzni tagħna.

Min jifli l-Annex numru 11 tat-Trattat ta’ Sħubija li Fenech Adami ffirma fis-16 ta’ April f’Ateni, u li Alfred Sant ma kienx se jiffirma, isib li l-Unjoni Ewropea ffissat hija, u Fenech Adami aċċetta, kemm jista’ jsir xogħol fit-Tarzni Maltin u x’inhu n-numru tal-ħaddiema produttivi li jistgħu jkomplu jaħdmu fit-Tarzni.

L-Unjoni Ewropea wżat il-giljottina mal-ħaddiema tat-Tarzni Maltin għax hemm “excess capacity” fit-Tarzni tal-pajjiżi ta’ l-Unjoni, jiġifieri, l-ammont ta’ xogħol li t-Tarzni huma kapaċi jagħmlu, huwa akbar mill-ammont tax-xogħol ta’ tiswija u ta’ bini tal-vapuri li hawn illum.

Għalhekk, l-Unjoni Ewropea qatgħetha li t-Tarzni ta’ Malta ma jistgħux jaqbżu ammont ta’ xogħol aktar minn żewġ miljuni “man hours” fis-sena.

Għal Malta, din il-politika ta’ l-Unjoni Ewropea hija diżastru kbir. 

Il-problema ewlenija u dejjiema ta’ pajjiżna hija n-nuqqas ta’ xogħol għan-numru ta’ ħaddiema li għandna.

Fl-imgħoddi taffejna għal din billi eluf ta’ ħaddiema kellhom jemigraw.

Wara li pajjiżna ha rajh f’idejh, bnejna industriji ħalli l-ħaddiema tagħna jibqgħu jaħdmu f’Malta. 

Biex għamilna dan, tajna għajnuniet u inċentivi lill-imprendituri ħalli joħolqu x-xogħol u l-opportunitajiet ta’ eluf ta’ impjiegi.

Imma issa skond il-ftehim li rabatna ma’ l-Unjoni Ewropea, ma nistgħux nibqgħu mexjin b’din il-politika li permezz tagħha ħloqna xogħol u impjiegi f’pajjiżna. 

L-Unjoni Ewropea, bil-ftehim li Fenech Adami ffirma fis-16 ta’ April f’Ateni, u li l-Oppożizzjoni Laburista fil-Parlament ivvotat kontra r-ratifika tiegħu, ħadilna d-dritt li nkomplu nagħtu għajnuniet u inċentivi lill-industrija, bl-iskuża tal-prinċipji tal-kompetizzjoni ħielsa.

Din il-politika ta’ l-Unjoni Ewropea hija ta’ ostaklu kbir ħafna għat-twaqqif ta’ intrapriżi ġodda f’pajjiżna, u anke għat-tkomplija ta’ x’uħud mill-intrapriżi li għandna joperaw f’pajjiżna llum. 

L-investiment ġdid li bil-politika ta’ għajnuniet u inċentivi konna nistgħu nġibu lejn pajjiżna, issa jmur f’pajjiżi girien li m’humiex marbutin bil-politika ta’ l-Unjoni Ewropea.

Xi intrapriżi li llum għandna, meta jitilfu l-għajnuniet li kellhom, ifittxu jmorru fejn l-għajnuniet jistgħu jingħatawlhom. 

Dan huwa kollu telf ta’ xogħol u impjiegi għalina, minħabba l-ftehim li rabatna Fenech Adami bih ma’ l-Unjoni Ewropea.

Is-soluzzjoni li l-Unjoni Ewropea imponiet fuq il-Gvern Malti għall-problema tat-telf li t-Tarzni jagħmlu kull sena, hija soluzzjoni ħażina ħafna għal Malta.

Aħna għandna bżonn inġibu aktar xogħol għal pajjiżna halli nħaddmu aktar ħaddiema u ħalli ndaħħlu aktar flus barranin li tant għandna bżonn biex inkunu nistgħu nixtru dak li jeħtieġilna minn barra.

Minflok infittxu li nġibu aktar xogħol għat-Tarzni tagħna, l-Unjoni Ewropea sforzatna naċċettaw limitu ta’ l-ammont ta’ xogħol tat-tiswija u tal-bini tal-vapuri li nistgħu nagħmlu kull sena.

Fil-qasam tax-xogħol, il-politika ta’ l-Unjoni Ewropea hija mibnija fuq prinċipji soċjali ħżiena u li ma naqblux magħhom. 

Għall-Unjoni Ewropea, fil-qasam ta’ l-industrija tal-manifattura u ta’ l-industrija tas-servizzi, ir-regoli tas-suq huma fuq kollox u assoluti u l-kompetizzjoni hija kmandament ieħor u ma tistax tixxekkel. 

Mhux hekk, iżda, fil-qasam tal-biedja fejn ir-regoli tas-suq ħieles u tal-kompetizzjoni ma jeżistux.

Minħabba l-politika żbaljata tagħha, l-Unjoni Ewropea ġġiegħel lill-pajjiżi membri tagħha jħallsu miljuni kbar biex ħaddiema jitilqu mill-impjieg fejn l-azjendi jkunu qegħdin jitilfu, minflok ma jagħtu lil dawk l-azjendi l-istess ammont ta’ flus biex ikunu jistgħu jkomplu jagħtu xogħol u impjieg lill-ħaddiema tagħhom.

Għalhekk hawn tant miljuni ta’ ħaddiema qiegħda bla xogħol fil-pajjiżi ta’ l-Unjoni Ewropea.

Din il-politika żbaljata u anti-soċjali, l-Unjoni Ewropea qiegħda timponiha fuq Malta u l-Gvern ta’ Fenech Adami huwa kuntent li jżid id-dejn billi jħallas il-miljuni ħalli mijiet ta’ ħaddiema tat-Tarzni jitilqu mill-impjiegi. 

Minflok qed jinħoloq aktar xogħol, qiegħed jinħoloq aktar qgħad bis-saħħa tal-ftehim tas-sħubija fl-Unjoni Ewropea.

IRRIDU L'INDIPENDENZA MILL-UNJONI EWROPEA

Il-Ħamis, 13 ta’ Novembru, 2003

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola liċ-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ