MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Moviment għall-Indipendenza ta’ Malta

Lill-Maltin u l-Għawdxin li jgħożżu l-Indipendenza u l-Ħelsien, lil dawk li m’humiex kuntenti li l-poplu tagħna m’għadx għandu rajh f’idejh u lil dawk li ma jaqblux mal-politika jew mat-tmexxija ta’ l-Unjoni Ewropea, il-Kampanja Ħelsien Nazzjonali (CNI), issa li l-Elezzjoni għaddiet, tħeġġiġhom jappoġġjaw it-twaqqif ta’ Moviment għall-Indipendenza ta’ Malta (Malta Independence Movement).

Hu x’inhu t-twemmin politiku tiegħek –

* Nazzjonalist,

* Laburist, ta’

* l-Alternattiva jew ta’

* l-Azzjoni Nazzjonali -

jekk tifhem li s-sħubija fl-Unjoni Ewropea hija aktar ta’ ħsara milli ta’ ġid għall-kotra tal-poplu u għal pajjiżna, għandek taħdem biex mill-aktar fis possibbli pajjiżna joħroġ mill-Unjoni.

Dan iseħħ meta jkun hawn maġġoranza ta’ Maltin u Għawdxin li jridu li l-Gvern elett demokratikament ma jkunx aktar mġiegħel li jagħmel dak li tiddeċiedi l-maġġoranza tal-gvernijiet tal-pajjiżi ta’ l-Unjoni, minkejja l-vot kuntrarju tal-Gvern ta’ Malta.

Bħal ma l-istorja politika ta’ ħafna pajjiżi tgħallimna, iż-żgħażagħ, speċjalment l-istudenti, dejjem ikunu minn ta’ quddiem fil-ġlieda għall-indipedenza u l-ħelsien.

Nittamaw li anki f’Malta, ħafna żgħażagħ għandhom il-fibra morali li jwarrbu l-interessi egoistiċi tagħhom u jiddedikaw l-isforzi u t-talenti tagħhom biex jifdu lill-art twelidhom u jeħilsu lilhom nfushom u lill-poplu Malti mill-madmad tal-gvernijiet barranin ta’ l-Unjoni Ewropea.

Iż-żgħażagħ, imħeġġin minn spirtu patrijotiku u mill-imħabba għal ġensna, m’għandhomx iħallu li jiddemoralizzawhom dawk sħabhom li jfittxu l-interessi personali u finanzjarji tagħhom qabel il-ġid tal-poplu u jinbarmu bil-propaganda tal-barranin ta’ l-Unjoni.

L-istorja politika ta’ ħafna pajjiżi, inkluża Malta, turina li l-klassi tal-ħaddiema kienet protagonista fil-ġlieda għall-Indipendenza u l-Ħelsien minn ħakma barranija.

Hekk seħħ f’pajjiżna fil-ġlieda biex sirna għall-ewwel darba stat sovran u repubblika demokratika.

Din id-darba, il-ġlieda kienet kontra l-barrani u ħafna ħaddiema kienu lesti jissagrifikaw anki l-impjieg tagħhom biex pajjiżna jsir indipendenti u ħieles.

Il-barrani ma kienx avversarju żgħir u l-ġlieda kienet iebsa fis-snin imgħoddija.

Illum, il-ġlieda għall-Indipendenza u l-Ħelsien mhux se tkun inqas iebsa għax din id-darba l-ġlieda hija kontra ħutna stess Maltin u Għawdxin li biegħu l-lealtà tagħhom lill-barranin ta’ l-Unjoni u li minnhom huma mwiżnin tajjeb.

Irridu noħduha kontra l-interessi egoistiċi tagħhom li jwassluhom biex jinjoraw u jissagrifikaw l-interessi tal-kotra tal-poplu Malti.

* Tkun kemm tkun iebsa l-ġlieda u

* tkun kemm tkun twila t-triq,

* dawk kollha li jgħożżu l-libertà għall-poplu tagħna,

* iħobbu lil art twelidna u

* jridu l-iżvilupp soċjali u

* l-ġid tal-poplu,

għandna niġu flimkien biex naħdmu ħalli Malta terġa’ tkun

* sovrana,

* indipendenti u

* ħielsa mill-Unjoni Ewropea,

għalkemm sħab magħha fil-ħidma għall-paċi u għat-tkattir tal-koperazzjoni bejnietna u bejn il-ġnus kollha ta’ rieda tajba.

Għandna lkoll naħdmu fix-xhur li ġejjin,

* fil-partiti politiċi rispettivi tagħna,

* fit-trejd unjins u

* l-organizzazzjonijiet soċjali li nappartjenu,

* fl-istituzzjonijiet edukattivi għoljin fejn ninsabu,

* ħalli l-ideali tagħna jitħaddnu mill-maġġoranza tal-Maltin u l-Għawdxin u

* l-poplu tagħna jerġa’ jikseb rajh f’idejh u

* ġensna jerġa’ jkun indipendenti u ħieles.

Il-poplu Malti qiegħed jgħix gidba.

Il-ħin kollu jtennulu l-gidba li se jirċievi mill-Unjoni Ewropea 855 miljun Ewro f’7 snin, bla ma jgħidulu li minnhom irridu nnaqqsu 360 miljun Ewro li nagħtu lill-Unjoni fl-istess snin.

* Aktar tard wara sirna nafu li issa s-somma hija ta' 420,000,000 ewro.

Għalhekk l-ammont nett li jibqgħalna huwa ta’ 495 miljun Ewro fis-7 snin, li jfisser li se jkollna 70.7 miljun Ewro fis-sena, li jġibu 30.5 miljun liri Maltin fis-sena.

Dan l-ammont ta’ 30.5 miljun liri Maltin fis-sena ma jirkuprax l-ispejjeż kbar li pajjiżna jagħmel fis-sena, kaġun tas-sħubija fl-Unjoni.

Dawn l-ispejjeż jikkonsistu fil-ħlasijiet lil għadd kbir ta’ impjegati fis-settur pubbliku f’Malta u barra minn pajjiżna, konnessi ma’ l-Unjoni Ewropea u l-ispejjeż kollha tas-safar kontinwu għal-laqgħat ta’ l-Unjoni kull ġimgħa.

Tant huwa kbir l-infieq fis-salarji u l-ispejjeż l-oħrajn kollha, li l-Gvern qiegħed jirrifjuta li jagħti tagħrif dwarhom, minkejja t-talbiet insistenti li jsirulu.

Ma jagħtix tagħrif għax jibża’ juri kemm pajjiżna sejjer minn taħt.

Ta’ min jgħid li dawn l-ispejjeż qegħdin isiru mingħajr il-pajjiż ma jikseb xejn minnhom, għax l-għoti tal-30.5 miljun liri Maltin fis-sena mill-Unjoni huma mwegħdin diġà, u nagħmlu kemm nagħmlu spejjeż, la nistgħu nżiduhom u lanqas innaqqsuhom.

Għalhekk nistgħu ngħidu li l-parti kbira ta’ dawn l-ispejjeż qegħdin jintefqu għalxejn, ħlief biex nidhru ma’ ta’ l-Unjoni li aħna qegħdin inlaħħqu magħha u mad-direttivi u regolamenti li toħroġ.

Anki dwar id-direttivi u r-regolamenti ta’ l-Unjoni l-poplu tagħna qiegħed jgħix gidba.

Għax madwar 75 fil-mija tad-direttivi u r-regolamenti ta’ l-Unjoni Ewropea 

* li nqallbu kollha għall-Malti għall-benefiċċju tagħna,

* huma għal kollox irrelevanti għalina u

* ma jgħoddux għalina u

* ma jiswelna xejn,

ħlief ħafna dokumenti li swew

* ħafna xogħol u

* spejjeż

* biex inqalbu għall-Malti.

Issa li wasalna biex nagħlqu erba’ snin li ilna mseħbin fl-Unjoni Ewropea, imissna nagħmlu “cost-benefit analysis” tas-sħubija ta’ pajjiżna fl-Unjoni, ħalli l-poplu jkollu stampa ċara tal-qagħda u jkun jista’ jifhem kemm mhux minnu li qablilna finanzjarjament li nidħlu fl-Unjoni.

Ma qablilniex mhux biss minħabba dan

* id-’deficit’ finanzjarju,

* iżda wkoll minħabba l-konsegwenzi ħżiena fuq ix-xogħol u l-impjiegi,

* fuq l-għoli tal-ħajja,

* fuq iż-żieda esaġerata tal-proprjetà immobbli u

* fuq it-taxxi

li ħafna minnhom l-Unjoni Ewropea ġagħlet lill-Gvern biex jagħmilhom, bħal ma hija

* t-taxxa tal-VAT,

* l-Eco Tax, u

* l-’levies’ fuq il-prodotti taż-żejt.

Barra dawn l-iżvantaġġi finanzjarji u ekonomiċi tas-sħubija fl-Unjoni, ġarrabna wkoll konsegwenzi ħżiena soċjali.

Forsi l-akbar waħda hija

* l-ħerba soċjali li qiegħed ikollna

* bl-eluf ta’ immigranti illegali

* li l-politika u

* r-regolamenti ta’ l-Unjoni

* jobbligawna li nżommuhom f’pajjiżna,

* anki kontra r-rieda tagħhom.

Anki f’din il-kwistjoni l-poplu

* mhux qegħdin jgħidulu l-verità,

* biex ma jintebaħx li l-ħsara li qiegħda ssir,

* hija tort ta’ l-Unjoni Ewropea

* li ma tħalliniex ngħinu lill-immigranti jkomplu sejrin

* lejn il-pajjiżi li jridu jmorru fihom fl-Ewropa.

Huwa għajb għall-mexxejja Maltin li qegħdin jaħbu l-fatti veri lill-poplu, ħalli dan ma jindunax kemm jaqbillu li noħorġu mill-Unjoni.

Għalhekk aħna nħossu d-dmir li ma nieqfux milli nitkellmu u niktbu l-verità dwar is-sħubija fl-Unjoni Ewropea, minkejja li jsir minn kollox ħalli ma ninstemgħux u l-kitba tagħna ma tinqarax.

L-għadd qiegħed dejjem jikber ta’ dawk li jikkritikaw l-Unjoni Ewropea għat-tmexxija korrotta tagħha, għall-politika żbaljata tagħha u għall-mezzi qarrieqa tagħha.

F’dawn l-aħħar ġimgħat, wieħed mill-iprem kittieba, Frans Sammut, kiteb hekk:

“Il-poplu issa sar jaf mill-qrib, għax qiegħed jara b’għajnejh u jmiss b’idejh, xi tfisser l-Unjoni Ewropea u l-liġijiet tagħha li tfasslu biex jintlaħqu l-ħtiġijiet ta’ pajjiżi li ftit li xejn għandhom il-ħtiġijiet, l-għanijiet u l-aspirazzjonijiet tagħna”.

F’dawn l-aħħar ħmistax, Dun Anġ Seychell kiteb hekk:

“…irridu nkunu nafu fiex qegħdin jintefqu l-miljuni li kull sena aħna l-Maltin qegħdin inkunu obbligati nagħtu lil Brussels.

Jekk aħna nistgħu nonfquhom ħażin u jmorru fi bwiet l-esplojtaturi, hekk ukoll huma fi Brussels. Nafu biżżejjed kemm korruzzjoni seħħet fi Brussels matul is-snin. Niftakru tajjeb dik id-darba meta kellhom jirriżenjaw l-irjus kbar kollha li mexxu l-Unjoni Ewropea. Nafu biżżejjed bl-istil ta’ ħajja fi Brussels li xi wħud qegħdin jgħixu minn fuq dahar iċ-ċittadini!”

Il-ġimgħa l-oħra dehret f’ġurnal bl-Ingliż lokali, kitba ta’ Joseph Lia dwar l-Unjoni Ewropea u l-Finlandja.

Huwa qal li l-Unjoni l-ewwel taċċetta t-talbiet li jsiru minn pajjiż qabel ma jissieħeb fl-Unjoni, minkejja li hija tkun taf li dawk it-talbiet ma jkunux jaqblu mar-regoli stabiliti tagħha.

Imbagħad, wara s-sħubija, meta l-pajjiż jimxi skond dak li huwa magħruf bħala l-‘common position’ tal-pajjiż u l-Unjoni, din la darba l-pajjiż ikun marbut bis-sħubija, tgħid li l-‘common postion’ mhix miftehma kif il-pajjiż jippretendi li hija. U l-Unjoni tibda tinsisti li pajjiż jagħmel dak li trid l-Unjoni.

Meta l-pajjiż ma jagħmilx dan, l-Unjoni tgħaddi biex tuża l-aħħar arma tagħha, billi tieħu l-każ quddiem il-Qorti tagħha tal-Ġustizzja. B’hekk tgħaddi ta’ l-Unjoni u din għandha il-wiċċ ssostni dan il-qerq Macchiavellian bħal ‘ġustizzja’”.

Il-kittieb ikompli juri kif il-magażin Time stqarr li l-Unjoni Ewropea teċċella bl-għadd kbir ta’ regolamenti li tagħmel, li bihom tmexxi hija l-istati membri tagħha u qalbet it-tifsira ta’ stati sovrani.

Għax fil-waqt li stat sovran ikollu s-setgħat kollha f’idejh u mhux taħt ħakma barranija, l-Unjoni la tmexxi hija l-istati membri, neżżgħethom mis-sovranità tagħhom.

Dan seħħ lil Malta, li m’għadhiex sovrana u min jaħseb il-kuntrarju, qiegħed joħlom, jinsisti Joseph Lia.

Dan il-kittieb imbagħad jitkellem dwar x’ġara fil-kwistjoni tal-kaċċa fil-gżejjer Aaland tal-Finlandja.

Il-poplu tagħhom ivvota “Iva” fir-referendum dwar is-sħubija fl-Unjoni, wara li żgurawh li se jkompli jgawdi d-dritt li kellu dwar il-kaċċa.

Wara s-sħubija, il-Qorti tal-Ġustizzja ta’ l-Unjoni qatgħet li l-kaċċa fir-rebbiegħa illegali skond ir-regoli ta’ l-Unjoni, ħlief għal eċċezzjoni żgħira.

Il-Qorti qatgħet li l-kaċċaturi fil-gżejjer Aaland jistgħu jisparaw fuq speċi waħda tat-tjur fir-rebbiegħa.

Bl-istess mod il-Qorti tista’ taqta’ fil-każ ta’ Malta, li l-kaċċaturi għandhom dritt jisparaw fuq ċerti tjur fl-istaġun tar-rebbiegħa.

Jekk tingħata sentenza bħal din, tinkixef aktar kemm l-Unjoni timxi b’qerq mal-popli li jissieħbu fiha.

Jekk is-sentenza tkun kontra, il-kaċċaturi jikkonfermaw kemm l-Unjoni Ewropea u l-propagandisti f’Malta tagħha, daħqu bihom qabel ir-referendum.

IRRIDU L'INDIPENDENZA MILL-UNJONI EWROPEA

Il-Ħamis,13 ta’ Marzu, 2008

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ