MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Għax ma naqblux ma’ l-Unjoni Ewropea

Mhux minnu li ma nistgħux noħorġu mill-Unjoni Ewropea.

Araw dan il-video tal-Parlament Ewropew kif nistgħu noħorġu

Nghiduha mill-ewwel. 

Aħna ma naqblux li pajjiżna jintegra ruħu aktar fl-Unjoni Ewropea. 

Għax nemmnu li l-politika ta’ l-Unjoni hija ħażina, it-tmexxija hija korrotta, u għax irridu li l-poplu tagħna jkun ħieles li jiddeċiedi kif jitmexxa u mhux ikun immexxi mill-Unjoni.

Għalina, aħjar ngħixu fil-ifqar pajjiż iżda ħieles, milli fl-aqwa pajjiż iżda kolonja ta’ l-Unjoni. 

Għalina, il-politika neo-liberali kapitalista ta’ l-Unjoni Ewropea hija fondamentalment anti-soċjali. 

Tkabbar id-diżugwaljanzi fis-soċjetà billi tfaqqar aktar lil min diġà għandu ftit, u tgħani aktar lil min għandu biżżejjed. 

Tiżgħel l-egoiżmu u tmewwet l-ispirtu ta’ solidarjetà. 

Mhix imnebbħa minn etika morali, iżda hija mmexxija mill-ġungla tas-suq u sprunata mill-kilba għall-profitt. 

Ir-riżultati tagħha narawhom 

* fil-qerda ta’ l-ambjent, 

* il-qgħad mifrux, 

* id-degrad ta’ l-ibliet, 

* il-ħerba morali, 

* l-għejbin tal-valuri, 

* il-konsumiżmu sfrenat u 

* ż-żgħażagħ iddrogati. 

Din hija d-dinja li l-Unjoni Ewropea tagħtina.

Ma rriduhiex għall-poplu Malti, għax nistmawh aktar.

Bħalissa għandna ma’ wiċċna żewġ problemi oħrajn kbar li qalgħathomlna s-sħubija fl-Unjoni Ewropea u d-dħul ta’ l-Ewro. 

Għandna l-akbar żewġ azjendi f’pajjiżna, il-ST Microelectronics u t-Tarzna mhedda.

Ir-rata tal-kambju ta’ l-Ewro qiegħda tħarbat il-bejgħ fis-swieq tad-dollaru Amerikan il-prodotti ta’ ST Microelectronics, li huma stmati bl-Ewro. 

Jekk il-pajjiż mhux lest jisfida r-regoli ta’ l-Unjoni Ewropea u jagħti għajnuna lil din l-azjenda, nispiċċaw nitilfuha, nitilfu 2,200 impjieg u nofs l-esportazzjoni tal-pajjiż.

L-istess diskors jgħodd għat-Tarzna. 

Jekk minħabba r-regoli ta’ l-Unjoni Ewropea dwar il-kompetizzjoni, il-pajjiż ma jagħtix l-għajnuna meħtieġa lit-Tarzna, nitilfu l-aqwa skola ta’ taħriġ fis-snajja f’pajjiżna u 1,700 impjieg. 

Pajjiżna għandu bżonn it-Tarzna ħafna aktar milli għandu bżonn l-Unjoni Ewropea.

Għall-Unjoni Ewropea t-telfien ta’ madwar 4,000 impjieg m’huma xejn. 

Għalina kull impjieg huwa importanti li nsalvawh. 

Daqshekk naħsbuha differenti minn kif tħares lejn l-impjieg tal-ħaddiema l-Unjoni Ewropea, u għalhekk ma nistgħu naqblu magħha qatt.

Għall-Unjoni Ewropea r-regoli tal-kompetizzjoni u tas-suq ħieles huma aqwa mill-impjieg tal-ħaddiema u mill-bżonn tal-pajjiż għal nies tas-sengħa. 

Hija ma tqegħidx ix-xogħol u l-impjiegi qabel il-kompetizzjoni u l-profitt, u ma tgħoddx li l-ħtiġijiet tal-pajjiż jiġu qabel is-suq ħieles.

Għax il-politika neo-liberali ta’ l-Unjoni Ewropea ma tridx tqis li huwa dmir ta’ Gvern li jiżgura xogħol għal kulħadd fil-pajjiż, bħalma għandu dmir li jipprovdi tagħlim għal kulħadd u kura mill-mard għal kulħadd. 

Bil-maqlub, aħna nemmnu li fejn l-attività ekonomika privata ma toħloqx biżżejjed xogħol għal kulħadd, l-istat huwa fid-dmir li jipprovdi huwa xogħol ħalli ħadd ma jibqa’ qiegħed.

Bl-istess mod nopponu l-politika ta’ l-Unjoni Ewropea li tintaxxa kemm tiflaħ il-prodotti taż-żejt, għax b’hekk tkompli tgħollihom aktar milli diġà għoljin ħafna fis-suq. 

Ma jimpurtahiex l-Unjoni mill-ħsara li tagħmel lill-industriji li jiddependu ħafna mill-prodotti taż-żejt fil-pajjiżi membri tagħha, meta dawn qegħdin jikkompetu ma’ produtturi bħalhom f’pajjiżi li huma barra mill-Unjoni u li ma jintaxxawx il-prodotti taż-żejt bħalma tagħmel l-Unjoni.

Il-konsegwenzi tal-politika ta’ l-Unjoni dwar il-prodotti taż-żejt huma tnejn,

* għeluq ta’ fabbriki u 

* telf ta’ mpjiegi, u 

* ħajja aktar għolja għaċ-ċittadini konsumaturi tal-prodotti li jinvolvu l-użu taż-żejt u 

* tar-rati tal-konsum ta’ l-elettriku. 

Minn dan kollu, l-Unjoni Ewropea ma jimpurtahiex.

Lanqas jidhru li jimpurtahom minn dawn il-konsegwenzi dannużi tal-politika ħażina ta’ l-Unjoni Ewropea, dawk il-politiċi li jiftaħru li jemmnu ħafna fiha tant, li lesti jissagrifikaw għalihom l-indipendenza, il-ħelsien u s-sovranità ta’ pajjiżhom u l-poplu tagħhom. 

Aħna m’hu se naqblu qatt ma’ dan.

Austin Gatt ikompli jaħbi mit-‘taxpayer’ dwar it-Tarzna?

Il-qaghda finanzjarja tal-lum tat-Tarzna se tinfluwenza lill-Unjoni Ewropea u lill-Gvern Malti fid-deċiżjonijiet li jittieħdu dwar il-ġejjieni tagħha. 

Is-CNI temmen li l-qagħda finanzjarja tal-lum tat-Tarzna hija f’parti kbira konsegwenza diretta tat-telf eċċezzjonali kkaġunat mill-kuntratt diżastruż tal-konverzjonijiet tal-Fairmount. 

Għalhekk is-CNI qiegħda tappoġġja bis-sħiħ is-sejħa nsistenti tal-ħaddiema tat-Tarzna biex bla dewmien issir inkjesta pubblika imparzjali, li fiha jieħdu sehem rappreżentanti tat-taxpayers, ħalli jsiru magħrufin il-ħafna fatti inkwetanti dwar dak il-kuntratt li s’issa nżammu moħbija mill-pubbliku Malti u mill-Unjoni Ewropea.

L-ewwel fatt li jrid jiġi stabbilit hu li l-kuntratt tal-Fairmount kien xogħol ta’ Graham Crouser, li t-Tarzna ngaġġat bħala ‘Marketing Manager’ għal tliet snin, iżda wara sitt xhur biss intbagħat ħieles minn kull responsabbiltà għal dak li kien għamel. 

Fuq dan jinqalgħu l-ewwel mistoqsijiet li l-Ministru responsabbli tat-Tarzna, Austin Gatt, m’għandux jibqa’ ma jwiġibx. 

X’esperjenza kellu Crouser biex jinnegozja kuntratt tat-tip tal-konverzjonijiet tal-Fairmount, li kien jinvolvi 

* xogħol estensiv ħafna, 

* bosta modifikazzjonijiet ta’ ‘pipework’, 

* installazzjoni ta’ faċilitajiet għall-akkomodazzjoni, 

* għadd massiv ta’ installazzjoni ta’ ‘high-tension cable’, u 

* xogħlijiet oħrajn varji? 

Il-Ministru huwa mistenni li jagħti t-tagħrif mitlub dwar l-esperjenza ta’ Crouser għal dak ix-xogħol.

Fit-tieni lok, għaliex il-kundizzjonijiet tal-kuntratt ta’ l-ingaġġ ta’ Graham Crouser qegħdin jinżammu moħbijin mit-‘taxpayers’ li fl-aħħar mill-aħħar qegħdin jagħmlu tajjeb għall-ispiża ta’ Crouser?

Fatt ieħor importanti dwar il-kuntratt tal-Fairmount huwa dak li l-General Workers’ Union sostniet, li min-negozjati tal-kuntratt tħallew barra apposta l-managers Maltin li proprjament kellhom sehem fit-tfassil tal-kundizzjonijiet tiegħu, jiġifieri, 

* il-Commercial Manager, 

* il-Project Manager, 

* il-Planning Managers u 

* l-Production Manager.

Għalkemm fil-Ġens illum ta’ l-10 ta’ Mejju l-GWU reġgħet ċaħdet kategorikament dan. 

Għalhekk fl-interess tal-pubbliku Malti u għall-benefiċċju ta’ l-Unjoni Ewropea, dan il-fatt għandu jkun investigat biex jiġi stabbilit għax minn dan il-kuntratt tħallew barra apposta l-managers Maltin li normalment ikunu mdaħħlin fil-kuntratti li tieħu t-Tarzna.

Hemm imbagħad fatt ieħor dwar dan il-kuntratt li fl-interess pubbliku u għall-benefiċċju ta’ l-Unjoni Ewropea għandu jkun magħruf u jeħtieġ tingħata spjegazzjoni għalih. 

F’dan il-kuntratt it-Tarzna ftehmet dwar ‘liquidated damages’, li jfisser li t-Tarzna aċċettat bil-quddiem li, f’każ li x-xogħol imur lura, it-Tarzna tħallas lill-klijent somma miftehma ta’ danni daqs il-qligħ li l-klijent seta’ jagħmel kieku x-xogħol sar fil-ħin u huwa ħaddem il-bastiment.

Mhux biss it-Tarzna normalment ma taċċettax ftehim dwar ‘liquidated damages’ bil-quddiem, iżda fil-każ tal-kuntratt tal-Fairmount, rabta bħal din ma kellhiex issir għax ix-xogħol kien estensiv u komplikat ħafna, u biċċa kbira minnu kien ‘protype’ li t-Tarzna ma kienet qatt qabel għamlet bħalu.

Is-CNI qiegħda tinsisti dwar dan il-fatt għax minn tagħrif li nkiseb, jidher li t-Tarzna tilfet 2,600,000 Ewro f’‘liquidated damages’ fuq il-kuntratt tal-Fairmount.

Huwa fl-interess pubbliku li l-Ministru Gatt jgħid min huwa responsabbli għal dan il-fatt inkwetanti ħafna.

F’dawn iċ-ċirkostanzi eċċezzjonali l-Ministru Gatt m’għandux ikompli jiċħad li ssir inkjesta pubblika imparzjali ħalli jiġu magħrufin il-fati kollha dwar il-kuntratt tal-Fairmount. 

Mhiex ħaġa ġusta li lill-ħaddiema tat-Tarzna jingħata t-tort għat-telf kbir li t-Tarzna ġarrbet u se ġġarrab minħabba x-xogħol tal-konverzjonijiet tal-Fairmount. 

Aktar u aktar dan mhux ġust meta l-istess ħaddiema 

* tbażwru bis-sħanat eċċessivi li fihom  kellhom jaħdmu, 

* bil-foga kbira tal-welding u ż-żebgħa, 

* bit-tqandil li kellhom tal-materjal tqil, u 

* wara li kissru moħħhom biex jaraw kif jagħmlu u jtellgħu x-xogħol

anke fejn ma kellhomx ‘drawings’ u gwidi eżatti.

Għalhekk is-CNI temmen li l-ħaddiema tat-Tarzna għandhom mitt raġun jisħqu li f’dan il-każ għandha ssir magħrufa l-verità kollha, lill-pubbliku ġenerali, permezz ta’ inkjesta pubblika imparzjali li jieħdu sehem fiha r-rappreżentanti tal-pubbliku ‘taxpayer’.

Kif jista’ min m’għandux x’jaħbi, ma jaċċettax din it-talba ġustissima? 

Il-membri Parlamentari mhumiex se jitniffsu dwar dan?

Il-Ħamis, 12 ta’ Ġunju, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ