MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Id-Deputat Mexxej Laburista għall-Affarijiet tal-Parlament il-ġimgħa l-oħra qal li l-Gvern ġiegħelna nħallsu t-taxxa tal-VAT fuq madwar 400 prodotti ġodda, li qabel ma kinitx titħallas VAT fuqhom.

Fost dawn il-prodotti hemm dawk 

* tal-ħelu, 

* juices, 

* materjal ta’ l-istampa bħal kotba, 

* pitazzi u 

* ġurnali u anki 

* mediċinali.

Li ma ntqalx huwa li l-VAT fuq dawn l-400 oġġetti hija ħtija tas-sħubija ta’ Malta fl-Unjoni Ewropea, għax l-Unjoni ġiegħelitna nagħmlu t-taxxa tal-VAT fuq dawn l-oġġetti.

Lanqas ma ntqal li sakemm min ikun fil-Gvern f’pajjiżna, jibqa’ marbut bil-ftehim li sar ma’ l-Unjoni Ewropea mill-Gvern Nazzjonalista, dawn l-400 oġġetti jibqgħu bit-taxxa tal-VAT fuqhom, għax rajna mhux f’idejna, iżda f’idejn l-Unjoni.

Il-Partit Laburista jaf dan, u qabel ir-Referendum insista biex ma niġux f’dan. 

Aħna tas-CNI wkoll insistejna ħalli dan ma jiġrix.

Imma issa, fil-waqt li aħna tas-CNI għadna ninsistu ħalli dawn it-taxxi fuq dawn il-prodotti jitneħħew, billi ma jibqax il-ftehim li sar ma’ l-Unjoni Ewropea, id-Deputat Mexxej tal-Partit Laburista m’għadux jgħid bħalna u kif kien jgħid qabel ir-Referendum.

IS-CNI se tibqa’ kontra s-sħubija ta’ Malta fl-Unjoni Ewropea, u se tibqa’ taħdem sabiex il-poplu Malti jerġa’ jikseb lura l-Indipendenza u l-Ħelsien. 

Hekk iddikjara ċ-Ċhairman tal-Kampanja Ħelsien Nazzjonali fid-diskors tiegħu ta’ l-għeluq tal-laqgħa annwali tas-CNI li saret nhar il-Ħadd, 9 ta’ Mejju, fil-Mosta.

L-Avukat Karmenu Mifsud Bonnici tenna d-deċiżjoni meħuda mis-CNI s-sena l-oħra wara l-iffirmar tat-Trattat tas-Sħubija ta’ Malta fl-Unjoni Ewropea. 

Huwa rrefera għad-dikjarazzjoni solenni li s-CNI xandret fid-29 ta’ Marzu li għadda, li fiha s-CNI ċaħdet għal kollox it-Trattat tas-Sħubija ffirmat fis-16 ta’ April, 2003, f’Ateni, u xliet lill-Unjoni Ewropea li kienet ħatfet taħt idejha lil Malta.

Id-dikjarazzjoni sostniet li l-ftehim li sar ma’ l-Unjoni Ewropea ma kienx jiswa legalment, għax il-kunsens tal-poplu għalih kien ivvizzjat b’qerq, bi pressjoni mhux flokha, indħil barrani żejjed, żbilanc skandaluż ta’ mezzi finanzjarji u tal-faċilitajiet ta’ tagħrif lill-pubbliku, u għadd ta’ irregolaritajiet oħra.

Il-Ġnus Magħquda informata

Id-dikjarazzjoni solenni tad-29 ta’ Marzu, 2004 ntbagħtet mis-CNI lill-Unjoni Ewropea stess u lis-Segretarju Ġenerali tal-Ġnus Magħquda, li ntalab jgħaddiha lill-pajjiżi kollha tal-Ġnus Magħquda ħalli jkunu jafu li f’Malta mhux veru li l-poplu kollu huwa favur li pajjiżna jinsab fl-Unjoni Ewropea, u li hawn min qiegħed jaħdem ħalli l-poplu Malti jerġa’ jikseb lura l-Indipendenza u l-Ħelsien li tilef.

Iċ-Ċhairman tas-CNI qanqal il-kwistjoni tar-ratifika tat-Trattat Kostituzzjonali ta’ l-Unjoni Ewropea li trid issir wara li jintlaħaq ftehim dwar il-Kostituzzjoni ta’ l-Unjoni, aktarx f’Ġunju li ġej.

Huwa fisser li l-Kostituzzjoni ta’ Malta hija l-ogħla liġi tagħna, u li hija tgħid li l-liġijiet tagħna jsiru mill-Parlament tagħna, u jekk xi liġi ma tkunx taqbel mal-Kostituzzjoni, il-Kostituzzjoni tegħleb dik il-liġi.

Iżda t-Trattat Kostituzzjonali ta’ l-Unjoni Ewropea se jipprovdi li l-Kostituzzjoni u l-liġijiet ta’ l-Unjoni Ewropea huma aqwa mill-Kostituzzjoni u l-liġijiet tagħna, u li jegħlbuhom fejn ma jkunux jaqblu. 

Dan jammonta għal emenda fundamentali tal-Kostituzzjoni tagħna, li tista’ ssir biss jekk jaqblu magħha mill-inqas, tnejn minn tlieta tal-membri kollha tal-Parlament Malti.

Sabiex l-‘entrenched provisions’ tal-Kostituzzjoni tagħna ma jiġux fix-xejn, il-membri ta’ l-Oppożizzjoni m’għandhomx jivvotaw favur ir-ratifika tat-Trattat Kostituzzjoni ta’ l-Unjoni Ewropea, u b’hekk ma jkunx hemm in-numru meħtieġ ta’ tnejn minn kull tlieta tal-membri kollha tal-Parlament Malti li bil-vot tagħhom favur dak li tgħid il-Kostituzzjoni ta’ l-Unjoni Ewropea jkunu qegħdin ixejnu dak li tgħid il-Kostituzzjoni ta’ Malta.

Jekk xi deputati ta’ l-Oppożizzjoni ma jkollhomx il-kuraġġ li jivvotaw kontra r-ratifika tat-Trattat Kostituzzjonali ta’ l-Unjoni Ewropea, għandhom almenu jastjenu milli jivvotaw, ħalli jkunu leali għall-ġurament li ħadu li jirrispettaw il-Kostituzzjoni ta’ Malta.

Il-Ħamis, 13 ta’ Mejju, 2004.

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ